الثلاثاء، 11 نوفمبر 2008

اخص عليك يازمن

مهاترات
فرق تسد
العباره دى دخلت البلد من ايام الاحتلال الانجليزى
بس للاسف الاحتلال خرج
والكلمه لسه موجوده فينا ومتأصله كمان
المناسبات كتير بصراحه
أولها حزب الغد
بما ان السنه دى سنه الحرايق
واللون الموضه الحكومه قررت انه يكون الاسود
فما كان من حزب الغد غير انه يستجيب لقرارات الحكومه
ويولع
هايكون اجدع من مجلس الشورى يعنى؟
ماعلينا أنه ولع
ده قضاء وقدر
نعمل ايه فى الماس الكهربائى الشقى؟
المصيبه الأكبر فى انقسامات حزب الغد
والى هى تكريس واضح لمقوله فرق تسد
الراجل موسى ده من مؤسسى الحزب مع ايمن نور
ودلوقت هو ومرات ايمان نور وانصاره واقعين فى بعض
ومبهدلين الدنيا صراحه
وكان طبعا ختامه مسك يوم الخميس
الاخ موسى ده جه مع جميله اسماعيل
فى العاشره مساء علشان كل واحد فيهم يقول الحريق حصل ازاى
طبعا الأعمى فتح على الحقيقه الى ظاهره من الصور والفديوهات
والاقوال بتاعتهم هما الاتنين
لاننا طبعا مفتحين وما بينضحكش علينا
الى ضايقنى اوى بقى من ربيب الحزن الوطنى
انه قعد يبلطج على جميله اسماعيل يقول انها عميله طول عمرها وانها بتشوه سمعه مصر
السؤال بقى ياعم السمعه؟
ولما هى زفت وزباله هى وجوزها انت ليه أسست مع الخونه دول الحزب؟
ولما هما خاينين لمصر وبيشوهوا سمعه مصر ليه متمسك بحزبهم المشبوه ده؟
طبعا مافيش اجابه
المفروض هدف أحزاب المعارضه انها تتصدى للحزب الحاكم وتحاول تخرج الناس من طغيانه
مش يحرقوا فى بعض
كده يبقى الناس دى كلهم مش كويسين
الى هاممهم المصالح وبس
اددى كان الموضوع الاول
الموضوع التانى بقى
خناقه المدونين
از فجأه يا جماعه بعد ما كان التدوين ده مهمته الاولى هو التعبير عن مصر
بعيد عن سلطه الحكومه
وجبروت الحكام
اصبح خناقات على المصاطب واحد يقول يمين والتانى يقول شمال
وهات يا شتيمه
الخناقات بقت كتيره
وبيدخلها عدد كبير من كل طرف
اخر خناقه بقى
تغطيه انتخابات امريكا
فيه مدونين سافروا وغطوا انتخابات امريكا
جميل
ناس بقى مدونين معجبهمش
ليه يا جماعه
اصلهم مدونين والتدوين ده مش مهنه
أصلهم واخدين فلوس
وده اسمه شحاته
أصلهم بيأيدوا فكر أوباما
وده تحيز
والمدون لازم يكون محايد
يا راجل
والقواعد دى بقى كانت فى أى كتاب
يعنى نزلت فى الصحاح مثلا؟
ولا فى تفسير الزمخشرى
ما كل واحد حر
يعمل التدوين مهنه
يتربح منها
ياخد فلوس مقابل تغطيه
يحب أوباما ويشجعه حتى بدل المنتخب
ولا لازم الكل يشجع أبو تريكه؟
طب لو كانوا سافروا من غير ما ياخدوا فلوس؟
ولا كانوا سافروا مسانده لماكين؟
كانوا ها يبقوا حلوين وعليهم سكرسنترافيش؟
ما كل واحد حر
ما بدل ما نقعد ناكل فى بعض علشان الى سافروا وغطوا الانتخابات
ما نقعد نفكر ازاى الناس دى وصلت لمرحله انها تختار مين يحكمها بمزاجها
ونحاول نتعلم منهم
يعنى انتم اتضايقتوا من التغطيه
وما اتحسرتوش من الانتخابات نفسها
وما تحسرتوش من البرامج الانتخابيه الى كانت مطروحه والناس تختار الأفضل
سبحان الله
ولله فى خلقه شئون
وحاجه تانيه بقى
بجد غيظانى اوى
بقى دلوقت واحد من الى سافروا طول عمره بياخد من المعونه؟
طب ما تقالش الكلام ده ليه زمان
لما كنا حبايب وزى السمن على العسل؟
ايه الى جرى يعنى
ولمصلحه مين كل ده؟
اكيد مش فى مصلحه أوباما

هناك 16 تعليقًا:

رئيس جمهوريه نفسى يقول...

اولا موضوع حزب الغد ده العادى بعد رفع شعار البلطجة هى الحل والحريقة بتاعت المقر دة ااقل واجب واهو حصل مقر حزب الوفد مش مشكلة يعنى بس السؤال الاهم هل اى واحد من اعضاء الحزب حيعتقد انى واحد بيفهم حينتخبة بعد ما شاف اسلوب البلطجة
ثانيا موضوع فلوس التدوين وتغطية الانتخبات الاعتراض مكنش على اخد فلوس مقابل التغطية او اى حاجة من كدة الاعتراض كان على موضوع انى الناس بتنكر وبدون ذكر اسماء من كان متولى لواء الهجوم على افراد السفر انا بصراحة عازره او عازرها بمعنى ادق لانى اتهمات العمالة والقبض اتوجهة لبعض اللى راحو وهى كانت بتدافع عنهم فلما تكتشف انها كانت مخدوعة وبتدافع عن باطل رد فعلها منطقي
وثانيا هى ما هجمتش القبض فى حد ذاته هى هاجمة الادعات بتاعت البعض من كونهم مضهدين وبيتعذبوا وبيتسجنوا علشان يرفعوا نصيبهم من اموال وانهم بيصرفوا على مدونتهم من جيبهم الخاص
وبصراحة يا نودى هى معاها حق من وجهة نظرى على الاقل

إبـراهيم ... معـايــا يقول...

هيا حاجة تقرف من الحكومة والمعارضة على السواء !!!!

امبارح "جميلة اسماعيل" لما جت في العاشرة مساءً كانت في حالة يرثى لها، والكلب التاني اللي اسمه موسى مصطفى ده متخلف قووووي !!!!........


مليش نفس أتكلم عن الحاجات دي !!!


بجد تغم !

إبـراهيم ... معـايــا يقول...

وبعدين إبقي كبري الخط شوية يا ستي :)


تحياتي

nody_1987 يقول...

رئيس جمهوريه نفسى

وهما يعنى علشان راحوا وغطوا الانتخابات يبقوا عملا
يعنى على كده الى بيروح بعثه امريكا يبقى عميل؟
ماهو بيتعلم عندهم وبعد كده بيشتغل عندهم
والمستشفيات الى اجهزتها من امريكا الى بيتعالجوا هناك عملا
طب لو كانوا راحوا غطوا انتخابات فى بلد قريبه مننا وبلاش ذكر اسماء يعنى
كانوا بارضه ها يبقوا عملا؟
واشمعنى جمله طول عمره بيقبض من الماعونه ما اتقالتش الا دلوقتى بارضه
ما كل واحد حر
احنا بقينا عمالين نجلد فى بعض ونتهم بعض وخلاص
نورتنى

nody_1987 يقول...

ابراهيم ---معايا

سواء الحكومه والمعارضه
ما يهمهومش
غير مصالحهم وبس
كل واحد بيلعب بالكارت الى ها يكسب بيه
واحنا مطحونين فى النص
بلاوى وملوا البلد

حاضر ها كبر الخط
شرفتنى

mero-moory يقول...

السلام عليكم و رحمة الله و بركاته

بنرد الزيارة يابنت بلدي وإن شاء الله معاكي هنا دايما يا جميل

نيجي بقى للموضوع :-
إنتي نفسك قولتيها بس لا تلوموا الدهر لأن الدهر هو الله عز وجل طبقا للحديث القدسي

وكما قالوا يعيبون الزمان والعيب فينا وما لزماننا عيب سوانا

هي دي الحكومة هي دي السلطة هما دول المصريين
وصعب أقول هما دول المسلمين بس عايزة أقول هما دول البشر

موش بقى حد كويس ولا حد بيخاف على حد انا كتير بحس لو كل حد جاله فرصه يبيع البلد هييع و حاسه إن كله بيتلكك لكله موش بيقولوا الضحيه لما بتقع بتكتر سكاكينها

أنتي بنفسك قولتي واستغربتي موش دي جميلة اسماعيل وايمن نور اللي مع الزفت ده في الحزب ليه دايما لما حد بيقع بنقول عليه ونطلع فيه القطط الفاطسه
ليه بقت القلوب ضعيفه خالية من اي مشاعر
فين كلمة الحق فين الراي الحر

لو راحوا وماتوا واتباعوا ومات ضميرنا يبقى احنا كده في بلد حكومتها مصرية

يارب يكون المغزى اللي عايزة اوصلهولك فهمتيه

لان حتى لو كلامي صريح وعلى الملأ قالها الله يرحمه سعد باشا زغلول

مفــــــــــــيش

فـــــــــــــايدة

في رعاية الله يا قمر

أخوكم / عبدالرحمن يقول...

الموضوع فيه لعبه كبيرة ومسيرنا نعرفها

في حب مصر يقول...

السلام عليكم
ازيك يا زملكاوية
اولا شكرا لسؤالك
ثانيا بالنسبة لموضوع الكتابة في المدونة فأنا بصراحة ومن ساعة ما جيت من مصر مش ليا نفس اكتب اي حاجة، ده غير ان المشاكل بتلاحقني من هناك ومش راضية تخلص.. كأنها لعنة الفراعنة
بخصوص بقى حكاية فرق تسد دي.. فاحنا والحمد لله مش عايزين مؤامرات ولا أجانب علشان نخبط في بعض وكل واحد يدي التاني في ضهرة او على دماغة.. احنا الحاجات دي بقت هواية عندنا.. طبعا لسة فيه ناس كويسين لك للاسف بقم قليليين جدا

بمناسبة ايه حكاية الاسهم المجانية دي.. هما ناويين يعملوا زي هاني رمزي في فيلم عايز حقي؟؟ ولا الحكومة عايزة تبيع اللي فاضل في البلد وبتسكت الناس بشوية فتافيت؟؟؟

تحياتي يا زملكاوية
وانشاء الله ناخد الكاس

nody_1987 يقول...

mero_moory

اكيد طبعا المعنى المدفون فى كلامك وصل يا جميل

هى مافيش فايده دى بارضه اتقالت ايام الانجليز
وبارضه الانجليز خرجوا وهى لسه موجوده

نورتينى ياقمرايه

nody_1987 يقول...

اخوكم عبد الرحمن

ابحث عن المرأه
وانت تلاقى الحاجه دى

شرفتنى

nody_1987 يقول...

فى حب مصر

اولا لا شكر على واجب
ثانيا الف سلامه عليك من المشاكل
ان شاء الله القطه السوده الوحشه
ثالثا
احنا بقينا زى السمك بناكل فى بعض
خامسا بالنسبه لموضوع الاسهم
فايسيدى ال176 مليار الى اتسرقوا من الخصخصهالاولانيه
وانت ارف الدنيا بقت غلا وكوى
هما ياسيدى ها يبيعوا الى فاضل لسه
وهايدوا لكل واحد الفين جنيه
اهم ينفعوك فى العزومه الى انت اكلتها عليه
نورتنى يا اهلاوى

م/ الحسيني لزومي يقول...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
ارسل ميلك اذا كنت ترغب في وضع البنر نرسل لك كود البنر

~*§¦§ Appy §¦§*~ يقول...

نودى معلش موضوع المدونين اللى سافروا دول كبيررررررررررر
اكبر مما تتخيلى فاهمه بعدين اكون رايقه ابعت لكى كل حاجه علشان تفهمى اوك

اقصوصه يقول...

موضوع التدوينه جدا جميل

وذكرني بتدوينه اخرى قرأتها

من مده قريبه

كانت بعنوان

تلت يوم تقل الثور الاحمر

تحدثت التدوينه تقريبا عن نفس الموضوع

البت المشمشية حلوة بس شقية يقول...

فيه غموض وحاجة مش مفهومة واكيد هيجى يوم ونعرفها ياريت تنورى مدونتى المتواضعه

قلم رصاص يقول...

يعني هي جت على المدونين

اشمعنى هما ميحصلش بينهم خلاف وطحن فكري
هههههههههههه

احنا بصراحة خساره فينا كل حاجة حلوة في الدنيا

حتى لما ربنا يفتحها على المكبوتين سياسيا وفكريا زينا ويبقى لهم بوابه يعبروا من خلالها للتعبير عن آرائهم بحرية زي المدونات مثلا..برضه ومفيش فايدة وكالعادة نختلف ونطحن بعض ونشتم بعض ونتزايد على بعض

واما بخصوص حزب الغد

فهو شانه شان الاحزاب الاخرى ، لكن لكل شيخ طريقة

مين فينا ينسى احداث البلطجة اللي حصلت في اعرق الاحزاب الليبراليه في الشرق الاوسط وهو حزب الوفد

ربنا يستر على البلد
بجد الواحد قلقان الفترة اللي جايه وخايف تبقى فوضى

يلا كلنا نشوف الفيلم احسن

تقبلي مروري مع التحيه