ورجعت من السفر

ازيكم
وحشتونى كتير
ونودى وحشتنى اكتر
مرسيه للناس الى حسيت بجد انهم معايا وزعلانين علشانى
احساس جميل انك تحس ان في ناس انت تهمهم
انا صحيح ازمتى ماخلصتش لكن
من جوايا بقيت احسن واهدى وبدات ارجع زى ما كنت قبل كده
وملحوظه بجد ياجماعه مهمه
انا لااعانى من ازمه عاطفيه
لانى بمنتهى البساطه
مؤمنه بمبداء يروح كلب يجى سبع
وتقريبا عملت بنصيحه الست ماجده الرومى واعتزلت الغرام
المشكله اكبر من مجرد واحد ندل او معندوش ضمير
لكن الحمد لله
ربنا واقف جمبى لغايه ما كل حاجه تنتهى
تحياتى ليكم جميعا

لحظات

لحظات كتير مرت عليه قبل كده

كانت صعبه

كنت بضحك او على الاقل ابتسم

وبمنتهى الرضى

وأقول ان غدا ليوما اخر

لكن دلوقت راحت ابتسامت الرضا

وفقدت الأمل ان فيه يوما اخر

يمكن علشان اللحظات دلوقت بقت اصعب

يمكن علشان زمان كان فى حاجه تصبرنى

لكن الأكيد

انى اتكسرت جوايا حاجات كتير

وضاعت منى حاجات اكتر

كل حلم حلمته اتسرب من بين أيدى

كل حاجه اتمنتها تحصل مهما ان كانت بسيطه وحق مشروع ليه

انتهت

مش عارفه ليه كل ده بيحصل

اقل الاشياءبتضيع منى وبفقدها بمنتهى البساطه

قربت انهار فعلا

عامله زى جبل التلج الى بيسقط حته حته

ممكن ارجع واتماسك

يمكن ارتكب اخطاء فى حق نفسى وغيرى

مش عارفه

ويمكن ابطل تدوين

ويمكن ابطل اتنفس ويمكن بقت امنيتى

الوحيده

بجد مش عارفه

اخص عليك يازمن

مهاترات

فرق تسد

العباره دى دخلت البلد من ايام الاحتلال الانجليزى

بس للاسف الاحتلال خرج

والكلمه لسه موجوده فينا ومتأصله كمان

المناسبات كتير بصراحه

أولها حزب الغد

بما ان السنه دى سنه الحرايق

واللون الموضه الحكومه قررت انه يكون الاسود

فما كان من حزب الغد غير انه يستجيب لقرارات الحكومه

ويولع

هايكون اجدع من مجلس الشورى يعنى؟

ماعلينا أنه ولع

ده قضاء وقدر

نعمل ايه فى الماس الكهربائى الشقى؟

المصيبه الأكبر فى انقسامات حزب الغد

والى هى تكريس واضح لمقوله فرق تسد

الراجل موسى ده من مؤسسى الحزب مع ايمن نور

ودلوقت هو ومرات ايمان نور وانصاره واقعين فى بعض

ومبهدلين الدنيا صراحه

وكان طبعا ختامه مسك يوم الخميس

الاخ موسى ده جه مع جميله اسماعيل

فى العاشره مساء علشان كل واحد فيهم يقول الحريق حصل ازاى

طبعا الأعمى فتح على الحقيقه الى ظاهره من الصور والفديوهات

والاقوال بتاعتهم هما الاتنين

لاننا طبعا مفتحين وما بينضحكش علينا

الى ضايقنى اوى بقى من ربيب الحزن الوطنى

انه قعد يبلطج على جميله اسماعيل يقول انها عميله طول عمرها وانها بتشوه سمعه مصر

السؤال بقى ياعم السمعه؟

ولما هى زفت وزباله هى وجوزها انت ليه أسست مع الخونه دول الحزب؟

ولما هما خاينين لمصر وبيشوهوا سمعه مصر ليه متمسك بحزبهم المشبوه ده؟

طبعا مافيش اجابه

المفروض هدف أحزاب المعارضه انها تتصدى للحزب الحاكم وتحاول تخرج الناس من طغيانه

مش يحرقوا فى بعض

كده يبقى الناس دى كلهم مش كويسين

الى هاممهم المصالح وبس

اددى كان الموضوع الاول

الموضوع التانى بقى

خناقه المدونين

از فجأه يا جماعه بعد ما كان التدوين ده مهمته الاولى هو التعبير عن مصر

بعيد عن سلطه الحكومه

وجبروت الحكام

اصبح خناقات على المصاطب واحد يقول يمين والتانى يقول شمال

وهات يا شتيمه

الخناقات بقت كتيره

وبيدخلها عدد كبير من كل طرف

اخر خناقه بقى

تغطيه انتخابات امريكا

فيه مدونين سافروا وغطوا انتخابات امريكا

جميل

ناس بقى مدونين معجبهمش

ليه يا جماعه

اصلهم مدونين والتدوين ده مش مهنه

أصلهم واخدين فلوس

وده اسمه شحاته

أصلهم بيأيدوا فكر أوباما

وده تحيز

والمدون لازم يكون محايد

يا راجل

والقواعد دى بقى كانت فى أى كتاب

يعنى نزلت فى الصحاح مثلا؟

ولا فى تفسير الزمخشرى

ما كل واحد حر

يعمل التدوين مهنه

يتربح منها

ياخد فلوس مقابل تغطيه

يحب أوباما ويشجعه حتى بدل المنتخب

ولا لازم الكل يشجع أبو تريكه؟

طب لو كانوا سافروا من غير ما ياخدوا فلوس؟

ولا كانوا سافروا مسانده لماكين؟

كانوا ها يبقوا حلوين وعليهم سكرسنترافيش؟

ما كل واحد حر

ما بدل ما نقعد ناكل فى بعض علشان الى سافروا وغطوا الانتخابات

ما نقعد نفكر ازاى الناس دى وصلت لمرحله انها تختار مين يحكمها بمزاجها

ونحاول نتعلم منهم

يعنى انتم اتضايقتوا من التغطيه

وما اتحسرتوش من الانتخابات نفسها

وما تحسرتوش من البرامج الانتخابيه الى كانت مطروحه والناس تختار الأفضل

سبحان الله

ولله فى خلقه شئون

وحاجه تانيه بقى

بجد غيظانى اوى

بقى دلوقت واحد من الى سافروا طول عمره بياخد من المعونه؟

طب ما تقالش الكلام ده ليه زمان

لما كنا حبايب وزى السمن على العسل؟

ايه الى جرى يعنى

ولمصلحه مين كل ده؟

اكيد مش فى مصلحه أوباما

عايزين حقنا

عمرك سمعت عن صنيعى قتل الصبى بتاعه؟

هذا ليس سؤال منى لك ايها القارىء العزيز

ولكنه سؤال سأله والد الطالب قتيل الاسكندريه

ضحيه المعلم الذى قتله لعدم اكماله الواجب

سال ذلك الاب المسكين الذى افنى حياته من اجل ان يربى فلذه كبده ويلعمهم

كد واجتهد

لم يسرق اموال البنوك

ولم ياخذ اموال اراضى الدوله لينفقها على الراقصات

ويحرض بها على قتل المطربات

بل عمل بشرف

وكان جزاؤه ان يضرب ابنه حتى الموت تحت سقف مدرسه بالاسكندريه

لجريمه ارتكبها هذا المسكين

لم تكن جريمه تحرش بفتيات المدرسه وحتى ان كانت هكذا فلن يكون جزاؤه القتل

لم يسب حتى المعلم

ولكنه لم يكمل واجبه

لفظ انفاسه الاخيره فوق كراسه الواجب

جلس ذلك الاب المسكين أمام المذيع محمود سعد

يقص عليه ماحدث لابنه وما حدث معه من مساومات

وافتراء

جلس ذلك الحرفى يصرخ ويقول لقد قتل ابنى

قتل والساده المسؤلين لا يهتمون بمقتله

والسبب أن هذا الولد هو ابن صنيعى مسكين

لم يهتم احد بالقضيه

لانه ليس ابن وزير متقاعس

او رجل اعمال فاسد

لقد قتل ابنى

شاهدت ذلك الذى فقد اغلى ما لديه

ضحكت بمراره وتذكرت روايه حكايه مدينتى لتشارلس ديكنز

حينما مات صغير تحت عربات احد نبلاء فرنسا

وحين صرخ ابوه

تقدم احد العقلاء

قال له هذا خيرا له

انه مات دون ألم بينما كان سوف يعيش فى ألم معيشتك الشاقه

ولكن هذه فرنسا قبل الثور ه

شابهت مصر بعد ثورتها

عندنا البستيل والنبلاء

ولويس ومارى

ولكن ليس لدينا من سيقدمونهم يوما الى المقصله

كل هذه افكار راودتنى وانا اشاهد ذلك الوجه التعس

وأغرورقت عيناى بالدموع حين سأل الرجل محمود سعد هذا السؤال

عمرك سمعت يا أستاذ محمود عن معلم قتل الصبى بتاعه؟

فقال محمود سعد له

هذا سؤال نوجهه لوزير التربيه والتعليم ورئيس مجلس الوزراء

فياأمه باض فيها الفساد وتفرخ

أين المسؤلين من هذه الجريمه الشنعاء ؟

أين رئيس الوزارء ووزير التربيه والتعليم لماذا لا يحاسبون ؟

أين قبطان تلك السفينه التى تغرق؟

اين فطاحل المحايمن الذين من الحين والاخر يهلون علينا بدعاوى ضد الراقصات والفنانات والساقطات

بحجج واهيه

لماذا لا يساندون ذلك المسكين لأخذ حقه وحق ابنه

أليست هذه اهم من خلع الفنانه الفلانيه الحجاب يا سيد نبيه الوحش ؟

أليست تلك اهم من التشدق بالعبارات الرنانه الواهيه ياسيد مصطفى بكرى؟

أننا امه استشرى السرطان فى كبدها

ولا خلاص لنا قبل ان نعالج هذا السرطان

ولكن ليس فى مستشفى تم التسول عليها

وانما فى مستشفى المنهج الربانى العادل

الى مش راجل ما يطلعش من يبتهم

هى دى ليلى

صاحبه الصوره ما اسمهاش ليلى

دى ست البنات نهى رشدى

انا قلت ان هى دى ليلى الى احنا عاوزنها مش ليلى الى تتكسف وتخاف من الفضيحه

والى ما يعرفش حكايه نهى رشدى

دى اول بنت ترفع قضيه ضد خنزير

اتحرش بيها

والمحكمه نصفتها وحكمت عليه 3 سنين سجن

علشان يكون عبره لكل خنزير ماشى فى الشارع بنصه التحتانى وبس

بجد البنت دى ارجل من الف راجل

يسلم الى ربوها

ويسلموا المدرسين الى درسوا لها

ويسلم اى حد وقف جمبها وشجعها انها تاخد حقها من الخنزير ده

يارب تكون كل البنات بشجاعه نهى

وما نخافش وما نتكسفش ونوقف كل كلب عند حده

دى ان شاء الله البدايه

وان شاء الله يشرعوا قانون ينص على لفظ التحرش صريحا

وتكون عقوبته مشدده

علشان كل واحد يحط لسانه جوه بقه وما يقوليش اصلها مش محجبه يعنى

اقوله البنات الى اتقطعت الهدوم من عليهم فى جامعه الدول يوم العيد

كانوا بحجاب وخمار كمان

يعنى غباوه مش عاوزه

فاهمين

احنا بقى نمشى بمزاجنا

بحجاب عادى

بخمار عادى

من غير حجاب بارضه عادى

اى واحد بقى تفكيره ما بيخرجش غير من تحت الحزام

يقعد فى بيتهم

او يروح يعمل عمليه ويريح الناس من شره

اصله اكيد يعنى تلاقيه فى الغالب بيروح يقف قدام الصيدلى مدلدل ودانه ويوشوشه ويقوله مافيش مقويات

ههههههههههههه

فا بيطلع عقده على بنات الناس

ماذا يريد الأخوان مظاهرات كل عام فى الجامعات المصريه

والسبب حرمان طلبه الاخوان من الاشتراك فى انتخابات اتحاد الطلاب

يتكرر هذا المشهد من كل عام

مظاهرات وهتافات وامن مركزى وعربات مصفحه

واحيانا قنابل مسيله للدموع واعتقالات وفصل من الجامعات

والسبب الاخوان

وهناك العديد من الأسئله تجول بخاطرى

اولها لماذا يمنع النظام الجامعى الاخوان من الوصول الى اتحادات الطلبه ؟

وهذا السؤال اجابته لا يختلف عليها اثنان

والاجابه

ان النظام لا يريد الاخون فى أى مكان فى مصر

حتى لو كانوا طلبه

أما باقى الاسئله هى

ماذا سيفعل الاخوان حين يصلوا الى مقاعد الرئاسه فى اتحادات الطلاب

هل سيفعلون هكذا أو سيكتفون بتوزيع المنشورات الدينيه على الطلاب والوعظ لهم فيما بين المحاضرات؟

أهذا كل ما يملكه الطلاب الاخوانيون؟

لقد كنت أراهم حين كنت طالبه ولم يكن هذا بالبعيد بل كان فى العام الماضى

كانوا لا يفعلوا سوى ذلك فى محاوله لنشر افكارهم عن طريق الملصقات والخطب والدورس فقط والتطفل والتدخل فى ما لايعنيهم

اتذكر حين كنا ناخذ بعض الصور التذكاريه انا وزميلاتى

وتدخل احدهم وارسل لنا ورقه يععلمنا ان اشد اهل النار عذاب هم المصورين

حينها الغضب تملكنى من هذا التطفل الابله

هذا وهم خارج الاتحاد

فما بالكم ان دخلوه

هل سيكون واجب على كل فتاه ان ترتدى الخمار فى الجامعه مجبره

وعلى كل طالب ارتداء بنطال قصير مجبر ايضا

ولا يحق للفتاه ان تتحدث الى استاذها اثناء المحضاره بحجه ان صوتها عوره؟

هل سيحدث هذا؟

ان الاخوان أناس احتار الكل فيهم

نتذكر حين دعوه الأضراب فى أبريل الماضى وعدم مشاركتهم

ونتذكر ايضا مواقفهم المخجله مع النواب المستقلين فى مجلس الشعب وهم اغلبيه كبيره

وعدم دعمهم لكثير من اثاره قضايا الفساد فى المجلس

ونتعجب منهم ايضا حين الانتخابات وعدم منافستهم فى الدواير التى يحتلها رموز النظام العتيده

امثال سرور والشاذلى واحمد عز

ومنافستهم للمعارضين والمستقلين

نتعجب منهم حين يهاجهون النظام ولا يفعلون شىء ضد فساده

ونتعجب ايضا حين يطالبون بأن يأخذوا حقهم وهم لا يراعوا حقوق الأخرين

لأخر الزمان

يوم فقدنا الزعيم

لا تأسفن على غدر الزمان لطالما رقصت على جثث الأسود كلاب

لاتحسبن برقصها تعلو أسيادها تعلو أسيادها

تبقى الأسود أسودا والكلاب كلابا

عيدكم سعيد

مش هاقول مبارك

مش ناقصين مغص

احترم نفس

طبعاكلنا سمعنا عن الحمله دى على الفيس بوك وعلى مواقع الانترنت

الحمله دى فى واقعها ان عكست حاجه ها تعكس مدى التدنى الى وصلنا ليه فى مصر

لما الاحصائيات تقول ان اكتر من 70فى الميه من السيدات بيتحرش بيهم

دى مهزله بكافه المقايس دا غير طبعا الاجانب الى بيجوا ونتفضح قدامهم

ده شىء عادى نظرا لتدنى المستوىالاخلاقى والتعليمى

وردائه الخطاب الدينى

ومع ذلك كل الى احنا فالحين فيه نجيب اللوم على اى حاجه بس المهم مانجبوش على الحيوان الى استباح حرمات الله

الفريق المتخلف اياه والى اكتريته ستات اغبيه

يقولوا ماهو من لبس البنات

لبس بنات ايه يا عنوان التخلف منك ليها له؟

لبس البنات ده كان موجودقبل كده واكتر تحرر من دلوقت ومع ذلك كانت البنت او الست تلبس مينى جيب وكات وتركب الاتوبيس

مافيش واحد يقدر يبص لها ولا يقولها بم حتى

دلوقت المحجبه بتمشى فى الشارع ما بتسلمش من السفاله

وطبعا كلنا عارفين ان 70 فى الميه من السيدات والبنات فى الشارع المصرى محجبات

داغير ان الاحصائيات الى اتعملت اكدت ان المحجبات والمنتقبات بيتعرضوا بنسبه اكتر للتحرش

عارفين ليه ؟

لانهم لما سئلوا البهوات قالوا ان البنت المحجبه من السهوله التحرش بيها بينما الغير محجبه مش هاتسكت لى لو عملت فيها حاجه ممكن تزعق وتفضحنى فى الشارع انما المحجبه لا

يبقى اللبس هو السبب بذمه النبى؟

ولا السبب غباوه الى بيربوا وبيعلموا

ماهى لما واحده تعلق ارتكاب جريمه بشعه زى دى على الانثى والمفروش دى هاتبقى ام او هى فعلا ام يبقى عليه العوض ومنه العوض

ماهو لما ابنها يعمل كده ويقولها ماهى البت لابسه مش عارف ايه

هاتسكت

انما هى لو واحده عندها دماغ وبتفكر بيه وقامت رزعاه على وشه بالقلم لو عمل حاجه زى كده

وقالت له وانت مالك بالى هى لبساه هى حره تلبس الى هى عوزاه

انت المفروض تغض بصرك وتخاف من ربنا لايحصل ده معايا او مع اختك او مع بنتكفيما بعد

كانوا العيال اتربوا

انما لا نفضل نجلد فى البنات والستات لحد ما نجيب عليهم كل الغلط

الفريق التانى

الى اقرب حاجه على بؤه رمى اللوم على الحكومه

ماهو ارتفاع تكاليف الجواز

والبطاله

والواسطه

هما السبب

يسلام يا اخويا منك له

بقى هو ارتفاع تكالبف الجواز والبطاله والوساطه

هما السبب؟

طب ايه راى جنابك انت وهو ان الاحصائيات اثبتت

ان ان ظاهره التحرش بتكون بنسبه كبيره لدى الاطفال من سن الاعدادى للثانوى

والرجاله من سن 35 فما فوق

ايه راى سعادتكم

العيل الصغير الى فى اعدادى عنده مشكله ارتفاع تكاليف الجواز ولا بيعانى من بطاله

ولا الشحط الى عنده 35 فما فوق ده

ماتجوزش لسه؟

دا بيكونوا متجوزين وبيتحرشوا بارضه

ايه مشكلتهم دول

بيتحرشوا ليه؟

ولا السبب هو انعدام الاخلاق والخوف من ربنا

والتناحه وقله الادب

وبعدين الى عاوز يتجوز مش ها يقف على النواصى يستنى بنت تعدى علشان يتسافل عليها

ولا ها يقسم يومه على حسب مواعيد خروج مدارس البنات

الى عاوز يتجوز ده ها يشغل ليل نهار علشان يقدر يتجوز

مش ها يبقى عنده وقت بيتسافل على مخاليق الله فى الراحه والجايه

الصيع الى واقفين على النواصى دول مش عاوزين يتجوزوا دول عاوزين واحده ينهشوا فيها علشان يشبعوا السعار الجنسى الى عندهم

لا اكتر ولا اقل

اما بقى الفريق التالت فهما الاخوه المتنورين المتعلمين

الى يقولوا اصل الحجاب الغريب على مجتعنا اصل حجاب عمرو خالد ده هو السبب

ونظريه المزه المحجبه الى بقت منتشره فى كل الدنيا

يعنى حضرتكم الى مش محجبه بيتحرش بيها ليه؟

ماعلينا من المحجبه الوحشه الكخه الى اهلها مش عارفين يربوها دى

(مع ان دى حريه شخصيه يا دعاه الحريه

ماعلينا طبعا)

ماتجوبونى الغير محجبه بيتحرش بيها ليه هى كمان؟

طبعا مافيش اجابه

بس انا عاندى الاجابه على كل الفرق دى

طول ما احنا عمالين نجيب الغلط على كل الناس الا الجانى ها نفضل ورا

طول ما احنا عمالين نعامل الانثى على انها رجس من عمل الشيطان هانفضل كده

طول ما بنتعدى على حريه الاخرين فى لبسهم وحياتهم

هانفضل كده

يبقى من الاخر الكل فى البلد دى لازم يحترم نفسه

عيد ميلادى والمدونه

ورمضان كريم

انا بقالى 21 سنه النهارده على وش الارض
شخصيا مش فارقه كتير
المشهد بيتكرر كل سنه
وكل سنه بكون لوحدى
انا والوحده بقينا قدر بعض
هههههههههههههه

الحدث التانى والاهم
هو عيد ميلاد نودى
نودى عندها سنه
ودى بقى احلى سنه فى حياتى
يمكن لانى حسيت ان نودى دى بقت بنتى من يوم ما بقت موجوده
واكيد لانى بسببها اتعرفت على شخصيات اكتر من رائعه
بس الاكتر
انها كانت ونيسى فى ايامى الصعبه
كانت ملاذى من شبح ---------
بوستات وتعليقات ومواقف
اى نعم مدونتى مش مشهوره
لانى مش حابهانى ادخل كل المدونات
لانه بقى مولد
بس انا بحب الناس الى بدخل عندهم والى بيجوا عاندى
كده هاايل


وفى النهايه
رمضان كريم كل سنه وانتم طيبين

تحياتى
نودى

تيتى تيتى زى ماروحتى زى ماجيتى

ريح نفسك ياحج

الرئيس يأمر بتشكيل لجنه لبحث اسباب اخفاق البعثه المصريه فى بكين

الخبر ده فى المصرى اليوم

طب ممكن يا حج تسمح لى اقولك انا اسباب الاخفاق
من غير لجنه ثلاثيه
ومصاريف وبدل انتقالات
شوف ياكبير
اى عضو من اعضاء البعثه دى الى فيهم ابطال اولمبيين سابقين مرتبهم قد ايه
بياخدوا كام كل اول شهر
بياكلوا بكام وازاى
بيصرفوا ازاى
وشوف مرتبات وفلوس اقلها لاعب فى الاهلى ولا الزمالك ولا حتى الاسماعيلى
شوف ياكبير الناس دى بتاخد حقها اعلاميا زى لاعيبه الكوره ولا لاء
جريده الاهرام ياكبير سابت الناس بتموت فى طوابير العيش
وفضلت تتكلم عن هروب الحضرى
متنخبك بتاع اليد ياكبير اخد بطوله افرقيا مافيش حد عبره
اعضاء البعثه دول فيهم ناس ابطال فعلا وحققوا مدليات اولمبيه قبل كده
واول ما جم مصر الحقد اشتغل عليهم
والمشاكل واللعب من تحت لتحت
واظن كرم جابر ونهله رمضان اكبر مثال
شوف حضرتك بتعمل ايه لما بيكون فى ماتش مهم للاهلى
بتحضره
اى نعم بتنحسهم
بس اسمك عبرت
شوف بتدى فلوس قد ايه للمنتخب بتاع الكوره وهما حتت كاس عالم مش عارفين يطلعوه
وبقيه الرياضه فين ياريس

ريح نفسك والنبى وبلاش تتعب البهوات الافاضلهاتقولى ايه وتسمعنى

بشوفك انا قلبى يوجعنى
عايزنى انسى لك بالساهل
دا ابقى مابحسش واستاهل

مع حفظ كامل الحقوق الفكريه لعمرو دياب

-------------------------------
ملحوظه
عيد ميلاد نودى والمدونه يوم 1-9
مستنياتكم على صفحف التعليقات بعد التراويح كل سنه وانتم طبيبن بمناسبه رمضان
وهانكون بمنتهى الديموقراطيه
والى جواه اى حاجه يقولها
اوعوا تنسوا
والحاضر يعلن الغايب

حريق القاهره

مجلس الاكسلانصات ولع يا جدعاااااااااااااااااان
مش ده بارضه الى فيه زفتوح اسماعيل
اممممممممممممممممم
ياترى مين؟
طب زمان الى ولعوها الى كانوا ليهم مصلحه انها تتحرق والاحكام العرفيه تتطبق والبلد تبقى فاضيه
ويلعبوا لعبتهم
وحصل الى حصل
على اساس انهم ها يعملوا الى هما عاوزينه
بس ياخساره المحروس بتاعهم قلب عليهم الترابيزه وقا ل لهم امكم فى العشه ولا طارت
بس السؤال الخبيث الى بيراوض عقلى
ميييييييييين؟
هل ياترى بعد كام يوم ها يطلعوا علينا فى الفضائيات ويقولوا لنا( لقد اجتازت مصر فتره عصيبه قد تضافرت فيها عوامل الفساد-----)
ماهو مابقاش حد بيسمع الراديو
ههههههههههههههههههههههه
انا مش قاصدى اى حاجه وحشه
دا بس هاجس جالى

يوم عاد الماضى

يوم عادت اليها الذكرياتانا من بوم ما عرفتك وانا فى حاجه شدانى ليكى

حاجه زى ايه؟

مش عارف بس بحس انى بقرب منك كل يوم اكتر

مش عارفه اقول لك ايه

انا بحبك

انت بتقول ايه ؟

انا بقول الحقيقه

سكتى ليه ؟

مش عارفه

مش عارفه ايه؟
بتحبينى؟
ايوه
انا عملت حجات غلط كتير فى حياتى

محدش ما بيغلطش
غلطى اكبر مما تتصوريه
انا----
انا مسمحاك
انا نفسى كل الناس تعرف انك حبيبى
وانا كمان
انا كلمت اهلى عنك
مرحبين بيكى جدا
ليه عملت كده.؟
مابخبيش عنهم حاجه
انا خايفه
ماتخافيش
انا بعد الايام علشان ارجع من السفر
ونكون مع بعض
وانا كمان صدقنى
-------------------
النهارده عيد الحب
كل سنه وانتى طيبه يا حبيبتى
وانت طيب يا حبيبى
اول مره احس يعنى ايه عيد حب والفضل ليكى
ربنا يخليك ليه
--------------------
ممكن اخت تيجى تزوركم علشان تبقى قربت المسافات على ما انا ارجع
ازاى؟
مش مامتك عارفه
اه
خلاص
احاول
-------------------
اختك قالت عنى ايه؟
قالت انك انسانه مهذبه ومحترمه
ومرحبين بيكى جدا
------------------------
ايه الى انت عملته ده
انا اسف يا حبيبتى
ارجوكى ما تسبنيش
انا بحبك
مستعد اعمل اى حاجه علشان تغفرى لى
ايه ده انت شكلك عامل كده
بتعيط؟
ايوه
مقدرش استغنى عنك
خلاص مسمحاك
بحبك
------------------------
انتى اختى وامى وحبيبتى وكل حاجه فى دنيتى
وانت اغلى حد عندى
عمرى ماحبيت ولا هاحب حد قابلك
---------------------------------------------
---------------------------------------
انا حجزت هانزل بعد 20 يوم
بجد؟
اه
بس نازل اجازه صغيره يادوب استجم وبس
تيجى بالسلامه
-----------
انا بكلمك من مصر
حمد الله على السلامه
لازم اقابلك قبل ماجى عندكم البيت فى كلام مهم عاوز اقوله
احاول
لازم
اوك
------------------------------
ايه رايك لو نفضل مع بعض لحد ما كل واحد فينا يتجوز
يعنى ايه
ماتخديش فى بالك
------------------------
ايه الكلام الى انت قلته واحنا مع بعض ده
بصراحه
اهلى مش موافقين عليكى
وانا الى غصبت على اختى تزورك
وانا لقيت فى شخصيتك حاجات ما تنفعيش بيها تكونى ام ولادى
وانا ما كنتش عاوز علاقتنا تاخد الشكل ده
لكن انتى الى اصريتى على موضوع الحب
انا؟
ايوه
والحب
الحب حاجه والجواز حاجه تانيه
وانا اعمل ايه من غيرك؟
انت اول راجل فى حياتى
انساك ازاى؟.
عيشى حياتك
سلام

تاج السينوريتا نودى

التاج ده جالى من عند محمد صاحب مدونه ابن مصر وبما انى طول عمرى تلميذه غير مطيعه وغير نجيبه كنت بدعى ربنا انه
ما يجيش ليه بس يالا مش مشكله علشان خاطر محمد

وقلت اجيب لكم صوره نودى وهيه صغير

اولا

التاج ده جاى ليه من مدونه ابن مصر
ثانيا

16 صفه عن نفسى
بصوا انا هاكتب الى يجى فى دماغى وربنا يستر


اولا

مسلمه
ونفسى ما اغضبش ربنا ابدا بس كتير بغضبه
وبدعيه انه يسامحنى

ثانيا

نفسى كل الناس تتقى ربنا وتراعيه فى كل حاجه بتعملها
فى الحاله دى كل مشاكلنا ها تتح للان مش هايكون فيه سرقه ولا نصب ولا نهب ولا رشوه
ولا اى حاجه وحشه
والبلد ها يتصلح حالها

ثالثا

نفسى ما يكونش فيه حد حزين
ولا يكون فيه حد مظلوم على سطح الارض
وكل واحد ياخد حقوقه

رابعا
بدعى ربنا انى ما تسببش فى زعل اى حد

وماظلمش اى حد
ولا حد يظلمنى

خامسا

زملكويه جدا جدا جدا
وانشالله ننزل درجه تالته بارضه زملكويه رغم انف الحاقدين

سادسا

قادره ومحدش بيقدر عليه

سابعا

بكره كل العنصرين
بما فيهم بنت الكلب ايران الى بتشتم فى الصحابه وطبعا

شتيمتها فى السادات

ثامنا

بكره الكدابين والكدب
من اول الزعما الى هما مش زعما وبيكدبوا وبيقولوا انهم زعما
وكتاب التاريخ الى بيزوروا فى التاريخ علشان مصالحهم
وكذلك الصحفين
لغايه الانسان العادى الى ممكن يكدب علشان ياخد حق مش حقه

تاسعا

طيبه جدا لدرجه ان ممكن يضحك عليه

عاشرا

عنيده جدا جدا جدا
ودماغى ناشفه فوق الوصف

الحادى عشر

رومانسيه

بحب الروايات العاطفيه موت

الثانى عشر

وحيده

الثالث عشر

هاديه وما بحبش الدوشه
بس ساعات بحب الاصوات العاليه

الرابع عشر

انطوائيه لحد ما
وساعات كتير الناس بتفتكر انى مغروره

الخامس عشر

بكره كل الديكتاتورين

السادس عشر

ربنا يسامحك يامحمد

ثالثا اهدى التاج ده لاى حد عاوزه

مشاكل

تحديث
تضامنا معايا ومع حملتى ضد سى السيد سمحت ليه ابى بوضع اللينك ده من عندها
اتفضلواهنا
www.appyplant.blogspot.com\2008\06\blog-spot_7742.html

عن الرجاله سألونى

الست لازم تهتم بنفسها علشان جوزها ما يبصش باره
لو جوزك اتجه لصحابه يبقى اكيد العيب فيكى
لازم جوزك يشوفك بشكل جديد كل مده علشان ما يحسش بالملل
الراجل لو مالقاش الراحه فى بيته اكيد هايدور عليها باره
كلام كتير بنسمعه

ونصايح مهمه جدا الناس بينصحوا بعض بيها

وخصوصا بين السيدات
طيب جميل
اكيد طبعا لازم الست تهتم بنفسها وبمظهرها
علشان خاطر نفسها وجوزها فى نفس الوقت
ولازم تعرف تحتوى جوزها وتحس بيه
علشان حياتهم تكون حياه سعيده
بس فيه سؤال مهم
طب وحق الست؟
هى مش الست بارضه من حقها
ان جوزها يهتم بنفسه علشانها
ويكون مظهره كويس
زى ماهى لازم تهتم بمظهرها
ولا ده مش من حقها
وكفايه عليها انها تاكل وتشرب وخلاص
زى ما هو عاوز يشوف واحده جميله هى من حقها تشوف واحد جميل
يعنى مش واحد يصحى من النوم ما يهونش عليه يغير الهدوم الى هو نايم بيها
ويفضل قاعد بشكله المقزز ادامها ولا فى دماغه مشاعرها
ليه الانانيه بقت فى طبع كتير من الرجاله الا من رحم الله
انت عاوز تشوفها من غير هدوم المطبخ وريحه البصل
هى كمان من حقها تشوفك شيك
والله العظيم مره شوفت راجل عمال يقول مراتى مش بتهتم بنفسها
والله العظيم لما فتح بؤه وشفت سنانه
اكاد اقسم انه عمره ما غسلها بالمعجون
ليه الراجل من دول يفضل يبص لزميله المتقمعه فى الشغل ويفضل يقارن بينها وبين مراته
مع انه هو لو راح بيتها وشافها ها يلاقيها مبهدله وافظع من مراته
ومع ذلك الست بيبقى ليها زمايل رجاله محفلطين وحلوين
ونبيكلموها بذوق ومن النادر جدا
انها تقارن بينهم وبين جوزها
الى لو اشترت فستان جديد
بدل ما يقولها حلو يا حبيبتى عليكى
يقولها بكام؟
وتلاقيه يقعد يتفرج على التلفزيون
ويبص على هيفا واليسا ونانسى
وبمنتهى النطاعه يقول
جاتنا نيله فى حظنا الهباب
وطبعا ان ده نم عن شىء ينم عن غباء
لانه بيقارن بين الست المهدوده من الصبح فى البيت
وشغلها
وبعد كده مع عياله
الى هما اكيد وارثين الغباء من ابوهم
وبين نانسى وهيفا الى وراهم الف واحد يهتم بيهم
الى مكياج والى مصمم ازياء والى خبير فى الاتيكت
والى خبير تغذيه وبلاوى ما انزل الله لها من سلطان
جربت انت تهتم بمراتك
طبعا عمر ماحد قال لواحد من النوعيه دى من الرجاله
ان الست زى الورده
كل ما تهتم بيها كل ما تديك اكتر
جرب كده وانتم بتاكلوا تاكلها بنفسك مره
تقولها تسلم اديكى يا حبيبتى
مره تجيب لها ورد
اكيد الورده تمنها مش ها يخرب الدنيا
جرب تاخدها تمشيها شويه كل ما جنابك تفضى
وشوف هى ها تعمل لك ايه
بطل تقارن بين الى مستحمله الحياه معاك وبين اى واحده تانيه

اكيد مش ها تستحملك ولا تستحمل العيوب الى انت مش شايفها
التلفزيون زى ما فيه كده

وكده


فيه كده

وكده

وان كانت هى مش هايفا فا انت مش براد بيت

كفايه يا حازماعلن حازم امام كابتن نادى الذمالك لكوره القدم اعتزاله رسميا
وطبعا مش محتاجه اقول مين هو حازم امام
لانه بلا فخر يعد من اكثر اللاعبين المصرين خلقا ومهاره
بغض النظر عن اى تعصب اعمى
المغذى من المقال ده هو اعتزال حازم
لو كلنا تنذكر مباراه الذمالك والاسماعيلى فى بدايه
الدورى المصرى العام الماضى
ونزول حازم فى اخر المباره
وتمريرته الخاطئه
وهتاف الجماهير
كفااااااايه يا حازم
فما كان من حازم الا انه نوى الاعتزال
واتنظر نهايه الموسم الرياضى
واعلن اعتزاله
والحظ حالفه بحصول نادى الزمالك على بطوله كاس مصر

وطلع الراجل بعد الاعتزال بكل

ادب فى التلفزيون وقال انا مقتنع بالاعتزال

لانى كبرت عمرى بقى 33 سنه

مجهودى فى الملعب قل عن سابق عهدى

وانا كنت مفكر فى الاعتزال من زمان بس كان نفسى اعتزل والنادى اخد

بطوله

شفتوا الاخلاق

مع ان زمايله كلنا شفناهم اخر ماتش فى الكاس

لابسين تيشرتات

مكتوب عليها لا للاعتزال

والجماهير تراجعت واقتنعت ان حازم وجوده وهم فى لم شمل اللاعيبه المشتته

بين مجالس الادراه المهلهله فى النادى

والمسؤلين كمان فى النادى منهم كتيرجدا عاوزينه يستمر

لكن الراجل احترم تاريخه

وانسحب بكل ادب

نيجى بقى للاعب تانى فى دوله بعيده عننا شويه

اللاعب ده سنه عدى فوق ما انتم تتصورا

بيلعب من ايام ما ايران اطلقت اسم خالد الاسلامبولى على احد شوارعها

(ركزوا فاهمين)

بيلعب من زمان اوى

ومش بيلعب وبس لا

دا هو الى بيحط اسامى اللعيبه زمايله الى بيساعدوه


ويقول مين يلعب ومين ما يلعبش

ولازم يكونوا

عادلين

وراشدين

ومغربين

ويختار كمان المدرب

ولازم يكون نضيف اوى

وكل ده وما بيكسبش النادى خالص

تقولوش الزمالك المصرى

ايام مرتضى منصور

والنادى عمال يخسر

ويبيع فى ممتلكاته

وبقى محتل من الانديه التانيه الى اشتروا فيه حاجات كتير

الجماهير زهقت

وقعدت تقول له
كفاااااااااااايه

واخدين بالكم من اللون الاصفر
بارضه ماهموش الجماهير
قام معين
شويه بلطجيه بقى يوزعهم على المدرجات اى حد يقول كفايه
يضربوه لحد ما يموتوه
وعمل لائحه فيه قواعد دخول المشجعين
الى عاوز يدخل يكون فوق الاربعين
انما اقل من كده باره
المركب مستنياه
واى حد يتكلم ها يضرب
ووزع منشورات عليها صورته
وقالهم انسوا يا حبيبى انتوا مفكرنى
حازم

أنا والتلفزيون
مش عارفه أنا ليه دايما موعوده بالعاهات كل ما افتح التلفزيزن
مع أنى بحاول ابعد كل البعد عن القنوات المستفزه
والبرامج الغتوته
والاشخاص غربيين الافكار والكلام
بس غصب عنى بشوف ساعات حاجات من هذا القبيل
يعنى الاسبوع الى فات بقلب بالصدفه كده الاقى برنامج البيت الى عمره ما كان بيتنا ده
والاقى المذيع المعجزه
تامر امين
هاجس جالى وقالى بلاش تقلبى
لاقيت معاه كده راجل كوبره رئيس مش عارفه رئيس مركز اتخاذ القرار
حاجه زى كده
لقيت الكلام بتاعهم عن التدوين
وعرفت ان فيه مؤتمر كان معمول لمناقشه ضاهرع التدوين
قلت ما اسمع بيقولوا ايه
لقيت اخينا تامر عمال يسأل الحج الى معاه اسئله غاظتنى اوى واتضايقت واتمنيت انى انا
أرد عليه
والاسئله هى
هل معظم المدونات موضوعتها سياسيه؟
واشمعنى السياسيه الى بتسال عنها
ولا هى المدونات السياسيه دى هى الى تعباكم ومطيره النوم من عنيكم انت والى مشغلينك

ماهى اهم عيوب المدونات دى؟
أقول لك أهم عيوب المدونات دى
اهم عيوبه انها كشفت زيف افترائكم على الشباب
انه شباب جاهل مغيب مافيش فى دماغه غير التفاهات والمخدرات والستات
زى الى انتم بتعرضوه فى افلامكم ووسائلكم الاعلانيه المؤرفه
وان مافيش حد بيفهم ولا وطنى من الشباب دول غير شباب الحزن الوطنى
جت المدونات دى وبينت ان البلد دى فيها شباب بيعرف يتكلم
ومثقف ويع وجهه نظر ولو اديتوا له الفرصه ها يعمل الى انتم مش عاوزين تعملوه
هى دى العيوب يا بش مهندس
هل فيه يجب عمل رقابه على المدونات دى؟
مهما حاولتوا انكم تكدبوا وتقولوا ديموقراطيه
سياسه الرقابه والرقيب فى دمكم
اسفين يا استاذ تامر
الرقابه دى عندك انت فى ماسيبرو يقولوا لك تقول ايه وما تقلش ايه
ولما تبقى مستضيف حد من الى هما يملوك الاسئله
اه معلش
انما المدونات مافيش فيها رقابه
رقابه فى عينكم

ولقيت نفسى بعد كده بدأت اتعب نفسيا من الغباوه الى بسمعها قمت قايمه


غيره
بارضه مافيش فايده
الاخ شوبير عمال يقرف فينا
خير اللهم اجعله خير لقيت البرنامج بتاعه شغال على التلفزيون
انا بطبعى بكره الاستاذ شوبير
مش علشان انا زملكويه وهو اهلاوى
انا بحب مصطفى عبده ومصطفى يونس وصالح سليم والشيخ طه
وبحترم كتير من لاعيبه الاهلى المحترمين
مصطفى عبده لما بيجى يتكلم بحسه انسان محترم هادى عنده حياد
انما الحج شوبير الاعمى يفتح ويقول ده اهلاوى
بصراحه بيضايقنى
والمفروض ان المذيع يكون محايد دى اساسيات المهنه بس نقول ايه
ويخلق ما لاتعلمون
الاستاذ شوبير ده عدو النجاح اه والله
مش عاجبه حسن شحاته وبيهاجمه
وكلنا فاكرين قبل كاس الامم جاب لنا احساس انهم هايروحوا يادوب يكنسوا
ملاعب كوماسى ويرجعوا
وحتى لما كانوا بيكسبوا كان يطلع علينا ويقول حظ لا مش عارفه ايه
واول ما اخدوا البطوله كان اول المستفدين

كذلك مهاجمته لمستر جوزيه وخلافاته معاه
مع انه المفروض انه اهلاوى وجوزيه ده حقق مع النادى بطولات هايله والاهلى اصبح
الاول افرقيا فى عهده
لكن نقول ايه للحقد
دلوقت بقى هو متمزج اوى لانهيار الذمالك وعمال ينقاش ويجيب من قلبه هو وضويوفه
واى حد يبص فى عنيه يعرف الحقيقه
انا عاوزاك تتبسط كمان وكمان يا كابتن شوبير
اهى اتخربت واقعد انت وامثالك على تلها
علشان تلاقى كلام تتشدق بيه انت وضيوفك
نفسى الاقيك بتشجع حد ناجح
مش بتشمت فى حد عنده مشاكل