الأربعاء، 25 فبراير، 2009

حاله قرف

دماء على الشاشه بما انى انسانه عاطله وفاضيه وماورايش اى حاجه
فا وقتى بقضيه يا اما نايمه يا بتفرج على التلفزيون يا على النت يا بقراء اى حاجه
والتلفزيون ده بقى مش حبيبى قوى
لانه بحس ان معظم القنوات بتساعد على زياده نسبه العته والبلاهه
ودى رأى الشخصى
نيجى بقى لموضوعنا
مسلسل اسمه بنت من الزمن ده بطوله الممثله الفلته داليا البحيرى
مسلس بيناقش ظاهره بنات الشوارع على التحديد شفت من حلقات كتير
لكن فيهم حلقه اثارت استيائى وقرفى واشمئزازى
وهى الحلقه الى بيعتدى فيها (كونه)باسم السمره على شروق(داليا البحيرى)
جنسيا
هما اى نعم ما بيجبوش منظر الاعتداء لانها طبعا بتكون متخدره
لكن بيجيوا قبل وبعد الاعتداء
المنظر المقرف بجد هو ان (كونه) بيحتفظ بلملايه الى عليها دماء العذريه للبطله
علشان يذلها ببيها
وبتظهر فعلا الملايه فى المسلسل وفيها اكتر من بقعه وكانها حد فاتح كرش حد على الملايه دى
حاجه كده تدعو للقىء
انا مش ضد الموضوع لكن ضد الطريقه
افتكر فى فيلم الطوق والاسوره اتعرضوا لموضوع دماء العذريه لكن الموضوع كان مقدم بطرقيه احسن من كده
جابوا المنديل اياه والعريس (احمد عبد العزيز.) ماسكه فىايده وخلاص
واحنا فهمنا
انما ليه دلوقت المناظر دى بقت بتيجى فى التلفزيون
يعنى كمان مش فيلم سينما
لو اتعرض فى التلفزيون ها يبقى بالليل بعيد حتى عن الاطفال
انما مش فى مسلسل بيتعرض ليل ونهار قدام الجميع
يعنى لما طفل يشوف منظر زى ده والفضول يشتغل
مامته ولا ابوه ها يردوا عليه يقولوا له ايه؟
المشكله مش فى المسلس ده وبس
بقت فى كتير من الاعمال بتعرض الحاجات دى بشكل فج ومبتذل بدون اى مراعاه لمشاعر المشاهدين
المفروض يكون ليهم دور للنهضه بالذوق والاخلاق العامه
مش العكس
ولا انا غلطانه؟

هناك 38 تعليقًا:

رئيس جمهوريه نفسى يقول...

اولا هو فى استحالة عملية اصلا للموضوع يعنى انى يكون المنظر زى ما انتى بتقولى كرش مفتوح يعنى دم كثيف ودة مستحيل لانى دماء العذرية بتكون نقاط مش لترات
موضوع الفرق بين المنظرين ممكن راجع لانى مجتمع اولاد الشوارع هو مجتمع عشوائي فمش محكوم بقيد وتقاليد

thunder يقول...

طبعا معاكى حق يابنتى بلدى المشكلة فعلا حتى الاول يرعوا ان فى اطفال لا اعتقد انك دا اتنسى بفرض ما لية وخلاص المشاهد يحط ماهو فى العموم الفكرة وصلت وخلاص لية اصلا من حشر المشهد فى الموضوع ولا دا على اساس السينما الواقعية وهيتقال زى التوربينى وغيرهما اللى ظاهروا فى الشوارع وخصوصا القضية الجديدة لكن المفروض فى مراعاة لمشاعر ناس لكن فى المجامل على الرغم من ان المسلسل طرح الفكرة بس طريقة وصلها للقمة اعتقد استخفاف اكبر بى العقول وصعبها جدا تتحقق

nody_1987 يقول...

رئيس جمهوريه نفسى

المشهد ده اتكرر مرتين مره كان منطقى جدا وطبيعى
والمره التانيه كان مبالغ فيه جدا

اما بخصوص اولاد الشوارع
فاحتى لو مافيهوش اخلاق وقيم
المفروض يكون فيه معالجه دلااميه للاحداث بحيث ما يضروش شعور المشاهد

nody_1987 يقول...

thunder

عندك حق طبعا هو استخفاف بينا وبمشاعرنا
وعدم مرعاه لتقاليد او حتى احترافيه المهنه

راجى يقول...

لا طبعا موش غلطانة معاكى حق

واحدة مفروسة يقول...

بصي ما تزعليش منى انا مشكملت لآخر الموضوع
انا و صلت لمشهد الاعتداء بس

بس علشان تعرفي انا مش بتفرج على مسلسلات عربي خالص
لانها بتستغبانا
و المخرج بيضربنا على قفانا
و احنا قفانا ورم من الكتر الضرب
مين ما كان بيضربنا
قوم انا مش عاوزة فرسة و لا ضرب
فمش بقيت اتفرج على مسلسلات عربي خااالص
بتفرج على توم و جري
ههههههههههههههههه
و عليكي و على الام بي سي 2 و3و4وماكس
احسن كتير و لو اننا ساعات بنبهت عليهم
حاجة تفرس

nody_1987 يقول...

راجى

ربنا يخليك ياهندسه

nody_1987 يقول...

واحده مفروسه

اه والله تصدقى بيضربونا على قفانا
وان جيتى تتكلمى يقولوا لك عاله جهله ما بتفهمش

وهاحاول اعمل بنصيحتك

Appy يقول...

لكل شخص رؤيه مختلفه فى اللى بيشوفه
انتى مش غلط يا حبيبتى

Eng. Ahmed Abo El-Ella يقول...

ممكن اسأل سؤال؟
هو الهدف الأساسي من المشاهد ديه ايه؟ أو بمعنى أصح ليه بتتعرض بالطريقه ديه بالذات؟ هل عشان مناقشة القضيه؟

انا بشوف أن اللي بيشوف المشاهد ديه بالطريقه ديه بينسى القضيه أصلا وبيفكر في اتجاهات أخرى

طيب يبقى الهدف ايه؟
الهدف هو احداث فرقعه
أيوه فرقعه عشان الناس تتكلم وتنتقد وبكده يحقق نسبة مشاهده عاليه

Bondoka يقول...

اصلا التليفزيون والسنيما دلوقتى كله قرف
يعنى مشهد زى ده لزمته ايه
ماحنا بنفهم لوحدنا والله وزمان كان كفايه الدنيا تضلم عشان نعرف ايه اللى حصل

انما القرف ده عشان يشبع رغبات فئه من الشعب مقرفه زيه هو اللى صنعها وبيغذيها

الله يرحم الادب والحياء والاخلاق

nody_1987 يقول...

appy

حتى لو اختلفت وجهات النظر
المفروض يكون فيه قواعد واداب عامه

محدش يخرج عنها

nody_1987 يقول...

ENG AHMED ABO El-ELLA


فعلا هو الهدف من ورا المشاهد دى هو احداث فرقعه اعلاميه
لعمل بيكون فعلا هابط فنيا
نورت المحكمه ياهندسه

nody_1987 يقول...

BONDOKA

لا ازاى هو احنا ها نفهم لوحدنا كده

هما عارفين اننا شعب جاهل لازم يعرضوا لنا كل حاجه بقرفها

مستكه يقول...

السلام عليكم ورحمة الله وبركاته

بنت المنصوره اول مره ازورك وسعدت بزيارتك

عجبني البوست في فكرته ان الاعمال الدراميه فعلا بتتغاضي كتير عن عن الواقع ويقولوا احنا بنمثل واقع

واقع ايه وواقع مين !!

غير ان فعلا الواحد بئه يتحرج يشاهد علي اعمال كتير مع الاسره مهما قلنا انه مسلسل ومر بالرقابه الا ان الرقابه معدتش زي زمان

ده بالنسبه للرقابه يعني اما بالنسبه لقصة المسلسل واحداثه فحدث ولا حرج

كنت كتبت وجهة نظري في المسلسل ده تحديدا يسعدني لو تشوفيها وتقوليلي رايك بما انك بنت من الزمن ده .

http://mestka7abhan.blogspot.com/2008/10/blog-post_17.html

تقبلي مروري ^_^

في حب مصر يقول...

السلام عليكم
ازيك يا قمر المنصورة
يارب تكوني بخير
بخصوص دماء العذرية ده فكرتيني باللي كان بيحصل عندنا في البلد زمااااااااان كانوا بيجيبوا منديل عليه دم ويفرجوا عليه الناس دليل على نجاح الفتح العظيم... والمنظر بصراحة بيكون مقرف جدا.. لكن كون ان الكلام ده يتعرض على التليفزيون فده تطور خطير!!!!
هو تكريس لعادات قديمة غبية مش عارف ليه
عامة انا مش بحب المسلسل ده ومش اتفرجت عليه مش عارف ليه اصلا
بشكل عام الانتاج الفني المصري دلوقت بقى كل تركيزه على المشاكل والقضايا الجنسية.. وبعدين يتكلموا عن سبب التحرش..
المهم انتي اخبارك ايه يارب تكوني بخير.. طمنيني على اخبار سموك

في حب مصر يقول...
أزال المؤلف هذا التعليق.
nody_1987 يقول...

مستكه

المدونه وصاحبتها اتشرفوا بمرورك واتمنى لو تكرريها تانى

انا قراءت النقد بتاعك للمسلسل
فعلا خمس سنين وبقت طالبه فى الماجيستير
حاجه كده زى افلام جيمس بوند
والى يغيظك بقى فستان الفرح الى كانت لبساه وهى اصلا حامل عمرك شوفتى استخفاف اكتر من كده بينا؟

نورتينى

nody_1987 يقول...

فى حب مصر

انت حذفت الكومنت التانى ليه
على فكره هو سؤال مهم جدا
وانا بفكر اعمل له بوست

اما بقى بخصوص الفن المصرى
فابجد بقى محسور اسفل البنطلون
وان جيت تقول كده مايصحش يقولوا لك اخرس ياوهابى ياجاهل
على اساس ان التقدم والرقى لازم يكون نابع من اوض النوم

ماتتاخرش علينا تانى
مش لازم الواحد يجى يخبط عند بيتكم يعنى

*البت المشمشية *حلوة بس شقية * يقول...

بصى يا اوختشى
الموضوع دلوقتى مبقاش فن ولامسلسلات
كلو بقه قلة ادب
المفروض التلفزيون يبقا للكبار فقط
خلاص يبنتى حتة المسلسات اللتى كان مضمون ان يبقا مفيهاش مشاهد خارجة بيقا فيها
مش هتصدقى لم ااقولك كان فيه مسلسل
مصرى مش فاكرة اسمو
المهم كان فيه كدة
ليلة الدخلة والعريس والعروسة
بس مش بوضوع اوى
كانو بيجيبو رجليهم بس
هههههههههههه
ايه قلة الادب اللى انا فيها دى
بعرفك بس
ان خلاص الموضوعغ بقه ايزى موزو وسلملى ع التلفزيون

زوجة عنيدة يقول...

على قد ما الافلام والمسلسلات بتعمدوا يجيبوا حاجات كتيرة من نوعية المشهد

قال يعنى عشان يحصل جدل علية ويبقى ناجح

زى الاغانى برضة تيجى المطربة من دول وهى لا مطربة ولا حاجة تلبس لبس مش ملبوس برضة لنفس الغرض

ويعنى هو الدم مكتوب علية انه بتاع
الشخصبة دى

ده هبل وربنا يحفطنا من الهبل

المسلسل دة بيتذاع على قناة كل ما اشوفة اغير القناة اصلى مش بحبة

بس مع اعتراضى للموضوع هو ممكن دة يحصل
ان يكون الدم بالغزارة دى
لانك مش واخدة بالك ان دة كان اغتصاب

مش زواج عادى

تحياتى

حياة يقول...

عندك حق معظم القنوات بتساعد على زياده نسبه العته والبلاهة
وهو ده الهدف الأساسي من الأفلام والمسلسلات الي بتعرض على التليفزيون في ظاهرها انها بتعالج مشكلة ولكنها للأسف مستترة في باطنها لمحو القيم والمبادئ لا لك ان تتخيلي فعلا زي ما ذكرتي لو طفل او طفلة بيتفرجوا على مشهد اعتداء كونة على شروق..
وفي نفس المسلسل شخصية الغجرية الي اتجوزت ابو شروق علشان الفلوس وسرق الذهب منها وشخصية الدكتورةالي اتجوزت من راجل كبير في السن علشان الفلوس .

وبعد المسلسل اتفرجوا على فيلم عربي ومااكثر مشاهد العنف وتعاطي المخدرات حينشأو فاقدين المبادئ والقيم والأخلاق وللأسف هو ده الواقع الي احنا عايشينه طفوله بلا براءة واجيال مادية.

أطيب وارق تحية
دمتي بسعادة

سكوت هنصوت يقول...

ارجوك ما تنطش التعليق ده

ادعوكم لقراءه هذه التدوينة لنوارة

http://www.tahyyes.org/2009/02/blog-post_27.html

نجم...فإن اردتم توفير الوقت فمن فضلك ضع توقيعك في هذا الرابط من أجل مطالبة العالم بتفكيك اسرائيل كدولة

http://www.tahyyes.org/2009/02/blog-post_27.html
\

MaNoO يقول...

طبعا عندك حق وهسأل سؤال هما ليه بيعرضوا المشهد بالطريقة دى ؟
فاكرين اللى بيتفرج أهبل ولا عبيط ماخلاص وصلتا الفكرة وانتهينا نفسى نعتمد فى الدراما والسينما علىا لفكرة نتعامل مع المشاهد بعقليته فى الفترة الاخير فى ناس كتير بداوا يأخدوا بالهم من الموضوع دا انما فى ناس لسة عايشة فى زمن اننا لازم ندخل المعلومة جوا المخ مش ممكن حد يلقطها كدا

بشكرك على البوست وتقبلى تحياتى

nody_1987 يقول...

البت المشمشيه حلوه بس شقيه

طب احمدى ربنا انها جت على رجليهم بس

ههههههههههه

nody_1987 يقول...

زوجه عنيده


يمكن يكون كان بالغزاره دى نه اغتصاب

بس الضحيه كانت متخدره

nody_1987 يقول...

حياه

لا لو طفل شاف المسلسل ده وبعد كده كمل
بفيلم من دول
تانى يوم هايقول لمامته انا عاوز ماطوه يامامى
ههههههههه
هما الناس دى اهم حاجه عندها انهم يحققوا شهره وفلوس
انما يبنوا اخلاق ومبادىء جيل
لا طبعا

nody_1987 يقول...

سكوت هانصوت


ربنا يوفقكم الى ما يحبه ويرضاه

وما يضيعش تعبكم على الفاضى

nody_1987 يقول...

MANoO

لا هما بيتعاملوا معانا على اساس اننا لسه فى الروضه
عاوزين كل حاجه واحده واحده وبالتصوير البطىء علشان نفهم

thunder يقول...

مممممممممممممممم اية يانتى انا اللى سيبت ترويل مش انتى مالك وفين اتمنى تكونى بخير ان شاء الله يارب وبوست دا طول فين الجديد

nody_1987 يقول...

thunder

هو انت ؟؟؟؟؟
مش تقول
وايه الى وداك روسيا
انا بدخل على الاكونت القديم مش شغال

ســـهــــر يقول...

يعنى خو مش اكتر من استخفاف بينا
انا عن نفسى مش بحب اتفرج ع التليفزيون خالص بيجيلى حالة فقدان للوعى
شوية جيبولك واحدةو فى الاربعين طالعه بنوتة فى جامعه ولا بنت بتكون نفسها وراكبة عربية بأأأأاااد كدة حاجة تجيب الضغط يعنى

ايييية ربنا يصبرنا
ميرسى ع البوست الحلو يا قمراية

حاسوباتيه يقول...

عندك حق فعلا بقوا كتير قوي المواقف دس والمظاهر دي من غير اهتمام لمشاعر المتفرج

تحياتي ليكي واول مره ازورك

nody_1987 يقول...

سهر

دا هو مش استخفاف وبس
دا استعباط وقله دين واخلاق

شرفنى مرورك

nody_1987 يقول...

حاسوباتيه

هما بيتعمدوا حشر المشاهد دى فى الاعمال
علشان يحققوا شهره رخيصه
على حساب اخلاقيات العمل

يارب الزياره تتكرر

hasona يقول...

يمكن علشان
الاخلاق في منحدر خطير

hasona يقول...

السلام عليكم

عندك حق
ولأسباب كثير

يمكن علشان
الاخلاق في منحدر خطير
وبقي الفن رخيص
وأكثر وقاحة

الاعمال الفنية مش بتعالج أو مش بتناقش المشكلة لإيجاد علاج لها
وانما لتحقيق مكاسب مالية فقط
وبيكون علي حساب المشاهد والموضوع والعرض

تحياتي

شريكة في المطعم يقول...

فعلا عندك حق
بقوا بيزودوها اوي في كل حاجة
مع ان الي بيتفرج ..مش محتاج كل ده عشان يفهم
وحتى بغض النظر عن ان في اطفال بتتفرج
حتى لو حد كبير ..في الغالب هيغير القناة ..
فمش عارفه المخرج استفاد ايه من كده؟؟!