الأربعاء، ١٨ يونيو ٢٠٠٨

أما هذه
فمدينتى أنا

البعض بيعتقد ان محافظه الدقهليه

بكاملها مدينه ريفيفه

وده طبعا اعقاد خاطىء لأن الاعتقاد ده

لشخص لم تسنح له الفرصه بزياره

المحافظه بوجه عام

او مدينه المنصوره

بوجه خاص

وحتى المراكز التابعه لمحافظه الدقهليه

ليست بكاملها قرى ريفيه

بل بها مدن رئيسيه لا تقل تحضر من اى مدينه اخرى

يعنى من الاخر ليست المنصوره

كلها فلاحين

وكذلك محافظه الدقهليه

وانا بما انى اسكن فى مدينه المنصوره

فا انا شايفه انها زيها زى احسن مدن مصر

زيهم فى كل حاجه فيها الوحش وفيها الحلو

وماتقلش عنهم

بالعكس فيها حاجات

مش مجتمعه جميعها فى محافظات اخرى

زى مثلا النيل وروعه منظره

جامعه المنصوره وهى من اعرق الجامعات المصريه

ولا ينقصها سوى الكليات الغير اقلميه

زى السياسه والاقتصاد والاعلام والسياحه والفنادق

اما بقاى الكليات موجوده

وبمستوى عالى جدا
زى كليه الحقوق والتجاره والزراعه والصيدله والهندسه والطب وطب الاسنان والتربيه بكافه تخصصاتها والاداب والتربيه

النوعيه والحا سبات والمعلومات


والطب البيطرى

وبيدرس فى الجامعات دى مجموعه هائله من الاساتذه

من امثلتهم الدكتور احمد جمال الدين الوزير السابق

انا شخصيا كان بيدرس لى الدكتور على ابو زيد رحمه الله


وده كان من اعظم اساتذه الادب فى العالم العربى


وكان تلميذ طه حسين

ويمكن ده من القله الى كنت بفهم منهم


وبستمتع بسماعهم

كما يوجد فى المنصوره مجمع طبى هائل


فهى قلعه الطب فى الدلتا

بها مجموعه هائله من المستشفيات الكبرى

زى الطوارىء والجهاز الهضمى والرمد ومستشفى جيهان والباطنه التخصى ومستشفى طب الاطفال ومستشفى الدكتور

غنيم للكلى والمسالك البوليه


وتستقبل هذه المستشفيات والعيادتها الخارجيه الاف المرضى يوميا من كافه انحاء الجمهوريه

نظرا لتوفر بها كافه التخصصات والنادره ايضا

ا ناقلت اجيب لكم شويه صور

افرجكم بيها على مدينتى

مدينه نودى

الى مش كلها فلاحين

الصور دى للمدينه والشوارع الرئيسيه فيها

والجامعه

ومبنى المحافظه






منطقه الجامعه من زاويه عكسيه


جامعه المنصوره من الداخل




فاعليات الجامعه
من شوارع الدقهليه
كوبرى طلخا
النيل صباحا
منطق الاستاد الرياضى

ميدان ام كلثوم

من داخل الجامعه
فندق راماد
النيل فى المنصوره ليلا



هناك ١٩ تعليقًا:

سفينة يقول...

ابن المنصوره

وسعيد جدا بأول تعليق عند بنت المنصوره ..
سعيد بعودتك وبحبك للمنصوره بلد الفلاحين ..اوووو
سوري قصدي اللي مش كلهم يعني
........
خالص تحياتي

قبطان

في حب مصر يقول...

السلام عليكم
ازيك يا نودي

تقريبا كدة والله اعلم ان الكلام ده موجه لي انا..هههههه وانا بصراحة ليا تعليق عليه.
انا عارف كويس ان المنصورة مدينة جميلة زي غيرها كتيييييير من المدن المصرية الموجودة في الأقاليم واللي ربما تكون اجمل من القاهرة والجيزة بكتير.. بس ده ما يمنعش اننا نقول ان المنصورة تقع في نطاق ما نعرفه نحن باسم الفلاحين.. زي ما مدينة اسيوط ومدينة الاقصر وهي مدن جميلة برضة بنقل عليها صعايدة!!

وبعدين انا لما أقول فلاحيين فدي مش شتيمة ولا عيب بالعكس معرف دايما ان ابناء الريف من الفلاحين والصعايدة اجدع من ابناء القاهرة واخلاقهم افضل وكرما .. وانا لما اقول ان المنصورة فلاحين فده للتأكيد على الصفات الايجابية دي..
بالمناسبة انا كان معايا اصحاب كتير في كلية الاقتصاد من المنصورة ومعايا هنا في الامارات اصدقاء من المنصورة وبحترمهم جدا ومفيش حد منهم بيضايق لما نقوله انه من الفلاحين!!!!!!!

تحياتي

mregypt7 يقول...

انا جيت بس وعايز اقولك كلمه
اذا كان الكلام ده موجهلى بانى انا قلتلك ان المنصوره من مدن الفلاحين
وانتى رديتى بالصور وكلامك عنها
اولا لا هو عيب ولا حرام انها تكون من الفلاحين
على فكره انا والدى احد ابناء مدينه المنصوره عشان بس تبقى فى الصوره
يعنى مدينتكم ديه انا لفيت فيها كتير
وانا بعشقها وبعشق اهلها اللى هم اهلى
ولكن انى اقول انها من الفلاحين وتتعاملى على انها جريمه طب ليه يعنى وايه المشكله
على فكره اى مدينه غير القاهره واسكندريه والمدن السياحيه بيندرجوا تحت اسم فلاحين عشان بس يكون عندك خلفيه
ولو على النيل ومنظره اللى انتى بتقولى عليه
طيب ما كفر الزيات فيها نيل ومنظره مالوش حل هل هى مدينه حضاريه وهنقول عليها كمان شويه سيدنى مش كده يعنى وعلى فكره يعنى ردا على كلمه انتى كنتى قولتيها ان معظم كليتكم من الفلاحين على فكره بنات كليه الاداب من اشيك بنات مصر واعلاهم مستوى فى كافه انحاء الجمهوريه وان كليتك يبقى معظمها من الفلاحين يبقى ده ياكد كلمه ان المنصوره من الفلاحين وده مش موضوع اساسا نتناقش فيه او انك تعرضيه لان ده يجرح ناس كتير واولهم اللى عايشين فى القرى نفسيهم وياريت تبقى تنزلى عند طلخا وتتمشى شويه وانتى داخله كده لجوه من عند محلات البغل وهكذا وانتى هتشوفى كويس
وشكرا اوى على احترامك ليا وتقديرك للناس اللى بتحب تتابع كلامك وانك تردى على تعليقاتهم
ياريت ماكنش تقلت عليكى فى تعليقاتى ليكى من اول ما كتبت
واحب اشكرك تانى
والسلام عليكم ورحمه الله وبركاته
مع خالص تحياتى
هندسه

غني يابهيه يقول...

اول زياره


عموما ....... انا اصلي من دمنهور بس مش فارق معايا ان حد يقول انها فلاحين او وزراء

المهم انا ايه ...... ؟
واللى عاجبه عاجبه واللى مش عاجبه ....... هو حر


مش مهم انتى منين .........
المهم انتي ايه ........ ؟

nody يقول...

ده ردى عليكم كلكم
يا قبطان انت وفى حب مصر و غنى يا بهيه
لو ركزتوا فى كلامى مويس
ها تلاقونى بقول مش كلها قرى ريفيه
اقصد انها مدينه متحضره
والصور دليل على كده لانى ماجبتش صور بنات لابسين بموده وباديهات علشان اقول اننا ناس متحضرين
انا ذكرت اماكن وجبت صور لاماكن
لان ده الى انا اقصده
لانى كتير بحس ان الناس بيتعاملوا معاها على انها مدينه لا تمت بالحضاره لشىء
وكتير بسمع مصطلح
دى طلعت المدينه غير ما الواحد كان فاكر خالص
ودى حاجه بتضايقنى
اما على انها مش كلها فاحين
فاى دى دعابه
وانتم عارفين اسلوبى
ويارب يكون معنى كلامى وصل

nody يقول...

البش مهندس احمد الشيخ
ايه يا سيدى الداخله الهباب دى
مالك يا احمد
انا قلت فى اول الكلام الى بيعتقد كده الى مازارش المدينه
وانا معلوماتى بتقول انك دايس المنصوره من اولها لاخرها
وشفت لك صور حتى قريبه من بيتنا
ايه جابك انت فى الموضوع؟
وزعلان اوى ليه؟
انا نسيت اعلق على كلامك البوست الى فات
وعارفه ان فيه بيناعشم ولما افتكرت قلت مش ها يزعل علشان مخه كبير
انما تزعل كده وتقولى مش عارفه ايه
وطلخا
طلخا ايه دى الى اروحها دى بير الرخامه
وانا ما بقولش الفلاحين وحشين
لان اصلا والدى من قريه تبع السنبلاوين
انا قصدى فى البوست الى فات التصرفات الى ساعات بتصدر منهم
بلاش الكلام الجامد بتاعك ده
وكبر دماغك شويه

إبن مصر يقول...

إزيك يا نودى من زمان اوى مش زورتك وارجوا المعذره
لكن انا بختلف معاكى يانودى انا من المنصوره او نقول انى من فلاحين المنصوره
بس ممكن اعرف ايه يعنى فلاحين
المهم انى شايف انك متحامله اوى على الفلاحين او القرويين
وكمان شيفاهم بحاجه وحشه وانا مش بحب حد يشوف الناس دى كده
وعلى فكره انا لفيت كتيييير جدا وانتى عارفه ده بحكم شغلى يعنى
بس احسن ناس كنت ممكن اتعامل معاهم هم الناس اللى مش فى المدينه يعنى من القريه
طبعا مش كلهم ولكن الا من رحم ربى
وخلى بالك مش زنبهم انهم اتولدوا فى قريه وانتى او غيرك اتولدتوا فى مدينه مش عاجبهم الفلاحين اللى تقصدى بيهم القرويين
انما انا بس حبيت اوضح ليكى ان الناس فى البوست السابق بيتكلموا عن فلاحين المنصوره مش القرويين لأ دول بيتكلموا على انها اقليم من اقاليم مصر زى الغربيه والمنوفيه وكفر الشيخ وغيرها من الأقاليم
انما انا عايز حتة العنصره دى تروح منك عن قريب
اتمنى ذلك
وعرفت من البوست السابق لده انك كنتى تعبانه انتى ووالدتك
الف سلامه عليكى انتى وهى وهى اكتر
وكمان عرفت انك خلصتى امتحانات بالتوفيق ان شاء الله
تحياااااااااتى
فلااااااح مصرى بجد اتمنى انه يكون شرف لمصر
ويكون صديق لكل الناس فى مصر ويشرف قريته ويشرف المنصوره مش يتعالى على بلده واهلها

mregypt7 يقول...

يا استاذه نودى لا زعل ولا نيله الحكايه كلها ان ده اصلا موضوع المفروض ما نتكلمش فيه وعلى حد قولك كنتى بتهزرى
وعلى فكره لو تعرفينى كويس هاتعرفى ان كل كلامى كنت بنكشك فيه بس لان ديه طبيعتى احب اعمل كده مع اى حد حتى ولو كان اصحابى احب انكشهم دايما على انى بتكلم جد ولو على التعليق مش هزعل يعنى عشان هيافات زى ديه كل الكلام انى خدت على خاطرى شويه وافتكرتك زعلتى من الكلام مش اكتر والمنصوره يا ستى اجدع ناس واحلى مدينه فيينا العرب !!!!!!!
حلوه الصيغه ديه
ياريت تبقى تنورينى
تحياتى

the beauty candy يقول...

المنصوره مدينه فلاحين ولا مدنيين
واجعين دماغكم على ايه دول حلوين ودول حلوين كبروا دماغكم شويه
بالنسبه للمدينه هى جميله جدا بس مستخبيه بس ما تزعليش نفسك يا نودى هى جميله ولذيذه كفايه انك منها ولو ممكن اتدخل بس فى حاجه شايفه انك انتى وبيبو كان فى بينكم حرب ايه يا جماعه مش كده على فكره انا متاكده وواثقه انه بيهزر هو كده ما تعرفيش هزاره من جده يعنى فعلا بنعانى منه فى اشد الاوقات الاقيه بيتكلم جد وكده وفى الاخر يطلع بيهزر قال بينكشنا ما تزعليش منه بيحب ينكش كل الناس سواء يعرفهم او لا وما بيزعلش من حد سورى لتدخلى بس عشان لو كان فى سوء تفاهم يعنى جيت اوضحه
ومدينه المنصوره اشراقه على ارض مصريه يا نودى وما تبقيش تانى تقولى لا فلاحين ولا غيره خليكى فى نفسك وخلاص
كانت معكم دوودا

blue-wave يقول...

اولا محدش قال ان المنصورة بلد فلاحين
ثانيا عاجبنى اوى اعتزازك ببلدك
ثالثا عاجبانى اوى الصور بجد مكنتش اعرف انها بالجمال دا
رابعا بقى
المنصورة اكيد حلوة علشان انتى منها
تحياتى

nody يقول...

ابن مصر
الله يسلمك
شكرا على مرورك

nody يقول...

البش مهندس احمد
حلوه استاذه دى
ايوه كده احترمنى
انا اكبر منك بارضه
وخلاص ياسيدى قولى انت نازل عندنا امتى
وليك عاندى عزومه عند الحجاز
ونحبس باتنين عصير قصب من العصاره الى قدامه
وما تتطمعش فى اكتر من كده

nody يقول...

blue_wave
ربنا يخليك دا بس من زؤك
هى دى الرجاله الى ترفع المعنويات

nody يقول...

the beauty candy
والله ياقمر ما فى حاجه بينى وبين البش مهندس
اخويا الصغير وبيتدلع
وادخلى يا باش زى ما انتى عاوزه
هنا بلوج ديموقراطى
نورتينى يا قمر
ومرسيه على زؤك

واحد مصري يقول...

ايه يا نودى انتى عامله مشكله ليه كده على الفلاحين مالهم الفلاحين ما هم بنى ادمين زينا برده
بل بالعكس ليهم فضل كبير فى حياتنا ومش لازم ننكرهم ونتجاهلهم وان نهاجم طبليعتهم فى الحياة كل بشر وليه طبيعته الى عايش بيها واتأقلم عليها
اما بالنسبة لمدينة المنصورة فانا بجد مكنتش اعرف انها بالجمال دا ومفيش حد يعنى على طول بيقول انها فلاحين وكده الا بسيط من الى ميعرفهاش
بس بجد طلعت جميله اوى بل منظر النيل باليل من ورا الكليه روعه
ومتزعليش نفسك وخفى على الفلاحين شوية

جار القمر يقول...

كمان أنا من ريف الدقهليه وعاوز اقول حاجه مضايقانى ريف مصر كله مهضوم الحقوق واعتقد ان المدينه الام لكل محافظه هيا اللى واخده كل حاجه يعنى مثلا المنصورة يروح محافظ ويجى محافظ كل اللى بيعملوا يظبط المشايه ومنطقة المحافظه وكدا لكن ينظر نظرة عطف مش من جيب أهله على ريف محافظته اللى هو أساسا بياكل من خيرها اللى احنا بيطلع دين ابونا علشان نطلعه للسيد المحافظ ... يختى بلا خيبه

Fla7 يقول...

علي فكرة الصور دي إنتشرت بصورة مبالغ فيها
و المطلوب أننا كأبناء للمنصورة نعمل صور أحسن منها و ننشرها ما نكتفيش بالصور خصوصاً إن في ميادين و شوارع بأكملها إتغيرت عشان الصور دي عمرها أقل حاجة 8 سنين بدليل المنظر اللي فيه صورة الإستاد و واضح فيه الميدان القديم و الجزيرة القديمة اللي قدام مسجد الإستاد

و علي فكرة الأولي اللي يتقال عليهم فلاحين هي القاهرة بالأخص بعكس الأخ اللي بيقول "إن غير القاهرة و الإسكندرية يبقوا فلاحين" عشان 75 % من الناس اللي فيها نازحين من الأقاليم فبلاش نفتح لبعض و نتكلم علي بعض و إحنا كلنا مصريين و بعدين بلاش الناس اللي عاملة فيها مثقفة اللي كل شوية واحد منها يدخل يقول " ايه المشكلة في كلمة فلاحين" ماتمثلش الله يكرمك .. عشان مش ناقصاك
أيوة .. كلمة فلاحين مفيش فيها عيب و كلمة صعيدي مفيش فيها عيب .. لكن العيب في اللي بيستخدمها بطريقة ساذجة زيه و يقول علي ناس "دول فلاحين" و بالطبع هو بيشتم الفلاحين قبل ما بيشتم الناس الي بيقول عليهم كدة
يعني ايه يعني لما يقول "دول فلاحين" ايه الغرض من أم دماغك اللي عاوزة تنضيف دي لما تقول كلمة زي دي .. يعني تقصد إنهم ناس درجة تانية و لا ايه دماغك !!

و لأي واحد بيستظرف .. تعالي إنزل المنصورة و شوفها بنفسك مش هنعد نبجل في بلدنا مع واحد دماغه قفل بيتريق علي الصعيدي و يقول علي من الأقاليم فلاح

و الفلاح اذا انت ناسي و او بتتناسي هو اللي بيفطرك و يغديك و يعشيك
و لا انت بتزرع جنينة فيلا بابي و مامي و بتحصد اللي فيها و تأكله !؟

و لا فض فوه أحمد المسلماني مقدم الطبعة الأولي علي دريم
لما قال .. هو مواطن القاهرة عاوز إيه من الأقاليم زعل لما النت و الدش دخل بيوت الفلاحين و بقوا بيسهروا و مابيصحوش بدري عشان يحرثوا و يفلحوا و كتير من الفلاحين اتجهوا لمهن تانية .. خلاص يا إخوانا يا فلاحين تبقوا تصحوا بدري بعد كدة من 5 الصبح عشان خاطر مواطن القاهرة يعيش حياته و انتوا تدفنوا نفسكم بالحياة عشانهم

و كلام تاني بينم عن شخص بيفهم و بيفهم قوي

و أخيراً .. أنا تعمدت أرد عليك من أكاونت بإسم Fla7 عشان اللي عنده حساسية منها يظهرها و يقل أدبه
و للعلم انا كنت عامل الأكاونت ده علي سبيل الهزار من زمان عشان أنا مهندس زراعي و كنا عاملين مقلب في واحد صديق بالأكونت .. و كويس إني إستخدمته تاني لما لقيت الناس السخيفة اللي رادة ردودة سخيفة زيها

سلام

غير معرف يقول...

انا من المنصورة وفى السعودية وبقول
جميلة يا بلدى ويارب يحرسك

غير معرف يقول...

تقدروا تشوفو المنصورة فى الموضوع ده المشاركة التانية http://aqarimall.com/vb/aaeeii-aiiaee-caaaeoaene/13-ciaa-oaen-aaiiaee-caaaeoaene.html