فى ذكرى التطرف

القتلهكذلك شوه القتله ذكرى النصر والعزه والكرامه وهذا هو جزائهم الرحيم

اما ماكنهم فهو الى مذبله التاريخ

والى جانبهم تلك الدوله البشعه التى لازلات تخلد اسمائهم على جدران طرقاتها الخبيثه

مصرى اصلى

لو سالتك أنت مصرى تقولى ايه؟هاتقولى ده مصرى وابن مصرى

وابن مصر الله عليه

اكيد الكثير يجهلون هذا الرجل

وليس السبب هو ان هذا الرجل يستحق الجهل بل انه لديه من العلم الكثير والشأن الجليل

الذى لو قيس بمقياس الاحترام لدى أناس يحترمون العلم والعلماء لوقروه وأعطوه الأوسمه والنياشين

ولكننا ياساده فى بلد لاتكرم سوى لاعبى الكره والفنانين والفنانات الأحياء منهم والأموات

ولا نعطى النياشين الا لذوى البنادق والرتب

أما العلماء من أمثال الدكتور عصام حجى لا يلقون لدينا الا كل تجاهل وتحطيم

فهذا الرجل المصرى هو دكتور فى علم الفلك ويعمل حاليا فى معمل الدفع الصاروخى للمحركات فى وكاله ناسا الفضائيه

الذى يقوم بدوره بااجراءالعديد من الابحاث لاكتشاف المجموعه الشمسيه

كما كان الدكتور عصام دورا مهما فى العديد من الاكتشافات على كوكب المريخ

لدرجه انه مشهور فى الاوساط العلميه فى الخارج برجل المريخ ويعكف الان الدكتور عصام على تدريب عدد من رواد الفضاء وذلك لارسالهم الى الفضاء فى وقت لاحق والان هو موجود فى مصر لاجراء تجارب جولوجيه فى الصحراء الغربيه والمقارنه بين تركيبها الجولوجى والتركيب الجولوجى للقمر يتبع كوكب زحل

هذه نبذه مختصره عن عالم مصرى يحترمه الغرب ويرفعون له القبعه احتراما

بينما نحن هنا لم يلتفت اليه اى مسؤل فى هذه الحكومه المبلجه

ولم تكرمه جامعه القاهره الذى هو احد ابنائها وتعطيه الدكتوراه ا لفخريه

ملحوظه ( الدكتور تم فصله من جامعه القاهر لانه تغيب فى الخارج اكثر من 3 سنوات )

وفى الختام

اتمنى الا يحبط الدكتور عصام من هذ الجفاء من بلده وان يقرر فيما بعده ان يجعل من ابنه لاعب كره

او من ابنته فنانه لكى ينعموا بتكريم واهتمام رسمى لم يحصل هو عليه

دراما على الميزان

يوسف الصديق بغض النظر عن بغضى الشديد للنظام الايرانى

وعدم ارتياحى للدوله الارانيه

وبغض النظر ايضا عن فتاوى التحريم التى طالت الملسلسل بسبب تجسيد شخصيه سيدنا يوسف

ألا ان المسلسل قد نال اعجابىو اعجاب الكثير من الناس

فى اراء بتقول ان المسلسلات الايرانيه هى وسيله للمد الشيعى

وده ممكن يعتبر صحيح

بس لو حتى المسلسلات دى هى وسيله للمد الشيعى

توجب علينا بارضه اننا نرفع القبعه احتراما وتقديرا لهذا العمل

لان العمل يعتبر جيد جدا من جميع النواحى

سواء من الناحيه التاريخيه او التمثيل المقنع والديكورات الرائعه

بجد شىء مبهر والملابس والمنطقيه فى كل شىء داخل المسلسل

فعلا عمل يحترم الماشهد

وبالتالى على المشاهد ان يحترم هذا العمل

لأننا لو جينا بصينا على الأعمال التاريخيه أو الدينيه الى بنعملها فى مصر

فاانك ياعزيزى المشاهد سوف تنتابك حاله من الغثيان رغبه شديده فى القىء نظرا لما سوف تجده من

استعباط واستهبال واستخفاف بعقول المشاهد

يعنى هاتلاقى الممثل فى مسلسل تاريخى لابس ساعه

ووالاحداث التاريخيه كلها غلطات

ولو انتبهنا للديكورات هايجى لك اكتئاب زى الى جالك فى مسلسل كيلوبترا وعمرو ابن العاص

ونصيحه منى بلاش حد يتفرج على معركه اأكتيوم البحريه فى مسلسل كيلوبترا

حرصا على عدم ارتفاع ضغطكم

يعنى لو جينا عملنا مقارنه كده بينا اعمالنا التاريخيه او الدينيه وبين اعمال ايران التاريخيه والدينيه

هاتحس انك بتقارن بين عربيه 28 وعربيه هامر

وازا كمان أضافنا الأعمال التاريخيه والدنيه السوريه

فا طبعا لا تعليق

وكلنا نتذكر لما عملنا مسلسل بيبرس

وسوريا هى كمان عملته واتعرض فى نفس التوقيت

كانت حاجه تكسف وتفضح وتعر

الكلام الطويل ده كله ليه؟

أقول لكم

علشان انا نفسى احنا كمان يكون عندنا هدف زى ايران ماهى عندها هدف

ونجند كل طاقتنا لتحقيقه

حاجه كلنا نلتف حوليها ويكون لينا حلم ونحققه

بس يكون حلم محترم مايكونش مثلا وصول المنتخب لكاس العالم

عاوزين هدف قومى زى ماايران عندهم هدف وبيحاولوا يحققوه بكل الوسائل وبكل الامكانيات حتى لو كان مسلسل

ليه احنا مانحولش نعمل زيهم ؟

احنا كمان من حقنا يكون لينا هدف ونحققه علشان نبقى كبار بجد

فى المقدمه بصحيح مش بالفبركه وشغل التزيف

مش كده ولا ايه؟

اسألوا وزير الماليه عن الضرايب

عشنا وشفنا ال ايه الدنيا قايمه فى أمريكا ومش عاوزه تقعد

ليه بقى؟

بيقولك ال الست ميشيل أوباما راحت ابصر فين فى أسبانيا رحله استجمام

وال ايه الرحله دى هاتكلف 400ألف دولار ها يتحملها المواطن الأمريكى دافع الضرايب

ال الدنيا قايمه ومش عاوزه تقعد فى أمريكا علشان 400 الف دولار

والنبى هما لو كانوا ميلوا على اى دوله صديكه من اصدكائهم فى الشرك الاوسط

كانوا دفعوا لهم

وعليهم 400 الف بوسه

ال فلوس دافعى الضرايب ال

طب وفين فلوس دافعى الضرايب عندنا ما احنا الحاجه أم قرش بندفع عليها 5 قروش ضرايب ودمغات

ومانعرفش بتروح فين

وما بنفتحش الماوس بتاعنا مش علشان احنا اغنى من دافعى الضرائب فى أمريكا

لا خالص

علشان احنا لو فتحنا الماوس واتكلمنا التانج هايتقطع

انما هما يفتحوه يقفلوه

سورىو يتفوا على اوباما ومراته الى بتتمرغ فى خيرهم وشقاهم

ومش علشان هما بيتعبوا فى شغلهم والى عندنا لا

دا بالعكس ازا كانوا هما بيتعبوا على ما يجيبوا الدولارالى عندنا بيتمرمطوا ويطلع عين أبوهم علشان يجيبوا القرش

بس هى الفرق انهم ناس ما تعودوش يتضربوا على قفاهم

انما احنا لو متضربناش على قفانا قفانا يوجعنا

يبقى اذن ومن موقعنا هذا

نناشد الصحافه والشعب الامريكى

انهم يتلموا شويه ويخلوا عندهم دم

ويبصوا كده على مصير فلوس ضرايب غيرهم

علشان يعرفوا نهم فى نعمه والى يتبطر عليها يعمى

مصر كبيره عليك

من عند مصرنا طنطاوى

نودى نجحت

نودى نجحت

ماحبتش أجى غير لما أجيب لكم خبر كويس

أنا الحمد لله نجحت فى التيرم التاني

وبتقدير عام جيد جدا

الحمد لله عدت سنه فى الدبلومه وفاضل سنه

وندخل بعد كده على الماجيستير شكرا جدا لاى حد دعا لبابا ان شاء الله ربنا يتقبل منكم

وانا مالقتش احسن من انى ازاكر وما تاثرش باى حاجه وانحج وبتفوق لان ده شىء كان بيبسطه

مش هانسى ان اخر خبر حلو سمعه قبل الوفاه هو نجاحى فى التيرم الاول وطلب منى انى احافظ على التقدير فى التيرم التانى

وأنا وفيت بوعدى معاه

ورغم انى كانت خايفه ومرعوبه اقل عن التيرم الاول

رفعت شعار ياجبل مايهزك ريح

والحمد لله

وشكر لكل الى وقفوا جمبى

ودعواتكم اكمل امتحانات icdl

على خير وربنا يوفقنى فى كورسات الانجليز ى

وانتظروني قريبا وها نرجع ونقول الوووووووووووووووو

أسألكم الدعاء لبابا

بابا توفى يوم الخميس امبارح

أسألكم الدعاء ليه

عسى يتقبل الله منكم

نودى نجحت

انا نجحت

واخيرا وبعد طول انتظار النتيجه بانت

الحمد لله نجحت وجبت جيد جدا

بالغيظه فى ناس هما عارفين نفسهم طبعا

عقبال التيرم التانى

رساله من أنثى

الى الدكتور يحيى الدكتور يحيى الأحمدى دكتور علم النفس التربوى غنى أكيد عن التعريف

وهو يعتبر من أهم نجوم البرامج على الشاشات الفضائيه

يأتى دائما لمناقشه القضايا الساخنه التى تخص الرجل والمرأه

وأنا من ضمن المتابعين الجيدين للدكتور يحيى

وكان ليه تعليق على الكتير من أرائه على الشاشه ومن أهمها

1 عمل المرأه

الدكتور يحيى يرى ان المرأه لايصح لها ان تعمل سوى فى منزلهالأن هذه المهنه الوحيده التى خلقت من أجلها

ويجب على المرأه أن يكون كل طموحها هو كيف تنحج فى مهمتها كا أم وزوجه

وحتى ان تركها زوجها وكان العائل الرئيسى لها

فلا بجوز لها أيضا ان تعمل لأن هناك الاب والخال والعام لكى يكفلوها

وفى أحد المرات قال مثال

ان فى زوج لسه شاب قاله انه بيبقبض 5000جنيه فى الشهر ومش مخلى مراته محتاجه اى حاجه

ومع ذلك مصممه انها تشتغل وكمان مرتبها لايزيد عن 500 جنيه فى الشهر

طب بالذمه انهى واحد لسه فى بدايه حياته بيكون مرتبه 5000؟

طبعا مش احنا او مش الى زينا

اكيد خرجين الكليات الاجنبيه والى ما بيقعدوش سنين يدوروا على اى فرصه سشغل

بملاليم الفلوس

والمثال الى ضربه الدكتور يحيى أكتر مثال انه عايش فى برج عاجى

لانه زى ماقلت كام شاب فى مصر مرتبه 5000

وكام عم وخال فى مصر عندهم استعداد يتحملوا واحده وعيالها بعد ما ابوهم يتخلى عنهم ؟

وانهى واحده عندها استعداد تمد ايدها لاهلها علشان تربى عيالها؟

وكام واحده تقدر تكون ست ناجحه وكذلك دكتوره وطبيبه ومحاميه ومدرسه شاطره؟

ولو استغنيانا عن عمل كل النساء الى الدكتور شايف انه اهم سبب للانحراف والادمان ها نجيب منين مدر سات رياض اطفال

وابتدائى وممرضات وطبيبات فى تخصصات معينه وغيره وغير فى مهن ماينفعش فيها غير ستات؟

وكام راجل فى مصر فعلا الواحده ممكن تخلى عن كل أحلامها وطموحتها علشانه؟

راح فين صوتى

سرقوا صوتى اه صوتى اتسرق

هاقولكم الحكايه

من اسبوعين روحت اطلع بطاقه انتخابيه لاول مره

طبعا انا ادرى الناس ازا كنت طلعتها قبل كده ولا لاء

روحت اطلعها من قسم تانى المنصوره

وبصراحه الناس كانوا متعاونين وزوق جدا

بس المشكله انى لقيت بطاقتى طالعه قبل كده

من سنه 2004

والمصيبه بقى ان انا مطلعه الرقم القومى 2006

طب ازاى هاروح اطلع البطاقه الانتخابيه 2004 وانا لامعايا بطاقه وشهاده ميلادى فى الكليه

يعنى ممعيش اى حاجه خالص؟

السؤال بقى

مين الى طلعها؟

وازاى طلعها ؟

وليه؟

نودى خدت الاجازه

واخيرا خلصت

واخيرا خلصت امتحانات

هم وانزاح

المشكله مش فى الامتحانات نفسها

بس فى الظروف الى كانت مصحباها

اولا انا تعبت تعب شديد جدا

وكل مااجى اخف يحصل انتكاسه

وكنت بين مطرقه التعب وسندان الامتحانات الى قربت ومش عارفه هاقدر ازاكرامتى

وجيت بعد كده بقيت امتحن يوم ويوم

بس الحمد لله كله عدا على خير

وخلصت

بس بصراحه فى ناس كتير اوى انا زعلت منهم

وهما عارفين نفسهم

بس كلكم والله وحشتونى

وهاجى ازوركم كلكم قريب

وهانرغى مع بعض تانى

سلاموووووووووووووووووووووز

حين غزتنا تركيا

تركيا

علاقتى بتركيا ابتدت زى غيرى مع بمتابعتى للمسلسلات التركيه

وزى ماقلتلكم قبل كده فى بوست سابقى ليه الناس وخصوصا الجنس الناعم أصبحوا شغوفين بالمسلسلات التركيه

هنا
http://bentelmansoura.blogspot.com/2009/05/blog-post.html

والكل افتكر ان الغزو التركى ها يوقف لحد المسلسلات وثوره الحريم العربيه على رجالتها

بس لا والف لا

قالها وفعلها أحفاد اتاتورك

فاكرين لما كان الحديد فى مصر بيتباع بسبع وتمن الاف جنيه بسبب السياسه الاحتكاريه والبلطجه بتاعه النخله الدكر (سورى يامدام شهيناز)

وزير الصناعه المحترم فتح وقتها الاستيراد وجاب الحديد من تركيه سعر الطن وقتها كان 3000

وفضل ينزل لحد مابقى 2900ومن عليه نزل سعر طن الحديد المصرى لنفس السعر او اغلى 100 جنيه

طبعا سبحان الله انه طن الحديد هناك يبقى ب3000والنخله بتديه للغلابه بضرب النار ب8000

وأصبحنا كلنا مديونين للحديد التركى الى رحمنا من الجشع والطمع الى عند الاخوه البعده

ومضت الأيام بسلام وأنا وغيرى نتابع الدراما التركيه

وازا فجأه أتجول فى محلات بيع الأجهزه الكهربائيه

وقد كانت المفاجئه

تركيا عملتها

المحلات تعج بالمنتجات التركيه

منين ماتروح تسمع كلمه تركى

تيفال و حلل استالس برادات معالق وشوك وسكاكين و مفارش

وكل ده تركى

كل مايخطر على البال فى المحلات تركى

انواع وماركات وخامات ودرجات كتيرررررررررررر

تنافس المنتجات المصرى وتتفوق عليها من حيث السعر وكمان الجوده

ايه الى حصل؟

مش تركيا دى الى من سنه 1923لما اتاتورك اعلن قيامها ؟

مش دول لحد سنه 200 عندهم مشاكل اقتصاديه مايعلم بيها الا ربنا وتضخم وبلاوى

ازا فجأه اصبحت صادرتهم تغزو الاسواق الاوربيه والعربيه وبالكميات والجوده دى؟

وبلغ الناتج القومي بالنسبة للفرد 4172 دولار أمريكي في 2004، كما بلغت القوة الشرائية موزعة على الفرد 7400 دولار أمريكي.

لما دى بلد ناميه ؟

مصر تبقى بلد ايه؟

وفى النهايه اسيبكوا مع الفيديو ده من مسلسل عاصى الى انا متباعها الايام دى

علشان تعرفوا مدى التقدم الى وصلوا له الأتراك

وف

ولسه بيتكلموا عن العنوسه

الجواز مش هايغلا لأنه غلا خلاص

ازيكم يارفاق (حلوه رفاق يجعل كلامنا خفيف على أوباما)أنا النهارده حبيت أكلمكم فى موضوع حلو كتير

الا وهو موضوع الجواز والمغالاه فى الجواز والى اتسببت فى العنوسه

أنا من زمان بقول أن البلد بتاعه بابا بيغالوا قوى ومفترين فى كل تفاصيل الجواز

يعنى مثلا عندنا فى البلد

فى يوم الشبكه

يودى شنطتين سفر مليانين هدوم للعروسه

داغير الفاكهه والذى منه وطبعا ده غير حق الشبكه

وطول فتره الخطوبه المواسم دى لازم تروح لعروسه تالت ومتلت واحد من البندر يقول يعنى ايه المواسم

اقولكم المواسم دى الى هى سبعه وعشرين رجب ونص شعبان واول رمضان والعيد الصغير والعيدالكبير ومولد النبى وعاشوره وشم النسيم

شفتوا شم النسم بقى عندهم موسم

وغير كده اما الفرح يجى لازم العريس يودى عشا العروسه

الى هما دقيق الكحك والبسكوت وكل اللاوزم بتاعتهم ومايقلش عن 100 كيلو دقيق

ده طبعا غير الفرح واى مصاريف تانيه

وده بعيد عن العفش الى لازم يكون مش أقل من أى حد قبله

ده بالنسبه للعريس

نيجى للعروسه

العروسه فى فتره الخطوبه مابتكونش مطالبه بأى التزامات غير مصاريف حفله الشبكه يعنى الاكل والفستان والزفه وكده

نيجى بقى للجهاز

حدث ولا حرج أنا شخصيا لوكان حد حكى لى ما كنتش هاصدق بس انا شفت بعنيه لو أقول لكم جهاز يكفى 3 عرايس ممكن تقولوا انى ببالغ

بس هى دى الحقيقه

العروسه عندنا مابتجبش اقل من 15 طقم سرير للسرير الكبير و15 زيهم لجوز السراير الصغيرين

واعداد مهوله من الفوط

وحاجه المطبخ بقى تكفى لتجهيز مطعم من اطقم الحلل الكتير لحد كوبيات الشاى وده طبعا غير النيش

ووتسمع بقى عندن اعن الى استلف وكتب على نفسه شيكات علشان يجهز بنته

ولا الارمله الى باعت القراطين الى حيلتها عشان تجهز بنتها وماتخليهاش اقل من حد وحكاوى لها العجب

وياريت المأساه بتنتهى لحد هنا وبس

لا الى راح للعروسه بط بط فى الخطوبه بيطلع على ابوها وز وز من بعد الفرح

من اول الصباحيه

لحد بقى المةاسم الى بيفضل يوددوها لها طول ما البنت دى عايشه

انشالله تبقى عندها 100 سنه

هو كده

أنا كنت فاكره أن ده فى البلد وبس

لكن لما اتفتحت السيره مع زمايلى فى الجامعه والى هما بارضه الى اصل أباهاتهم من بلادأرياف وعايشين فى المدينهزينالى فعلا عايشين فى بلاد ارياف

ولقيت اننا رحمه عن ناس كتير

يعنى مثلاواحده قالت لى دااحنا عندنا فى بلدنا العروسه لازم تودى تانى يوم الشبكه رد الشبكه وده عباره عن عربيه ربع نقل حاجات

أرز ودقيق ومكرونه طيور

والعريس يودى لها بعدها رد رد الشبكه

ودى لازم هديه دهب

وطبعا عندنا لازم فى الجهاز من كل حاجه اتنين وتلاته من اول الاجهزه الكهربائيه لحد المقشات

وغيرها قالت ان الشبكه عنده على ابو العروسه وما بيقلش تمنها عن 15 الف

والى قالت ان العروسه هى الى لازم تودى عربيه مليانه بارضه حاجات لاهل العريس قبل الخطوبه

والى قالت ان عندهم لازم فى الجهاز ام العريس يروح لها أوضه كامله سرير بمرتبته ودولاب وسجاد بس دى كانت من دمياط

وساعتها اتاكدت ان مش المنصوره بس الى كده الظاهر ده وباء وانتشر فى الدلتا كلها

بس الى انا مستغربه له بقى ان ليه الناس بتعمل فى نفسها كده

غير ان ده حرام ومخالف للشرع

ليه الناس تخنق نفسها وتستلف وتدين علشان بتبص لبعضها ؟

للدرجه مابقاش فينا عقل ولا بنحسن التصرف؟

وسايبين نفسنا لابداعات الناس المتخلفه الى عايشه فى غيبوبه؟

والمشكله ان مش فى الرف بس المغالاه دى

وفى المدينه كمان مغالاه

عارفين المشكله الى بحد ان فى الريف ده مش مشكله اوى لان هناك العريس يبقبى بنسبه تسعه وتسعين فى الميه عنده شقه ابوه بيكون بنيها لهوغير كده نسبه العنوسه شبه معدومه

انما فى المدينه ده مش موجود الحياه اغلى واصعب ونادر لما يكون واحد عنده شقه وبيطر انه ياجر وده لوحده مشكله

والعروسه ابوها بيبقى يادوب قدر يعلمها ولا يربيها ويلاقى نفسه بين نارين انه عاوز يفرح ببنته ومايخليهاش أقل من حد

وان هو يكسر بخاطرها

وهنا مافيش أبلغ من كلم الله عز وجل(وما ظلمناهم ولكن كانوأنفسهم يظلمون)

وراكم والزمن طويل

راحت الفرحه

اعتدنا أن نذهب لصلاه العيد مع جدتى كل عيد فى استاد المنصوره الرياضى
صلينا الفجر واستعددنا للذهاب
لم يكن الذهاب لاستاد المنصوره حادث سرور على قلب اى زملكاوى
فكلمها ذكر اسم استاد المنصوره تذكرنا نحن الفئه المغلوبه على أمرها
هزيمتنا الفاضحه من فريق بنى عبيد فريق الدرجه الثالثه الذى أطاح بنا من بطوله الكأس العام الماضى
لكنى تشجعت وذهبت
وأنا أرجو من الله ا يمنحنى السعاده من وجوه المسلمين المستقبلين للعيد
وقد كان وخطت قدمى أرض النادى وقد بدأت ذكريات الهزيمه المؤلمه تعتصر قلبى وفجأه
رأيت زحام فظع على أحد جوانب البوابه
سرعان ما عملت ماسبب الزحام وتكالب الناس بهذا المشهد الغير حضارى
انه الحزب الوطنى يوزع حلوى على المصلين
ضحت ضحكه بها مراره وتذكرت المثل الشعبى الشهير (من دقنه وفتلو)
ثم توجهت الى الملعب حيث مكان الصلاه
حيث كانت هذه اللافته على احد المداخل للملعب

أستعذت بالله من الشيطان الرجيم وقلت لنفسى (معلش عيد لازم نستحمل بعضنا)
ثم بدانا بالتكبير وقبل الصلاه نظرت الى امامى وجدت تلك الصوره المباركه

أيقنت لحظتها انه لا مفر
ومنين هانروح هانلاقيهم معانا
صليت وروحت

واستعوضت ربنا فى العيد

اضحك كركر مع عزو

لما الشجره بتستظرف

عندما سألت الاعلاميه رولا خرسا السيده شهيناز حرم ابن أم عز عن كثره الانتقادات الموجهه للسيد الفافى احمد عز

ردت عليها المدام وقالت لها لأن الشجره المثمثره هى الى دايما الناس تحدفها بالطوب

من الاجابه دى علينا نستشف نحن الشعب المصرى الحقود

ان احمد عز ده شجره لاء وكمان مثمره

أنا مش جايه انؤ على ثروته الى مش عارفه هو هايعمل بيها ايه أصلا

لان انا من واقع فلسفتى المتواضعه شايفه ان الفلوس ماهى الا وسيله لتحقيق الرفاهيه والمتعه لصاحبها

وللاسف مابقاش فيه رفاهييه تقدر على استنزاف هذا الكم الهائل من المليارات الى ربنا وحده اعلم هى اتلمت ازاى

والناس الجعانه ليها فيها قد ايه

ده مش موضوعنا خالص على فكره

موضوعنا بقى ايه

التصريحات الى كل شويه تطلع لنا بيها الشجره

مش عارفه هو حاطط ليه الطبقه المتوسطه فى دماغه؟

يمكن يكون احساس بالذنب؟

ضميره بيأنبه؟

على الى هو والى معاه عملوه فى الطبقه دى ؟ مش عارفه

المهم ياجماعه

مره يقول ان الطبقه المتوسطه ارتفع مستواهاوبقت دلوقت بتعلم عيالها فى جامعات خاصه وبتطلعهم يكملوا دراستهم فى الخارج

ودلوقت بيكلموه عن مشكله القمامه والاوبئه الى ممكن تنشرها لو الحكومه ماشفتش حل

رد علهم وقالهم زياده الزباله تدل على ارتفاع مستوى معيشه الطبقه المتوسطه وازدياد الانفاق

اه وربنا انا ما بهزرش ومش عاوزه حد يفتح لى بؤه

هو قال كده

هو اكيد الطبقه المتوسطه الى يقصدها دى مش الطبقه المتوسطه بتاعتنا الى هما الموظفين زى

بتوع الضرايب العقاريه الى اتشردوا علشان حقوقهم وماخدوهاش اكيد مش المعلمين الى اتمرمطوا فى امتحانات الكادر وفى الاخراكتر واحد بقى مرتبه700جنيه وهو عنده 3 عيال على الاقل اتنين منهم فى الجامعه

اكيد هو يقصد حد تانى

ممكن يكون صغار رجال الاعمال الى ربنا مافتحش عليهم وادهم مواهب عزو

هما دول الطبقه المتوسطه عند عز

انما الطبقه المتوسطه بتاعتنا دى الى بتحتضر

هما دول عنده ماانتم الاعبيد احسناتنا

وبكده يؤسفنى انى اقول للست شهيناز ده كده مايبقاش شجره مثمره

لا دى نخله وكمان دكر

فين حقنا؟

الوجه القبيح للغرب الغرب يمثل يمثل لنا هاله الانبهار الاعظم والاوحد

ننظر اليه بكل انبهار واحترام

ولكن يختلف نابع الانبهار والاحترام من شخص لاخر

فهناك من ينبهر بالغرب لتحرره واتفتحه العقلى وابتعادهم عن كل قديم وبالى

وهناك من ينبهر بالغرب نظرا لتقدمه العلمى والتكنولوجى

وهناك من ينبهر بهم نظرا لقوتهم وتماسك دولهم

وتعددت الاسباب والانبهار واحد

ولكننا تفاجئنا بحاذث مروع

شهدته احد الساحات القضائيه الاروبيه الا وهى ساحه القضاء الالمانيه

حادث بشع راحت ضحيه مواطنه مصريه تعيش باالمانيا امام اعين صغيرها

واصيب زوجها بجراح خطيره

هذا الحدث وان كشف عن شى فسوف يكشف عن التعصب الاعمى الذىانتشر بين

بعض الاوربيين

ولكننا انتظرنا حكم القضاء الالمانى

فجاء الحكم بالسجن مدى الحياه على هذا المجرم

ولكن السؤال هل هذا الحكم عادلا ؟

أمن قتل انسانه بريئه امام طفلها واصاب زوجها هو الاخر يكون جزائه السجن مدى حياته

ياكل ويشرب ويمرح داخل السجن

باقى عمرى

هل هذا هو ما يرضى؟

هل هذا ما يودون تطبيقه فى مصر هى ايضا الا وهى الغاء حكومه الاعدام والاكتفاء بالسجن مدى الحياه؟

امن يقتل او يتاجر فى المخدرات أو يغتصب أو يقوم بالارهاب

يكون جزائه العيش داخل االسجن؟

أى قانون هذا وأى عداله تلك؟

لماذا لا يكون جزاء القتل هو القتل؟

لما يعيش القاتل بعدما سلب المقتول حياته؟

هل هذه هى حقوق الانسان؟

أليس المقتول انسان وله ايضا حق علينا ؟

وهل يجب علينا ايضا الانيهار بتلك القوانين الغربيه الظالمه

وبعد مانتكلم

انه الاحباط

البش مهندس أحمد أبو العلا عامل بوست حلو بيقول اتكلم

بيقول الناس بطلت تتكلم ليه على مدونتها

أنا بقى هاقولكم أنا واحده من الناس بطلت أتكلم كتير ليه

أصل الواحد هايتكلم عن ايه ولا ايه

كل الكلام يوجع القلب ويرفع الضغط ويجيب جلطه

خدوا مثلا عندكم أول حاجه

الحكومه المحترمه العظيمه بتاعتنا خلاص مابقتش عارفه تتشطر على الزباله الى ملت الشوارع ولا على الفوضى ولا الفساد قالت اتشطر على ايه

مافيش غير النقاب

ولقينا شيخ الأزهر بدل ما ياخد باله من أعظم قلعه اسلاميه فى العلام والى بتنهار علميا واخلاقيا

بقى شغله الشاغل انه يمنع النقاب فى المعاهد والجامعات الازهريه وبمنتهى التصلت

ويليه وزير التعليم العالى هو كمان بدل ما يشوف حال التلامذه الى بيتخرجوا وهما حمير مع مرتبه الشرف نظرا لانعدام جوده التعليم

وحال الدكاتره الى لايسر عدو ولا حبيب هو كمان بيمنع النقاب

وكمان بالمره وزير التربيه والتعليم الى نص المدارس الى عنده ماتصلحش تكون غير ورش لحام

هو كمان بيمنع النقاب

يسلاااااااااااام

هو ده الى ربنا قدركم عليه

طب بدل ماتتجنوا على حريات الأخرين شوفوا حل للموضوع

يعنى المدن الجامعيه يتمنع فيها لبس النقاب اه بس يكون كل الموظفين ستات مافيش رجاله

تتأكدوا من هويه المنتقبه وهى داخله الجامعه ماشى بس ليه ماتكنش ست هى الى تتولى الموضوع ده ومش شرط الجامعه يبقى فى كل المصالح الحكوميه كمان ويبقى حلينا الموضوع من غير هيافه الناس تضحك علينا بسببها

نيجى لموضوع غيره
شوبير ومترضى
اتنين ما يفرقوش عن بعض يعنى تقدر تقول وجهين لعمله واحده
الاولانى عضو مجلس شعب والتانى مستشار وعضو مجلس شعب سابق
والاتنين تييييييت من بعض(الى عاوز يحط كلمه يحطها انا سيباها مفتوحه)
ماكفاهمش تخريبهم هما وأمثالهم فى نعش الرياضه فى مصر وتسيثها
لا كمان بدأويطلعوا قذارتهم على الناس
كل واحد زى شوبير يتفضح يروح يلم له شويه ناس مرتزقه هتفوا باسمه
كلنا عارفين من هما الناس الى ممكن يسيبوا مشاغلهموالى وراهم ويروحوا يهتفوا لواحد زى شوبير
ثقافه الشحاته والتنطع الى شوبير ومرتضى وأمثالهم نشروها بين الناس
وغير كده يطلع علينا الكابتن القدوه فى القناه الملاكى بتاعته يدافه عن نفسه ليس بأدله نفى
ولكن بكلا شعارات كلنا حفظينه
دول قدوه دول؟
ده اعلام محترم ده؟
دى بلد دى؟

غيره

ينفه يعنى بلد المفروض محترمه زينا
يكون همها وحلمها القومى هو وصول المنتخب لكاس العالم
هو ده حلم مصر ؟
هو ده همنا الأوحد ؟
طب مش عيب وحرام وربنا هايحاسبنا
انا مش عارفه ربنا هايعمل فينا ايه اكتر من كده

الختامه
هدى عبد المنعم خدت براءه
الست أصلها سددت الفلوس الى سرقتها وهربت
جت سددتهم بعد عشرين سنه
بعدما هربت بيهم باره وشغلتهم وكسبت
جت رمت لنا ملاليم ولا ليهم اى قيمه حاليا
وخدت براءه
هو ده العدل وهو ده الحق
وهى دى مصر ياعبله

أشهد يازمان

خليكو فاكرين

فاكرين مجزره غزه؟

فاكرين الخراب والدمار

والارواح الى ماتت

والاطفال الى اتيتموا وشافوا أهاليهم مقتولين قدام عنيهم

والناس الى انكتب عليهم يعيشوا متشوهين طول حياتهم

وطبعا بما انكم اكيد لسه فاكرين

فابالمره خليكو فاكرين ان مجلس حقوق الانسان فى جنيف

اعد تقرير بينص على مذابح ومجزار اسرائيل فى حق شعب الفلسطينى

أثناء الحرب على غزه

وكان خلاص هايتصوت عليه وهايتصعد لمجلس الأمن

طبعا مش مفجأه ان يتأجل التصويت لشهر مارس الجاى

ومش مفجاه ان امريكا تكون السبب وتطلب التأجيل

لكن المفجأه ان السلطه الفلسطنيه كمان هى الى تطلب التأجيل

طب أمريكا وعارفين ان اسرائيل دى الأبنه الغير الشرعيه ليها

طب والسلطه الفلسطنيه؟

تكونش اسرائيل ظبطها مره فى وضع مخل بالشرف وصورتها وبتهددها انها تفضحها عبر اليوتب؟

معقول فى مصلحه فى الدنيا أهم من دم الناس الى راحوا من غير أى ذنب

فى أى مقابل قدام خوف أم وولادها والقنابل عماله تنزل فوق دماغهم ومستنين الموت يجى لهم

فى حاجه تساوى دمعه أب وهو بيكفن ابنه وبيحطه بايده فى التراب

حسبى الله ونعم الوكيل

زنب كل دول فى رقبه حماس المغروره المتعجرفه وفتح العميله

منكم لله

ربنا يهدينا أجمعين

ازيكم يا رفقاء التدوين؟

عاملين ايه؟

لسه صايمين وبتصلوا التراويح ولا بقيتوا بتكسلوا انتم كمان؟

أنا هاقولكم

أصل فجأه النهارده لقيت فى الصلاه يادوب صفين وربع

انزهلت طبعا دول كانوا بيبقوا مش اقل من 7 سطرو

قلت يمكن ظروفوأعذار شرعيه

أبص لكم على الرجاله

الاقيهم صفين بعد ماكنوا بيملو المسجد وبكده الحريم تكسب

قلت يارتنى ما بصيت ماهو مش معقول ظروف وأعذار هما كمان

ايه الى هصل يااخوانا

هو المفتى طلع وقال رمضان خلص والعيد جه؟

حاجه تزعل

الناس بقت بتكسل

مش قادرين يكملوا الشهر

ربنا يلظف بينا

نيجى بقى للمهم

احنا خلاص بقينا فى العشر الأواخر

ودول بقى فيهم العتق من النار

ربنا يعتق رقابنا كلنا ان شاء الله

هانعمل ايه علشان نقرب لربنا فى الايام دى؟

هانعمل ايه علشان نكون من عتقاء الكريم فى العشره دول؟

أنا مش هاقولكم صلوا واستغفروا اصل انتم عارفين دى النار

والى مش مصدق يحط ايده فى الفرن

ولا فى الميكرويف حتى

احنا ناس كبار

الكلام ده كان بيتقال لنا لما كنا صغيرين لما كنا بنبلطج ومانصليش

دلوقت عاوزين كلام يدخل دماغنا ونقتنع بيه ونحسه

لازم نواظب على التراويح

ونختص الليل بالعباده

مش كل اللسل

ممكن التلت الاخير

قبل الفجر بساعه ونص مثلا او ساعتين

نقراء ورد قراءن ونصلى تهجد

ونتصحر ونصلى الفجر

والى يقدر يفضل للشروق يسبح ويستغفر ويصلى الشروق يكون جميل جدا

وخصوصا فى الليالى الفرادىنتحرى ليله القدر ياجماعه فى الليالى دى

ربنا يجعلنا من الفائزين بيها أجمعين

ونكون من الفرنحين بالعيد صدقونى

لما نتعب علشان نقرب من ربنا ونتفانى انه يغفر لنا

هانحس بالعيد وفرحته

واننا من الفائزين وليس الخسرانين

ربنا يعينا على طاعته والتقرب اليه

وأشوفكم على العيد

زى النهارده

فى مثل هذا اليوم

فى مثل هذا اليوم الموافق1\9

حدث اهم حدثين وان كانوا حدثو على فترات متتابعه

الحدثين هما

على الترتيب

الاول

ميلادى

النهارده عيد ميلادى

اما الثانى

هو ميلاد نودى النهارده نودى عندهاسنتين

يعنى بقالى سنتين بدون وكابسه

على مراوحكم

اتبسطت كتير وانا معاكم

وبحبكم كتير

ومش بزعل من اى حد بختلف معاه او بيختلف معايا لانكم ناس محترمه بجد

وانا بعزكم قوى

ويارب تكونوا بتحبونى

ومااكونش ضيفه تقيله

وادينى جايبه لكم تورت كتير اهوه علشان ماحدش يكون فى نفسه حاجه