الأربعاء، 9 ديسمبر 2009

ولسه بيتكلموا عن العنوسه

الجواز مش هايغلا لأنه غلا خلاص
ازيكم يارفاق (حلوه رفاق يجعل كلامنا خفيف على أوباما)أنا النهارده حبيت أكلمكم فى موضوع حلو كتير
الا وهو موضوع الجواز والمغالاه فى الجواز والى اتسببت فى العنوسه
أنا من زمان بقول أن البلد بتاعه بابا بيغالوا قوى ومفترين فى كل تفاصيل الجواز
يعنى مثلا عندنا فى البلد
فى يوم الشبكه
يودى شنطتين سفر مليانين هدوم للعروسه
داغير الفاكهه والذى منه وطبعا ده غير حق الشبكه
وطول فتره الخطوبه المواسم دى لازم تروح لعروسه تالت ومتلت واحد من البندر يقول يعنى ايه المواسم
اقولكم المواسم دى الى هى سبعه وعشرين رجب ونص شعبان واول رمضان والعيد الصغير والعيدالكبير ومولد النبى وعاشوره وشم النسيم
شفتوا شم النسم بقى عندهم موسم
وغير كده اما الفرح يجى لازم العريس يودى عشا العروسه
الى هما دقيق الكحك والبسكوت وكل اللاوزم بتاعتهم ومايقلش عن 100 كيلو دقيق
ده طبعا غير الفرح واى مصاريف تانيه
وده بعيد عن العفش الى لازم يكون مش أقل من أى حد قبله
ده بالنسبه للعريس
نيجى للعروسه
العروسه فى فتره الخطوبه مابتكونش مطالبه بأى التزامات غير مصاريف حفله الشبكه يعنى الاكل والفستان والزفه وكده
نيجى بقى للجهاز
حدث ولا حرج أنا شخصيا لوكان حد حكى لى ما كنتش هاصدق بس انا شفت بعنيه لو أقول لكم جهاز يكفى 3 عرايس ممكن تقولوا انى ببالغ
بس هى دى الحقيقه
العروسه عندنا مابتجبش اقل من 15 طقم سرير للسرير الكبير و15 زيهم لجوز السراير الصغيرين
واعداد مهوله من الفوط
وحاجه المطبخ بقى تكفى لتجهيز مطعم من اطقم الحلل الكتير لحد كوبيات الشاى وده طبعا غير النيش
ووتسمع بقى عندن اعن الى استلف وكتب على نفسه شيكات علشان يجهز بنته
ولا الارمله الى باعت القراطين الى حيلتها عشان تجهز بنتها وماتخليهاش اقل من حد وحكاوى لها العجب
وياريت المأساه بتنتهى لحد هنا وبس
لا الى راح للعروسه بط بط فى الخطوبه بيطلع على ابوها وز وز من بعد الفرح
من اول الصباحيه
لحد بقى المةاسم الى بيفضل يوددوها لها طول ما البنت دى عايشه
انشالله تبقى عندها 100 سنه
هو كده
أنا كنت فاكره أن ده فى البلد وبس
لكن لما اتفتحت السيره مع زمايلى فى الجامعه والى هما بارضه الى اصل أباهاتهم من بلادأرياف وعايشين فى المدينهزينالى فعلا عايشين فى بلاد ارياف
ولقيت اننا رحمه عن ناس كتير
يعنى مثلاواحده قالت لى دااحنا عندنا فى بلدنا العروسه لازم تودى تانى يوم الشبكه رد الشبكه وده عباره عن عربيه ربع نقل حاجات
أرز ودقيق ومكرونه طيور
والعريس يودى لها بعدها رد رد الشبكه
ودى لازم هديه دهب
وطبعا عندنا لازم فى الجهاز من كل حاجه اتنين وتلاته من اول الاجهزه الكهربائيه لحد المقشات
وغيرها قالت ان الشبكه عنده على ابو العروسه وما بيقلش تمنها عن 15 الف
والى قالت ان العروسه هى الى لازم تودى عربيه مليانه بارضه حاجات لاهل العريس قبل الخطوبه
والى قالت ان عندهم لازم فى الجهاز ام العريس يروح لها أوضه كامله سرير بمرتبته ودولاب وسجاد بس دى كانت من دمياط
وساعتها اتاكدت ان مش المنصوره بس الى كده الظاهر ده وباء وانتشر فى الدلتا كلها
بس الى انا مستغربه له بقى ان ليه الناس بتعمل فى نفسها كده
غير ان ده حرام ومخالف للشرع
ليه الناس تخنق نفسها وتستلف وتدين علشان بتبص لبعضها ؟
للدرجه مابقاش فينا عقل ولا بنحسن التصرف؟
وسايبين نفسنا لابداعات الناس المتخلفه الى عايشه فى غيبوبه؟
والمشكله ان مش فى الرف بس المغالاه دى
وفى المدينه كمان مغالاه
عارفين المشكله الى بحد ان فى الريف ده مش مشكله اوى لان هناك العريس يبقبى بنسبه تسعه وتسعين فى الميه عنده شقه ابوه بيكون بنيها لهوغير كده نسبه العنوسه شبه معدومه
انما فى المدينه ده مش موجود الحياه اغلى واصعب ونادر لما يكون واحد عنده شقه وبيطر انه ياجر وده لوحده مشكله
والعروسه ابوها بيبقى يادوب قدر يعلمها ولا يربيها ويلاقى نفسه بين نارين انه عاوز يفرح ببنته ومايخليهاش أقل من حد
وان هو يكسر بخاطرها
وهنا مافيش أبلغ من كلم الله عز وجل(وما ظلمناهم ولكن كانوأنفسهم يظلمون)

هناك 21 تعليقًا:

thunder يقول...

يووووووووووووه يحرقك يابنت بلدى هى ناقصة يابنتى سدة نفس
على راى عادل امام فعلا بلاد مغالاة صحيح
على فكرة يمكن سبب من اسباب فعلا احجام المجتمع الشبابى عن الزواج هو المغالاة الغريبة اوى اوى فى كل الاسر المصرية المفروض يعنى انهم متابعين للحياة فى مصر ومش الاسر دا عايش فى دولة والشباب فى دولة طيب نفترض بنت يتيمة بقى ومحدش بيعولها هيبقى موقفها اية او العكس شاب ولا يملك من مقومات الحياة الا صحته هيعمل اية فى ظل الظروف والمغالاة اللى تحرق دى وفى المقابل ياريت بقى ان الموقف بيقف زى ما قولتى على كدا الا انه مستمر فى الارتفاع كل يوم ومستمر فيما بعد الزواج دا لو حاصل يعنى فى موضوع المواسم دا ولسة يا ما هنشوف يابنت بلادى لا حكومة نفعة ولا اسرة شفعه
بنت بلدى دمتِ يااااااااااارب بكل حب و ود وفى رعاية وحفظ الله دائما ياااااااااااااااااااااارب وتهنئى على البوست دا لانها هيعمل مناقشة كبيرة اوى ودا حقد وغل طبقى

أحمـــــــــــــد أبو العلا يقول...

العقده في العقل
ادام مفيش عقل وفيه ناس ماشيه في القطيع زي غيرنا اشمعنا احنا يعني يبأه نتوقع اي حاجه
ربع نقل بأه ولا نص نقل
هيا هيا

Atef Shahin يقول...

السلام عليكم
هناك مشاكل اقتصادية تعوق الزواج ولكننا بتصرفاتنا الخاطئة وتقليدنا الأعمى نزيد من المشكلة

تحياتي

قلم رصاص يقول...


أصبتي كبد الحقيقة في مقتل

نفس الكلام ده كله عندنا بالحرف وانيل كمان .. ربنا يهدي الناس دي بقى

العند والغيره شوفتي بيعمل ايه ؟!

يعني الأهالي يخربوا بيوتهم ماليا عشان يتفشخروا ادام بعض وادام الناس..!

فعلا ده مش مشكلة اوي في الريف زي المدينه .. دي حقيقة وللاسباب اللي انتي قولتي عليها .. برافو عليكي والله

دمتي مبدعه

وكل لحظة وانتي طيبة

في امان الله

Moustafa يقول...

والله يعني ده اسمه اقولك ايه بس مش عارفه بس حرام حرام حرام

ادعيلي قريب ارد على البوست بتاعك ده ببوست عندي بس ادعي وهتفهمي بعدين

لعلمك انا بحب مواضيعك جدا وانا من المنصوره كمان بلديات اهو ياقمر وان شاء الله نتعرف فعلا لان نفسي اعرف اي مدونه من مدونين المنصوره فياريت

Lady E يقول...

ايه ده اوضة كامله لمامة العريس وفي دمياط ! انا اول مرة اسمع الكلام ده :)

بجد صعبه اوي كل المغالاة دي المشكلة الحقيقة ان الناس بتغير من بعض وبتقول اشمعنى فلانه تجيب حاجات اكتر من بنتي وبيبقى في منظره في جهاز العروسة

nody يقول...

thunder


وانت تحرقنى انا ليه هو انا الى بدعت الحاجات دى ؟

وبعدين احجام شباب ايه
؟ الاحجام ده لما تكونوا قادرين ومش عاوزين
انمت انتم لاحول ولا قوه الابالله
حالكم عدم
ربنا معاكم هههههههههه

تحياتى ياابن بلدى

nody يقول...

أحمد أبو العلا


نص نقل كمان ياشيخ اسكت لايمسكوا فى كلمتك
دافى ناس مابتصدق ويقولوا فى ناس بتودى نص نقل وتبقى موضه احمد ابو العلا


شرفتنى ياهندسه

nody يقول...

atef shahin



فعلا عندك حق احنا الى بعقليتنا بنعقدها اكتر على نفسنا


نورتنى

nody يقول...

قلم رصاص


انتم كمان عندكم كده
داانا فاكره انالمنزله اكتر تمدن من بقيه مراكز المنصوره
بس الظاهر هو وياء وانتشر فى مصر كلها


نورتنى ياابن بلدى

nody يقول...

moustafa


يارب ياسيدى ترد ببوست عندك
وافهم انا بعدين

وانا كمان يسعدنى انى اتعرف عليك

نورتنى

nody يقول...

lady E


والله ياحبيبتى احنا جمبنا واحد متجوز واحده من دمياط وجايبه لمامته كده

وانا كنت مستغربه وبعد كده سمعن عن الموضوع ده
بس هو مش فى دمياط نفسها ارياف دمياط

شرفتينى ياجميل

blue-wave يقول...

ماخلاص
لغوا الجواز:))
هوا محدش قالك؟؟؟

nody يقول...

blue-wave


والله ولا حد جاب لى سيره

Dr Ibrahim يقول...

أيون حدانا فى البلد
الشيل دى حاجات مهمة جداً بعد الخطوبة
والعزومات
العزومة لواحدها تكلف شىء وشويات
سول بلدنا بقى
بس والله ناس كان فيها الخير
الحاجات دى قلت شوية الوقتى

nody يقول...

هنا تسكن روحى


انت الى حظك كده

وبعدين انا ما افتكرش ان الصنين هما الى هايقدروا يحلوا المشكله دى
مافيش غير التركوه هما الى عندهم الحلول


نورتنى

nody يقول...

Dr ibrahim


والله يادكتور لو قلت تبقى بشكل طفيف جدا

لان سلو بلادنا صعب يتغير


شرفتنى

dr.lecter يقول...

جرام الدهب بقي ب 200 جنيه

يعني اجيب شبكه ب 25 الف علي الاقل

يعني مطلوب يكون مرتبي 4 الاف جنيه علشان اعرف اتزوج واعيش عيشه مرتاحه كويسه انا والبيت اللي هصرف عليه

سلامات يازواج

واحدة مفروسة يقول...

ايه يا بنتى ده كله؟؟؟؟؟
انا اول مرة اسمع ان الارياف بيعملو كل ده

بس تصدقى
لازم ثقافة الناس تتغير و العادات بتاعة زمان ما ينفعشي تمشي مع ظروف حياتنا دلوقتى
طيب و عاوزة البنات و الاولاد يتجوزوا؟؟؟!!
ربنا معاكم

nody يقول...

dr.lecter


دا الاربعه دول علشان تعيش
امال علشان تتجوز ؟؟؟؟

يبقى مافيش غير ان كلكم تشتغلوا حراميه
اقصد يعنى رجال اعمال

nody يقول...

واحده مفروسه

فعلا هى دى ثقافه القطيع
كله ورا كله

ربنا فعلا معاهم