السبت، 14 يونيو، 2008

انا جيت

وحشتونى كلكم وحشتنى المدونه



ووحشنى التدوين
ووحشنى الناس الحلوه الى دعوا لى



والى بارضه ما دعوش وحشون
ى



مش عاوزه اقولكم ان الشهر ده كان من اكتر الشهور بؤس فى حياتى




وده لاسباب كتيرررررررر


منها


المزاكره



وتعب والدتى

وتعبى انا كمان

وبعدى عنكم وعن نودى

بس يالا مش مشكله

مش مهم انى روحت

المهم انى جيت

وقلت بقى ما ارجعش لكم وايدى فاضيه

قلت اعمل لكم موجز بأهم الاشياء الى مرت عليه فى اربع سنين دراسه

فى وزاره التعليم العالى


حكاياتى فى الكليه مع الدكاتره والطلبه


والموظفين كمان


ونوادرى انا والمزاكره

يالا نقول باسم الله

اولا اربع سنين فى كليه الاداب

اربع سنين ماكانش الحلو فيهم كتير

الحلو فى ايام الثانوى كان احلى

مش عارفه ايه السبب

بس الاكيد ان زمايلى فى الثانوى كانوا احسن بكتير من الى فى الكليه

وده يمكن لانى كنت فى مدرسه كويسه بالرغم من كونها مدرسه حكوميه الا انها

من احسن مدارس الثانوى فى المنصوره

فى كل حاجه من مستوى تعليم لمستوى طلبه

بينما فى الكليه كنت فى قسم اللغه العربيه وهو ما يطلق عليه كفر كليه اداب

يعنى اغلبيته من الفلاحين

واسمحوا لى اكون عنصريه

لانى شفت مع معظم البنات فيه الا من رحم ربى ايام وسنين سوده
ا لبنات عندها خبث
وغباوه

وحب للكلام لا يوصف

حب الكلام ده اتسبب ان كل الدكاتره بلا استثناء سابوا لنا المدرج وخرجوا منه

اكتر من مره

ولغوا المحاضره

ومش كده وبس ونيلوها علينا فى الامتحانات والتصحيح

اما بقى الغباوه

فتتلخص فى التصرفات البدائيه الى كانوا بيعملوها

يعنى كان عادى جدا انى ابقى قاعده فى المدرج

وااقى عمالين ياكلوا ويرموا باقى الاكل فى الارض

ولا الاطفال

ويسلام بقى لو سندوتشات ومعاها مخلل ويرموا ميه المخلل على الارض

وريحه المدرج تبقى ولا ريحه محلات سيعد الحرامى الى فى القاهره

والبغل الى فى المنصوره

وكله كوم والتفاهه كوم تانى

هو الجواز والشبكه والفرش والنيش محور الحديث ليل ونهار

دا غير التطفل الى يخنقك لو ضحك عليك شيطانك واخدت معاك كتاب تتسلى بيه فى الكليه

تلاقيه اتمسك ميه مره وقلبوا فيه وكأنه منكر

وتلاقيهم اتريقوا وقالوا نكت لو عرفوا انه مش مقرر علينا

وكله كوم لما كنت اعطش وانزل اشترى ميه

ماهو مشمطلوب منى وانا واحده ربنا خلقنى بغسل ايدى فى الساعه عشر مرات

انى اشرب من كولدير الكليه الحزين الى مافيهوش غير كوبايه واحده

وبيشرب منها طوب الارض

انى اشرب انا كمان

اظن انا مش بغلط لما اشترى ميه

وكل مره بمنتهى البراءه اخد الازازه واطلع المحاضره

من اول ما ادخل واقعد اتسأل سؤال واحد

انتى شرياها؟

اقول اه

يقولوا لى طب ممكن اشرب

اقولها ممكن

بس من فضلك متحوطيهاش على بؤك

انا نفسى ما بحطهاش على بؤى

تقولى ليه

اقول لها كده

تفضل تقولى ليه

لحد ما اقولها بقرف

وصلت بعد كده لدرجه انى بقيت بحط الازازه فى شنطتى

ها تقولوا لى دا واحد سقى كلب دخل فيه الجنه

اقولكم كلب

مش بنات رابعه عربى

طبعا ما كنش كل البنات كده

كان فيه قله قليله كويسه


الدكاتره

انا بقى ولله الحمد اتفقعت اكتر من الدكاتره

من سنه اولى

اول دكتور منهم كان رئيس القسم

وفضل من سنه اولى لغايه سنه رابعه يدى لنا ماده اسمها علم لغه

ومحدش يقولى يعنى ايه

لانى بعد ما درستها على مدار اربع سنين

بمعدل مره كل ترم

ما اعرفش

الدكتور ده من اول محاضره

كان بيشرح باللغه العربيه الفصحه

حتى كلامه معانا بالفصحى

واحنا طبعا ولا فاهمين

لدرجه انه فى اول ترم كان بيدينا نحو وعلم لغه

انا فضلت طول المحاضره اسأل هو بيشرح نحو ولا علم لغه

طبعا ده كنايه عن الجهل

فقلت اسأل الى جمبى

لقتها بتقولى دا بيشرح ادب تقريبا

وطلع فى الاخر بيتكلم عن مبادىء علم الاصوات

ونفس الدكتور ده فى مره شرح لنا حاجه انا مافهمتهاش وهى تقسيم الكلام الى مقاطع صوتيه

واسمها التقطيع

فا فى اخر المحاضره روحت له وقلت له يادكتور مش بعرف اقطع

لقيته بص ليه بمنتهى النطاعه وقالى

واين المقص؟

ارد عليه واقوله ايه ده

وفضلت احضر فى سنه اولى كل المحاضرات

وانى افهم كلمه من دكتور ابدا

ليه بقى؟

اصل الدكاتره كتر خيرهم بيقروا من الكتب

وانا ما بعرفش افهم من قراءه حد

فا تانى سنه قلت اوفر صحتى وما احضرش

غير المحاضرات الى فيها غياب

وفى يوم كنت رايحه اسلم بحث لدكتور انا ما بحضرش له خالص

دخلت المكتب لقيت واحد قاعد

قلت له لو سمحت دكتور سمير موجود

قالى انتى سنه كام

رديت عليه
وقلت له كمان انى عاوزه اسلم بحث للدكتور سمير

لقيته بيقولى يا بنتى احنا فى اخر السنه

ومش عارفه شكل الى بيدرس لك

انا الدكتور سمير

هع هع هع هع

وعلى فكره المشهد ده اتكرر تانى معايا

ومره اتكلمت مع دكتور وسألنى عن راى فى الشرطه

قلت له رأى انهم بلطجيه

وطلع اخوه عميد فى امن الدوله

يعععععععععععععععععععععععععععععع


المزاكره

وما ادراكم ما المزاكره

اهى دى بقى الى حبيبتى من ايام الجيزه

اقولكم ايه بس

طول السنه وانا زى الفل

ماببطلش تنطيط

تيجى بقى المزاكره وسيرتها

المرض يمسكنى من اعالى رأسى وحتى قدمى

والله ما بهزر

الصداع وحساسيه العين والانيميا وعسر الهضم وحتى العمود الفقرى ما بيسلمش

كل ده من المزاكره

دا انا مره فتحت كتاب بمجرد ما فتحته والله الصداع مسك راسى من الساعه 11 الصبح لغايه نص الليل

دا غير البرد الى الاقيه جايلى فى عز الحر والحساسيه

اقولكم ايه بس

بشوف ايام طويله

واول ما امسك الكتاب احس ان فيه حاجه بتشوكنى

واقعد افكر فى اى حاجه

ان شاء الله لو افتكر عيد ميلاد ام محمد بتاعه اللبن

المهم مش فى المزاكره

وفجاه لما اخلص تفكير

اقفل الكتاب واقوم اعمل ايه؟

ادور على الاكل





اؤكد لكم

ان لو فيه الف واحده فى مصر نفسهم بتتفتح على الاكل كده

ايام الامتحانات

كانت حصلت مجاعه بجد

الناس كلها بترفع ايام الامتحانات وانا بتخن

بطريقه غريبه

مش عارفه ليه

بس دى حقيقه

الى بعمله فى الدايت طول السنه بيروح فى شهرين الامتحانات

وده طبعا هروب لا ارادى من المزاكره

زى بالظبط هروبى للتلفزيون

على فكره هما بيتعمدوا يجيبوا الحاجات الى انا بحبها الايام دى

زى افلام توم كروز وبراد بيت

ومسلسلات يسرا

والمسلسلات الكوريه الى بموت فيها

مع انهم فى الاجازه ولا بيعبرونى

هماا كيد قاصدين

نداله

ويسلام على الكتب والروايات الى الاقيها بتتحدف ادامى كده فى الطريق وانا ماشيه وتقولى اقرينى يا نودى

وطبعا نودى مابتكدبش خبر



لانها احلى كتير من المزاكره

بصوا من الاخر انا ممكن اعمل اى حاجه ولا انى اقعد ازاكر نحو وصرف وعلم لغه وفلسفه وفارسى وادب شعبى وشعر

مابحبهمش وما بفهمهش

ولانى بمنتهى البساطه دخلت عربى ده على نصيحه غبيه

من مدرس التاريخ الى كان اكتر واحد عارف

قد ايه انابحب التاريخ ومتفوقه فيه

ولو اتخصصت فيه ها كون حاجه

بس بما انى ما كنش فى دماغى ادخل اداب ولما جت اداب من نصيبى

دخلت عربى بناء على النصيحه المشؤمه

وكانت النتيجه انى قضيت اربع سنين من عمرى بدرس حاجه لا فهماها ولا حباها

لغايه ما جالى احساس بالفشل

وكان بيزيد كل ما الاقى هواياتى واتجاهاتى بعيد ه كل البعد عن دراستى

وحتى حبى للروايات

مابحسش بيه انى بقرب بيه للدراسه

وبتبقى النتيجه المعانه الى بعانيها اثناء المزاكره

وحتى لما بعصر على نفسى لمونه

وبزاكر

بنسى الى بزاكره

لانى ما بكونش فهماه

وده بيزود معاناتى واحساسى بالفشل

وكله كوم والامتحانات كوم تانى

اول ماده عدت بسلا لانى كنت بزاكرها قبلها باسبوع

وبصراحه كفايه اسمها
البنيه النحويه لشعر عروه ابن الورد

اظن كفايه الاسم
وكفايه ان الكتاب عباره عن رساله الماجيستير بتاعه الدكتور الى بيدرسها

لنا
اما بقى تانى ماده فالدكتور الله يعمر بيته جاب الامتحان من الملغى

والدكتور التانى جاب لنا الامتحان بتاعه صح وغلط

والعبارات كلها مبهمه

صعبه الفهم

وسؤال البحث الى طلع عنينا فيه

عليه درجه واحده
طبعا انا استعوضت ربنا فى الماده دى

قلت الماده الجايه لنفس الدكتور الى جاب الملغى

ازاكر له الملغى بتاع الماده الجايه
وقد كان

لكن للاسف المره دى جاب الامتحان من باره المنهج
اخلاق عاليه
مش عارفه اوصفها

وهو اتضايق وساب المدرج ومشى حب ينتقم مننا كل ده علشان العيال فى المدرج اتكلموا اخر محاضره

وبقيت الامتحانات الى جت بعد كده كانت كويسه

بس طويله لان الدكاتره نسوا ان الوقت المخصص للاجابه

اصبح ساعتين مش تلا تووبقى مطلوب منى انى اجواب على امتحان فى 12 صفحه وش وضهر

فى ساعتين


غير طبعا التفكير

وكان ختامه مسك بامتحان طويل والورقه التاينه اصل الامتحان ورقتين

كانت صح وغلط وبارضه ولا جمله والله كانت مفهومه

كله كلام مبهم

وده كان الختام

فى الليسانس




























هناك 28 تعليقًا:

كوارث يقول...

هههههههههههههههههه
والله كأنك بتتكلمي على لساني
حاجات كتير برضه كنت عايز اشوط اللي بيعملواه بس هعمل ايه اصحابي
وموضوع الكتاب ده
والله لما بدخل الكلية بكتاب غريب بحس اني مخلوق فضائي او اني كراولي او ديفيد كوبر فيلد لا مؤاخذه وناقص اطلع الكوتشينة من وداني !
بالنسبة لموضوع الراي في الشرطة ده
انا قلته كتير لظباط امن دولة مباشرةً !
اول مرة كان من اربع سنين واللي كلمته بيقوللي يا ابني الكلام ده مش هيوديك ورا الشمس
دنتا بتبقى عارف ان فيه شمش وانتا وراها لا انتا هتروح حتة لا يعرفها انس ولا جن
وهلم جرًا
بجد بوست لذيذ جدًا
على فكرة
ما عرفتش اكمله لان الكتابة عجنت في بعضها في الآخر !

tamer.sala7 يقول...

اولا الف سلامة علي والدتك

ثانيا عايز اقولك ان في العالم كله ايام الثانوي احلي من ايام الكلية

ثالثا بقي تلخيص الاربع سنين دول انا اخدتها من قصيرها ولفيت كل الكليات اللي في المجمع النظري حقوق واداب وتجارة وحتي الخدمة الاجتماعية وده كله بسبب مكتب التنسيق والنهاية اني لغاية انهاردة لسة بتعلم وبدرس ومش عارف اطلع من سنة اولي في اي كلية

بالنسبة للفلاحين عايز اقولك انهم موجودين في كل مكان في مصر وبرده مية المخلل في الارض والنيش والشبكة هو الكلام الوحيد اللي بيعرفوه

الف مبروك انك خلصتي والحمد لله انها عدت علي خير حاولي تنسي اللي فات علشان انتي داخلة علي مفرمة ما بعد الكلية

ربنا معاكي

موجة يقول...

على العموم مرحبا بيكي ثانية في عالم التدوين
حمدا لله على السلامة
نورتي العالم تاني
و الف سلامة على ماما
القصة هايلة و سردك سلس وواقعي

خالص تحياتي
أخوكي مجرد موجة

mregypt7 يقول...

الف سلامه على عودتك
واضح انك راجعه وروحك عاليه ومرتفعه
ومتشوقه للتدوين
ربنا معاكى يا ال نودى
والف ميت مليون سلامه على مامتك
نبدا التعليق
حاهزين
ون تو ثرى
جو
اولا انتى بتقولى ان ايام الثانوى احسن من ايام الكليه عشان زمايلك وكده
وان الكليه بتاعتك معظم زميلاتك من الفلاحين
ما هو طبيعى هايكونوا من الفلاحين
معلش يعنى يا نودى انتى منين يعنى
انتى من المنصوره والمنصوره اقاليم وكلها فلاحين فان كلهم منهم عادى يعنى مش فارقه كتير
ونيجى لتصرفاتهم
اولا معظم البنات كده بيتصرفوا كده
ان لا مؤاخزه دماغهم فاضيه خالص مافيش حاجه تشغلها غير الجواز والشبكه وديه لابسه ايه وديه اتجوزت مين وشوفتى النهارده استار اكاديمى مين كمل ومين خرج طب اتفرجتى على برنامج اسامه منير ده عسل اه والله يا سلام لو اتجوز واحد زيه وفى رقته
هم دول البنات والحاجات ديه بتحصل قدامى
يعنى الكلام ده موجود فى كل مكان
والتصرفات اللى بيعملوها ديه حاجه اصيله فى الشعب المصرى اللى هو اساسا متربى على انه يمشى فى العكس وبس الشعب المخالف احنا والانجليز وشوفى هاتلاقى كل المصريين كده
اما الغباء فبالتاكيد انه متوفر لان سيادتك عندكم مش بيعودوكوا تعملوا حاجه ولا حتى تتعبوا نفسكوا وتفكروا بيديكوا المحاضره احفظ الكتاب يا باشا وادخل سمع هاييجى منين الفكر الجديد اكيد هاتتخرج دفعه من الاغبياء الجدد سورى فى اللفظ بس على فكره على كل الناس
نيجى للدكاتره
الدكتور اللى قالك اقطعيها بالمقص
كنتى بصتيله كده وتديله ضحكه خفيفه كده وتقوليله اضحك يعنى ولا اعمل ايه
انا اللى شاغلنى انتى بتحضرى محاضرات ازاى
وليه ما الكتاب فيه كل حاجه مش محتاجه حضور دول كام كلمه الفاعل بينصب بايه والمضاف اليه بيرفع بايه هو والظرف وحروف الجر عددها كام وان واخواتها وكان واخواتها بس ما تنسيش تجيبى بقيت العيله
واالدكتور اللى جابلكم الامتحان من الملغى
تعرفى ان حصل معايا نفس الموقف
داخل امتحان الرسم لقيت الدكتور جايب اكتر من 90 فى الميه من الامتحان من اللى هو نفسه كان لاغيه فى المحاضره
طب لغيته ليه يقولك عشان اعرف مين اللى حضر ومين اللى بياخد كورسات
طب وزنب الناس اللى ما عرفتش تحل ايه
يقولك وانا مالى هاتعملى ايه
وحكايه الكتب اللى بتقريها من بره المكرر
يا شيخه حرام عليكى اول مره اشوف كده
بنت فى كليه اداب ملتزمه بالطريقه ديه وكل همها المزاكره والاطلاع تعرفى انى لما كان بيبقى عندى امتحان والله يا نودى ليلتها بنزل اخرج مع اصحابى عشان اروح الامتحان فايق واعرف افكر واركز واحل بس كويس انك كده تقرى وتتثقفى والله ياريت كل بنات اداب زيك
معلش بقه الناس بتوع التليفزيون دول قاصدينك بس الغلط عليكى
فى حد برده يتفرج على مسلسلات كوريه
يا شيخه دي المسلسلات المدبلجه ديه بتجيب تخلف عقلى بس فى ناس بتحبها ولازم نحترمهم
ربنا معاكى ومع اللى بيتفرجوا عليها
ما تخافيش اعرف ناس كتير بتتفرج عليها وعايشين عادى خالص وبيتكلموا زينا كده
وانتى كنتى بتقولى انك مش بتحبى المزاكره
وعنيكى مققت منها
طب ازاااااااااااااى
شكلك كده بتشتغلينا وشكلك دحيحه
ما تخافيش عينى بارده عند ضغط واحد اتموسفير
فى الاخر مش عايز تشيلى منى او تزعلى على اى كلمه انا قلتها وما عجبتكيش ده راى وبس
يالا بقه كفايه كده انا وجعتلك دماغك اكتر من اللزوم
وسلاموووووووووووووووووووووووووز
مع خالص تحياتى
الباش مهندس بوحميد

بنت مصريه يقول...

نووووودىىىى
حمدالله عالسلامه كفاره يا قمر
انتى هتقوليلى عالبنات دول منا كنت ف كليه البنات برضه
وكانوا مطهقينى ف عيشتى
عارفه انا اخر مازهقت من حكاويهم عن الولاد
على اساس انهم محرومين يعنى
قولت اندمج معاهم والعب عليهم شويه
فقولتلهم انى مخطوبه ووريتهم صوره توم كروز وقولتلهم دا خطيبى
اللى برقت واللى ريلت عالصوره
واللى قالتلى هو هييجى امتى عشان نشوفه
وانا اعيش قوى واقولهم هو بيكلمنى كل خمس دقايق بس ميقدرش ييجى اصله مشغول قوى
لغايه معملت الحركه دى ف واحده بس طلعت ذكيه شويه
قالتلى اطعاها من انهى مجله دى
مش دا توم كروز
سا عتها مقولكيش عاللى حصللى م البنات التانيه
هههههههههههههههههههههههههههه
بوست جميل احييكى يا قمر

في حب مصر يقول...

حمد لله على السلامة.. ونورتي بيتك ومدونتك يا نودي

بصراحة انا مقدرتش امسك نفسي من الضحك على مواقف كتييير

بس عايز اعرف ليه الكره ده للبنات اللي من الفلاحين.. وبعدين هو مش انتي من المنصورة.. والمنصورة دي تبع الفلاحين برضة..

يا ترى ايه توقعاتك للنتيجة بعد العك اللي حصل في امتحانات الليسانس؟؟؟

يارب تنجحي ونقولك ولكم في صفوف البطالة

ربنا يوفقك بجد وحمد لله على السلامة مرة تاني والف مبروك انك خلصتي الدراسة

appy يقول...

الف سلامه على ماما
ونورتى بلوج سبوت واخواته وولاد عمه وكل اللينكات التانيه

blue-wave يقول...

ايه دا يا بنتى؟
كل دا جواكى ومخبياة؟:))
دانتى مفقوعه من كل حاجه
اسلوبك جميل على فكرة
تحياتى

رئيس جمهوريه نفسى يقول...

اولا الف سلامه عليكى وعلى والدتك
كلنا كانت ايام الثانوى احلى من ايام الكلية وبما انى مكنتش بحضر ولا بروح اصلا الا ما ندر يعنى فمكنش هممنى الطلبه ولا تصرفتهم اصلا
المهم حمد لله على السلامه وفى انتظار جديدك وبالتوفيق يارب

nody_1987 يقول...

كوارث
اهى بلاوى ومحسوبه علينا بنى ادمين
سواء طلبه ولا دكاتره
وبتوع الشرطه مالحلتهوش غير الكلمتين دول
شكرا على مرورك
تحياتى

nody_1987 يقول...

تامر صلاح
اولا الله يسلمك
ثانيا
انت شكلك حبيت التعليم اوى

nody_1987 يقول...

موجه
الله يسلمك
ده بس من ذؤك

nody_1987 يقول...

بنت مصريه
الله يسلمك ياقمر
مالقتيش غير توم كروز
دا فتى احلامى

nody_1987 يقول...

فى حب مصر
لا مدينه المنصوره مش تبع الفلاحين
انا سايبه النتيجه على الله
المهم انى عملت الى عليه
وماتخفش مش هاتقولى ولكم فى عالم البطاله لانى مش غاويه شغل
ايه المعزه الجامده دى

nody_1987 يقول...

appy
الله يسلمك يا جميل
انتى الى نورتينى

nody_1987 يقول...

blue_wave
اه والله كل ده شليلاه فى قلبى لغايه ما جالى التهاب فى المراره
------------------
انت الى اسلوبك اجمل
احب دايما تنورنى

nody_1987 يقول...

رئيس جمهوريه نفسى
الله يسلمك
فعلا ايام الثانوى لا تعوض
تحياتى

عيله مفتريه سابقا يقول...

ايه المعاناة دى ..انا عارفه جامعة المنصورة اسألينى انا كنت فى حقوق
ربنا ما يوريكى
بس اهو وراكى
بجد الحمدلله انك خلصتى ويارب تنجحى وتخلصى خالص من الكلية دى

بس على فكرة بالنسبالى ايام الكليه احسن
انا كنت منغلقه على نفسى ايام ثانوى

حصلى على فكرة موقف قريب مع دكتور كان بيدينى ..شوفى بقالى سنتين مخلصه وشوفته صدفه وكلمته وعرفته بنفسى جاى يقولى بس انتى مكنتش بتحضرى
يا عم انا غلطانه اساسا انى سلمت عليك وعملتلك قيمه
دنا بكرهك
هههههههههههههههههههههههههه

دول ليهم نوادر

مدونتك حلوة قوى يا نودى
يا بنات المنصورة يا قمامير

تحياتى وسلامى

the beauty candy يقول...

السلام عليكم ورحمه الله وبركاته
حمدالله على السلامه
ديه اول مشاركه ليا معاكى
بس البوست لذيذ وجميل
بس تلاقى يا نودى ان الدكتور جابلكم الامتحان من بره المنهج
عشان انتى ما رضيتيش تخليه يشرب من ازازتك
فقال هاطلع عنيهم وبالاخص البت ديه
احييكى وبالتوفيق انشاء الله
منتظره تشريفك انتى وكل الناس
تحياتى دوودا

Desert cat يقول...

الحمد لله يا نودى انى خلصتى على خير
ويارب النتيجة تطلع بسرعه ويبقى امتباز
واهم حاجه المقص
والله هلكتنى من الضحك
تحياتى يا جميل

nody_1987 يقول...

عيله مفتريه سابقا

وهو الدكتور ده ها يعيش فى الدور
دى الدفعه الاف مؤلفه
عارف الى بيحضر والى ما بيحضرش
بلاوى وبتتحدف علينا
نورتى ياقمر

nody_1987 يقول...

the beauty candy
والله لو كان قال لى انه عاوز يشرب لا كنت جبت له كرتونه مايه مخصوص
بس هو شخصيه عندها نقص
محبتى يا قمر
واتمنى تشرفينى دايما

nody_1987 يقول...

قطه الصحراء
الله يسلمك
قولى رب اجعلنا من المقبولين
المقبول ده نعمه والى يتبطر عليها يعمى
نورتنينى يا جميل

غير معرف يقول...

من قلوبنا قلوب الناس الحلوين والجامدين بنقول الف سلامة عليكي يا نودي ولوالدتك كمان وانا بدي تعليقي بكل صراحة 3 2 1 اكشن والله يا جماعة انا اعتقد يعني انا بصراحة ومن غير زعل اول مرة اشوف حد يستهزأ بالناس اللي معاه في الكلية ودا الطبيعي لان المنصورة معروفة بانها فلاحين ومش عايشين في الدنيا خالص اما بالنسبة للغباء لما تلاقي فلاحين في الكلية عايزة يكون في نقطة ذكاء مستحيل طبعا والا تكون معجزة وطبعا الفلاحين تتوقعي منهم اي حاجة غريبة سواء كانت وحشة او حتى وحشة بردو عشان كدا هم صعبانين عليا جدا والمفروض ان احنا منتكلمش عليهم الكلام دا لان طبعهم كدا وهيفضلو طول عمرهم كدا واكيد ودول ناس ملهمش الا في المذاكرة وبس وياريت بيفهمو كلمة مفيش هم عليهم يروحو الكلية يخدو المحاضرة يذاكروها ويحفظوها صم ويكلو ويشربو وينامو يبقى ازاي هم اذكياء والنتايج زي ما انتي شايفة ورق عل الارض ومناظر عجيبة جدا فمن الاخر بنقول عمار اصل مفيش فايدة ان يبقى في نظافة فنعيش في الواقع ونقول عمار يا جدعان وبس دا راي هو رخم شوية بس هو دا الوقع هنعمل ايه لا حياة لمن تنادي ومعكم موجز تعليقي من عاشق البرسا

nody_1987 يقول...

غير معروف
الله يسلمك

مين قال ان المنصوره معروفه انها فلاحين
تلاقيك بس ما زورتهاش
علشان كده ما تعرفهاش
ولو التصرفات دى عادى عندنا انا ما كنتش انتقدتها
ولا حسيت انها غريبه
تحياتى

محمد الحسيني يقول...

الاخت الغالية نوديييييييي
الف سلامة لمماما
وحمد له علي سلامة رجوعك وياريت تزرو المدونة خفيف خفيف وتخلعي ويابخت من زار وخفف
نتمنينشوفك قريب

بورسعيد يقول...

بجد انا تعبت وانا بقرأ الليسانس بتاع حضرتك كأنى كنت معاكى فى 4سنين

بورسعيد يقول...

بس بينى وبينك احسن ايام ايام االجيش
ههه