الثلاثاء، ٢١ سبتمبر ٢٠١٠

دراما على الميزان

يوسف الصديق بغض النظر عن بغضى الشديد للنظام الايرانى
وعدم ارتياحى للدوله الارانيه
وبغض النظر ايضا عن فتاوى التحريم التى طالت الملسلسل بسبب تجسيد شخصيه سيدنا يوسف
ألا ان المسلسل قد نال اعجابىو اعجاب الكثير من الناس
فى اراء بتقول ان المسلسلات الايرانيه هى وسيله للمد الشيعى
وده ممكن يعتبر صحيح
بس لو حتى المسلسلات دى هى وسيله للمد الشيعى
توجب علينا بارضه اننا نرفع القبعه احتراما وتقديرا لهذا العمل
لان العمل يعتبر جيد جدا من جميع النواحى
سواء من الناحيه التاريخيه او التمثيل المقنع والديكورات الرائعه
بجد شىء مبهر والملابس والمنطقيه فى كل شىء داخل المسلسل
فعلا عمل يحترم الماشهد
وبالتالى على المشاهد ان يحترم هذا العمل
لأننا لو جينا بصينا على الأعمال التاريخيه أو الدينيه الى بنعملها فى مصر
فاانك ياعزيزى المشاهد سوف تنتابك حاله من الغثيان رغبه شديده فى القىء نظرا لما سوف تجده من
استعباط واستهبال واستخفاف بعقول المشاهد
يعنى هاتلاقى الممثل فى مسلسل تاريخى لابس ساعه
ووالاحداث التاريخيه كلها غلطات
ولو انتبهنا للديكورات هايجى لك اكتئاب زى الى جالك فى مسلسل كيلوبترا وعمرو ابن العاص
ونصيحه منى بلاش حد يتفرج على معركه اأكتيوم البحريه فى مسلسل كيلوبترا
حرصا على عدم ارتفاع ضغطكم
يعنى لو جينا عملنا مقارنه كده بينا اعمالنا التاريخيه او الدينيه وبين اعمال ايران التاريخيه والدينيه
هاتحس انك بتقارن بين عربيه 28 وعربيه هامر
وازا كمان أضافنا الأعمال التاريخيه والدنيه السوريه
فا طبعا لا تعليق
وكلنا نتذكر لما عملنا مسلسل بيبرس
وسوريا هى كمان عملته واتعرض فى نفس التوقيت
كانت حاجه تكسف وتفضح وتعر
الكلام الطويل ده كله ليه؟
أقول لكم
علشان انا نفسى احنا كمان يكون عندنا هدف زى ايران ماهى عندها هدف
ونجند كل طاقتنا لتحقيقه
حاجه كلنا نلتف حوليها ويكون لينا حلم ونحققه
بس يكون حلم محترم مايكونش مثلا وصول المنتخب لكاس العالم
عاوزين هدف قومى زى ماايران عندهم هدف وبيحاولوا يحققوه بكل الوسائل وبكل الامكانيات حتى لو كان مسلسل
ليه احنا مانحولش نعمل زيهم ؟
احنا كمان من حقنا يكون لينا هدف ونحققه علشان نبقى كبار بجد
فى المقدمه بصحيح مش بالفبركه وشغل التزيف
مش كده ولا ايه؟



هناك ١٦ تعليقًا:

أنا - الريس يقول...

طب ينفع رأي تاني .. طيب ليه ما نحيش القراءة في بيوتنا .. ونقرا تاريخ
احسن من الأعمال الدراميه وعلي الأقل .. يخلي الشعب مخه ينضف بدل الزرنخه .

بصي يا غالية ..
لو جينا للأعمال الدرامية التارخيه والإسلاميه .. فسوريا متفوقه كدوله ..
لكن
ادخال دراما في الدين .. شيء لا يرضاه العقل .. لأن الحبكة الدراميه تحتاج لتغير وان كان بسيط حتي لا يصبح العمل خالي من الروح .

dr.lecter يقول...

المسلسل لا يقل ابداعا عن مريم المقدسه وكان انتاج ايبراني برده

السنه دي فيه مسلسل انا استغربت انه اتعرض علي ام بي سي اسمنه القعقاع بن عمرو التميمي كان بيتحدث في اخر حلقاته عن الفتنه الكبري وكان سيدنا علي بن اب طالب طالع فيه بس مخبيين ووشه وجايبينه بيتكلم ودخلوا في موضوع الخوارج ومعاويه والرافضه

غير معرف يقول...

هههههههههههههه معاكى حق يابنت بلدى والله بس فعلا انا متفرجتش ومينفعش لانها ممنوع تجسيد الانبياء لكن معاكى قلب وقالب فى ان الدراما المصرية بى الخصوص اتفه دراما فى الكون دا واستخفاف رهيب اوووووووووووووووووووووووى اووووووووووووووووووووووووووووى
بالعقولودا على اساس إن المجتمع كله متعاطى يعنى
فبيتوهونا مع حالة التوهان اللى بتعانى منها الدولة ....
فصحيح لسه باصص فى اكلة الفسيخ ههههههههههههههه

nody يقول...

mr.prededent

بص انت بقى اسيدى
نحن شعب اصلا لا يقراء
شعب مضمحل ثقافيا وبفعل فاعل طبعا
علشان تقول احى القراءه عاوز لك سنين

دا غير ان شراء الكتب اصبح عبء مادى حاليا

فى حين ان الميديا مسموعه وذات تأثير على الكبير قبل الصغير
فاليه ما نستفدش منها بدل الهيافه بتاعتنا الى بنعملها؟

نورتنى يافخامه الريس

nody يقول...

dr.lecter

اه انا بارضه تابعت مريم المقدسه
وكان عمل جيد وناس كتير تابعته

ان كانت سوريا وايران فاهما تفوقوا على انفسهم فى المسلسلات التاريخيه والدينيه

احنا كفايا علينا العار

شرفتنى

nody يقول...

بص ياابن بلدى بغض النظر
ان المسلس بيجسد الانبياء والوحى
فا بجد لازم تشوفه
هايفوتك كتير

وبغض النظر عن عنيك والطفاسه
فاانت نورتنى

nody يقول...
أزال المؤلف هذا التعليق.
محمد التركى يقول...

السلامو عليكم

أولآ وحشتنى مدونتك جدآ لأنى بقالى مده غايب عن النت والتدوين
ولما جيت لقيت مفجأه
أنك أنتى كمان بقالك مده منزلتيش جديد
ياعنى أنا والحمد لله مافتنيش حاجه من عندك

ثانيآ ندخل بقى فى كلامك اللى بختلف معاكى فيه جدآآآآ
والاختلاف فى الرأى لا يفسد للود قضيه
ولا ايه

المسلسل سمعت عنه لكن مشفتوش لحرمانيته
طيب دول شيعه ياعنى أشد كفر من الاديان اللى على غير الاسلام
يعنى مينفعش أصدقهم فى اى حاجه
لأتهم غرضهم الاول والاخير أمتداد المذهب الشيعى على مرما البلاد الاسلامه والغير
ياعنى المد الشيعى
وأوعى تصدقيهم لما يطلعو يشتمو ولا يهددو بأبادت اسرائيل واليهود وكلامهم الغايب ده
لالالالا هدفهم بلبله وشد النظر ليهم
وهما اول ما عيتمكنو هيدمرونا عرب بلد ورى التانيه
ولو مش مصدقه شوفى نصر الله عمل ايه فى بلاد كتير من تحت لتحت
تنظيمات ارهابيه واختيالات وبلاوى
نرجع للدراما الايرانيه اللى عجباكى للأسف
عمرها قد ايه الدراما ديه
ملهمش تاريخ فيها
ثم شوفى الناصر صلاح الدين
او الرساله
او الممليك
برضو احنا لينا تاريخ
يمكن دلوقتى مفيش دراما تاريخيه
لان الشعب مش هيقبل عليها
بس احنا كده نشوف الحاجه بتاعت بره نموت عليها
ولو عملوه فى مصر ولا حد هيعبره ويشوفه صح

ربنا يسترها علينا

أنا سعيد جدآ بمرورى على مملكتك الجميله
وربنا يديم التواصل

تحياتى لأجمل بنت من المنصوره

محمـــد التركـــى

غير معرف يقول...

السلام عليكم ورحمه الله وبركاته
شدني البوست بتاع يوسف الصديق لاني تابعت المسلسل ده في رمضان علي قناه اسمها nesma وزي ما تقولي متخصصه في عرض المسلسلات الايراني يعني بعد يوسف هتعرض مسلسل ابراهيم الخليل وهتعرض قريبا مسلسل عن سيدنا سليمان . تابعوها ارجوكم .
اما حكايه المد الشيعي اللي الناس بتتكلم عنه فصدقوني كله ده كلام سياسه ولا فيه حاجه من ده ابدا ولو حتي فيه يا جماعه احنا ضعاف النفوس والاراده فلازم نقول زي ما عبد المطلب قال لابرهه ان للبيت رباً يحميه فلازم نقول ان للاسلام ونبي الاسلام رباً يحميهم لان احنا مفيش فينا امل انما هيا لبانه في لسان كل واحد عاجز ان ده مد شيعي سواء من ايران او حسن نصر الله . دا مسلسل اللي هيتابعه هيلاقيه مطابق للقران في كل شئ ولا فيه مد شيعي ولا اي كلام وهو يعني انا هشوف مسلسل ايراني هبقي خلاص شيعي ؟؟؟؟؟؟؟ مش منطق يعني طالما لينا عقل نقدر نميز به اي شئ نشوفه ومش احسن من افلام السبكي وفوازير مريام اللي المفتي مش بيكلف خاطره انه يطلع ويصرح تصريح خفيف بان الرأفه بالمسلمين حلوه علشان تعبوا وان اللي بيتعرض علي التلفزيون الحكومي والخاص حرام وخاصه العري والتفاهه واحسن من اني اتفرج علي حمرا بتاعت ابراهيم عيسي او حتي سيد ابو حفيظه وهو بيخلي الناس تضحك عليه يعني من الاخر يا جماعه خليكوا عقلاء وشوفوا اللي يفيدكم حتي ولو كان فيلم اسرائيلي بدل ما تتفرج علي فيلم بورنو عاملينه مسلمين ومن اهل السنه وسلامي لزهره وازواجها الخمسه وبالاخص الحاج حسن يوسف !!!!!!!!!!!!

nody يقول...

محمد التركى

حمد الله على السلامه بعد غيابك ياسيدى

اولا انا ماقولتش اننا نصدق كل حاجه
ولا قلت ان الشيعه نيتهم خالصه لوجه الله
انا اقصد انهم عندهم هدف محدد وبيجندوا كل طاقتهم لتحقيقه
حتى لو كان بمسلسل
طلعوا بشكل فنى رائع
وان كان على التاريخ فا ده مابياكلش عيش دلوقت
انا ادعوك تتفرج على مسلسل الظاهر بيرس المصرى
وتقارنه بالظاهر بيبرس السورى
وبعد كده تتفرج على مسلسل نزار قبانى السورى
ومسلسل العندليب بتاعنا وانت تعرف اننا لا ماعندناش حاضر وشكلنا مالناش مستقبل

نورتنى

nody يقول...

غير معروف

فعلا احنا عندنا انحلال اعلامى شامل سواء اعلانات او مسلسلات او افلام وربنا ينتقم من السبكى واشرف مروان
والكل كليله
وايران وسوريا سبقونا بمراحل

لكن ده مايمنعش ان فيه مد شيعى
وحتى مسلسل يوسف فيه تكات خفيه لتشويه الحضاره المصريه القديمه
وده مايمنعش ان المسلسل حلو

نورتنى

غير معرف يقول...

بردوا مد شيعي .. انتوا مش شايفيين ان دي كلمه كبيره قوي قوي حكايه المد الشيعي ده بالرغم ان فيه مد متشعب ومسيطر علينا من زمان وهو المد الامريكاني فكل ما حوالينا امريكاني من لبس واكل ومسحوق غسيل واعلام مفتوح وكلام فرانكو وافلام اجنبي بتتحدث عن عظمه امريكا . ليه مش بنقول مد امريكاني ؟؟ بتهيئلي لما يتقال قدامنا كلمه ونفضل نكررها يبقي كده المخطط نجح بامتياز . افضل التحدث عن المسلمين كوحده واحده افضل من التحدث عنهم كشيعه وسنه .
وتشويه حضاره ايه اللي حصل في المسلسل ؟؟؟؟ ياريت تقوليلي حاجه واحده فيها تشويه ؟؟ أظن إن سيدنا يوسف مكنش شيعي علشان يطلع كويس ويطلع المصريين وحشين ؟؟ ولا كان سيدنا يوسف شيعي ؟؟؟؟ تصدقوا بالله ما فيه أخيب مننا

nody يقول...

غير معروف

اولا حضرتك بتتكلم بنرفزه غير مقبوله

ثانيا المد الشيعى ليست كلمه والسلام
بل هى مخطط تنجد له كثير من موارد الدوله الايرانيه
ولعل الاحداث الاخيره فى البحرين تبرهن على ذلك

ثالثا
انا لم اهاجم المسلسل بالعكس وانا شايفه انهم من حين لاخر كان فيه تشويه للحضاره المصريه
فمن غير الطبيعى ان نساء مصر الاشراف جميعم كانوا يريدون حمل يوسف على البغاء
مافيش واحده على الاقل رفضت؟

غير معرف يقول...

والله اولا انا لا بتكلم بنرفزه ولا حاجه الموضوع واضح علي الاقل بالنسبه لي ولا يستحق النرفزه ولكن كل اسفي هو علي حالنا وكأننا نردد كلام فقط ان فيه مد شيعي مد شيعي بالرغم من وجود مد امريكي ومد اسرائيلي ومد غربي !! صح ولا انا غلطان لاء ومش مد لاء دا تأثير بكل معني الكلمه وبالرغم من كل ده تركناه وتركنا سارق البيت ومسكنا في صاحب البيت علشان نلومه انته نسيت البيت مفتوح ليه ؟؟؟ دا اسمه كلام يا عالم ... ثانيا لو بصيتي للموضوع بنظره شامله هتلاقي ان السيطره علي العراق من امريكا جعلت للشيعه صوت بعد التخلص من صدام ووجدت امريكا في جعل الشيعه عفريت يخاف منه اهل السنه شئ جيد للعب به كورقه رابحه بدون اي تدخل منها طالما وجدت من يستمعون ويرددون كلامها . مختصر الكلام لازم نبص للاسلام نظره شموليه ونتحدث عنه كمسلمين مش كسنه وشيعه وعلي فكره هما اقليه واحنا اغلبيه فمن وجهه نظرك مين اللي المفروض يكون له وجهه النظر الراجحه ؟؟ لو وحد علماء السنه رأيهم إتجاه الشيعه وبدأوا في التطبيع معاهم بدل اسرائيل الدنيا هتمشي . واذكرك بموقف مرشد ايران من سب السيده عائشه بالرغم من صدور السب من راجل شيعي . وعموما الغلط في الاسلام ورموزه بيصدر من الشيعه والسنه علي السواء وعندنا جمال البنا وعندنا سيد القمني وكثيرين .. علي فكره غالبيه سكان البحرين شيعه !!!!!!!! يعني عاملين زينا هنا في مصر كمسلمين ومسيحيين وشوفي المسيحيين بيطالبوا بايه !!!
اما حكايه تشويه الحضاره اللي واجعه دماغنا فانتي سيبتي كل حاجه وجيتي علي حكايه نساء مصر الشرفاء طيب يا ستي اقرئي القرآن كويس وانتي تعرفي القصه كويس ولو مفهمتيش من القرآن اقرئي اي تفسير موثوق فيه وهتعرفي ان ربنا قال في كتابه العزيز ( رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ ) ومقلش مما تدعوني اليه !! وكمان إمراه العزيز كانت بتتحدث في حضره نساء مصر الشريفات وقالت ( فَذَلِكُنَّ الَّذِي لُمْتُنَّنِي فِيهِ وَلَقَدْ رَاوَدتُّهُ عَن نَّفْسِهِ فَاسَتَعْصَمَ وَلَئِن لَّمْ يَفْعَلْ مَا آمُرُهُ لَيُسْجَنَنَّ وَلَيَكُونًا مِّنَ الصَّاغِرِينَ ) !!!!!! هل ذكر القرآن إن حد فيهم قال لا لا لا حرام عليكي بلاش احنا نساء شرفاء منعملش كده ؟؟ بالرغم من ان ده مش معناه التعميم علي نساء مصر اللي انتي وصلتي له منين مش عارف بس يلا كل بثوابه .. وفي الاخر لسؤال الملك للنسوه قائلا لهم ( قَالَ مَا خَطْبُكُنَّ إِذْ رَاوَدتُّنَّ يُوسُفَ عَن نَّفْسِهِ ) !!!!!!!!! تفتكري رادوتن دي معناها ايه ؟؟؟
احنا بس بنحب ناخد الامور من الظاهر وبس بالرغم ان المسلسل مقلش حاجه عن اهل مصر غير ما جاء في القرآن بالنص واتحدي بالنص وعلشان اشيل عنك حرج ان مفيش واحده رفضت علشان شكلك شاغله بالك بالموضوع فسيدنا يوسف تزوج مصريه يعني من اهل مصر يعني شريفه !! كنت اتمني انك تهتمي بمدي تاثير سيدنا يوسف علي الحضاره المصريه وازاي انه نادي بتوحيد الالهه وبالرغم من كل ده لم تذكر الحضاره المنيله بستين نيله اي شئ عن سيدنا يوسف ما عدا شويه اجتهادات من مؤرخين قد يصيبوا وقد يخطئوا وفي الغالب بيخطئوا ...
وبعدين شوفي تاثير مهند بطل مسلسل نور في بنات مصر وكاظم الساهر واحمد عز وانتي هتعرفي تاثير سيدنا يوسف في نساء مصر الشريفات ...
وبروا تعيش زهره المصريه وازواجها الخمسه وبالاخص الحاج حسن يوسف

ارجو عدم مسح التعليق لتفعيل روح الديمقراطيه في المدونه

غير معرف يقول...

هو مفيش حد هيرد علي الكلام اللي قولته إنه صح أو خطأ ولا السكوت علامه الرضا ؟

بسمه العتيبي يقول...

غير معرف فيه مد امريكاني ومد شيعي ومد صهيوني وكلهم بيشتغلو احنا مو مصدقين لانا مانعمل شيء غير الاستقبال فكلمة مد تعتبر خرافه لانها شيء كبير على ادمغتنا لاننا مانشتغل فنفكر انه الناس ماتشتغل على مبداءها احنا في الخليج نعرف اساليب كثيره عن ايران وهذا مو غايب عن المصريين كمان كل الناس تعرف طرق الشيعه في نشر افكارهم وبعدين فيه مقاطع حذفت من الفلم لما يكون يوسف في البئر وبيطلعله شيخ شيعي وروح شوفه باليوتوب موجود ومترجم