حاله قرف

دماء على الشاشه بما انى انسانه عاطله وفاضيه وماورايش اى حاجه

فا وقتى بقضيه يا اما نايمه يا بتفرج على التلفزيون يا على النت يا بقراء اى حاجه

والتلفزيون ده بقى مش حبيبى قوى
لانه بحس ان معظم القنوات بتساعد على زياده نسبه العته والبلاهه

ودى رأى الشخصى

نيجى بقى لموضوعنا

مسلسل اسمه بنت من الزمن ده بطوله الممثله الفلته داليا البحيرى

مسلس بيناقش ظاهره بنات الشوارع على التحديد شفت من حلقات كتير

لكن فيهم حلقه اثارت استيائى وقرفى واشمئزازى

وهى الحلقه الى بيعتدى فيها (كونه)باسم السمره على شروق(داليا البحيرى)

جنسيا

هما اى نعم ما بيجبوش منظر الاعتداء لانها طبعا بتكون متخدره

لكن بيجيوا قبل وبعد الاعتداء

المنظر المقرف بجد هو ان (كونه) بيحتفظ بلملايه الى عليها دماء العذريه للبطله

علشان يذلها ببيها

وبتظهر فعلا الملايه فى المسلسل وفيها اكتر من بقعه وكانها حد فاتح كرش حد على الملايه دى

حاجه كده تدعو للقىء

انا مش ضد الموضوع لكن ضد الطريقه

افتكر فى فيلم الطوق والاسوره اتعرضوا لموضوع دماء العذريه لكن الموضوع كان مقدم بطرقيه احسن من كده

جابوا المنديل اياه والعريس (احمد عبد العزيز.) ماسكه فىايده وخلاص

واحنا فهمنا

انما ليه دلوقت المناظر دى بقت بتيجى فى التلفزيون

يعنى كمان مش فيلم سينما

لو اتعرض فى التلفزيون ها يبقى بالليل بعيد حتى عن الاطفال

انما مش فى مسلسل بيتعرض ليل ونهار قدام الجميع

يعنى لما طفل يشوف منظر زى ده والفضول يشتغل

مامته ولا ابوه ها يردوا عليه يقولوا له ايه؟

المشكله مش فى المسلس ده وبس

بقت فى كتير من الاعمال بتعرض الحاجات دى بشكل فج ومبتذل بدون اى مراعاه لمشاعر المشاهدين

المفروض يكون ليهم دور للنهضه بالذوق والاخلاق العامه

مش العكس

ولا انا غلطانه؟

ليه كده

فى حاجه غلط

اه والله العظيم فى حاجه غلط

يا فى الناس يافينا احنا يا اما فيه انا

ازاى يعنى ايران تطلق قمر صناعى محلى الصنع

واحنا أساتذه البحث العلمى مش لاقين يأكلوا

وازاى اسرائيل عندها انتخابات حره ونزيها

واحنا من ارادت ان تثكله امه يذهب الى لجان الاقتراع لانتخاب حد من المعارضه

وازاى عندنا حد محترم زى العالم أحمد زويل والدول المجاوره والدول المتقدمه عننا بمراحل بيجاهدوا علشان يستفادوا من علمه

واحنا لا

ازاى الحكومه بدل ما تتحرك شويه فى مجال الطب والدواء والبحث العلمى وتنشأ مركز بحوث ومصانع ادويه بدل ما احنا تحت رحمه الشركات العالميه

تقوم ماتلاقيش حاجه تعملها غير انها تبداء وتبتز الصيادله الى فاتحين صايدليات صعبان على الحكومه ان فى حد فى البلد دى ممكن يكون له دخلو كويس يعيش بيه زى البنى ادمين بدل كده ماتتشتروا على الشركات الى بتنزل الدوا غالى اصلا ولا حتى تشوفوا

الصيادله الغلابه الموظفين فى المصالح الحكوميه والى مش لاقين

ازاى الحكومه بقت عامله زى اليهودى الى فلس وعمال تدور فى دفاترها وققرت تشيل بعض الفئات الى استفادت من الكادر الخاص للمعلمين بعد ما امتحنوا الامتحانالمهين اياه وقبضوا الفتات الى اتوعدوا بيها

وازاى عاوزين يلغوا المقطورات علشان حوادث الطريق وان السواقين بيكونوا مدمنين

طب ما يحطوا قوانين صارمه محترمه الكل يمشى عليها ويحاولوا يفكروا فى حل المشكله بدل ما يكفروا فى قطع عيش اللاف الناس

وازاى ولد فى انجلترا عنده 13 سنه يبقى اب نتيجه للمارسه الجنس مع بنت عندها 15 سنه وما اسمعش حد من بتوع الاسلام الى بيغتصب الطفوله

يقول ده اسمه ايه؟

وقاحه

مبروك على النصر

دى كانت اول بشاير النصروده الذروهوده حسن الختام
وده بكره المشرق
مبروك عليكى يا حماس التعويضات والاعانات

وماتنسوش تبعتوا مع وفد التهنئه الاخوانى كام مليون حق تعب الرجاله معاكم
ماهى المظاهرات مش ببلاش الناس تعبوا بجد ولازم يتراضوا



نفعنى انفعك وشيلنى اشيلك

كلا يغنى على ليلاه

سيد نجيب من فضلك اخرس تحديث ده اللينك بتاع الخبر http://www.almasry-alyoum.com/article2.aspx?

بس احقاقا انى اكتشفت انه قال ضد وليس للقضاء

وانا كتبت للقضاء لان ده الى فهمته من كلامه

صرح السيد نجيب انه بيدعوا الليبرالين بمعاونه الحكومه للقضاء على الاخوان

عارف فين ياعم نجيب

عندها

انا لا بحب الحكومه ولا الاخوان

ولا شايفه فيك ولا فى الحكومه ولا فى الاخوان ولا حتى الليبرالين خير

بس مش معنى كده انه نقضى على الاخوان

يعنى ايه نقضى دى؟

وحت اى مسمى نقضى

فين بقى الديموقراطيه حريه الرأى والتعبير

ما كل واحد حر فى الى يشجعه وينتمى ليه

الناس مش عبيطه ياسيد نجيب وبقت بتعرف مين الى يهمه امرهم ومين الى يهمه امره ومصالحه

وافتكر انتخابات 2010ها تبلرو ده والناس مش ها تبهدل نفسها علشان تنجح الاخوان لانهم عرفوا الى فيها

يبقى حضرتك ما تقولش كده ولازم تفهم انه ما ينفعش نقضى على تيار مناهض لانه مش على كيف جنابك

ويعنى لما الناس تاخد كلامك من منطلق طائفى وتقول اه اكمنك مسيحى

عاوز تقضى على الاخوان

وساعتها التعصب ها يشتغل

ومش بعيد تزداد شعبيه الاخوان

يبقى من الاولى تنقطنا بسكاتك انت كمان

وتشوف ملياراتك واكل عيشك

ويانحله لا تلسعينى ولا عاوز منك عسل

هناك فرق

قوه الملاحظه

كل واحد عنده قوه ملاحظه

يقولى ايه الفرق بين الصوره دى والصوره دى

وكمان الفرق بين الصورتين

للصبر حدود

سرور ازا أيدت(الايداريه العليا) وقف تصدير الغاز الى اسرائيل

سوف تلتزم الحكومه فورا للقرار

نقطه بقى كده معايا ومن أول السطر

وواحده واحده

اولا الغاز ده بتاع مصر بيروح فين لبنت القديمه اسرائيل وكمان بسعر مخفض

يعنى يا حلوين العسكرى الاسرائيلى يستحمىبميه سخنه من السخان ابو غاز

(مع العلم ان غزه الناس الى فيها صدت من قله الحمى

لام مافيش وقود يخبزوا بيه عيش

ولا فى اصلا ميه نضيفه )

وبعد ما يستحمى مراته تكون طبخت له على الغاز المدعم المصرى ده الاكل

يطفحه بالسم الهارى

وينزل يقتل فى غزه بر و جو يامعلم بصواريخ ماشى

قنابل وماله ذخائر محرمه ومسرطنه مايضرش

عاااااااادى

وبعد ما يروح طبعا الراجل عرقان وتعبان

يستحمى تانى بميه من السخان ابو غاز

وكمان متدعم

وبعد كده يتعشى( وبارضه مع العلم ان غزه الناس بيناموا من غير عشى مش علشان مافيش غازلا خالص

علشان مافيش اكل اصلا يطبخ)

وينام نوما هانئنا

وغزه بتندب موتاها

وبس

النقطه التانيه بقى

الغاز المصرى المتدعم ده الى بيروح لجارتنا اسرائيل

احنا فى مصر فى ناس مش لاقينه

اه وربنا

ورحمه القطه بتاعه بنات بوش الى نعاها البيت الابيض الاسبوع الى فات(على فكره لم ينعوا ضحايا غزه)

فى ناس فى مصر ما اسعدهمش الحظ لسه بتركيب الغاز الطبيعى

وماهماش لاقين الانبوبه الى سعرها وصل 10 جنيه من اصل 4 جنيه

http://www.almasry-alyoum.com/article2.aspx?ArticleID=194471

http://www.almasry-alyoum.com/article2.aspx?ArticleID=194584

شوفوا حتى هنا

واسرائيل بتاخده مدعم

وكل ده وفتحى سرور مستنى قرار الاداريه العليا

عارفين لو النظام ده بيستنى احكام القضاء ولا بيعبرها كنت بلعت الجزمه الى رومها الاخونجيه امبارح فى مجلش الانس وسكت

بس للاسف فيه الاف من الاحكام القضائيه فى البلد لا تحترم

اشمعنى يعنى دلوقت

حد يقولى علشان انا خلاص تعبت

انا واحده ربنا ابتلانى فى النادى الى بشجعه بلاش والنبى البرجين الى فاضلين يضيعوا هما كمان

حراااااااااااااااااااااام

عبود على الحدود

اخر نكته

عبود وطارق الزمر يطلبان الخروج من السجن للتبرع بالدماء

بصراحه مش عارفه اقول ايه

الى اقدر اقوله

قاتل عاوز ينقذ مقتول؟؟؟

ياترى ياسيد عبود انت وزمايلك عرفتوا قيمه الراجل ده

الله يرحمه لو كان حد سمع كلامه ما كانش كل ده حصل

يالا تفيد با ايه ياندم

احنا فى زمن المسخ

مصر يا أما ياهفيه

من غبير اى كلام مش محتاجه اقول قد ايه كل بنى ادم عنده ضمير قلبه بيتقطع

على بيحصل فى غزه

مش شرط يكون مسلم

ولا عربى

يكفيفه انه يكون انسان

الاحساس مش محتاج دين ولا وطن ولا جنس

الاحساس محتاج بنى ادمين

بنى ادمين يحسوا بريحه الموت الى عششت داخل بيوت ناس غلابه

كل ذنبهم ان ربنا رزقهم بمرتزقه اغبيه بهايم يحكموهم

ده بس كل ذنبهم

وطبعا ولان ده الحال العربى

مافيش شعب يقدر يغير حكومه بتحكمه

لانه حتى لو غير هايجى الأسوء

الموت والدم فى كل مكان

ومع ذلك بدل ما نفكر فى الناس

لا نفكر فى غباوتنا

خالد مشعل قال لن نتراجع حتى لو أبيدت غزه

والنبى حد يقولى هو مش ها يتراجع عن ايه؟

راجل ابن حلال كده متربى يقولى حماس الزفت دى لن تتراجع عن ايه

عن صواريخ العيد الى بترميها على اسرائيل؟

ولا ما يكونوش عندهم طيران

وصواريخ اربيجيه

وبيضربوا بيها اسرائيل وانا مش واخده بالى

او يمكن تلفزيونا ما بيجبش الحاجات دى؟

ولا بجد وبصحيح الراجل ده ما فيش عنده غير بمبم العيد الى بيحدفه على اسرائيل

وبيعمل لهم بيه جو اكشن

ومش ها يتنازل ولا ها يتراجع عن ده حتى لو ابيدت غزه

حسبى الله ونعم الوكيل فيك بجد

مئات ماتوا علشان صواريخ حماس الى بيزغزغوا بيها تل ابيب

وطبعا الحكومات والانظمه العربيه بدل ما يقعدوا ويشوفوا الكارثه الانسانيه دى
فضلوا بقى يطلعوا فى احقادهم وقاذورتهم علينا

اولهم السيد المبجل حسن نصر الله السيد رجل ايران وسوريا الاوحد

الراجل ياجماعه عاوزنا نعمل انقلاب عسكرى علشان نضغط على الحكومه انها تفتح معبر رفح

وهاجم مصر مهاجمه شديده

وكمان تقريبا حملنا مسؤليه عدم انعقاد قمه عربيه

دلوقت السيد حسن نصر الله عاوز قمه عربيه

ولما كان الطحت شغال فى لبنان قال لهم مش عاوزين قمه عربيه

دلوقت القمه العربيه بقت حلوه وبيوزعوا فيها هدايا

طبعا ده مش كلامك ياحسن

ده كلام اسيادك

ايران

هما دلوقت عاوزين قمه عربيه وعاوزين الكل يشتم فى بعضه

وانقلابات عسكريه كمان فى المنطق علشان هى فى الهوجه دى تكمل النووى بتاعها ونلاقيها بقت غول وماحدش قادر عليها

ايران هى الى ادتك الورقه وفيها الكلمتين دول

طب اقولك بقى احنا دوله ضعيفه وبينا وبين ولاد الرخمه دول معاهده

طب ماتخلى ايران تضربهم هى بصواريخها الى ممكن تطول تل أبيب؟

على الاقل هما فى حاله عداء معاهم ولا خايفنن على الفستق الى بيصدره لاسرائيل ؟؟؟؟

ولا اقولك طب ماتضرب انت شمال اسرائيل بدام انت عامل فيها ميه راجل فى بعض

بذمتك مش لما تدخل فى حرب معاهم علشان غزه

احسن ما تدخلها علشان جوز عساكر؟

طبعا عمرك ماهاتعمل كده

عارف ليه؟

علشان الاوامر الى جايه من طهران مش كده

ولما هى بقى الحكايه مصالح ولعب قذر من تحت الترابيزه زى الى حصل بين امريكا وايران فى العراق

يبقى تسعنا صمتك الرهيب احسن

ويادوب تلحق تحضر لخطبه عاشوراء

وماتنساش تبقى تهلفط على اسيادك زى ماعملت السنه الى فاتت

وشويه شويه نسمع عن مين الى عمل مظاهرات ضد مصر والنظام

وبيشتم وبيتسافل كمان

قسما بالله لو حد عمل كده

كنت عصرت على نفسى ليمون وسكت

انما الاقى سوريا بتشتم طب يعنى ما انتم عمالين تبوسوا الايادى علشان تقعدوا معاهم

وانتم معاهم على الحدود وبيكم حرب

فين الهمه؟

والاردن كمان بيشتموا قدام السفاره المصريه وبيطالبوا بسحب السفير الاسرائيلى من مصر

طب والسفير الاسرائيلى الى عندكم نظامه ايه؟ ؟

وكمان ليبيا الى المفروض ينقلوها جمب اخواتها فى الخليج بتهلفط

هى بقت كده

ما المعبر مفتوح والنعمه وفيه جرحى بيتعالجوا عندنا

لازمه السفاله ايه؟

وكله كوم بقى وقطر وقناه الجزيره كوم تانى

مافيش على بؤهم غير ليفنى

ليفنى اتفقت مع الحكومه المصريه على كل حاجه

مصر بنت الكلب العميله استقبلت ليفنى

طب ما يولاد السابوهات

ما كانت المزه عندكم ودبحين لاها عجل على باب المحطه

سمعتش انا صندل اتكلم

عرسه زنت؟

ابدا

والنبى المحن ده بلاش منه

الى عاوز يعمل حاجه للناس دى يعملها وهو ساكت

محتاجين دعايا ليه؟

انما المزايده من اشكال ضاله من باره

وناس من جوه بتعانى من امراض عقليه ربنا يشفيهم بقى

الواحد اى نعم ما لوش فى نفسه حاجه

بس مش لدرجه انه يحدف غباوته على الناس

ورجعت من السفر

ازيكم
وحشتونى كتير
ونودى وحشتنى اكتر
مرسيه للناس الى حسيت بجد انهم معايا وزعلانين علشانى
احساس جميل انك تحس ان في ناس انت تهمهم
انا صحيح ازمتى ماخلصتش لكن
من جوايا بقيت احسن واهدى وبدات ارجع زى ما كنت قبل كده
وملحوظه بجد ياجماعه مهمه
انا لااعانى من ازمه عاطفيه
لانى بمنتهى البساطه
مؤمنه بمبداء يروح كلب يجى سبع
وتقريبا عملت بنصيحه الست ماجده الرومى واعتزلت الغرام
المشكله اكبر من مجرد واحد ندل او معندوش ضمير
لكن الحمد لله
ربنا واقف جمبى لغايه ما كل حاجه تنتهى
تحياتى ليكم جميعا

لحظات

لحظات كتير مرت عليه قبل كده

كانت صعبه

كنت بضحك او على الاقل ابتسم

وبمنتهى الرضى

وأقول ان غدا ليوما اخر

لكن دلوقت راحت ابتسامت الرضا

وفقدت الأمل ان فيه يوما اخر

يمكن علشان اللحظات دلوقت بقت اصعب

يمكن علشان زمان كان فى حاجه تصبرنى

لكن الأكيد

انى اتكسرت جوايا حاجات كتير

وضاعت منى حاجات اكتر

كل حلم حلمته اتسرب من بين أيدى

كل حاجه اتمنتها تحصل مهما ان كانت بسيطه وحق مشروع ليه

انتهت

مش عارفه ليه كل ده بيحصل

اقل الاشياءبتضيع منى وبفقدها بمنتهى البساطه

قربت انهار فعلا

عامله زى جبل التلج الى بيسقط حته حته

ممكن ارجع واتماسك

يمكن ارتكب اخطاء فى حق نفسى وغيرى

مش عارفه

ويمكن ابطل تدوين

ويمكن ابطل اتنفس ويمكن بقت امنيتى

الوحيده

بجد مش عارفه

اخص عليك يازمن

مهاترات

فرق تسد

العباره دى دخلت البلد من ايام الاحتلال الانجليزى

بس للاسف الاحتلال خرج

والكلمه لسه موجوده فينا ومتأصله كمان

المناسبات كتير بصراحه

أولها حزب الغد

بما ان السنه دى سنه الحرايق

واللون الموضه الحكومه قررت انه يكون الاسود

فما كان من حزب الغد غير انه يستجيب لقرارات الحكومه

ويولع

هايكون اجدع من مجلس الشورى يعنى؟

ماعلينا أنه ولع

ده قضاء وقدر

نعمل ايه فى الماس الكهربائى الشقى؟

المصيبه الأكبر فى انقسامات حزب الغد

والى هى تكريس واضح لمقوله فرق تسد

الراجل موسى ده من مؤسسى الحزب مع ايمن نور

ودلوقت هو ومرات ايمان نور وانصاره واقعين فى بعض

ومبهدلين الدنيا صراحه

وكان طبعا ختامه مسك يوم الخميس

الاخ موسى ده جه مع جميله اسماعيل

فى العاشره مساء علشان كل واحد فيهم يقول الحريق حصل ازاى

طبعا الأعمى فتح على الحقيقه الى ظاهره من الصور والفديوهات

والاقوال بتاعتهم هما الاتنين

لاننا طبعا مفتحين وما بينضحكش علينا

الى ضايقنى اوى بقى من ربيب الحزن الوطنى

انه قعد يبلطج على جميله اسماعيل يقول انها عميله طول عمرها وانها بتشوه سمعه مصر

السؤال بقى ياعم السمعه؟

ولما هى زفت وزباله هى وجوزها انت ليه أسست مع الخونه دول الحزب؟

ولما هما خاينين لمصر وبيشوهوا سمعه مصر ليه متمسك بحزبهم المشبوه ده؟

طبعا مافيش اجابه

المفروض هدف أحزاب المعارضه انها تتصدى للحزب الحاكم وتحاول تخرج الناس من طغيانه

مش يحرقوا فى بعض

كده يبقى الناس دى كلهم مش كويسين

الى هاممهم المصالح وبس

اددى كان الموضوع الاول

الموضوع التانى بقى

خناقه المدونين

از فجأه يا جماعه بعد ما كان التدوين ده مهمته الاولى هو التعبير عن مصر

بعيد عن سلطه الحكومه

وجبروت الحكام

اصبح خناقات على المصاطب واحد يقول يمين والتانى يقول شمال

وهات يا شتيمه

الخناقات بقت كتيره

وبيدخلها عدد كبير من كل طرف

اخر خناقه بقى

تغطيه انتخابات امريكا

فيه مدونين سافروا وغطوا انتخابات امريكا

جميل

ناس بقى مدونين معجبهمش

ليه يا جماعه

اصلهم مدونين والتدوين ده مش مهنه

أصلهم واخدين فلوس

وده اسمه شحاته

أصلهم بيأيدوا فكر أوباما

وده تحيز

والمدون لازم يكون محايد

يا راجل

والقواعد دى بقى كانت فى أى كتاب

يعنى نزلت فى الصحاح مثلا؟

ولا فى تفسير الزمخشرى

ما كل واحد حر

يعمل التدوين مهنه

يتربح منها

ياخد فلوس مقابل تغطيه

يحب أوباما ويشجعه حتى بدل المنتخب

ولا لازم الكل يشجع أبو تريكه؟

طب لو كانوا سافروا من غير ما ياخدوا فلوس؟

ولا كانوا سافروا مسانده لماكين؟

كانوا ها يبقوا حلوين وعليهم سكرسنترافيش؟

ما كل واحد حر

ما بدل ما نقعد ناكل فى بعض علشان الى سافروا وغطوا الانتخابات

ما نقعد نفكر ازاى الناس دى وصلت لمرحله انها تختار مين يحكمها بمزاجها

ونحاول نتعلم منهم

يعنى انتم اتضايقتوا من التغطيه

وما اتحسرتوش من الانتخابات نفسها

وما تحسرتوش من البرامج الانتخابيه الى كانت مطروحه والناس تختار الأفضل

سبحان الله

ولله فى خلقه شئون

وحاجه تانيه بقى

بجد غيظانى اوى

بقى دلوقت واحد من الى سافروا طول عمره بياخد من المعونه؟

طب ما تقالش الكلام ده ليه زمان

لما كنا حبايب وزى السمن على العسل؟

ايه الى جرى يعنى

ولمصلحه مين كل ده؟

اكيد مش فى مصلحه أوباما

عايزين حقنا

عمرك سمعت عن صنيعى قتل الصبى بتاعه؟

هذا ليس سؤال منى لك ايها القارىء العزيز

ولكنه سؤال سأله والد الطالب قتيل الاسكندريه

ضحيه المعلم الذى قتله لعدم اكماله الواجب

سال ذلك الاب المسكين الذى افنى حياته من اجل ان يربى فلذه كبده ويلعمهم

كد واجتهد

لم يسرق اموال البنوك

ولم ياخذ اموال اراضى الدوله لينفقها على الراقصات

ويحرض بها على قتل المطربات

بل عمل بشرف

وكان جزاؤه ان يضرب ابنه حتى الموت تحت سقف مدرسه بالاسكندريه

لجريمه ارتكبها هذا المسكين

لم تكن جريمه تحرش بفتيات المدرسه وحتى ان كانت هكذا فلن يكون جزاؤه القتل

لم يسب حتى المعلم

ولكنه لم يكمل واجبه

لفظ انفاسه الاخيره فوق كراسه الواجب

جلس ذلك الاب المسكين أمام المذيع محمود سعد

يقص عليه ماحدث لابنه وما حدث معه من مساومات

وافتراء

جلس ذلك الحرفى يصرخ ويقول لقد قتل ابنى

قتل والساده المسؤلين لا يهتمون بمقتله

والسبب أن هذا الولد هو ابن صنيعى مسكين

لم يهتم احد بالقضيه

لانه ليس ابن وزير متقاعس

او رجل اعمال فاسد

لقد قتل ابنى

شاهدت ذلك الذى فقد اغلى ما لديه

ضحكت بمراره وتذكرت روايه حكايه مدينتى لتشارلس ديكنز

حينما مات صغير تحت عربات احد نبلاء فرنسا

وحين صرخ ابوه

تقدم احد العقلاء

قال له هذا خيرا له

انه مات دون ألم بينما كان سوف يعيش فى ألم معيشتك الشاقه

ولكن هذه فرنسا قبل الثور ه

شابهت مصر بعد ثورتها

عندنا البستيل والنبلاء

ولويس ومارى

ولكن ليس لدينا من سيقدمونهم يوما الى المقصله

كل هذه افكار راودتنى وانا اشاهد ذلك الوجه التعس

وأغرورقت عيناى بالدموع حين سأل الرجل محمود سعد هذا السؤال

عمرك سمعت يا أستاذ محمود عن معلم قتل الصبى بتاعه؟

فقال محمود سعد له

هذا سؤال نوجهه لوزير التربيه والتعليم ورئيس مجلس الوزراء

فياأمه باض فيها الفساد وتفرخ

أين المسؤلين من هذه الجريمه الشنعاء ؟

أين رئيس الوزارء ووزير التربيه والتعليم لماذا لا يحاسبون ؟

أين قبطان تلك السفينه التى تغرق؟

اين فطاحل المحايمن الذين من الحين والاخر يهلون علينا بدعاوى ضد الراقصات والفنانات والساقطات

بحجج واهيه

لماذا لا يساندون ذلك المسكين لأخذ حقه وحق ابنه

أليست هذه اهم من خلع الفنانه الفلانيه الحجاب يا سيد نبيه الوحش ؟

أليست تلك اهم من التشدق بالعبارات الرنانه الواهيه ياسيد مصطفى بكرى؟

أننا امه استشرى السرطان فى كبدها

ولا خلاص لنا قبل ان نعالج هذا السرطان

ولكن ليس فى مستشفى تم التسول عليها

وانما فى مستشفى المنهج الربانى العادل

الى مش راجل ما يطلعش من يبتهم

هى دى ليلى

صاحبه الصوره ما اسمهاش ليلى

دى ست البنات نهى رشدى

انا قلت ان هى دى ليلى الى احنا عاوزنها مش ليلى الى تتكسف وتخاف من الفضيحه

والى ما يعرفش حكايه نهى رشدى

دى اول بنت ترفع قضيه ضد خنزير

اتحرش بيها

والمحكمه نصفتها وحكمت عليه 3 سنين سجن

علشان يكون عبره لكل خنزير ماشى فى الشارع بنصه التحتانى وبس

بجد البنت دى ارجل من الف راجل

يسلم الى ربوها

ويسلموا المدرسين الى درسوا لها

ويسلم اى حد وقف جمبها وشجعها انها تاخد حقها من الخنزير ده

يارب تكون كل البنات بشجاعه نهى

وما نخافش وما نتكسفش ونوقف كل كلب عند حده

دى ان شاء الله البدايه

وان شاء الله يشرعوا قانون ينص على لفظ التحرش صريحا

وتكون عقوبته مشدده

علشان كل واحد يحط لسانه جوه بقه وما يقوليش اصلها مش محجبه يعنى

اقوله البنات الى اتقطعت الهدوم من عليهم فى جامعه الدول يوم العيد

كانوا بحجاب وخمار كمان

يعنى غباوه مش عاوزه

فاهمين

احنا بقى نمشى بمزاجنا

بحجاب عادى

بخمار عادى

من غير حجاب بارضه عادى

اى واحد بقى تفكيره ما بيخرجش غير من تحت الحزام

يقعد فى بيتهم

او يروح يعمل عمليه ويريح الناس من شره

اصله اكيد يعنى تلاقيه فى الغالب بيروح يقف قدام الصيدلى مدلدل ودانه ويوشوشه ويقوله مافيش مقويات

ههههههههههههه

فا بيطلع عقده على بنات الناس

ماذا يريد الأخوان مظاهرات كل عام فى الجامعات المصريه

والسبب حرمان طلبه الاخوان من الاشتراك فى انتخابات اتحاد الطلاب

يتكرر هذا المشهد من كل عام

مظاهرات وهتافات وامن مركزى وعربات مصفحه

واحيانا قنابل مسيله للدموع واعتقالات وفصل من الجامعات

والسبب الاخوان

وهناك العديد من الأسئله تجول بخاطرى

اولها لماذا يمنع النظام الجامعى الاخوان من الوصول الى اتحادات الطلبه ؟

وهذا السؤال اجابته لا يختلف عليها اثنان

والاجابه

ان النظام لا يريد الاخون فى أى مكان فى مصر

حتى لو كانوا طلبه

أما باقى الاسئله هى

ماذا سيفعل الاخوان حين يصلوا الى مقاعد الرئاسه فى اتحادات الطلاب

هل سيفعلون هكذا أو سيكتفون بتوزيع المنشورات الدينيه على الطلاب والوعظ لهم فيما بين المحاضرات؟

أهذا كل ما يملكه الطلاب الاخوانيون؟

لقد كنت أراهم حين كنت طالبه ولم يكن هذا بالبعيد بل كان فى العام الماضى

كانوا لا يفعلوا سوى ذلك فى محاوله لنشر افكارهم عن طريق الملصقات والخطب والدورس فقط والتطفل والتدخل فى ما لايعنيهم

اتذكر حين كنا ناخذ بعض الصور التذكاريه انا وزميلاتى

وتدخل احدهم وارسل لنا ورقه يععلمنا ان اشد اهل النار عذاب هم المصورين

حينها الغضب تملكنى من هذا التطفل الابله

هذا وهم خارج الاتحاد

فما بالكم ان دخلوه

هل سيكون واجب على كل فتاه ان ترتدى الخمار فى الجامعه مجبره

وعلى كل طالب ارتداء بنطال قصير مجبر ايضا

ولا يحق للفتاه ان تتحدث الى استاذها اثناء المحضاره بحجه ان صوتها عوره؟

هل سيحدث هذا؟

ان الاخوان أناس احتار الكل فيهم

نتذكر حين دعوه الأضراب فى أبريل الماضى وعدم مشاركتهم

ونتذكر ايضا مواقفهم المخجله مع النواب المستقلين فى مجلس الشعب وهم اغلبيه كبيره

وعدم دعمهم لكثير من اثاره قضايا الفساد فى المجلس

ونتعجب منهم ايضا حين الانتخابات وعدم منافستهم فى الدواير التى يحتلها رموز النظام العتيده

امثال سرور والشاذلى واحمد عز

ومنافستهم للمعارضين والمستقلين

نتعجب منهم حين يهاجهون النظام ولا يفعلون شىء ضد فساده

ونتعجب ايضا حين يطالبون بأن يأخذوا حقهم وهم لا يراعوا حقوق الأخرين

لأخر الزمان

يوم فقدنا الزعيم

لا تأسفن على غدر الزمان لطالما رقصت على جثث الأسود كلاب

لاتحسبن برقصها تعلو أسيادها تعلو أسيادها

تبقى الأسود أسودا والكلاب كلابا

عيدكم سعيد

مش هاقول مبارك

مش ناقصين مغص

احترم نفس

طبعاكلنا سمعنا عن الحمله دى على الفيس بوك وعلى مواقع الانترنت

الحمله دى فى واقعها ان عكست حاجه ها تعكس مدى التدنى الى وصلنا ليه فى مصر

لما الاحصائيات تقول ان اكتر من 70فى الميه من السيدات بيتحرش بيهم

دى مهزله بكافه المقايس دا غير طبعا الاجانب الى بيجوا ونتفضح قدامهم

ده شىء عادى نظرا لتدنى المستوىالاخلاقى والتعليمى

وردائه الخطاب الدينى

ومع ذلك كل الى احنا فالحين فيه نجيب اللوم على اى حاجه بس المهم مانجبوش على الحيوان الى استباح حرمات الله

الفريق المتخلف اياه والى اكتريته ستات اغبيه

يقولوا ماهو من لبس البنات

لبس بنات ايه يا عنوان التخلف منك ليها له؟

لبس البنات ده كان موجودقبل كده واكتر تحرر من دلوقت ومع ذلك كانت البنت او الست تلبس مينى جيب وكات وتركب الاتوبيس

مافيش واحد يقدر يبص لها ولا يقولها بم حتى

دلوقت المحجبه بتمشى فى الشارع ما بتسلمش من السفاله

وطبعا كلنا عارفين ان 70 فى الميه من السيدات والبنات فى الشارع المصرى محجبات

داغير ان الاحصائيات الى اتعملت اكدت ان المحجبات والمنتقبات بيتعرضوا بنسبه اكتر للتحرش

عارفين ليه ؟

لانهم لما سئلوا البهوات قالوا ان البنت المحجبه من السهوله التحرش بيها بينما الغير محجبه مش هاتسكت لى لو عملت فيها حاجه ممكن تزعق وتفضحنى فى الشارع انما المحجبه لا

يبقى اللبس هو السبب بذمه النبى؟

ولا السبب غباوه الى بيربوا وبيعلموا

ماهى لما واحده تعلق ارتكاب جريمه بشعه زى دى على الانثى والمفروش دى هاتبقى ام او هى فعلا ام يبقى عليه العوض ومنه العوض

ماهو لما ابنها يعمل كده ويقولها ماهى البت لابسه مش عارف ايه

هاتسكت

انما هى لو واحده عندها دماغ وبتفكر بيه وقامت رزعاه على وشه بالقلم لو عمل حاجه زى كده

وقالت له وانت مالك بالى هى لبساه هى حره تلبس الى هى عوزاه

انت المفروض تغض بصرك وتخاف من ربنا لايحصل ده معايا او مع اختك او مع بنتكفيما بعد

كانوا العيال اتربوا

انما لا نفضل نجلد فى البنات والستات لحد ما نجيب عليهم كل الغلط

الفريق التانى

الى اقرب حاجه على بؤه رمى اللوم على الحكومه

ماهو ارتفاع تكاليف الجواز

والبطاله

والواسطه

هما السبب

يسلام يا اخويا منك له

بقى هو ارتفاع تكالبف الجواز والبطاله والوساطه

هما السبب؟

طب ايه راى جنابك انت وهو ان الاحصائيات اثبتت

ان ان ظاهره التحرش بتكون بنسبه كبيره لدى الاطفال من سن الاعدادى للثانوى

والرجاله من سن 35 فما فوق

ايه راى سعادتكم

العيل الصغير الى فى اعدادى عنده مشكله ارتفاع تكاليف الجواز ولا بيعانى من بطاله

ولا الشحط الى عنده 35 فما فوق ده

ماتجوزش لسه؟

دا بيكونوا متجوزين وبيتحرشوا بارضه

ايه مشكلتهم دول

بيتحرشوا ليه؟

ولا السبب هو انعدام الاخلاق والخوف من ربنا

والتناحه وقله الادب

وبعدين الى عاوز يتجوز مش ها يقف على النواصى يستنى بنت تعدى علشان يتسافل عليها

ولا ها يقسم يومه على حسب مواعيد خروج مدارس البنات

الى عاوز يتجوز ده ها يشغل ليل نهار علشان يقدر يتجوز

مش ها يبقى عنده وقت بيتسافل على مخاليق الله فى الراحه والجايه

الصيع الى واقفين على النواصى دول مش عاوزين يتجوزوا دول عاوزين واحده ينهشوا فيها علشان يشبعوا السعار الجنسى الى عندهم

لا اكتر ولا اقل

اما بقى الفريق التالت فهما الاخوه المتنورين المتعلمين

الى يقولوا اصل الحجاب الغريب على مجتعنا اصل حجاب عمرو خالد ده هو السبب

ونظريه المزه المحجبه الى بقت منتشره فى كل الدنيا

يعنى حضرتكم الى مش محجبه بيتحرش بيها ليه؟

ماعلينا من المحجبه الوحشه الكخه الى اهلها مش عارفين يربوها دى

(مع ان دى حريه شخصيه يا دعاه الحريه

ماعلينا طبعا)

ماتجوبونى الغير محجبه بيتحرش بيها ليه هى كمان؟

طبعا مافيش اجابه

بس انا عاندى الاجابه على كل الفرق دى

طول ما احنا عمالين نجيب الغلط على كل الناس الا الجانى ها نفضل ورا

طول ما احنا عمالين نعامل الانثى على انها رجس من عمل الشيطان هانفضل كده

طول ما بنتعدى على حريه الاخرين فى لبسهم وحياتهم

هانفضل كده

يبقى من الاخر الكل فى البلد دى لازم يحترم نفسه

عيد ميلادى والمدونه

ورمضان كريم

انا بقالى 21 سنه النهارده على وش الارض
شخصيا مش فارقه كتير
المشهد بيتكرر كل سنه
وكل سنه بكون لوحدى
انا والوحده بقينا قدر بعض
هههههههههههههه

الحدث التانى والاهم
هو عيد ميلاد نودى
نودى عندها سنه
ودى بقى احلى سنه فى حياتى
يمكن لانى حسيت ان نودى دى بقت بنتى من يوم ما بقت موجوده
واكيد لانى بسببها اتعرفت على شخصيات اكتر من رائعه
بس الاكتر
انها كانت ونيسى فى ايامى الصعبه
كانت ملاذى من شبح ---------
بوستات وتعليقات ومواقف
اى نعم مدونتى مش مشهوره
لانى مش حابهانى ادخل كل المدونات
لانه بقى مولد
بس انا بحب الناس الى بدخل عندهم والى بيجوا عاندى
كده هاايل


وفى النهايه
رمضان كريم كل سنه وانتم طيبين

تحياتى
نودى