الأربعاء، ٦ أغسطس ٢٠٠٨

يوم عاد الماضى

يوم عادت اليها الذكرياتانا من بوم ما عرفتك وانا فى حاجه شدانى ليكى

حاجه زى ايه؟

مش عارف بس بحس انى بقرب منك كل يوم اكتر

مش عارفه اقول لك ايه

انا بحبك

انت بتقول ايه ؟

انا بقول الحقيقه

سكتى ليه ؟

مش عارفه

مش عارفه ايه؟
بتحبينى؟
ايوه
انا عملت حجات غلط كتير فى حياتى

محدش ما بيغلطش
غلطى اكبر مما تتصوريه
انا----
انا مسمحاك
انا نفسى كل الناس تعرف انك حبيبى
وانا كمان
انا كلمت اهلى عنك
مرحبين بيكى جدا
ليه عملت كده.؟
مابخبيش عنهم حاجه
انا خايفه
ماتخافيش
انا بعد الايام علشان ارجع من السفر
ونكون مع بعض
وانا كمان صدقنى
-------------------
النهارده عيد الحب
كل سنه وانتى طيبه يا حبيبتى
وانت طيب يا حبيبى
اول مره احس يعنى ايه عيد حب والفضل ليكى
ربنا يخليك ليه
--------------------
ممكن اخت تيجى تزوركم علشان تبقى قربت المسافات على ما انا ارجع
ازاى؟
مش مامتك عارفه
اه
خلاص
احاول
-------------------
اختك قالت عنى ايه؟
قالت انك انسانه مهذبه ومحترمه
ومرحبين بيكى جدا
------------------------
ايه الى انت عملته ده
انا اسف يا حبيبتى
ارجوكى ما تسبنيش
انا بحبك
مستعد اعمل اى حاجه علشان تغفرى لى
ايه ده انت شكلك عامل كده
بتعيط؟
ايوه
مقدرش استغنى عنك
خلاص مسمحاك
بحبك
------------------------
انتى اختى وامى وحبيبتى وكل حاجه فى دنيتى
وانت اغلى حد عندى
عمرى ماحبيت ولا هاحب حد قابلك
---------------------------------------------
---------------------------------------
انا حجزت هانزل بعد 20 يوم
بجد؟
اه
بس نازل اجازه صغيره يادوب استجم وبس
تيجى بالسلامه
-----------
انا بكلمك من مصر
حمد الله على السلامه
لازم اقابلك قبل ماجى عندكم البيت فى كلام مهم عاوز اقوله
احاول
لازم
اوك
------------------------------
ايه رايك لو نفضل مع بعض لحد ما كل واحد فينا يتجوز
يعنى ايه
ماتخديش فى بالك
------------------------
ايه الكلام الى انت قلته واحنا مع بعض ده
بصراحه
اهلى مش موافقين عليكى
وانا الى غصبت على اختى تزورك
وانا لقيت فى شخصيتك حاجات ما تنفعيش بيها تكونى ام ولادى
وانا ما كنتش عاوز علاقتنا تاخد الشكل ده
لكن انتى الى اصريتى على موضوع الحب
انا؟
ايوه
والحب
الحب حاجه والجواز حاجه تانيه
وانا اعمل ايه من غيرك؟
انت اول راجل فى حياتى
انساك ازاى؟.
عيشى حياتك
سلام








هناك ٣٠ تعليقًا:

إبن مصر يقول...

السلام عليكم
بعد كل هذا الإشتياق والحب والرومانسيه رغم انها مختصره إلا انها واضحه جدا جدا
كان بعد كل ده كان لازم جواز وبيت وعيله
كانت هتكون اسعد عيله

تحياتى على هذا العمل الجميل المحسوووس اوى اوى
nageh

إبن مصر يقول...

كان لازم ارجع واهنى نفسى انى اول كومنت عندك يا بنت المنصوره

لأن ده شرف لى انا شخصيا

تحياتى
nageh

blue-wave يقول...

عارفه يا نودى؟؟
غصب عنى ابتسمت
وهابقى اقولك بعدين ابتسمت ليه
بجد
احسنتى اختيار العنوان
تحياتى

Amgad يقول...

بجد قلبي معاكي
ومكنتش اتمني ده يحصلك
بس تعملي ايه بقي في قدرك
خالص تعازيا والمي من اجلك
هههههههههههههههههههههه

ايه ده مانتي هارشة اهه
اوعي تقولي لحد م البنات بقي
ليبطلو ينضحك عليهم
والشباب يزعلو منك اوي
وتبقي انشاتي ازمة في البلد
لان الشعب هيبطل يحب
وبالتالي يتجه للسياسة
تزعلي الحكومة منك
شوفي البوست بتاعك ده تاثيره ايه بقي
خلي بالك بعد كده
المخبرين في قسم اول اللي جمب المديرية ايد الواحد فيهم بيبقي لابس فيها جزمة
هههههههههههههههههههه
خالص تحياتي وتقبلي رزالتي

Empress appy يقول...

حقير ولو انك تزعلى اللى بالشكل ده كتير ناس ملهاش لازمه فى الحياه صدقينى اتوقعي دايما الغدر علشان متتعبيش

me يقول...

يادى النيلة المنيلة بنيلة

هو انا موعودة ولا ايييييييه

اصلهم كتروا و ملوا البلد

حسبى الله و نعم الوكيل

يلا بخاطرها

اسلوبك عجبنى و نقلنى من مكان لمكان فى ثوانى
احساسها بالرغم انك موصلتيهوش بس بيتهيالى كلامك حط كل واحدة فينا مكانها و كلنا حسينا احساسها

ربنا يبعدهم عنا

تشااااااااااوووووووووو

غير معرف يقول...

كل المكتوب في المدونة أوكي مظبوط بس ليه هو الطلع في الأخر ندل وخلا بها أي تركها ألم يحدث ذلك من الفتيات وبالأكثر عن البنين ليس لاني شاب أدافع عنهم لا .
لان راءيت وسمعت عن كثير مثل هذه المواقف لا اختلف لكل انسان وجهة نظر

تحياتي

Desert cat يقول...

هو ايه موضوع الحب حاجه والجواز حاجه تانية اللى بقى فيرس منتشر فى الجو الايام دى واصاب البلد كلها ده
لا حول ولا قوة الا بالله
الناس اتعدت من بعها يا اختى
ربنا معاها ويخرجها من الازمة دى على خير
تحياتى ليكى

في حب مصر يقول...

الجواز قسمة ونصيب.. والمفروض الانسانة دي تحمد ربنا ان الموضوع انتهي لحد هنا.. كان ممكن الجاي يكون أصعب بكتيير من اللي حص لو ارتبطت بواحد زي ده.

بس طبعا القصة مش واضحة.. ومش معروف هو اخد قراره ده ليه.. وهو كان يعرفها قبل السفر ولا لأ؟ فيه حاجات كتير نلقصة ومش واضحة في القصة علشان نحكم على التصرف ده صح.

عامة ربنا يكرمها بالاحسن منه.. ويوفقك كل المصريين للزوج او الزوجه الصالحة

تحياتي يا زملكاوية
ومبروك للزمالك الفوز على المحلة..

على فكرة انا ليا تعليق على موضوع عند ابي بيتكلم عن حاجة مشابهة.. اتمنى تقرأيه

goodman يقول...

مأساة الحب الاول تتكرر

ياسر يقول...

عارفة متزعليش ارجوكي من صراحتي
دة مش انسان اصلاا كنتي قوليلة تقبلها
علي اختك او مرتك او بنتك في المستقبل
وفوضي امرك فية لله ولاا يهمك والله
في مثل فرنسي بيقول واحد يضيع
عشرة يجوا بس صدقيني ميستهالكيش
واحسن انك ما ترتبطيش بواحد بالطريقة دي
ربنا معاكي ومتزعليش الحمد لله انك عرفتي
تفكيرة قبل حاجة رسمي
تحياتي

Radwa يقول...


يا نهار ابيض
دا ايه دا هو فى كده اصلا
دا متخلف ربنا ينتقم منه
لا دا حمار ما بيفهمش
.........................
سندريلا

ShimaaMahdy يقول...

الحب حاجه والجواز حاجه تانيه
وانا اعمل ايه من غيرك؟
انت اول راجل فى حياتى
انساك ازاى؟.
عيشى حياتك
سلام

********

دا ايه البروووووووووووووووود دا

مش معقول فعلا

و ازاى اخته تساعده ..دى بنت المفروض تخاف على الاقل ليحصل كدا فيها

لا بجد ربنا يصبر صاحبه القصه و الحمد لله انه ظهر على حقيقته

رغم انه ظهر على حقيقته بعد وجع قلب لكن الحمد لله انه ظهر قبل ماتندم العمر كله بعد كدا

Mina يقول...

احساس رائع
وانتقال رشيق في الاحداث
بجد حاجة جميلة جداااااا
ميرسي علي البوست الجميل

nody يقول...

متأسفه جدا يا جماعه انى اتاخرت عليكم فى الردود وده لانى مشغوله جدا الايام دى
سامحونى

nody يقول...

son of egypt
اهلا بيك يابش مهندس اول تعليق
وده شرف ليه

هو اه كان لازم
بس محصلش نصيب

تحياتى

nody يقول...

blue_wave
ماهو شر الباليه مايضحك

منورنى دايما

nody يقول...

amgad
لا ياسيدى ما يكونش عندك اى فكر

دا كلام ابن عم حاديت

nody يقول...

appy
ازعل ليه
دى الحقيقه
محبتى يا قمر

nody يقول...

البت قباحه
دول بقوا اكتر من لهم على القلب
ربنا يستر علينا
نورتى يادوك

nody يقول...

australia
هو عمل كده لانه بكل بساطه ندل
تحياتى

nody يقول...

desert cat
الحكايه فيرس وطينه يااختى وانتشر بين الرجاله
هو ده اصلا طبع كتير منهم

نورتينى

nody يقول...

فى حب مصر
اكيد طبعا الجواز قسمه ونصيب

واكيد ربنا عاين لها حاجه احسن


نورتنى

nody يقول...

goodman
انها مأسى غياب الضمير والاخلاق
وليس مأسى الحب الاول

تحياتى

nody يقول...

ياسر

لا وانت الصادق فى مثل مصرى احلى من الفرنساوى
يروح كلب ويجى سبع


مرسيه على زيارتك

nody يقول...

sendrlla
ههههههههههههه
اه والله لسه فيه كده واكتر من كده كمان

منورانى دايما

nody يقول...

shimaamahdy

تقولى ايه لما البنى الادم يغيب عنه ضميره
ماتفرقش راجل من بنت

ربنا معاها فعلا


نورتينى

nody يقول...

manamino

مرسيه على كلامتك الرقيقه
منورانى دايما

عايش... ولكن !!!! يقول...

ابعد كل هذا الحب... وهذه الاشواق
ينتهى بنا الدرب ... الى الفراق؟!!!!
من اجلك ودعت الرفاق
وحلفت الا اكون لغيرك... مهما تباعدت الآفاق
كنت عندما اراك... ابتسم ... كطفل يرى امه حين استفاق
...............
ده كلام ارتجالى مش عارف بقا طلع منى دلوقت من احساسى بالموقف ده
ربنا يكرمك باللى يستاهلك
تحياتى
علاء

nody يقول...

عايش ولكن

جميله الكلمات بجد
مرسيه على ذوقك
ومبروك لاخوك
فين الكحك؟