الخميس، ٢٧ سبتمبر ٢٠٠٧


واعتبره دورىوراح
حسبى الله ونعم الوكيل


مش عارفه ليه انا كده ليه انا من دون الناس الى بيجرى ليه كده بشجع فريق ما سابش نادى الا واتغلب منه يبقى لسه الفرقه بتتكون وشاحتين لهم مدرب يدربهم وبارضه يتغلبوا منهم والله ما خالوا فريق الا واتغلبوا منه


طب والاهلى و قلنا الحزب الوطنى طب والاسماعيلى وطلايع الجيش هما كمان نتغلب منهم دول بس الموسم ده يا للهوى بقى لو جبنا سيره الموسم الى فات خد عندك المصرى والمحله والاهلى والفيصلى الاردنى والهلال السودانى ما سبوش وطلعوا لادورى ولا كاس مصر ولا افرقيا ولا البطوله العربيه


وقلنا السنه دى هناك امل يارب انفخ فيهم بس تقول ايه المنحوس منحوس


يا ناس انا زهقت كل مره نتغلب كده نفسى افرح واقول فريقى خد بطوله ان شالله دورى الشركات


والى يغيظك بقى انه مش هزيمه وبس لاء يا باشا فضايح كمان جيمى بيه جاب ضربه جزاء يقوم فتوه اللعيبه يصمم انه هو الى يشوط على اساس انه نسى البلنتى الى ضيعه يوم الاهلى ولا بلاش نفتكر ذكرياته احسن وجيمى كان عاوز يشوط هو اللبلنتى واتخانقوا فى الملعب على مين يشوط البلنتى والله يا جماعه المنظر ده عمره ما حصل حتى فى مركز شباب الحوامديه بس ده بقى اكسكلوسف عندنا


وطبعا الفتوه ضيع البلنتى وخرجوا مغلوبين من الطلايع زى السنه الى فاتت وكأن التاريخ يعيد نفسه وعلى راى زميلى فى العذاب الزملكاوى عمرو دياب نقول ايه خلاص انا وانت حبيبى ما فيش حاجه نقولها


والعاقبه عندكم يوم ماتش المصرى
اضراب عمال غزل المحله

دخل اضراب عمال غزل المحله يومه الخامس ومن جانب الحكومه لا جديد

حوالى عشرين الف عامل متجمعين ومضربين وبيطالبوا بحقوقهم البسيطه

على فكره الناس دى لا بتطالب بمرتبات مساويه لمرتبات وزاره السياحه ولا الكهربا ولا حاجه ولا بيطالبوا بتخصيص وحدات مصيفيه علشان يدلدلوا رجليهم هما كمان فى الميه

الناس دى بتطالب برفع بدل الغذاء بما يتناسب مع ارتفاع الاسعار وبالحصول على مكافائتهم الى اتوعدوا بيها ما بيطلبوش حاجه اكتر من حقهم بس نقول ايه

حسبى الله ونعم الوكيل

الصور ماخوذه من مدونه عمال مصر

الأربعاء، ٢٦ سبتمبر ٢٠٠٧

حتى اريتريا
أكد مصدر دبلوماسي بالسفارة الإريترية بالقاهرة، أن السفينة المصرية المحتجزة في إريتريا منذ أربعة أشهر وعلي متنها ٢٣ صياداً مصرياً،
اخترقت المياه الإقليمية الإريترية، موضحاً أنها مسألة تتكرر كثيرا، باختراق سفن صيد مصرية وغيرها منذ بداية التسعينيات. وقال المصدر في تصريحات خاصة لـ«المصري اليوم»: «إننا ندرس حالياً التوضيح الذي طلبته الحكومة المصرية حول هذه القضية ويتابعها السفير المصري في أسمرة». وشدد المصدر علي عدم وجود أي مشكلة بين القاهرة وأسمرة أو الشعبين المصري والإريتري، وإنما هي مخالفات قانونية تحدث هنا وهناك.
في المقابل، أكد زكريا ناصر مالك المركب، أنه لم يطرأ أي جديد علي مشكلة السفينة المحتجزة وطاقمها، مشيراً إلي أنه قام بالفعل بتوكيل محام للدفاع عن السفينة وطاقمها أمام القضاء الإريتري .
ونورت مصر

الثلاثاء، ٢٥ سبتمبر ٢٠٠٧























مسلسلات رمضان
كل عام يهل علينا شهر رمضان وفى جعبته العديد والعديد من المسلسلات حتى اصبحت هذه المسلسلات علامه مميزه من علامات هذا الشهر ولكن اللافت للانتباه الى ان نجوم السينما القدامى اصبحوا من اعلام هذه المسلسلا امثال الفخرانى ونور الشريف ومحمد صبحى ويسرا والهام شاهين وغيرهم وكل عام تاْتى الينا هذه المجموعه من المسلسلات بظاهره مختلفه فمثلا العام الماضى كان هناك لوبى المحجبات امثال صبرين وسهير رمزى وحنان ترك وسهير البابلى والغريبه انه حتى قبل عرض مسلسلاتهم قامت الدنيا عليهم من جميع الناس سواء مخرجين او مؤلفين او ممثلين لم يكونوا ينتقدوا العمل كا قصه او كا احداث او حبكه دراميه او الى ما اخر ذلك من معاير الحكم على العمل الفنى ولكن كان النقد على الحجاب واستحالت توظيفه من وجهه نظرهم فى التمثيل مما يعنى انه كان كل الهجوم على الحجاب
وليس العمل بحد زاته وهذه هى الماساه الحقيقيه

اى عندما تظهر الفنانه بهدوم مثيره او حتى بالمايوه يكون الامر عادى ولا هناك اى شىء غريب ولكن عندما تتحجب المراْه وترفض ان تقوم بمشاهد مثيره او مخالفه للشرع تكون بذالك اثمه ومخالفه للقواعد الاصليه للفن وكاْن الفن اقترن بالعرىوتبداْ المهاترات والمزايدات (اصلها حاطه مكياج اصلها ازاى تلبس بنطلون ازاى فى غرفه النوم ولابسه ايشارب )وكانالانتقاد كله لكونها محجبه ليس على العمل وهذا ما يدل على اننا اصبحنا اناس بلا هويه مسلمون فى البطاقه فقط انما السلوك لا يوجد
اما فى هذا العام فقد اختفت المحجبات تماما واهل علينا ارباب الفن انا لا اقدر على الحكم على ما قدمونه من افكار فى هذه السلسلات للانى والحمد لله لا اتابع التلفاز فى هذا الشهر وكل معلوماتى عن هذه المسلسات جئت بها من النت والذى لفت نظرى ان هذا الكم من المسلسلات لا يوجد به سوى مسلسل دينى واحد وهو الامام الشافعى للمطرب ايمان البحر درويش
ويوجد مسلسلان على الاقل تقريبا لراقصتين تقومان فيهما بدور البطوله
يعنى المطلوب اننا نصوم بالنهار ونتفرج على الرقصتين باللي وهما بيفنوا نسبه للفن ايوه
وطبعا ما حدش ها يقول حاجه عادى التمثيل فن والرقص فن مش مشكله لما تكون يعنى الست عامله كليب بيتذاع على قنوات الاغانى اثناء هذا الشهر اقل ما يقال عنه انه كليب ايباحى وتيجى تهل علينا فى مسلسل رمضانى عادى جدا كله فن وعلى راى الاستاذ احمد عدويه كله على كله لما تشوفوه قوله

استكمالا للمهذله مسخرة -
الازهر يدرس كتابا لطنطاوي بديلا عن فقه الاربع أئمة
ولا عزاء للمسلمين الله يرحمهم كان عندنا اْزهر

السبت، ٢٢ سبتمبر ٢٠٠٧

عيب يا شيخ سيد
انا ما كنتش ناويه اكتب حاجه النهارده بس بجد سمعت خبر يغيظ خبر يخلى كل مسلم يقرف من نفسه الخبر يا ساده انه تم حذف باب الجهادمن مقرر فقه الصف الثالث الثانوى الازهرى يعنى ها يطلعوا لنا مدرسين ازهرين فقه وشريعه ما يعرفوش يعنى ايه جهاد ولا احكام الجهاد تفتكروا الموضوع ده فى مصلحه مين مين الى كل همه فى الدنيا انه يمحى الجهاد من زاكره المسلمين ويبدله بالارهاب مين عاوزنا ما نعرفش نرد عليه لما يقول ان الى بيحصل من مقاومه فى فلسطين ارهاب من مصلحه مين؟طبعا الاجابه معروفه بس الى مش معروف ليه شيخ الازهر والعلماء المبجلين وافقوا وقاموا بتغير باب الجهاد بباب النكاح واشمعنى النكاح فكروا وقولوا لى طبعا الاجابه مش محتاجه تفكير مين يعنى يهمه اننا ما نفكرش غير فى الجوازبس على فكره كل العيال بتوع ثانوى يعرفوا احكام الجواز والنكاح اكتر من المتجوزين ثقافه بقى

نيجى بقى لموضوع الزمالك ايه يعنى الاهلى غلب الزمالك ايه جديده لا مش جديده وعادى وبعدين الجون مشكوك فيه ونيجى لموضوع شيكابلا على فكره عماد متعب عملها قبل كده لجماهير الاهلى ايوه بس كمن يعنى شيكا بالا زملكاوى تيجى علينا والاحترام يبان والاخلاق تنقح علينا هو لازم يعنى كله يبقى من ضمن الشياطين الحمر علشان لما نغلط محدش يكلم ولا هو الاهلى ده الحزب الوطنى والزمالك حركه كفايه ويطلع بقى علينا العضو المبجل الاهلاوى الصميم ويفضل يصول ويجول ما يصدق جنازه ويشبع فيها لطم الا ما سمعناه مره طلع نفس فى قعر المجلس
بس نقول ايه الى مالوش ضهر يجى جون الاهلى ويضربه على بطنه يامسهل كلها كام شهر والمنتخب يعملها ونرتاح من المجلس بتاع الرياضه الاهلاوى ده زى ما حصل بعد فضيحه ميسيكو سيتى ويبقى يورينا بقى العضو المبجل ها يقول ايه ها يقول اديها ميه اديها نار النادى الاهلى فريق جبار بصراحه هو ده الى ناقص عليه ما يقولوش اه مش مصدقين والله هو بس لولا الملامه كان قالها

اظن بعد كلام ده مافيش كلام الترزى من الظلمه فايعنى خلاص اما بقى موضوع المحاكمه بصراحه ياجماعه انا عمرى ما سمعت ان فى الصومال او حتى جزر البهاما فى صحفى اتحاكم بس دى يمكن من الحاجات الاكسكلوسف عندنا

الموضوع الاول وهو محاكمه اربعه من رؤساء التحرير لاربع صحف مستقله اشهرهم وائل الابراشى وابراهيم عيسى وانا بقول اشهرهم لانهم دول الى بيطلعوا فى التلفزيون والمشكله ليها فرعين اول فرع هو المحكهم زات نفسها تانى حاجه ليه المحاكمه او ايه هى العقوبه نبداء بالعقوبه العقوبه يا جماعه هى الاساءه بكوادر الحزب الوطنى طب بذمتكم هو بعد انى اقول على واحد انه ينتمى للحزب الوطنى مش اهانه؟اقول لكم ليه اصل مره جه واحد لسيدنا عمرو بن الخطاب وقاله انا بشتغل تارزى للحاكم والحاكم ده ظالم انا بكده بمجرد انى بفصل له هدومه اكون من اعوان الظلمه سيدنا عمرو قال له لا فضحك الرجل ثم اكمل سيدنا عمر بل انت من الظلمه انفسهم

الأربعاء، ١٩ سبتمبر ٢٠٠٧

اهلا بيكم فى اول تجاربى التدوينيه على الانترنت واستحملونى شويه
اوعدكم ان زيارتكم للمدونه دى ها تكون متميزه
اوعدكم انى ما اكونش ضيف تقيل ولا ملل واوعدكم انى احاول اقدم لكم شىء جديد ومتميز
مش هاضحك عليكم واقول لكم انكم ها تلاقوا اسلوب صحفى متميز ولا مدون قح على فكره قح دى كلمه عربيه صميمه بس اوعدكم انكم ها تلاقوا واحد سنها صغير شويه من ضمن الشباب الى مافيش حد ادى له الفرصه مره انه يتكلم ويقول رايه ياريت اقدر اغير الفكره عن جيل بحاله مظلوم
ومن حسن حظى وحظكم ان فيه احداث كتير حصلت الاسبوع ده اهمها واولها طبعا صدور الاحكام القضائيه بالحبس ضد اربعه منرؤساء تحرير لبعض الجرايد المستقله منهم وائل الابراشى وابراهيم عيسى بتهمه الاساءه الى كوادر الحزب الوطنى والغريبه يا جماعه ان ابراهيم عيسى ده النائب العام اصدر قرار بحبسه بعد ما اثبت تورطه فى ترويج اشاعه موت بابا مبارك والد كل المصرين مع ان سبحان الله النائب العام ما اصدرش قرار بمنع ممدوح اسماعيل الى كان من اهم اسباب موت الف تلاته وتلاتين واحد فى الميه اكلهم السمك بس عادى مش موضوعنا
ثانيا اول امبارح كان ايه يا رجاله كان ماتش القمه ويقوم ايه الاهلى يغلب الزمالك هو طبعا ده شىء عادى بس عند الزملكويه مش عادى صدقونى مش عادى عارفين ليه ابسط حاجه يا جماعه فيه نظريه بتقول ان الارض بتلف نفسى اعرف هى ليه مش بتلف عند الزمالك يالا كله تكفير سيئات
ثالثاالخبر المؤسف الى سمعته قبل الفطار انفجار موكب النائب اللبنانى انطوان غانم بس المشكله مش انه اتقتل لا ده نصيبه وعمره بس المشكله التوقيت
السؤال ليه دلوقت بالخصوص الانفجار بعد الانتخابات ما اتعملت بمنتهى النزاهه وطبعا نزاهه لانهم ما عندهومش اخوان مسلمين دا غير ان مجلس النواب على مقربه من الانعقاد لمصلحه مين الانفجار طبعا الحج بكره ها يطلع ويقول سوريا بس ياترى هى فعلا سوريا سؤال نحاول ندور له على اجابه