الخميس، ٢٣ يوليو ٢٠٠٩

وعاوزنا نرجع زى زمان

تحديثمقالى التانى فى مجله رؤيه
راحه على الفراعنه



فى روايه مشهوره ليوسف ادريس اسمها السيده فينا

الروايه دى كان البطل فيها فلاتى وبتاع حريم وكان مسافر تبع الشغل لااوربا اول ما خلص شغله راح على فينا

راح علشان يتأكد من كلام أسمهان على ليالى الأنس فى فينا

أصحابه مدحوا له فى ستات فينا وهو مكدبش خبر وقالوا له
وهما ماهايصدقوا يشوفوك
دا انت مصرى
فرعون أصيل
وقد كان أى نعم درش صبر كتير لحد ما وجد الى هو عاوزه بس لقاه
وهى صارحته انها نفسها تجرب مع أفريقى
حس درش ساعتها بالفخر
وطبعا اى واحد مكانه يحس بالفخر لما يبقى الحريم الخوجات مش مالى عينهم رجالتهم ونفسهم فى راجل مصرى او افريقى عامه
اهى حاجه اتقدمنا فيها
ماهو مش كل حاجه هما يسبقونا فيها
أدينا سبقناهم وعلمنا عليهم كمان
بس للأسف الأسيف والخزى الشديد
الكلام ده زمااااااااااااااان
دلوقت خير اللهم ما تجعله خير كل ما تدخل صيدليه
ولا تفتح التلفزيون تلاقى ايه
لامؤخده يعنى فى الكلمه يعنى أدويه منشطه
مره واحده قاعده تشتكى لجارتها وتقولها حلمد مش جامد
ومره واحد ومراته بيتخانقوا ودخل ياخد الحبايا خرج اتصالحوا
وواحد تانى يطول فى الشارع بعد ما خد الحبايه
وواحد تانى بيشتكى لصاحبه والتانى يقوله ماتخفش بعد الحبايه
هاترقص وتجيب اجوان على أساس انه رأس حاربه يعنى
يعنى الواحد كان ماصدق انه يخلص من تناحه اعلانات الفياجرا
بتاعه المسامير والشالمونتات
يجى لنا القرف ده؟
طب على الأقل الفياجرا حاجه عالميه مش تهمنا أوى
انما دول بقى الجداد أدويه مصريه
والمصيبه مش فى طريقه الاعلان
المشكله انهم جايبين فى الاعلانات الواحد منهم سنه ما يعديش 35 سنه
يانهار اسود
35سنه
وعاوز أدويه
لييييييييييييييه
دا دلوقت الواحد ما بيتجوزش غير على مشارف 30
وفى اكتر
يعنى يتجوز وبعد سنتين تلاته ياخد منشطات؟
طب والى عنده 35 ياخد بقى من قبل ما يتجوز ماهو يادوب
انا سمعت من دكاتره متخصصين فى التلفزيون ان المنشطات دى ما تتاخدش غير بعد الاربعين وبمراحل كمان
انما بدرى كده
دى تبقى فضيحه بجلاجل
وعار فى حق أجدادنا الفراعنه
يعنى حتى دى ما بقوش فالحين فيها
ناقص ايه تانى؟

السبت، ١٨ يوليو ٢٠٠٩

أنا هناك

خبر هام
ده اول مقال ليه فى مجله رؤيه
اتفضلول شوفوا وقولوا رأيكم
انا عارفه انه مش حلو اوى بس دى
اول مره وأدينى بتعلم ومش هالاقى احسن منكم أجرب فيه
يالا على هناك
وتابعونى كل سبت هناك بارضه


الأحد، ١٢ يوليو ٢٠٠٩

حاكموا حواء

حواء المذنبه

يوم من الايام كنت يادوب لسه انا وجدتى وعمى وصالين البلد
عمى راح مشوار وفضلت انا وجدتى
شويه وجت واحده قريبه جدتى تشوفنا
وقعدوا يتكلموا مع بعض وانا كنت قاعهد بعيد عنهم بشويه والنوم عمال يغازل عيونى الى مش متعوده تفتح بدرى كده
بدأوا كلامهم وانا مش مديه لهم ودنى كنت مركزه اوى فى النوم وعماله الوم نفسى انى جيت معاهموصحيت بادرى كده
وسخن الحديث بينهم وكانت جدتى بتتطمن على احوال البلد وناسها وايه الى حصل فى اليومين الى هى غابت فيهم
وكله تمام
لحد ما سألت جدتى عن ناس قرايبها
وكان الحديث كالتالى
جدتى وايه اخبار عمك(اخو جوزها يعنى سلو بلدنا كده)

هى كويسين بس الواد ابنه غضب مراته عند اهلها
جدتى ليه؟
هى ضربها وبهدلها قامت البت خدت بعضها هى وبنتها وراحت بيت ابوها
جدتى ولم يهتز منها شعره ليه تانى؟
ه ى نفس المره الأولانيه علشان مهله مش نضيفه فى شقتها
انا بقى فى الوثت ده صحصحت ونفضت النوم من عنيه
واقتحمت الحديث وعنيه بتطق شرار
انا يعنى ايه ضربها يعنى ؟
هى ضربها هى دى عاوزه يعنى ايه
انا ا اه يعنى ازاى ضربها
هى بالحزام باين ولا بعصايه
انا لا والله اللهى تتقطع ايده وتنكسر رقبته البعبد
هى ليه كده يابنتى؟
انا ( والغيظ خلاص ها يقتلنى )هو ايه الى ليه؟ هى عرسه؟ ولا فار؟
هى ماهى مش نضيفه ومهمله
انا ا ولو ليها اهل ما نفعش معاها الكلام والهجر والضرب الشرعى مش تمويت العرس ده يوديها لاهلها هما يتصرفوا معاها مش يضربها بالحزام
هى وفيها ايه مش جوزها
انا جاز عليه الهم هو واخدها من الشارع دى بنت ناس وبعدين تعالى هنا اهلها عملوا ايه (مع العلم ان البنت دىعيلتها من اكبرعائلات البلد)
هى ولا حاجه ها يعملوا ايه
ان ا ولا حاجه طب ماهو ليه حق
وبعد كده اتدخلت جدتى وانا فضلت الانسحاب بدل ما نبتديها بخناقه مع بعض والناس فى البلد ودانها دايما مرميه على باب الجيران
لكن الموضوع فضل فى دماغى ودبابير عماله تدور فى الجمجمه
ازاى يعنى واحده ست تقبل بموضوع الضرب من واحد علشان هو جوزها؟
يعنى هو علشان اتجوزها بقى خلاص اصبحت هى عبده ليه
ومن حقه انه يضربها ويلعن لها ابوها كل الى جابوها
الست الى بتدافع عن الحلوف الى ضرب مراته ده ست ومتجوزه ومخلفه بنات
يعنى لو بنتهاجوزها ضربها هاتقول لبنتها معلش استحملى
ومش كده وبس اكيد هى ربت ولادها انه بدام هو راجل يبقى من حقه يضرب ويهين الست
وأهل البنت الى انضربت دى ازاى بنتهم نتروح لهم مضروبه ومتبهدله كده ويسكتوا
اه هى غلطانه
بس مش لدرجه الضرب والاهانه
دا هما اكيد بيخافوا على البهايم بتاعتهم اكتر من كده
فضلت افكر وافكر
لحد ما بقيت مؤمنه اكتر من الاول
ان سبب ظلم حوا
هى حوا
هى الام الى فضلت ابنها عن بنتها لما قومتها من على الاكل تجيب لاخوها يشرب
هى الى سمحت لابنها يخرج ويتفسح ويتصرمح واخته تتحبس والنفس يتعد عليها
هى الى ربت بنتها على انها مخلوق درجه تانيه والراجل هو محور الكون
سلبتها حقوقها
قالت لها لما جوزها شتمها وضربها معلش استحملى ده جوزك
عيشى علشان عيالك وبيتك
محدش ظلم حوا غير حوا

الأربعاء، ٨ يوليو ٢٠٠٩

مجرد سؤال

مش هانخلص بقى ؟1



سمعتوا اخر الأخبار

خير اللهم اجعله اكمالا لدور المغص والاسهال الى عملوه لينا من كام سنه بمسلسل العندليب

وبعديه ناصر رضى الله عنه

ها يكملوها السنه دى بالمشير عبد الحكيم عامر

يعنى الواحد يلطم ولا يصوت ولا ينكش شعره ويجرى ورا عربيه الرش ؟؟؟


مع كامل احترامى لكل من ساهم ولو بشكل غير مباشر فى وكسه يونيو

بس ليه يقرفونا ويزهقونا بمسلسلات عن حياتهم يعنى؟

قدوه؟

هانتعلم منهم ايه يعنى؟


كلنا طبعابنشوف المسلسلات الى من النوع ده
لما بتتعمل
بيطلع الشخصيه ملاك نبى من الأنبياء وكل الناس التانيه هما الى شياطين
مافيش ولا غلطه ولا حتى سؤ تصرف ولاحتى ذنب واحد الشخصيه بتعمله
وطبعا ده منطقيا اسمه فشر
ومن النوع التقيل كمان
يعنى الواحد يجهز نفسه مسبقا انه ها يشوف قصيده مدح مطوله لمده 30 يوم ن غير اى فايده
لان من الناحيه التاريخيه ها يكون فيه كالعاده مجامله واستعباط على اساس اننا اغبيه وما بنفهمش
وزى ماطلعوا ناصر نبى على حساب الى حوليه
ها يطلعوا حكيم هو كمان نبى
ومش هانبقى عارفين فين الحقيقه