الثلاثاء، ٣٠ أكتوبر ٢٠٠٧

نار على ولا جنه معاويه
تفتكروا المصرين بيسافروا اسرائيل ليه؟
انا عن نفسى يوم ما اقرر اسيب البلد دى ها سبها يوم ما احس انى مش قادره انى اتكلم ويوم ما احس ان مافيش فايده
مش ها سيب علشان الظروف الاماديه او الاقتصاديه
بس يمكن انا علشان بنت ولسه ما جربتش ان يكون عاندى مسئوليه بيت وانى عاوزه اتجوز واجيب شبكه وشقه او لانى ماجربتش انى اكون عيانه وومعايش تمن الدوا
او انى انام من غير عشا وانا جعانه
يمكن انا حصلت لى بس علشان كنت مكسله اجيب اكل انما يمكن لو حصل لى وكنت جعانه ومماعيش فلوس اكل لا انا ولا اهلى دا انا مش اروح اسرائيل واتجوز اسرائليه دا انا اروحو
جهنم الحمرا
ياريت كل واحد يقراء البوست ده يسيب كومنت ويقولى من وجهه نظره ايه الى يخلى واحد يروح اسرائيل ويتجوز اسرائليه ويعيش هناك

الاثنين، ٢٩ أكتوبر ٢٠٠٧


ياربى

الوبا ولا الغبا

سمعت كلام الناس ورحت الكليه قلت اخر سنه وخلاص هانت نروح نشوفهم بيعملوا ايه


بس من اول لحظه وانابستغفر ربنا من غلبى الغباء قابلنى من قبل ما ادخل

اه والله من قبل ما ادخل البيه بتاع الامن مش عاوز يدخلنى بالكارنيه لازم البطاقه يابن الناس وانا اجيب لك كارنيه السنه دى منين طب ادخل وادفع المصاريف واعمل كارنيه جديد يقول لا خلاص عاوز البطاقه اقوله وماله الكارنيه القديم

ماهو بتاريخ السنه الى فاتت ومكتوب فيه سنه تالته يعنى انا اكيد فى الكليه السنه دى ماهو مش معقول اتخرجت وانا فى


سنه تالته بس تقول ايه ذكاوه شعب وبعدين ده من رجاله العادلى جيت قلنا الامر لله ندخل بالبطاقه

ندخل بقى للمعمعه

العيال هما بغابوتهم ماتغيروش السلم ضيق وناس طالعه وناس نازله وهما قاعدين عليه طب ننزل ونطلع ازاى ؟

مش مشكلتهم ننط نقفز مش مشكله المهم الحديث ما يتقطعش

الحمد لله طلعت بعد عناء ودخلت المحاضره وكالعاده انى افهم حاجه مستحيل اصل الدكتور بيقراء من الكتاب

ومابيشرحش الى هو بيقوله قلت مش مشكله بقالى اربع سنين ما بفهمش حاجه جت على السنه دى يالا

المحاضرات بينها وقت قلت نطلع المكتبه نشوف الكتب وايه اخبارها وعلشان محدش يقول علينا نحن شعب لا نقراء

دخلت المكتبه والحمد لله كان ده من ضمن الايام المخصصه لدخول سنه رابعه ايوه اصل المكتبه بمواعيد

اول مادخلت لقيت المنظر الى بشوفه من اربع سنين خمس ستات بيكلموا فى كل حاجه غير الكتب

قلت يامهون دخلت جوه جبت الكتاب الى انا عاوزاه بعد ما طلعت روحى معاهم

دخلت قاعه الاضطلاع القاعه دى بيتعمل فيها كل حاجه ماعدا القراءه

بيتحب فيها وبيتاكل وبيشرب فيها

وبيتسمع فيها نغمات واغانى الموبيلات وطبعا بيترغى فيها فين وفين اما تلاقى حد بيقرا حاجه

وطبعا لو اتكلمت تبقى قليل الذوق

عصرت على نفسى لمونه وفضلت نص ساعه بطلوع الروح ونزلت طبعا بعد ماوديت الكتاب واتفقعت مرارتى

لتانى مره

لقيت رجلى وخدانى بعد كده عندبياع الكتب والجرايد الى فى اخر سور الكليه

اشتريت روايه لنجيب محفوظ وقلت اسلى نفسى بيها وقلت مش راحه قاعه الاضطلاع اروح الاستراحه

وطبعا اتشليت

لانى ببساطه كنت انا الشاذه الى فيهم البنات يا اما بيروحوا الاستراحه علشان ياكلوا او يكلموا او يصلحوا الميك اب

انا كنت بقى بقراء الى راحه والى جايه تمسك الروايه

ايه ده ؟ بتقرايها ليه؟هى مقرره؟

ولما اقول لاء مش مقرره مجرد قراه يهزوا دماغهم ويرجعوا لى الروايه تانى بعد ماالصفحه الى انا بقراها تروح

قلت لله الامر من قبله ومن بعده بلاش اقراء

اروح احجز الكتب المقرره

وبارضه واقفه احجز واحده تاخد الروايه وانا شايلاها وتفتحها وتقولى مابحبش نجيب محفوظ

وانا ماسكه نافسى وانا قلت لك حبيه

اااااااااااااااااه يا ولاد الفراعنه

وده كان يوم من ضمن ايامى فى الكليه


الجمعة، ٢٦ أكتوبر ٢٠٠٧

ربنا معاكم
برغم كل شىء
حرقه الدم والغيظه والفرسه وفقعه المراره
الا انى بدعى للاْهلى ان ربنا يوفقه بكره
طبعا ليس حبا فى الاهلى ولكن كرها فى التوانسه
ايوه طبعا
ماهو انا مش ها فرح لما التوانسه يروحوا اليابان والاهلى المصرى لاء

اى نعم انا مافيش حد قارفنى فى حياتى زى جوزيه ولا حد معكنن عليه ا د ابو تريكه ولا حد بيعصبنى
زى بركات ولا حد بيمسكنى سلك الكهربا زى السد العالى الحضرى ولا حد بيحرق دمى غير متعب



بس انا واخويه على ابن عمى




















































































الخميس، ٢٥ أكتوبر ٢٠٠٧

الملك فاروق




















الاميره فوزيه











الملكه فريده












فاروق اثناء دراسته فى انجلترا








الاميره فوزيه عندما كانت امبراطوره ايران












الملكه نازلى عام 1919






السبت، ٢٠ أكتوبر ٢٠٠٧

بالرغم من انى مش حابه انى اقتبس من حد مواضيع بس بجد الموضوع جذبنى واثر فيه موضوع لقيته ى مدونه واحده مصريه ولقيته نقلا عن مركز النديم ولما فتحت الموقع بتاع المركز لقيت حاجات ما ينفعش انى اسبها وقلت اعرضها
وربنا يستر على عباده

وتحيا مصر المخروسه

في قسم شرطة المنصورة هتك العرض من باب المجاملة 4/10/2007"غفير اسمه سعد سعد عبد الباري استلمني من سلامون الساعة 12 الظهر وسلمني على سركي في قسم شرطة المنصورة الساعة 1.30. أول ما وصلت الضابط محمود أبو المكارم استلمني ضرب وشتيمه في مكتبه بالأقلام.. وبعدين قال للأمناء هاتوا العصاية.. أمين شرطة محمد خرج جاب العصاية.. الضابط قال لأمين الشرطة السيد عبد النبي: فتشه!!.. لقوا معايا 120 جنيه.. الضابط أصر ياخد المحفظة عنده.. ضربني بالعصاية، قطرها حوالي 4 سم، على كل جسمي والظهر والمؤخرة.. وبعدين قال لي: بوس الأرض.. وداس بالجزمة علي.. وقفني.. حط وشي في الحيط.. ونزلوا علي ضرب أكتر من 60 عصاية على الظهر والكتاف.. قلبوني تاني على الأرض.. وهم بيضربوني كان محمد فرج بيسألني: "انت مزعل السيد عبد النبي ليه" ويضربني بالأقلام.. ومحمد فرج يصوره.. ويقول أنا هخليك عبره لعيلتك وللبلد.. الضابط قال لهم ما تسجلهوش في الدفاتر!!" تلك كانت كلمات المواطن السيد محروس عبد الواحد الذي تعرض لتعذيب بشع، تضمن هتكا لعرضه، في مركز شرطة المنصورة، مجاملة لأسرة زوجته السابقة كانت الزيارة يوم 18 سبتمبر 2007 في قرية سلمون القماش – المنصورة، وكان اللقاء مع محمد محروس عبد الواحد شقيق السيد محروس عبد الرازق. يقول محمد:"أخويا السيد عنده 27 سنة.. بيشتغل نجار.. وورشته تحت البيت.. من أكثر من سنة كان متزوج واستمر زواجه لمدة شهر ونصف. حصل خلافات وكان فيه قضايا بين العائلتين.. كانت قضية تبديد عفش رقم 11870.. ورغم أن القضية وصلت النيابة إلا انه حدثت جلسة صلح عرفي واتفقوا يخلصوا كل حاجة.. وتم الصلح يوم 12 ديسمبر 2006 وسقطت جميع الإجراءات القانونية وأخدنا ما يثبت ذلك من النيابة.خطوبة السيد كانت يوم 26 فبراير.. في يوم 24 فبراير 2007 الساعة 12 ظهرا جت قوة من قسم المنصورة ومعاهم الضابط محمود أبو المكارم لتنفيذ الحكم اللي اتلغى في قضية التبديد.. السيد كان في ورشته تحت البيت.. وراهم الورقة الرسمية اللي تثبت سقوط القضية.. صمموا ياخدوه.. قال لهم هتشطف وانزل.. دخلت البيت بالصدفة.. فوجئت بأمين الشرطة على السلم بيشتم فينا بألفاظ بذيئة.. اعترضت لأن ده عيب وخادش لحياء النساء.. السيد لبس ونزل.. وهو على السلم أمناء الشرطة دوروا فيه الضرب وأخدوه على القسم.. حسيت إن الأمر فيه شيء غريب.. سبت أخويا ورحت على المحكمة أسأل إذا كان السيد عليه أحكام ما لقيتش.. خالي راح القسم يشوف السيد، رجع وقال لي إن أخويا مربوط إيد ورجل في الحديد ووشه مليان تراب ووارم وبيبكي.. ولما خالي سأل الضابط محمود أبو المكارم: ليه كده؟؟.. رد عليه وقال له: ولسه الدور جاي على أخوه!" ذهب محمد محروس في نفس اليوم للمحامي الخاص وتأكد انه لا توجد قضايا على السيد.. وضاع هذا اليوم في محاولة البحث والتأكد. يوم 26 فبراير ذهب محمد للنيابة.. وبعدها اتصل به خاله ليخبره أن السيد قد خرج. يستطرد محمد محروس"أهل زوجته القديمة كانوا بينتقموا منه لأن خطوبته وزواجه كان يوم 26 مساء.. هم اللي زقا عليه القسم.. في نفس اليوم اللي خرج فيه السيد عملنا الخطوبة وكتب الكتاب.. وروحنا الساعة 12 مساء.. على الساعة واحدة سألت السيد: إيه اللي حصل في القسم؟ انهار في العياط وقال أنا مش راجل.. قلعته هدومه.. حاولت التماسك عشان ما أنهارش قدامه.. ما نمتش طول الليل.. كان جسمه كله مبهدل كدمات وجروح. الصبح خدته ورحت النيابة. قعدت تلات ساعات. اتخانقت لغاية ما دخلت.. حولونا لمفتش الصحة ونصحني وكيل النيابة إني ما أقولش ان اللي ضربه ضابط شرطة وان اللي ضربه كان أمين شرطة.. مفتش الصحة كتب التقرير كويس. كان بيربطوه ايد ورجل ويحشروه ما بين المكتب والدولاب في مكان ضيق عشان ما حدش يشوفه.. اشتكيت لكل الجهات وابتدا الضغط علي وعلى عمي.. ما حدش رد علينا. بعد النشر قامت النيابة بتحريك القضية واستمعت لأقوال الأمناء والضباط في القسم وانعقدت محاكمة عسكرية حبست الاثنين أمناء الشرطة.. كل واحد 6 شهور (السيد عبد النبي ومجمد فرج).. أما محمد أبو المكارم فتحول لمجلس تأديب بعد الحكاية دي.. القضية تأجلت لمدة 40 يوم.أنا ما سكتش، عملت بلاغ للنائب العام ورفضت جميع الضغوط اللي جت لي للصلح.. من أول مساعد وزير الداخلية لعضو مجلس الشورى لضباط أمن الدولة لرئيس النيابة.. أقارب الضابط عرضوا علينا 100 ألف جنيه.. ونائب مأمور قسم المنصورة ثاني هددنا بتلفيق قضايا.. كانوا عاوزيني أكتفي بحبس الأمناء.. وانا عاوز أحاسب المسئول عن اللي عمله الأمناء.. أحاسب الضابط نفسه.. هو اللي ضرب وهو اللي أمر بالضرب وهو اللي أمر بالاغتصاب وكان واقف شايف ده كله.." بعد أن قدم محمد محروس بلاغه أمر النائب العام بفتح القضية ضد محمود أبو المكارم ومحمد فرج وسيد عبد النبي والسيد عبد الله و"شخص اسمه شاهين كان القسم مكتم عليه طول الوقت
النديم للعلاج والتأهيل النفسي لضحايا العنف 3 أ شارع سليمان الحلبي، من شارع رمسيس، القاهرة هاتف: 202 5787089 فاكس: 5776792 بريد اليكتروني: nadeem@link.netالموقع:www.hrinfo.net/egypt/nadeem
كنا بنحاول لا ناكل ولا نشرب عشان مفيش حمام
مركز النديم
للعلاج والتأهيل النفسي لضحايا العنف
3 أ شارع سليمان الحلبي، من شارع رمسيس، القاهرة
هاتف: 202 5787089 فاكس: 5776792 بريد اليكتروني: nadeem@link.net ":www.hrinfo.net/egypt/nadeem
كنا بنحاول لا ناكل ولا نشرب عشان مفيش حمام حكاية ناهد ونورا وميادة في قسم شرطة المنصورة
ناهد محمد توفيق امرأة مصرية تعول أسرة من ثلاثة أبناء هم عبده أحمد عبد الرازق (19 سنة) وعماد أحمد عبد الرازق (20 سنة) ونورا أحمد عبد الرازق 14 سنة ومياده أحمد عبد الرازق 12 سنة.
كانت المقابلة يوم 18 سبتمبر 2007 في منزل ناهد محمد توفيق في قرية سلمون القماش بالمنصورة.. منزل صغير لا يوجد داخله أي نوع من البلاط أو الخشب.. أرضيته طينية.. به غرفة واسعة في الدور الأول بها حوالي 4 ماكينات خياطة تريكو، تسميها ناهد "مصنع"، وعشرات القطع الصغيرة التي كان ابنها الثالث – الذي لم يسجن – يقوم بحياكتها.. هناك سلم طيني تملأه الشروخ في أعلاه غرفة نوم بالدور الأول أيضا مرحاض عبارة عن حفرة في الأرض.. جميع الدواليب مكسورة وكذلك الأدراج وبعض الأبواب!!
تقول ناهد:
"بالذمة ده منظر بيت أصحابه بيتاجروا في المخدرات.. طب كنا بلطنا الحمام.. احنا ناس كويسين.. أنا وولادي التلاتة كنا بنشتغل في المصنع وبنورد جاهز.. طول الليل بنشتغل التريكو ونكيس ونودي مصر!!
"المشكلة بدأت من سنتين.. اشتريت أرض مباني جنبنا.. أولادي قالوا لي لازم ننقل المصنع لمكان تاني بره البيت.. اشتريت كل
"البيت كان جه له أمر إزالة.. أنا كنت بره.. دخلوا عليه بالبلدوزر هدوه.. ومش اكتفوا بكده، لأ كمان بيدوسوا على الخشب والطوب يخلوه زي الدقيق.. داسوا على الطوب مرتين.. جيت من بره تعبانة الناس قالوا لي عليك العوض.. أنا كنت بأصرخ وأقول لهم حرام عليكم.. أولادي حاولوا يلموا أي حاجة.. محمد قنديل قال للمخبرين: هاتوا لي العيال دول من فوق.. لموهم، وهددوهم يلبسوهم قضايا.
"يوم 14 يناير 2007 عيالي كانوا قاعدين على المكن بالليل.. الساعة 11 دخلوا على العيال بشوم وسكاكين وسيخ.. أنا كنت فوق.. وأبوهم مش موجود.. لقيت العيال بتصرخ ومجرجرينهم جر.. قابلوني على السلم.. ضربوني بالشوم على دماغي ودراعي ووركي.. أخدوا العيال.. عمي لفقوا له قضية سلاح.. وابن عمتي لفقوا له 13 ورقة بودرة.. بس كله تلفيق لان عمي طلع براءة.. شيلوا العيال قضايا بانجو وكل عيل أخد 3 سنين سجن.. كنا بنروح جلسات المحاكم بتاعة الأولاد.. كنت بأخاف أروح الزيارة..
"تاني يوم ما ضربونا رحت مستشفى المنصورة العام وعملت تقرير طبي.. كان عندي اصابات وتكسير عظام وأوجاع في غضاريف الضهر.. وقرروا لي علاج 21 يوم.. رفعت دعوى قضائية على محمد قنديل ومحمد معوض واستمرت التحقيقات في نيابة المنصورة ست شهور.. وقدمت شهود شافوا الضرب جوه البيت وبرضهحاجة خرج بيت.. الخشب والبلاط وكنت بأبنيه شويه شويه.. النيابة ما حولتش الضباط للقضاءالنيابة لم تستدع حتى المتهمين.
"فيه غفير اسمه "سالم النحاس".. كان بيخطط لمشكلة مع جوزي.. كان بيفتعل خناقات.. عشان يمسكوه.. وبالفعل هدده بالسلاح في شهر يوليو السنة اللي فاتت.. عمل له كمين عشان ياخدوه ومسكوه فعلا وربطوا ايديه ورجليه وقبل ما يحطوه في العربية قامت مشكلة كبيرة في البلد.. الناس اتلمت من كل حتة وسحبوا أحمد جوزي من البوكس بالعافية.. هربنا.. وسبنا البيت وهم قعدوا يدوروا علينا.. واحتلوا البيت وكسروه زي ما انتم شايفين وقبضوا على كل اخواتي من قرى تانية..
عزيزة محمد توفيق.. ضربوها بالخرزانه وجابوا اتنين مخبرين عشان يقلعوها هدومها قدام الأسرة.. أخوها صرخ وقال للضابط أنا بدالها.. اعمل في اللي انت عاوزه...
عايدة محمد توفيق: تعرضت هي الأخرى للتعذيب.
السيد محمد توفيق: لما تدخل عشان يحمي عزيزة من خلع هدومها أجبره ساعتها الضابط على تقبيل حذاءه وداس على راسه بالجزمة ثم حلق له على الزيرو وأمره بان يوقع على أي جريمة يختارها له وبالفعل أجبره على التوقيع على سرقة سيارة (صاحب السيارة رفض توجيه اتهام لشخص لا يعرفه). ساعتها قام قنديل بإلغاء المحضر وحرز له سلاح. السيد أيضا تعرض للتعذيب حيث قام رجال الشرطة بتعليقه عاريا وكهربته في هذا الوضع أكثر من مرة.
بعد أيام ألقي القبض على ناهد!
تقول ناهد:
"قلعونا كلنا هدومنا وعلقونا على الأبواب وبقوا يشدونا من الثديين وبرفعونا لفوق، وأنا قصوا شعري وكهربوني وعلقوني على الباب وربطوا في رجلي أنبوبة بوتاجاز وتركوني عشر أيام ايدي مربوطة في الحديد وعنينا مغمية أغلب الوقت ومنعونا من دخول الحمامات.. عملنا على نفسنا أكتر من مرة.. كنا بنحاول لا ناكل ولا نشرب عشان مفيش حمام..
"بنتي عندها 12 سنة عملت على نفسها الوسخ.. كانت بتعيط مش عارفه تعمل ايه.. أربع أيام مفيش حمام.. قلت لها اعملي يا ماما! ومسحت لها بهدومي!! فرجونا على اللي بيتعذبوا.. شفت واحد عريان ملط بيتكهرب والأطفال شافونا طول عشر أيام أنا وخالاتهم بنتعذب. كانوا بينتقموا مننا عشان ما عرفوش يمسكوا جوزي.. طب ما هو موجود ّأهه قدامهم!!"
نورا ومياده احتجزوا مع أمهم ناهد وتعرضوا للتعذيب.. "انضربوا، وهددهم الغفر أكتر من مرة بخلع الملابس والاغتصاب!"
بعد أن مر 10 أيام على تعذيب ناهد – وبعد ان تفجرت قصة التعذيب في تلبانه – نقلوا ناهد إلى البرامون هي وأولادها في حالة يرثى لها من الجراح والآلام والقذارة.. هناك أحضر لها الضابط عصام تليس صابون لها ولبناتها كي تستحم، كما أحضر لها ملابس بديلا عن الملابس الغارقة في القذارة.
نزلت ناهد النيابة في نقيطة بعد 13 يوم من انتهاء التعذيب.. تقول:
"أخدوني من غير بناتي.. كنت مرعوبة على البنات لدرجة إني ما ركزتش مع وكيل النيابة على واقعة التعذيب.. لكن حاولت أحكي له"
ناهد لا تعلم إذا كانت عملت بلاغ تعذيب أم لا.. كما أن وكيل النيابة لم يعرضها على الطب الشرعي!!
سبتمبر 2007
"

الثلاثاء، ١٦ أكتوبر ٢٠٠٧

هو ايه الى بيحصل ده شيخ الازهر ايه الى هو قاله ده ايه علاقه ليله القدر بالاشاعات والصحافه؟


ولا هى استكملا للمهزله انا اصلا مش مستغربه ماهو الى يقول ان اللاه المصرين واحد والى يلغى كتب الفقه الاربعه والى يلغى باب الجهاد يجامل ويقول اجلدوا الصحفين وارجموهم كمان علشان طلعوا اشاعات وقالول الحج صاحب البلد مات اصله يا جماعه مش ها يموت اه اصله لا بيقف فى طابور العيش ولا بيتعالج فى التأمين الصحى ولا بيشرب ميه
مشكوك فى مصدرها ولا ولا ولا ولا فا يموت ازاى دا احنا الى هانموت ناقصين عمر من الى احنا شايفينه فى البلد دى انا مش قادره اتكلم والا اطلع الى جوايه تعليقا على الكلام الى ليه مدلول سياسى ده بس مش خوف من حد لا احتراما لفضيلته مش علشان هو شيخ الازهر لا هو موظف زيه زى غيره متعين بكلمه زى الى متعين بيها العادلى ورشيد وغيره وغيره بس علشان شيخ الازهر قبل ما يبقى شيخ للازهر فهو عالم دين وكل مسلم ملزوم بأنه يحترم علماء الدين لانه امر ربانى وثانيا لان الشيخ الشعراوى باس ايد الشيخ سيد فى يوم من الايام
بس الى انا عاوزه اعرفه وياريت فضيله شيخ الازهر يعرفوا لنا هو فضيلته قال ان ده حقه فى التعبير عن رأيه فى مروجين الاشاعات طب يا فضيله الشيخ ورجاله العادلى والتعذيب الى بيعذبوه لمواطنين حضرتك ما عبرتش عن رأيك ليه لما الظابط اسلام ننبيه باشا بيه ابن الناس لما اعتدى على عماد الكبير وهتك عرضه فى قسم الشرطه وصور الى عمله على التليفون وكليبات التعذيب الى ماليه البلد بنات وشباب واطفال طفل شها يا فضيله الامام الى اتحرق واتعذب داخل قسم شرطه المنصوره حضرتك كان فين رايك والعباره الى غرقت ومات بسببها وسبب الاهمال الف تلاته وتلاتين مواطن مصرى الى السمك اكله والى النار سحبت فى جسده امام اعين ولاده ولا الى مات من البرد فى الميه دول ماتوا مش اتقال انهم ماتوا بس دول طبعا مالهمش سعر ناس رخيصه ممدوح اسماعيل فين فى لندن ولو يعنى الحكومه اتزنقت فيه ولا حد اتكلم البلكونه مستنياه مش كده وفين حق حضرتك فى النقد والناس مش لاقيه تاكل وبتعتصم من كتر الجوع
وفين شرع ربنا وحدوده فى الدنيا الى عماله تغلى والبطاله والاكل المسرطن والميه الملوثه الى حتى فيه ناس مش لاقينها وعايشين بقالهم سنين على الميه الجوفيه لما جالهم فشل كلوى وفين حد الجلد للستات الى بيتحرش بيهم بعلم رجاله الداخليه دافيهم ستات اطلقوا علشان اتكلموت وقالوا على الى حصل كان فين كتاب الله والست بتعيط امام الكاميرات وبتقول والله انا لامن كفايه ولا من الاخوان انا كل الى عملته انى كنت رايحه نقابه الصحفين يوم الاستفتاء على تعديل الدستور وتم التحرش بيها تحت قياده رجاله الامن الازهر كان فين وده بيحصل فين حق الناس دا حنا ما حصلناش دابه سيدنا عمر الى كان بيقول لو تعثرت دابه فى العراق لسئل عليها عمر والله ما حصلناه قبل ما تدور يافضيله الشيخ على حق الى عايشين فى شارم دور على حق الى عايشين فى العشوائيات دور قبل ما تشرع قوانين لترويج الاشاعات شرع قوانين للى بيزوروا فى الانتخابات والى بينتهكوا ادميه الناس ولو مش مصدق ابقى اسئل كده العادلى باشا عن الناس الى فى المعتقلات السياسيه بيتعمل فيهم ايه هما واهلهم بيتعمل فيهم ايه علشان يجبورهم على الاعتراف انا مش ها قول اكتر من كده
وللتاكيد على كلامى دى كليبات متصوره اثتاء انتخابات مجلس الشعب هى قديمه شويه بس بتبين مدى عداله ونزاهه النظام وصاحب النظام الى شيخ الازهر يوم ما دافع ما دافعش غير عنه وكان كمان فى ليله القدر طب كنت قول كده يوم ما فطرت فى الكنيسه كانت ها تبقى مبلوعه



الانتخابات

صور لعماد الكبير ضحيه الظابط اسلام نبيه بيه باشا ابن الناس


السلام على من اتبع الهدى
انا عارفه انى غبت عليكم بس قلت اسيبكم شويه فى اخر الشهر الفضيل وتعيدوا بعيد عن حرقه الدم
بس نقول ايه حرقه الدم ورانا ورانا الناس دى مش عاوزه تخلينى ابطل اكلم عنهم هما والله الى بيستفزونى انا كنت عاوزه ابعد عنهم شويه علشان بس الزهق اصلى بزهق بسرعه بس هما بقى الى مش عاوزين خلاص ذنبهم على جنبهم فى رمضان شهر العباده الناس عاوزه تصلى تهجد بعد واحده فى المساجد لاء ممنوع طب ممنوع ليه يقولوا لك الاوقاف طب يا ست الاوقاف ليه بلاش يقولوا لك هو كده صلوا فى بيوتكم قلنا ماشى وبعد كده العشره الاواخر الناس عاوزه تعتكف يقولوا لاءمافيش حاجه اسمها اعتكاف ايوه والله قالوا كده وزاره الاوقاف قالت كده مافيش حاجه اسمها اتعكاف على اساس ان النبى ما كانش بيعتكف كان بيروح يستجم ولما الناس زادت فى الطلب قالوا لهم الى عاوز يعتكف يجيب بطاقته
ااااااااااااااااااااه يابلد بطاقته علشان يعتكف الله يرحمك يا ابن العاص لو كنت تعرف بالى ها يحصل على البلد الى انت فتحتها ما كنتش فتحتها البلد الى بقى الى عاوز فيها يعبد ربنا بيتاخد بطاقته وبيتعمل عليه تحريات والى عاوز يغضبه فيها تتفتح له كل الابواب فى لحظه ميت خيبه رمضانيه جايبين فيها ساقطات وبيقولوا عليها مطربات الف قهوه بتقدم شيشه عشرات البارات بتقدم خمره ولا حد يقوله بطاقتك يا حج ولا باسبورك يا كابتن نقول ايه ومش كده وبس لا دول كان حددوا المساجد الى يبتم فيها الاعتكاف الى بقى متطرفه وفى الارياف والى تحت عنيهم وسكتنا زى ما بنسكت على كل حاجه مباقتش فارقه

الاثنين، ١٥ أكتوبر ٢٠٠٧

ونبدأ بقى بشويه حاجات كده حصلت فى شهر الصيام واهمها الصلاه فى المساجد كل سنه بتحصل ل الموضوع ده اول اسبوع من رمضان تلاقى المساجد مليانه ناس على اخرها فى اى وقت سواء فجر او ظهر وخصوصا التراويح تانى اسبوع تلاقى العدد خف شويه على اخر ايام الشهر ممكن تلاقى الامام والى وراه عامل المسجد انا بقى كان حظى حلو لان المسجد الى بصلى فيه بالنسبه للرجاله ملنوا هوالى صافين فى اخر ايام انما ليله العيد والله خمس رجاله ومنهم العامل والى كمان يغيظ ان على يمين وشمال المسجد قهوتين سورى قاصدى كافتريتين علشان بس ما يقولوش فلاحه والكافتريتين دول كانوا بقى فى حاله تزايد بالنسبه لعدد الزوار والصلاه شغاله ويسلام بقى على الليله الى وزاره الاوقاف المسلمه الى حنت فيها علينا وخلتنا نعتكف فيها والله طول الليل والكافيتريتين مليانين ناس اصل شباك مصلى الحريم بيطل على واحد فيهم وانا كنت كل شويه اشوف ايه الاخبار والى منعنى من انى انزل اصورهم وهما بيشيشوا والفجر على وشك الاذان انى كنت ناويه الاعتكاف وما ينفعش انزل واسيب المسجد فى الليله اليتيمه الى هما سامحين لنا بيها مع ان الى بيسهروا فى القهاوى والخيبات الرمضانيه قصدى الخيمات بيسمحوا لهم بالسهر طول الشهر من غير اى مشكله وفى الاخر يقولوا لك ازهر واسلام وعلماء وبلد مسلمه الصور دى انا اختها ليله 28 وعلش صور الكافيتريات بعيده شويه اصلى خفت اقرب شوبه حد يقولى بتعملى ايه وكمان صوره المسجد وهو بينش فى نفس الليله الصوره متصوره من فوق من فتحه النص الى فى مصلى النساء

السبت، ١٣ أكتوبر ٢٠٠٧


الجمعة، ١٢ أكتوبر ٢٠٠٧

كل عام وانتم بخير

العيد السبت فى مصر وفى معظم دول المنطقه العربيه الجمعه

حتى العيد اتفقوا لى ان لا يتفقوا

انتظرونى بعد العيد حاجات كتير محوشاها من الشهر الفضيل ها نشرها بعد ما اكون لميت العيديه

فالتحيا الانوثه من اجل العيديه