السبت، ٢٨ يونيو ٢٠٠٨

أنا والتلفزيون
مش عارفه أنا ليه دايما موعوده بالعاهات كل ما افتح التلفزيزن
مع أنى بحاول ابعد كل البعد عن القنوات المستفزه
والبرامج الغتوته
والاشخاص غربيين الافكار والكلام
بس غصب عنى بشوف ساعات حاجات من هذا القبيل
يعنى الاسبوع الى فات بقلب بالصدفه كده الاقى برنامج البيت الى عمره ما كان بيتنا ده
والاقى المذيع المعجزه
تامر امين
هاجس جالى وقالى بلاش تقلبى
لاقيت معاه كده راجل كوبره رئيس مش عارفه رئيس مركز اتخاذ القرار
حاجه زى كده
لقيت الكلام بتاعهم عن التدوين
وعرفت ان فيه مؤتمر كان معمول لمناقشه ضاهرع التدوين
قلت ما اسمع بيقولوا ايه
لقيت اخينا تامر عمال يسأل الحج الى معاه اسئله غاظتنى اوى واتضايقت واتمنيت انى انا
أرد عليه
والاسئله هى
هل معظم المدونات موضوعتها سياسيه؟
واشمعنى السياسيه الى بتسال عنها
ولا هى المدونات السياسيه دى هى الى تعباكم ومطيره النوم من عنيكم انت والى مشغلينك

ماهى اهم عيوب المدونات دى؟
أقول لك أهم عيوب المدونات دى
اهم عيوبه انها كشفت زيف افترائكم على الشباب
انه شباب جاهل مغيب مافيش فى دماغه غير التفاهات والمخدرات والستات
زى الى انتم بتعرضوه فى افلامكم ووسائلكم الاعلانيه المؤرفه
وان مافيش حد بيفهم ولا وطنى من الشباب دول غير شباب الحزن الوطنى
جت المدونات دى وبينت ان البلد دى فيها شباب بيعرف يتكلم
ومثقف ويع وجهه نظر ولو اديتوا له الفرصه ها يعمل الى انتم مش عاوزين تعملوه
هى دى العيوب يا بش مهندس
هل فيه يجب عمل رقابه على المدونات دى؟
مهما حاولتوا انكم تكدبوا وتقولوا ديموقراطيه
سياسه الرقابه والرقيب فى دمكم
اسفين يا استاذ تامر
الرقابه دى عندك انت فى ماسيبرو يقولوا لك تقول ايه وما تقلش ايه
ولما تبقى مستضيف حد من الى هما يملوك الاسئله
اه معلش
انما المدونات مافيش فيها رقابه
رقابه فى عينكم

ولقيت نفسى بعد كده بدأت اتعب نفسيا من الغباوه الى بسمعها قمت قايمه


غيره
بارضه مافيش فايده
الاخ شوبير عمال يقرف فينا
خير اللهم اجعله خير لقيت البرنامج بتاعه شغال على التلفزيون
انا بطبعى بكره الاستاذ شوبير
مش علشان انا زملكويه وهو اهلاوى
انا بحب مصطفى عبده ومصطفى يونس وصالح سليم والشيخ طه
وبحترم كتير من لاعيبه الاهلى المحترمين
مصطفى عبده لما بيجى يتكلم بحسه انسان محترم هادى عنده حياد
انما الحج شوبير الاعمى يفتح ويقول ده اهلاوى
بصراحه بيضايقنى
والمفروض ان المذيع يكون محايد دى اساسيات المهنه بس نقول ايه
ويخلق ما لاتعلمون
الاستاذ شوبير ده عدو النجاح اه والله
مش عاجبه حسن شحاته وبيهاجمه
وكلنا فاكرين قبل كاس الامم جاب لنا احساس انهم هايروحوا يادوب يكنسوا
ملاعب كوماسى ويرجعوا
وحتى لما كانوا بيكسبوا كان يطلع علينا ويقول حظ لا مش عارفه ايه
واول ما اخدوا البطوله كان اول المستفدين


كذلك مهاجمته لمستر جوزيه وخلافاته معاه
مع انه المفروض انه اهلاوى وجوزيه ده حقق مع النادى بطولات هايله والاهلى اصبح
الاول افرقيا فى عهده

لكن نقول ايه للحقد
دلوقت بقى هو متمزج اوى لانهيار الذمالك وعمال ينقاش ويجيب من قلبه هو وضويوفه
واى حد يبص فى عنيه يعرف الحقيقه
انا عاوزاك تتبسط كمان وكمان يا كابتن شوبير
اهى اتخربت واقعد انت وامثالك على تلها
علشان تلاقى كلام تتشدق بيه انت وضيوفك
نفسى الاقيك بتشجع حد ناجح
مش بتشمت فى حد عنده مشاكل



هناك ٢٦ تعليقًا:

Desert cat يقول...

انا بتفرج على التلفزيون قليل جدا وعلى طول بشوف مسلسلات قديمة اصلى مش ناقصه حرقة دم
ولو حصل ده لو يعنى وقلبت لاقيت الكورة فى دريم بقفل التلفزيون واقعد انا اغنى فى البلكونة
تحياتى

في حب مصر يقول...

مش كنت اعرف ولا أتوقع تكوني زملكاوية يا نودي.. أمال ازاي بيقولو الزملكوية انقرضوا..هههههههههههههه
وبعدين نصيحة أخر أكبر بلاش تتفرجي على التليفزيون المصري وخاصة البرامج الحمارية.. قصدي الحوارية لانها بتجيب الضغط

تحياتي

الميكروباص يقول...

بغض النظر عن انك زملكاويه او أهلاويه
لكن أحمد شوبير بيشتغل نائب رئيس اتحاد كرة القدم وسمسار لاعبين وبيكتب في مجلة الشباب وبيكتب في جريدة معارضة وبيذيع في التليفزيون المصري وبيذيع في فضائيات وبيعلق على مباريات وعضو مجلس الشعب
الحاجه الوحيده اللي انا خايف منها أني أصحى من النوم ألائيه نايم جنبي

رئيس جمهوريه نفسى يقول...

يا نودى
هو فى حد بيتفرج على التلفزيون المصرى حاليا غير الى شغالين فيه ومش بس كمان بتسمعى التلفزيون لا ويجيكى صبر تقعدى قدام تامر امين الى بقى مذيع بالواسطه على اساس انى الوالد امين بسيونى رئيس قطاع الامن فى التلفزيون
الاخ شوبير رغم اهلاويتى الشديدة بس هو متسلق وانتهازى وعديم مبداء من الاصل وكفايه فضيحة سفرية دبى وبيع تذاكر بطولة افريقيا فى 2006 الى اتقفش السواق بتاعه فيها وقال معرفش حاجه عنه ده على اساس انه لقى التذاكر على الارض

سفينة يقول...


والله عندك حق في كل كلامك...

فعلا اذا كان تامر ولا شوبير الاتنين أنيل من بعض،الاتنين بيخنقوني لما بشوفهم...

للأسف المنافقين اللي زي دول وعباد الكراسي والمناصب هما دلوقت اللي اصواتهم مسموعه ...

.................
خالص تحياتي

قبطان

Empress appy يقول...

هههههههههه المدونات والتددوين جاب لهم هسس حسه انه هيطلع ليهم فى المنام ويوقوموا مفزوعين
وبعدين بطلى تتفرجى على تليفزيون الجيران هههههههههه

nody يقول...

قطه الصحراء
والله ياحبيبتى انا زيك ما بحبش غير اتفرج على الحاجات القديمه
بس اعمل ايه ساعات غصب عنى الظروف بتحكم

وبتغنى لمين ياقطه؟
نورتينى ياقمر

nody يقول...

فى حب مصر
اه زملكويه
وافتخر كمان
واشاعه اننا بننقرض دى
زى اشاعه موت ابو جمال بالظبط
طول ما مصر فيها النيل
هايفضل فيها الزملكويه
وبعدين صدقنى انا مش من هواه التلفزيون المصرى
لانه عامل زى الصابون السايل
بس والله الرموت هو الى بيعلق ساعات
اصله اهلاوى

nody يقول...

لورانس العرب
اقفل الشبابيك كويس
وانت ما تلقيهوش جمبك
بس هانعمل ايه فى موضوع الحنفيه
اصله مش بعيد ينزل منها
مرسيه على زيارتك ويارب تنورنى دايما

nody يقول...

سفينه
ياهلا
اشرقت الانوار
فينك
افتكرتك مخاصمنى


دول مش منافقين وبس
دول مؤرفين اوىىىىىىىىىىىىى
تحياتى

nody يقول...

رئيس جمهوريه نفسى
يا اهلا بالفانله الحمرا
على رايك راح شحت على المنتخب فى دبى
بس تفتكر يمكن يكون السواق بتاعه
شربه حاجه اصفره
واخد من التذاكر
منورنى يامتر

nody يقول...

appy
عقبال مايجى لهم استبحس
ونرتاح بقى من الاشكال دى

وبعدين الجيران هما الى بيعزمونى عندهم
هههههههه

blue-wave يقول...

والله انا ريحت دماغى ومش بفتح التلفزيون اصلا

بحبك يامصر يقول...

برغم انى اهلاوى لكنى مش بحب شوبير لانه شخص انتهازى ومتسلق ومعندوش مبدئ معين والدليل على كده وجوده وسط الحزن الوطنى
اما بخصوص الاخ تامر امين ابوشفايف حمرا اصله بيحط روووووووووج على رأى محمد صبحى انا مش بحبه برده لانه لو مش ابوه مكنش هيبقى موجود فى مكانه وطبعا المستفدين من الوضع هما اللى بيدافعو عنه
تحياتى

فارس بلا جواد يقول...

بالنسبة للبيت بيتك .. أكيد موضوع التدوين ده بقي عاملهم وش وبعدين هيراقبوا مين ولا مين .. الاعداد بتزيد لحد ما قريب ان شاء الله هيبقي الشعب المصري كله بيدون
أما للكورة بقي فرغم ان انا اهلاوي بس فعلا ما بحبش شوبير عشان انسان وصولي وبتاع مصلحته .. ومعلش بقي مع احترامي لزملكاويتك بس برده مش باحب خالد الغندور عشان زملكاوي متعصب ومش عارف يداري
بالتوفيق دايما

nody يقول...

blue_wave
انه الفراغ يا سيدى الفاضل
طب حضرتك بتشتغل ووقتك مشغول تقدر تستغنى عن التلفزيون
انما انا لا استطيع ان اخرج عن المثلث المعروف
القراءه والتلفزيون والنت
تحياتى

nody يقول...

بحبك يامصر
هو شوبير مش كد وبس
لا وغتوت وبينرفزنى وخصوصا لو علق على ماتش
بتخنق
وتصدق عندك حق بالنوسبه لتامر ايمن
انا كنت مستغربه انهم اختاروه ازاى
اتارى ابوه
اتمنى تنورنى دايما

nody يقول...

فارس بلا جواد
دا التدوين عمل لهم هسهس فى دماغهم
وبقى بيجى لهم فى كوابيسهم
اما بانسبه لخالد الغندور
صدقنى ما بتفرجش عليه
بتغاظ منه انا كمان
بس بينى وبينك
ارحم من غباوه شوبير
ومرسيه على احترامك لزملكويتى
نورتنى

Mafrousa يقول...

انت تاعبه نافسك ليه و بتتفرجي على تامر
مش ده اللي كلكم قولتولي بلااااااش
هههههههههههههه
خليكي عل سبيس تون

mregypt7 يقول...

والله كلامك حلو وزى الفل
بالنسبه للبيه تامر امين
بصى يا نودى هو شايف نفسه حبتين تلاته كده
بيحسسنى وانا قاعد بتفرج وده نادرا لما افتح برنامج البيت بتاعنا ده بحس ان كل الناس ما بتفهمش وهو اينشتين عصره وزمانه
مع انه لا بيفهم ولا حتى عنده اسلوب الحوار والمناقشه عاهات والله عاهات نفسى يا حج تامر تتفرج على عمرو بيه اديب واتعلم بقه

اما بالنسبه لسياده النايب شوبير
هو اينعم اللى يسمعه اول مره يقول انه اهلاوى ودى مش ميزه فى معلق انه يكون منحاز لفريق معين ولكن انتى بتقولى انه حسسنا ان المنتخب هيروح ويطلع عين اللى جابوه فى كوماسى طيب سؤال يا نودى
هو مين فى مصر كلها كان متفائل او مين فى العالم اصلا رشح مصر انها تحقق اللقب
الكل اجمع ان منتخبنا رايح عشان يتغلب ويرجع خسران البطوله وساعتها المعلم شحاته هيتشال ونجيب الاجنبى والكل كان عارف كده
مش هانيجى وندبح واحد عشان قالها انا متاكد انك انتى نفسك ماكنش عندك شك ان المنتخب هيخرج بالزات لما قابل الافيال
وان كنتوا ناسيين نفكركوا الشعب المصرى يو الماتش بتاع قبل النهائى كان حاطط ايده على قلبه وبنقول لو انغلبنا يبقى كويس اننا وصلنا لقبل النهائى ده احنا خرجنا من الافيال وده مش كلامى ده كلام الشارع المصرى والعربى والعالمى كمان ومش هنكدب على بعض فانك تحبى شوبير او تكرهيه دى حاجه ترجعلك انتى وياريت يكون الاسباب مقنعه مش اسباب الشعب كله كان عارفها وبيقولها هانيجى على واحد قالها ونعلقله المشانق لا مش كده يا نودى وبالنسبه للزمالك يعنى من امتى الزمالك فرقه عدله ما طول عمره فريق تعبان ومهلهل وهقولك الدليل لما كنتم بتزعموا ان الزمالك فرقه اولا ما كنش فيه منافسه لان الاهلى كان بيعيد بناء نفسه وفى عصر الزمالك لما كان كويس على حد قولكم المنتخب عمل ايه او خد كام بطوله ده احنا اتفضحنا وخرجنا من الدور الاول ده بالمقارنه طبعا لما الاهلى اتعدل وانتى هتشوفى الفرق وده بالارقام فانتوا يا زملكاويه لازم تعرفوا كويس اوى ان فرقتكم ديه تعبانه موووووووز واى كلام واللى بيحصل فيكم ده علدى جدا لانكم فرقه عاديه وعلى فكره مافيش حاجه اسمها قطبى الكره المصريه هو قطب واحد وهو الاهلى وده طبعا مقارنه بالبطولات انتى تلاقيكى مضايقه من شوبير عشان لما بيعلق ماتش للزمالك بيتغلب طيب عاوزك تشوفى التعلب حماده امام لما الاهلى بيلعب بيعمل ايه وبالزات لو مع الزمالك وانتى هتعرفى كويس اوى مين اللى عنده مهاره التعليق وبيعرف يحايد ده حتى الراجل حماده ده ماعندهوش ولاء لدولته لما الاهلى كان بيلاعب اتحاد جده الراجل كنت بحس ان اى هجمه لاتحاد جده شويه وهيقوم يرقص عشان الكوره تدخل جون يا شيخه دى حاجه تقرف
وياريت لما تيجى تتكلمى عن واحد اهلاوى ظالم تبقى تشوفى مين زيه فى الزملكاوى وتقولى عليه وابقى شوفى خالد لطيف لما بيعلق بيعمل ايه
انا بس استوقفتنى ملحوظتين كده
اول واحده اتنك بتقولى ان مستر جوزيه جعل الاهلى فى عهده الاول افريقيا
اولا الاهلى طول عمره الاول افريقيا وفقدها الموسم الماضى وده كان فى عهد جوزيه
ثانيا كلمه مقرفه بالقاف سيادتك مش بال ؤ
دول ملحوظتين بس كلمه اخيره
بحلم بيك انا بحلم بيك ويوم 17 انا مستنيك
دى لكل عشاق الزمالك لانكم كالعاده وبكل سعاده هنرسم البسمه على وجوهكم وهنغلبكم وده مش جديد وانتم متعودين عليه
انا طولت عليكى يا زملكاويه
مع خالص تحياتى
الباش مهندس الاهلاوى بوحميد

Desert cat يقول...

سؤال جديد على مدونة برنماجنا الاذاعى
انت تسال والكمبيوتر يجيب
http://netradio.blogspot.com
والذى يذاع يوميا الساعه 9.10 صباحا ما عدا يوم الجمعة
السؤال هو

الأشاره حمراء
الأشاره خضراء صفراء لافرق فانت متاخر متاخر عن موعدك ....ايه كل العربيات دى؟المرور متوقف لا يتحرك وبعدين لو اقدر اطير!؟؟؟ وتفكر وتسرح ....ما هو السكه واقفه....تفتكر حيخترعوا سيارات تطير؟؟؟؟ ونحب نعرف منك بماذا اجبت .
تمنياتنا بدوام التواصل

nody يقول...

واحده مفروسه
والله انا من الى نادوا بعدم الفرجه على الكاءنات الغريبه دى
بس حظى جه فى مره قلت اجرب كده واتفرج
منورانى ياقمر

nody يقول...

mregypt7
ونيجى بقى للنشره بتاعه الهندسه
مين يا احمد جاب سيره مقارنه بين زمالك واهلى
انا لا قلت الزمالك احسن ولا الاهلى وحش
انا زملكويه لكن بحترم اى فريق تانى
ولا قلت ان فريقى احسن فريق ولا يعنينى انه يكون احسن فريق او انى اقلل من شان اى فريق تانى
بلاش بقى موضوع الاهلى والزمالك ده وقطبين ومش قطبين
اتعلموا بقى من الاوربين
ما شوفتش الاسبان قاعدين ازاى جمب الالمان
فى المدرجات كل واحد بيشجع فرقته
من غير تجريح فى التانى
ما شوفتش سفير امانيا فى مصر اتكلم ازاى بمنتهى الذوق عن الماتش وعن اسبنسا وشجع فريقه الخسران
الظاهر انها ثقافه احنا مفتقدنها يا عزيزى
اما بالنسبه للاخ شوبير
فيكفيه عار انه راح دبى قاد قافله الشحاتين
من ورا المنتخب الى قعد يقطع فى فروته قبل البطوله
ومش كل الناس عملت زيه قبل البطوله
حتى انى ما بحبش خالد الغندور
بس عجبنى قبل البطوله لما قال لازم نكون متفائلين اولا
ولازم ثانيا نتعلم ثقافه الهزيمه
ده الفرق بين الاتنين
كذلك الراجل المحترم الدكتور مصطفى عبده
الى رحب بحسن شحاته ترحيب مشرف
بغض النظر عن تفاهات واحقاد
تحياتى يا بش مهندس

nody يقول...

ديزرت كات
افكارك هايله
اتمنى لك دوام التوفيق ياقمر

إبن مصر يقول...

السلام عليكم
ازيك نودى بعتذر للتأخير وده لظروف شغلى طبعا كلها سفر
كان طبيعى انى اعلق على الموضوع الجديد انما انتى اتلكمتى عن حاجتين مهمين جدا فى الموضوع ده وفيهم رباط وثيق جدا جدا مش واخده بالك منه انتى بتتلكمى عن الحزن الوطنى اقصد الحزب ونسيتى ان شوبير افندى واحد من الحزن ده
يعنى ورانا ورانا يبقى منتظره ايه منه غير انه يكون وجهه ليهم بالنفاق والتلفيق وكله على الهوا وبالنسبه للبيت اللى مش بيت وهو مليان حكاوى القهاوى اللى كله لك فى لك فيه مواضيع من دى كتير عليه وانا الحمد لله مش فاضى اساسا انى اسمع له
تحياتى

nody يقول...

ابن مصر
لافض فوهك
فعلا عندك حق واجهه للنفاق
مقدرين مشغولياتك ياعم المهم
بس ما تنسناش