الاثنين، 19 أكتوبر 2009

وبعد مانتكلم

انه الاحباط
البش مهندس أحمد أبو العلا عامل بوست حلو بيقول اتكلم
بيقول الناس بطلت تتكلم ليه على مدونتها
أنا بقى هاقولكم أنا واحده من الناس بطلت أتكلم كتير ليه
أصل الواحد هايتكلم عن ايه ولا ايه
كل الكلام يوجع القلب ويرفع الضغط ويجيب جلطه
خدوا مثلا عندكم أول حاجه
الحكومه المحترمه العظيمه بتاعتنا خلاص مابقتش عارفه تتشطر على الزباله الى ملت الشوارع ولا على الفوضى ولا الفساد قالت اتشطر على ايه
مافيش غير النقاب
ولقينا شيخ الأزهر بدل ما ياخد باله من أعظم قلعه اسلاميه فى العلام والى بتنهار علميا واخلاقيا
بقى شغله الشاغل انه يمنع النقاب فى المعاهد والجامعات الازهريه وبمنتهى التصلت
ويليه وزير التعليم العالى هو كمان بدل ما يشوف حال التلامذه الى بيتخرجوا وهما حمير مع مرتبه الشرف نظرا لانعدام جوده التعليم
وحال الدكاتره الى لايسر عدو ولا حبيب هو كمان بيمنع النقاب
وكمان بالمره وزير التربيه والتعليم الى نص المدارس الى عنده ماتصلحش تكون غير ورش لحام
هو كمان بيمنع النقاب
يسلاااااااااااام
هو ده الى ربنا قدركم عليه
طب بدل ماتتجنوا على حريات الأخرين شوفوا حل للموضوع
يعنى المدن الجامعيه يتمنع فيها لبس النقاب اه بس يكون كل الموظفين ستات مافيش رجاله
تتأكدوا من هويه المنتقبه وهى داخله الجامعه ماشى بس ليه ماتكنش ست هى الى تتولى الموضوع ده ومش شرط الجامعه يبقى فى كل المصالح الحكوميه كمان ويبقى حلينا الموضوع من غير هيافه الناس تضحك علينا بسببها
نيجى لموضوع غيره
شوبير ومترضى
اتنين ما يفرقوش عن بعض يعنى تقدر تقول وجهين لعمله واحده
الاولانى عضو مجلس شعب والتانى مستشار وعضو مجلس شعب سابق
والاتنين تييييييت من بعض(الى عاوز يحط كلمه يحطها انا سيباها مفتوحه)
ماكفاهمش تخريبهم هما وأمثالهم فى نعش الرياضه فى مصر وتسيثها
لا كمان بدأويطلعوا قذارتهم على الناس
كل واحد زى شوبير يتفضح يروح يلم له شويه ناس مرتزقه هتفوا باسمه
كلنا عارفين من هما الناس الى ممكن يسيبوا مشاغلهموالى وراهم ويروحوا يهتفوا لواحد زى شوبير
ثقافه الشحاته والتنطع الى شوبير ومرتضى وأمثالهم نشروها بين الناس
وغير كده يطلع علينا الكابتن القدوه فى القناه الملاكى بتاعته يدافه عن نفسه ليس بأدله نفى
ولكن بكلا شعارات كلنا حفظينه
دول قدوه دول؟
ده اعلام محترم ده؟
دى بلد دى؟

غيره

ينفه يعنى بلد المفروض محترمه زينا
يكون همها وحلمها القومى هو وصول المنتخب لكاس العالم
هو ده حلم مصر ؟
هو ده همنا الأوحد ؟
طب مش عيب وحرام وربنا هايحاسبنا
انا مش عارفه ربنا هايعمل فينا ايه اكتر من كده

الختامه
هدى عبد المنعم خدت براءه
الست أصلها سددت الفلوس الى سرقتها وهربت
جت سددتهم بعد عشرين سنه
بعدما هربت بيهم باره وشغلتهم وكسبت
جت رمت لنا ملاليم ولا ليهم اى قيمه حاليا
وخدت براءه
هو ده العدل وهو ده الحق
وهى دى مصر ياعبله

هناك 12 تعليقًا:

أحمـــــــــــــد أبو العلا يقول...

استني بس احسن عبله تصدقك
عبله متصدقيش ياعبله

ديه مش مصر
ديه مش احتا ياعبله
معلش ياعبله اصل بنت المنصوره قرفانه شويه
اصلها بتحب مصر وبتحب المنصوره

بس هنعمل ايه ياعبله
هنسكت ونكتم في نفسنا؟
لااااااااااا
ربنا انعم علينا باللسان وهيحاسبنا على كلامه وسكاته

وبعدين يعني نطق نموت؟ فشر ياعبله, فشر وغلاوة عنتر عندك ياعبله

نتكلم يمكن واحد يتهدي بكلمه مننا
نتكلم يمكن واحد ربنا يخفف عنه الحزن بحرف عندنا
نتكلم عشان نحس بغيرنا وغيرنا يحس بينا

norahaty يقول...

هدى عبد المنعم
خـــــــدت براءة!!
أمتى معلش اصلى مبطلة
جرايد بقى لى شوية وأخر
مرة قرأت انها اتحكم عليها
بخمس سنين؟

صمت المشاعر يقول...

سوري ان اقولك هي دي مصر ام الدنيا

thunder يقول...

ممممممممممم
هوانا مش قولتلك بطلع لعب فى عداد
عمرى انا قولتلك سجن القناطر منين
تانى
وبعدين مالك انتى ومال اعلام البلد ورموزها الكريمة امثال المفغور له
احمد بيك شوبير والممؤسوف على شبابة مرتضى باشا
يابنتى دول لازم كدا يكملو منظومة الفساد وحالة التخبط اللى بنعشها دول نتائج ثقافة السبكى وزمن احمد عز
المشكلة والله مش فيهم بقدر ما هى فى اننا سبين الاشكال دى تتمنظر علينا وتوصل على حسبنا لمراكز مهمة وبدون مقابل
فاهمنى
بهنيئك والله على بوست الجامد دااااااااا
جدااااااااااا
جدااااااااااا
ومتخافيش وراكى بعيش وحلاوة فستق مكان ما تروحى
اختى العزيزة دمتِ فى رعاية وحفظ الله دائما يارب

nody يقول...

احمد أبو العلا


عبله ماتت ياهندسه


حتى موضوع الاحساس ده بقى نادر قوى
عند ناس كتير

شرفتنى

nody يقول...

norahaty


لا الدعاوى صقطت بالتقادم

ياستى مااحنا قلنا يحيا العدل

nody يقول...

صمت المشاعر

هى اه ام الدنيا بس بقت مرات ابونا


شرفنى مرورك

nody يقول...

thunder


عيش وحلاوه لا انا عاوزه لانشون حلوانى وفراخ بانيه

تجيب فيروز توت

Soul.o0o.Whisper يقول...

السلام عليكم و رحمة الله و بركاته

أولا سعيدة بالتعرف عليكى فى اللقاء
و يارب مش يكون الأخير :)


و يارب بئا ترجعى تكتبى فى مدونتك تانى

مستنيين جديدك :)

دمتى بكل الخير

قلم رصاص يقول...

مابلاش بقى الكلام ده

شعب فقري ومبيجعبوش العجب

هههههههههههههههههه

انتوا عاوزين ايه اكتر من كده

ميه بمجاريها مع عيش بمسامير والشعب

يعمل اعلى دماغ ههههههههههه

سبيها لله بس اليومين دول

وانا متوقع ان البلد هتتغير والله

فيه حاجة جديدة ان شاء الله انا متوقع

حصولها في الفترة الجايه

دمتي على خير

بنت مصريه يقول...

عندك حق والله
خلاص هى دى بقت همومنا
بوست جميل اتمنى تنورينى

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت