الخميس، 19 يونيو 2008

اشمعنى يا خالد يا يوسف
طبعا كلنا عارفين المخرج النابغه الفالته خالد يوسف
وعارفين افلام ذات الموضوعات الهادفه ومناظرها الهدامه
وفيلمه الجديد الريس عمر حرب
انا مالفتش نظرى حاجه فى الفيلم غير حاجه واحده
طبعا مش المناظر ولا القصه والموضوع الجهنمى الى بيناقشه
ولكن حاجه واحده بس وهى
التفه الى اتفت على الممثل الفظيع هانى سلامه
التفه دى يا جماعه غير حقيقيه
طب ليه؟
ليه يا خالد مش حقيقيه
ما انت كله بتجيبه حقيقى وعلى عينك يا تاجر
وبالتفصيل الملل
فى فيلم خيانه مشروعه مثلا عرفتنا بالظبط ايه الى بيحصل فى حمامات صالات الديسكو
وما اكتفتش بدخول الواد والبت ساندى الحمام
بل صورتهم لحظه بالحظه وعرفتنا عملوا ايه بالدقيق
فى فيلم حين ميسره
ورتنا الاغتصاب تم ازاى
ما اكتفتش مثلا بان العيال يقفلو الاوضه عليهم هما والست سميه
ولا تسمعنا صوت صراخها
واحنا نفهم
قلت لا دول شعب ما بيفهموش
وجبت الاغتصاب كما انزل
بالتفصيل الممل
وان جينا نتكلم تقولنا ياشعب ما بتفهمش
دى السينما الواقعيه
يعنى ايه سينما نظيفه؟ انتم شعب اهيل
سؤال بقى
يعنى هو البوس والتحسيس والتفعيص يتعمل حقيقى
بغض النظر عن اى حاجه لا دين
ولا عادات
ولا اى حاجه خالص
ده فن
والتف ما يبقاش طبيعى؟
طب خلينا معاك
بتعمل زى الاجانب وبتجيب كل حاجه طبيعى زيهم
مااااشى
طب فى فيلم تيتانك اه كل حاجه صريحه
من قبلات ومشهد الرسم
بس البت روز لما جت تتف على خطيبها تفت عليه بمنتهى الطبيعيه
يعنى هانى سلامه اجدع من الواد القمر ده؟

http://www.youtube.com/watch?v=9sBmbbcNG44

اضغط هنا لمشاهده اعلان الفيلم


هناك 30 تعليقًا:

Son of Egypt يقول...

ازيك نودى برغم انك مش رديتى على الكومنت بتاعى فى البوست اللى فات الا انى فرحان ان ده يكون اول كومنت
بس فرحان اكتر بجرأتك فى الكلام يعنى فى كلام كده انا بصراحه اخاف واتكسف احطه لو مكانك
بصراحه بوست هاااااااااااايل جدا جدا وهى دى نودى اللى اعرفها
تحياتى والى الأمام دائما

Desert cat يقول...

انتى عارفه يوم لما كنت بشوف حين ميسرة فى السينما
كان معايا مييييييين ؟؟؟
لما شوفت العشوائيات قعدت اسال هو ده صح
كان يقولى ااااه
لما جه مشهد الجماعه المحظورة
قالى اعتقد
لما جه مشهد الاغتصاب قولت له هو ده صح
بلاش بقى اقولك اللى قاله لى احسن يتحرر لى محضر حالا
عايزة بقى هانى سلامة بيه ينتف فى وشه
هو ليواناردوا ماشى ده واد زى القمر وتلاقيهم مفقوعين منه علشان كدا حبوا يغيظوه وجابوا التفه اللى فى وش هانى سلامة مجرد ديكور
الا هو ايه موضوع التف ده الواحد نفسه غمت عليه
تحياتى يا نودى

جبهة التهييس الشعبية يقول...

يااااااااااااااا بقى على الناس اللي ما بتفهمش سينما
يا ستي هو عمل التفة مش حقيقية لان التف الحقيقي ح يقوم بيه الجمهور
افهموها بقى لازم تحرجونا مع السينمائيين؟

nody_1987 يقول...

ابن مصر
والله رديت
اهلا بيك اول كومنت

احنا الى كسرنا التابوهات
مرسيه كتير

nody_1987 يقول...

قطه الصحراء
طبعا دى افلام النابغ
خالد يوسف
عبقريه غير منتهيه
سيب بقى وتعالى بقى
مين كان معاكى؟
نورتينى يا قطه

nody_1987 يقول...

جبهه التهييس الشعبيه
مش معقول
نواره نجم شرفت مدونتى المتواضعه
بجدشرف كبير
اما بقى بالنسبه للبروفسير خالد يوسف
معلش يانوار ماكنتش اعرف صدقينى النظريه اللولبيه دى
معلش بقى شعب جاهل
مع ان كل الكتب الى اتكلمت على التمثيل
من اول الشعر لارسطو
ماجبوش النظريه دى
انتى اكتشفتيها ازاى؟

mregypt7 يقول...

ههههههههههههههههههههههههههههههههههه
لا مؤاخزه يا نودى ما حدش يغلط فى السير خالد بيه يوسف
ده سابق عصره يا شيخه الراجل ممتع الشباب المصرى نيجى احنا ونهاجمه ده كلام برضه !!!!
النجم خالد يوسف استطاع انه يتفوق على غيره من المخرجين يعنى كفايه فيلم حين ميسره فيلم فعلا غايه فى الاحترام المتبادل بين واحده بعتبرها عنب السينما المصريه حاليا السيده الفاضله والمحترمه جدا واللى العيبه ما تطلعش من بقها اللى عمره ما اتكلم مع رجاله هو بيلمس بس ّّّّّّّّّّّّّّّّّ!!!!!!!!!!!!!!
الست بريئه وعيب نتكلم عليها والمشهد اللى انتى بتتكلمى عليه لازم يوضحه عشان يعرفك قد ايه طنط سمسم محترمه الى ابعد الحدود يعنى لحد حلايب معرفش هتجيب شلاتين معاها ولا لا
ولا الموزه اللى اسمها ساندى بلاش نتكلم عشان كله اتفرج يبقى كلام وفرجه البت كده سوقها يقف فى البوس اوه سورى فى الجواز !!!!!!!!
ولو على التفه انا اللى عجبنى اوى وكيفنى اوى القلم اللى خده الشاب المعجزه الهانى بن سلامه لزقه فى اللى وراه بس صعب عليا وهو بيعيط ( ما يصعبش عليك غالى يا هندذه)
خلصنا من المصريين ودخلنا فى الاجانب وروز
بس البت ديه ايه مووووووووووووووز
ربنا معاك يا عم جاك
فى الاخر احب اشكرك يا خالد بيه
واقولك كمل مشوارك مشوارك مازال طويلا ويحتاج الى مجهود عشان تعرف تطلع افكارك فى مزه الشرق والغرب سميه باشا وابله ساندى
ايه يا نودى كده برضه تهاجمى الناس وهى ما عملتش حاجه ابقى اتاكدى من مصادرك الاول
لما تبقى تلاقى الفيلم بالحجاب ومحترم اوى ابقى انقضيه لكن نتهم الناس زور كده
انا عارف عارف ما تقصديش بس عشان بس ما يمسكوهاش عليكى وابقى كترى من صور سميه بس السؤال الملح عليا فين ساندى
اكيد فى الديسكو وزمانها جايه


نتكلم جد بقه
خالد يوسف ده ما ينفعش يبقى مخرج بسبب مناظره اللى بيتعمد يجيبها مع ان افلامه فعلا
بتعجبنى جدا بس لولا اللى فيها كان هيبقى مخرج مستر فى الاخراج
معلش بقه انا بحب اطول فى الكلام
اصلى بعيد عنك فيا عاده سودا
رغاى زياده عن الازم
وياريت ابقى اشوف تشريفك ولا اقولك زى ما تحبى شكلك كده من اللى بيكسلوا يمسكوا الكى بورد ويكتبوا يا اما ما بيعرفوش يكتبوا بصى فى دورات للتعليم ( بهزر )
تحيااااااااااااااتى
الباش مهندس بوحميد

رئيس جمهوريه نفسى يقول...

يا نودى افهميها بقاء
المعضلة الجمهور عايز اية داخل السينماء لية عايز يشوف التفعيص والاحضان ومشاهد الاغتصاب هى دى السينماء التجاريه للاسف من المنظور الاهبل المصرى رغم انى الفلاحيس بتوع السينماء الى بيقولوا الجمهور عايز كده مغيبين مش عارفين انى الدش والانترنت وفرو كل حاجه ديلفيرى
ومشاهد الى انتى بتقولى عليها دى بتكون متوظفه مش هبل انا فاكر فى فيلم فرنسى مونيكا بيلوتشى عملت مشهد اغتصاب وكان حقيقى بس المشهد لانه متوظف فى الدور لدرجه انى فى ناس تعاطفت معاها مش اثيرت غرائزها ومعلش دى مونيكابيلوتشى ياجماعه
موضوع التفه والى كانت لخطيب روزا طب ده خطيب روزا انتى عايزه معجبات هانى يزعلوا علية ليه

Sad Emperror يقول...

بصى هو انتى اتكلمتى على الى كنت انا عاوز اتكلم عليه
خالد يوسف
بس انتى جبتى من الاخر ليلته
والحته الى عجبتنى بتاعه البت روز العسل والواد ليوناردوا القمر دا
ههههههههههههههه
ماشى يا نودى موضوع جامد

في حب مصر يقول...

يعني هي بس التفه اللي مضايقكي يا نودي.. خلاص يا ستي ابقي تفي انتي على الشاشة لما تشوفي الفيلم..

انا مش شوفت فيلم حين ميسرة بس بعض العرب هنا علقوا عليه وقالوا ايه اللي بيحصل عندكم في مصر ده.. فقلت ان ده مجرد فيلم اثارة مش بيعكس الواقع والحقيقة عمرها ما تبقى كدة.. محاولة اثارة وخلاص..
ربنا يخليه ويفضح البلد كمان وكمان..

مع تحياتي

بنت مصريه يقول...

هانى بيه
يتف عليه
ودا معقوله يا نودى
دى سينما نضيفه
مفيهاش تفافه
فيها نجاسه اه
اغتصاب ميضرش
قتل وماله
زنا محارم ايه يعنى
لكن تفافه بجد
لا ملكيش حق يا نودى
ربعدين ايش جاب الابداع ده لفيلم تيتانيك الزباله ده
هههههههههههههههههههه
يا بنتى انا من ساعه ما مات عبد الحليم وشاديه والناس دى
معتش بعترف بحاجه اسمها سينما
بزنس اه لكن سينما لا يمكن
بوست جميل احييكى

blue-wave يقول...

انتى مجنونه يا بنتى؟
عايزة حد يتف على هانى سلامه؟
دا كانت الدنيا تقف واليورو يغلب الجنيه
مهزله فعلا وحياة ربنا

فارس بلا جواد يقول...

سعيد بمروري الأول بمدونتك
موضوعك جميل .. وفعلا أنا باتخنق من كل مخرج شايف نفسة يقولك الفن الواقعي .. عشان يحشر شوية مشاهد تخلي الفيلم يجيب ايرادات .. المشكلة فعلا أن لو حد وجه لهم نقد يتهموه بالجهل
حسبي الله ونعم الوكيل فيهم

كاتب مصري يقول...

تحيتي
ممكن تقبلي دعوتي لمدونتي
يارب تيجي وتسيبي تعليق وميكونش حضور كده وكده ومعدتش أشوفك تاني ياريت تبقى المدونتين أصداقاء ده لو ممكن اطول الشرف ده
لو جيتي هكون مبسوووووووط جدا
تحيتي مدونتي هنا
http://kanyatklam.blogspot.com/

sendrlla يقول...

انا مش عارفه اعلق اقولك ايه
يمكن لانى مش حاسه انه موضوع جوهرى اوى
بس انا ممكن ابررلك موقف خالد يوسف
يمكن هانى سلامه اصلا مش رضى بالموقف لذلك خالد حب يجمله
تحياتى لقوة ملاحظتك

بس عندى سؤال واحد بس
ليه ما لفتش انتباهك
ليه ماجبش خالد يوسف هانى سلامه وهو بيموت فى فيلم انت عمرى مع انه هيكون مشهد حساس جدا ويزيد من قوة الفيلم وايراداته ؟؟؟؟؟؟؟
ربما لرفض هانى سلامه ان الناس بتشوفه وهو بيموت
سندريلا

nody_1987 يقول...

mregypt7
يابش مهندس مش لازم فيلم بالحجاب
بس يرحمونا من المناظر المقززه بتاعتهم دى
ما كنتش اعرف انك بتعز ساندى وسوسو كده
مع تحياتى طبعا للسير خالد يوسف
نورتنى ياهندسه

nody_1987 يقول...

رئيس جمهوريه نفسى
انا متفقه معاك ان الاجانب بيعرفوا يوظفوا كتير جدا من المشاهد دى واى حد بيتفرج عليها ما بيحسش بالتقزز الى بيحسه من الافلام الهابطه بتاعتنا
دا غير ان فعلا ما بقاش فيه حد بيسال قبل ما يخش الفيلم قصه ولا مناظر؟
بس نقول ايه فى عبقريه المخرجبين
تحياتى

nody_1987 يقول...

امبرطور الحزن
اهوا احنا بنقول على هما يخلوا عندهم دم ويفهموا بقى
شكرا على مرورك

nody_1987 يقول...

فى حب مصر
يا رقبتك الى كانت قد السمسمه
منك للى كلت دراع جوزها يا خالد يا يوسف
وبعدين انا ها عمل كده على ايه ولا ايه
مش كفايه متشات الزمالك
والبيت بيتك وشوبير
تحياتى

nody_1987 يقول...

بنت مصريه
امال هانى بيه بمثل ليه
مش علشان يتف عليه
ان ما كنش فى الفيلم يبقى من الجمهور
عندك حق ايه جاب ابداع قيصر السينما خالد يوسف
للعك بتاع تايتنك
منورانى دايما ياقمر

nody_1987 يقول...

blue_wave
طبعا هو ما يتفش عليه هو يتعامل معامله الصراصير
بالشبسب على طول
شكرا على مرورك

nody_1987 يقول...

فارس بلا جواد
انا الاسعد بتشريفك ليه
ويارب ما تكونش المره الاخيره وتشرفنى على طول

------------------
واقعى فى الى هما بيحبوه وبس
غير كده لا
طبعا يعنى هما العباقره واحنا الجاهله

nody_1987 يقول...

كاتب مصرى
ان شاء الله ها زور مدونتك
تحياتى

nody_1987 يقول...

سندريلا
طب اشمعنى هانى سلامه بيرضى انه يعمل الموبيقات التانيه
وانتهاك حرمات الله
بدافع الواقعيه
ماهى دى كمان واقعيه
منورانى يا جميل دايما

عيله مفتريه سابقا يقول...

بصى يا نودى

اظن ان اينعم خالد يوسف جرئ فى افلامه ولانه من مدرسة يوسف شاهين كمان

بس بينى وبينك
هو مش ده بيحصل فى مصر؟
هو احنا ليه بنزعل لما بننصدم بالواقع
اللى شايفينو وعارفينو كويس ومتناسينه
انا مش بكلم على البوست بتاعك
انا بتكلم على بالاخص فيلم حين ميسره
اكيد انا معاكى ان التفه مش حقيقيه
بس يمكن هانى سلامه بيقرف :D

لكن انا بكلم فى نقطه مصداقية العرض للحاجات دى من عدمه
فى مصر بيحصل امر من كده واسخم


سلامى

عيله مفتريه سابقا يقول...

على فكرة

كلامى ده مش مدح فى خالد يوسف

احسن اتفهم غلط

دنا بينى وبين افلامه وبينه عمار كبير


سلامى

nody_1987 يقول...

عيله مفتريه سابقا
ماشى ياجميل انا متفقه معاكى ان ده بيحصل
بس يصح اننا نجيب اتنين راجل وست ويمارسوا الزنا عينى عينك
مش ممكن يكون فيه بديل للمارسه الصريحه دى
احنا فى الاول وفى الاخر مسلمين
واظن فيلم الحرام
مشهد الاغتصاب هو محور الفيلم ومع ذلك الفيلم فى منتهى الاحترام
تحياتى

عيله مفتريه سابقا يقول...

موفقاكى
ومحترمه رأيك جدا ومعاكى فيه
بس الناس بتاخد البيعه كلها
ازاى يعرض الفكرة نفسها
مانا بردو مبحبش جرائته فى افلامه
بس مينفعش انكر ان الفكرة غلط
لان الفكرة صح
وهى عرض اللى بيحصل واننا نتصدم بيها
علشان على الاقل نلاقيلها حل
اينعم هو معرضش حل
ولكن صدمنا
زى بالضبط فيلم يعقوبيان

وانا معاكى ومع ناس كتيرررررر فى نقد مشهد الاغتصاب

وكمان فى مشهد الشذوذ

تعرفى يا نودى
تنفعى ناقده هايله
بسم الله مشاء الله عليكى

احسنتى

سلامى

ياسر يقول...

اذيك يانودي حمد الله علي سلامتك
وموافق معاكي في كل حرف قلتية
ومش خالد يوسف لوحدة في بردة افلام
لي النبغة السيدة الفاضلة ايناس الدغيدي
بس للاسف الشديد هما لاا فضلوا عرب ولاا
حصلوا الاوربين والافلام دي للاسف هيا من وجهة
نظري الخاصة الا بدخل كويس لكل واحد في الفيلم
او دور العرض بس صدقيني افلام زي دي بتهز صورة
مصر ام الدنيا في الوطن العربي ومش عارف فين الرقابة
الا بيقولو ا علية دي
اغتصاب/ عري/شتيمة في كل مشهد /او تفة في كل فيلم
بيقولوا للشباب يلاا بقي اغلطوا وخدوا المثل الاعلي
من سمية خشاب ولاا هاني سلامة ولاا نسيت اسمها
يتها دهية اة تقريبا غادة عبدالرازق الا كانت مرات الحج متولي
المهم الله يرحمنا واسترها علي بناتنا وشبابنا
تحياتي

nody_1987 يقول...

ياسر
الله يسلمك
طبعا دول من اكتر عباقره العصر
دايما بيشوفوا الى ما بنقدرش نشوفه احنا
ولو اتكلمنا يقولوا انتم جهله

منورنى دايما