الخميس، 14 فبراير 2008

happyValentine's Day

بما ان ما فيش حد قالها لى

قلت اقولها لكم انا ولانى طبعا مش زعلانه ولا متغاظه ان ما فيش حد

عبرنى حتى بكلمه

بقولكم عااااادى يعنى عاااااااادى

ايه يعنى لما كل صحباتىاتقالهم هابى فالنتين داى

وفيه الى جالهم هدايا لاء وكمان البت اسماء النهارده الخيس بتخرج هى وخطبها يعنى يوم مفترج من كله

يمكن شيماء بس هى الى محدش ها يعبرها علشان جوزهامن انصار قال الله ةقال الرسول

بس الباقين اتقالهم

اوعى حد يصور له عقله انى مخنوقه ولا هاطق من جنابى ولا اى حاجه

ادينى عماله اسمع ام كلثوم فات المعاد وبقينا بعاد

ادى اخره التناكه على خلق الله

الناس تسمع بحب الحب الى جمعنا

وانا اسمع بينى وبينك هجر وغدر وجرح فى قلبى داريته

يالا
تفيد بئيه يا ندم

الثلاثاء، 12 فبراير 2008

مبروك على الحكومه

مش ها قول بقى الكلام الحلو بتاع مبروك على مصر مبروك على الشعب

ده كلااااااااااااااام فارغ

انما الكلام الموزون انه مبروك على الحكومه النظيفه الشريفه الرشيدهالى طبعا

مبروكه

الناس خرجت ناسيه كل شىء ناسيه ازازه الزيت الى بقت بتسعه جنيه ناسيه قضيه العباره الى لسه لغايه دلوقت بتنظر فى قضيه جنح

طب شوفتوا والنبى المسخره بقى ابراهيم عيسى يتحاكم فى الجنايات وامن الدوله وممدوح اسماعيل يتحاكم فى محكمه الجنح

ماعلينا نرجع لموضوعنا

الناس نست كل البلاوى الى فى حياتها وخرجت فى الشارع تحتفل بالنصر فى الشوارع واتقفلت الشوارع

وطبعا مش مهم المرور ولا حتى عربيه اسعاف ولا حتى مطافى كله يهون لجل خاطر المعلم ورجالته

والغريبه يا جدع ان الحكومه والامن المركزى سابوا الناس تزحم الشوارع وتوقف المرور براحتها

انما لو مظاهره

خد عندك ضرب وتكسير وامن مركزى بيلطشوا فى الكل

لله فى خلقه شئون

لا والحج عرف يلعبها صح

اه امال ايه

بيتابع الماتشات وبعد كل ماتش يتصل بيهم فى غانا

ماهو مش دافع حق المكالمه

الاهو الحج اشتراك ولا وصله

ولومؤخذه يعنى الا هو تلفزيون الحج ما بيجبش غير الماتشات بس يعنى ما بيجبش مظاهرات ولا محاكمات ولا اى حاجه تانيه

يالا هو يعنى ها يقطع نفسه

نرجع تانى لموضوعنا مش عارفه انا برغى كتير ليه يمكن من الفاقعه الى انا فيها

احتمال

الناس مانامتش وفضلت طول الليل فى الشارع برغم انى كنت فرحانهبسبب الفوز الا ان حزن الدنيا كله حسيت بيه لما شفت منظر الناس

افتكرت حاجات كتير اوى

افتكرت يوم استفتاء تعديل الدستور افتكرت يوم الانتخابات بتاعه مجلس الشعب وانتخابات الرياسه وافتكرت يوم قطر الصعيد والعباره وافتكرت الالف الى المعتقلات والملاين الى معندهاش عشى تتعشى بيها

وفضلت ابص للمنظر فى التلفزيون وسالت نفسى سؤال واحد

ما الناس اهيه بتحس وبتعبر اشمعنى ما بتعبرش غير فى الكوره ؟

هى الناس دى لو عبرت عن كل حاجه بتحصل فى البلد بالشكل ده كان بقى ده حالنا ؟

هما يعنى بيقلدوا اوربا

ماشى خلينى معاهم علشان ما ابقاش وحشه ووش نكد

طب اوربا دول لسه اول امبارح الحكومه سقطت فى ايطاليا علشان مشكله القمامه والحكومه مش عارفه تتصرف فيها

لما الحكومه تسقط علشان مشكله القمامه يبقى من حق الشعب يرقص للمنتخب بتاعه فى الشارع

انما لما الناس ما تلاقيش تاكل وتدور على لقمه فى الزباله يبقى الشعب يتلهى هو والحكومه

الله يرحمك يا محمد يا عبد الوهاب والنبى ما حد اترحم عليه

السبت، 9 فبراير 2008

ورحل مجدى مهنا

وافته المنيه امس الجمعه بعد صراع مع المرض كتم اخبار مرضه لعده سنوات حتى خرج عن صمته فى احد المرات من خلال عموده المتميز فى الممنوع فى المصرى اليوم وقال

لا أرغب في الدخول في تفاصيل حياتي الصحية.. المشوار طويل.. وعلي أن أتقبله بنفس راضية مرضية، وأن أشكر الله في السراء والضراء.. فليس أمامي طريق آخر لمشوار غيره، لكي أسلكه، وسوف يؤيدني الله بنصر من عنده.)

كما رفض ان يتعالج على نفقه الدوله وظل يصارع المرض وحده حتى اشتد عليه الالم فى الفتره الماضيه حتى وافته المنيه ليله امس

دعى المصرين له با لفشاء والان يدعون له بالرحمه

اللهم ما تقبله فى فسيح جناتك

الأحد، 3 فبراير 2008

راجل يا سركوزى

بالرغم انى كنت معترضه على ان الرئيس الفرنسى ساركوزى يجى وهو وصاحبته كارلا مصر وينزلوا فى سويد واحد

لان ده ضد العادات والتقاليد الاسلاميه والمصريه بجانب القانون

الا انى لم اكن معترضه على العلاقه لان ما فيش مخلوق على وجهه البسيطه ليه انه يعترض لان دى حريه شخصيه

الا نى بجد انبسطت كتير لما عرفت ان ساركوزى اتجوز كارلا

انا ما فرحتش علشان بكره سيسليا طليقه ساركوزى ولا بحب كارلا

انا انبسطت علشان ساركوزى ده بجد طلع راااااااااااااااااااااااااجل

ايوه راجل وده راى الشخصى

الراجل حب الست وعمل معاها علاقه ولما جه يقول يا جواز وكان متاكد انها بتحبه وانه بيحبها وانهم ها يسعدوا بعض

ما ترددش واتجوزها الراجل ما قلش لا دى واحده انا عرفتها ومشيت معاها ازاى اتجوزها

اصله هو كمان مشى معاها وان كانت هى غلطانه فا هو غلطان قبلها

ده تفكير الناس المحترمه انا واحد محترم وفى حالى وبخاف على بنات الناس وبتقى الله فيهم اكيد يوم ما ها جى اتجوز ربنا ها يدينى

واحد تتقى الله ومحترمه وبنت ناس ومتربيه وما عندهاش حاجه غلط وحتى ان كان حد فيهم حب قبل كده فا لحب مش حرام

الا ازا كان الانسان هو الى غلط او اختار غلط

وساعتها بيكون الرك كله على البنى ادم عل انه ها يوافق على الغلط او انه ها يقضى على الغلط ده

وهنا يكمن الاحترام

لان كلنا معرضين للغلط

لكن كلنا مش بنخاف من ربنا ولا بنحافظ على غيرنا علشان غيرنا يحافظ علينا

انما انا واحد مش فى حالى وبعمل علاقات مع طوب الارض بس بقى خاللى بالك يا معلم انا الى امشى معاها لا يمكن اتجوزها ايوه

امشى معاها ازاى الجواز حاجه والحب حاجه تانيه خالص

انا لازم الى اتجوزها تكون قطه مغمضه ما فيش واحد شافها ولا عرفت حد

ايوه دى ها تبقى ام العيال الى ها رميها فى البيت واسيبها تتطبخ وتزاكر للعيال وانا داير باره ابصبص للى رايحه والى جايه

وانا واثق ومتكد انها عمرها ما تبص لغيرى وانها ها تصونى

لازم تكون قطه مغمضه

انما الى هو حبها ووعدها بالجواز دى لا والف لا

دى واحده مجرمه هى اى نعم لا اخدت قرض ولا تخابرات مع اسرائيل

بس هى عملت جريمه اشنع من كده وثقت فى انسان مزدوج الشخصيه عنده عقد نقص

ويروح صاحبنا بقى يتجوز القطه الغمضه

علشان الى قبلها ما تنفعش بما انه طبعا معمل لاختبار النساء يعمل معاهم العلاقه من دول مش علشان حاجه لا سمح الله

بس علشان يشوف اخلاقهم

بس هو بينسى حاجه مهم جدا انه دان تدان

وزى ماهو عمل اكيد شريكه الحياه عملت

ماهو ربنا حكيم بعلمه

وربنا يخلى دكاتره امراض النسا

وطبعا هو مفكر نفسه عنتر زمانه

ويقولك لا يا عم دى ولا كلمه

هو انت مفكرنى ساركوزى ولا ايه

طبعا هو مش فرنساوى

هو هندى