الأحد، ١٢ أبريل ٢٠٠٩

انا فى ورطه

نودى فى ورطه




اولا وحشتونىىىىىى

وأسفه كتير علشان فى ناس مقدرتش ارد على تعلقياتهم فى البوست الى فات وكمان اتاخرت على ما نزلت البوست

بما ان طبعا بوستاتى ينتظرها القراء ههههههههههههههههه

ثانيا مرسيه للاى حد سأل عليه وخصوصا ولاد بلدى الجامدين قوى

بصوا بقى انا فى ورطه

بقالى حوالى شهر منعزله عن الدنيا

جهازى اللعين بايظ وكل ما اصلح حاجه حاجه تانيه تبوظ

لما بقى عامل زى كرتونه العيش الفاضيه

ومقضياها اخبار من على الدش بس مدونات حبايبى وحشانى والله كتير

وانتم كلكم واحشينى كتير جدا جدا وسامحونى على قله متابعتى ليكم بجد

وادعو الجهاز يتصلح


نيجى بقى للموضوع المهم

انا فى ورطه تانيه
بما انى حد عاطل عن العمل كا معظم حال كتير من الشوباب وحيث انى بااعتراف موثق من جامعه المنصوره
مدرسه عربى قد الدنيا
فا انا اقترحت على ماما انها ماتديش لاخويا الصغير درس عربى باره وانا الى ادى له
وقد كان بالفعل ياساده
والموضوع ماشى كويس بالنسبه ليه ولأخويا انا من ناحيتى بسلى نفسى وما بنساش قواعد النحو والصرف
وهو بيلاقى اهتمام ومتابعه اكتر
ولكن تأتى الرياح بما لا تشتهى المراكب
أخويا فى تانيه اعداى وبيدرسوا فى العربى قصه اسمها كفاح شعب مصر
بتحكى الكفاح المصرى منذ مينا موحد القطرين لغايه حرب اكتوبر
المهم جه الفصل السابع وبيتكلم عن ثوره 1919
طبعا الحماس اخدنى وقعدت أشعر له فى الثوره وأقوله ان دى الثوره الوحيده الى قام بيها المصرين
ما كناش فيه فرق بين مسلم ومسيحى وراجل وست
وحده عنصريه ووطنيه من أجل الاستقلال والحريه
وبسبب الثوره دى أصبح عندنا انتخابات حره ووزاره الشعب اختارها
ودستور 1923 وفضلت امجد له فى الدستور ده وان احنا لحد دلوقت مش قادرينت نتحصل على واحد زيه
وخلص الموضوع
جه يوم ما طلعلتوش شمس
بفتح الفصل الى عليه الدور لقيت قدامى الصوره اياها
بتاعه العصابه الى انتم عارفنها
ونزل عليه سهم الله
طب أعمل ايه؟؟؟؟؟؟
أقوله الكلام الى الوزاره رصاه
ان الايام الى قبل الثوره دى كانت سوده مخططه اسود وان كل حاجه كانت فساد فى فساد
ملك فاسد وحكومات فاسده وحاشيه فاسده
وان جت الثوره المباركه خلت كلل حاجه بمبى بمبى
طب اعمل ايه
دى كلمه ثوره دى اصلا كدب
يعنى اقوله الحقيقه
أقوله ان مش كل حاجه كانت بالشكل ده
اقوله اه كان عندنا ملك بس كان الناس لما بتطلع تشتمه فى المظاهرات بتروح على بيتها عادى
اقوله كان عندنا النحاس باشا زعيم الامه ورئيس الوزرا اتضرب بالقلم فى الشارع اخد الولد الى ضربه
وعمل له محضر فى القسم لان كان فيه احترام للقانون
وكان عندنا احزاب وحريه سياسيه
مش كل حاجه كانت سوده كده
واقول ان عصر ما بعد الانقلاب ده ما كانش ربيع زى ما كاتبين
كان فيه قمع واغتصاب للسلطه
ولا اقوله على النهب الى اتنبهب من املاك العائله المالكه والقصور والعمارات للظباط وأهاليهم
والمعتقلات والناس الى اتعذبت ظلم
والى ماتوا بدون اى ذنب
ولا عن النكسه
وقيمه الجنيه الى بقت فى الارض بسبب السياسه الميمونه
طب ولما يسألنى اخويا عن محمد نجيب أقوله ايه؟
اقول زى ما حفظونا؟
انه كان مجرد واجهه للثوره وانه ساب الحكم للناس الى تصستحق تحكم
ولا اقوله ان الراجل لما حب ان الشعب هو الى يختار الى يحكمه اعتقلوه داخل بيته وعزلوه عن الحكم
اغتصبوا الحكم لحد ما بقى حواز فؤاده من عتريس باااااااااااااااااااااااااااااطل
بصراحه احتارت
أقول الحقيقه ولا اسكت؟
طب وضميرى
والامانه؟
مش عارفه


هناك ٢٩ تعليقًا:

thunder يقول...

اووووووووووووووووووووووول تعليق

thunder يقول...

وتانى تعليق
نياهاااااااااااااااااااااااااا

thunder يقول...

وكمان نحجز التااااااالتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتتت

thunder يقول...

نيجى بقة للكلام على البوست
اولا انا معاكى ان الثورة الوحيدة كانت بتاع 19 و23 يوليو كانت انقلاب عسكرى
بس انا عزراك انتى لو قولتى ليه ان الكلام دا معظمة مش حقيقى يبقة هيعقد معاكى وهتبقى السبب فى انه فاشل لانه مقالش اللى فى كتاب الوزارة
والله موقف وحش اللى صعبان عليا اخوكى لما يكبر ويعرف التناقض اللى موجود دا
هما عاوزين شهادة بدون معلومة يبقة احسن تخالية ياخدها
فعلا ورطة ربنا معاكى المهم ابقى قولى لى على سجن ابو زعبل اللى هتكونى فية
علشان فى جروب هناك جامد ليا اوصى عليكى وعيش وحلاوة هههههههههههههههههه

AHMED SAMIR يقول...

ماهو انتي قدامك حل من اتنين:
يا تريحي ضميرك....يا تريحي مامتك
لو ريحيتي ضميرك و قولتي له ان دي العصابة اللي وصلت مصر للحالة المذرية دي
يبقى الولد هيذاكر في الصيف علشان الملحق
و لو ريحتي مامتك و شرحتي له المقرر بالضبط يبقى هتخسري نفسك
احسن حاجة
تعتزلي المهنة دي.....بلا وجع دمااااغ

Ahmed يقول...

أولا حمدلله على السلامه
على فكره الغيبه الطويله ديه كده متنفعش
ياريت تشوفيلك صرفه في الجهاز بتاعك ده

بصي ياستي
أنا أمي أصلا مدرسه عربي
سابت التدريس من زمااااااان من أيام ما كنت انا في المدارس

كانت بتواجه المصاعب ديه وخصوصا اني كنت عنيد مبصدقش أي حاجه وبجادل دايما

كانت دايما تقول الحاجه مرتين
المره الأولى الحقيقه
والمره التانيه اللي لازم اكتبه في الامتحان عشان انجح واجيب مجموع

من وانا في حضانه وانا فهمت يعني ايه تعليم بايظ وتاريخ غلط
كنت بتعلم الصح واللي اكتبه في الامتحان

صبرني يارب يقول...

قابلتنى نفس ذات المشكله

لما مريم اتفرجت على فيلم طباخ الريس
وقالتلى معقوله يا ماما الرئيس يمشي كده وسط الناس فى الشارع

بس انا قلت بامانه بقى

وانا مااااااااالي

قوليله الحق يا بنتى ورزقنا ورزقك على الله

صبرني يارب يقول...

اه بس عرفيه ما يكتبش الكلام ده فى الامتحان

احسن تتسوحوا يا حلوه
ههههههههههههههههههههههههه

Unknown يقول...

سلامو عليكم
بصي
بما اننا بلديات انا هقولك
انتي تستغفري ربنا 10 مرات
و تشرحي لأخوكي زي ماهو موجود ! مش عاوزين يحصله زي الاء

ولا انتي عاوزة تصيتيه؟!

dodo يقول...

انا بقى معنديش مدونه بس لما عرفت ان انتى من المنصوره قولت لازم أعلق بما اننا بلديات

بصى يا بنت من المنصوره

إنتى قولى لاخوكى اللى مكتوب فى الكتاب بالظبط وبكده يبقى انتى بتعملىا للى عليكى فعلا وبتزاكرى له اللى هيدخل يمتحن فيه

ولما يخلص امتحان تقعدى معاه قاعده حلوه وتحكيله على التاريخ الفاسد ده

وبعدين فيه حاجه اصلا الوقتى ان احنا لو شوفنا حاجه غلط منكلمش احسن
لان لو اكلمنا فيها اعتقال لا مرمطه يبقى احنا مالنا بقى

نعيش اليوم بيومه وخلااااااااااااااااااص

انا مبسووووط جدا انى علقت فى مدونه بنت بلدى
على فكره المدونه بتاعتك كانت متسجله على الكمبيوتر لان اخويا عنده مدونه (سفنيه)وعندنا مدونات كتيره متسجله على الجهاز فاختارت انى اعلق عندك

خلى مواضيعك بعد كده فيها نقض بس مش بالوضوح ده وكله لمصلحتك

صدقينى الحاجه الوحيده اللى لو اتطبقت فعلا فى البلد دى البلد هتتقلب هى الديموقراطيه

لان الناس مشحونه فلو سابوها تكلم البلد هتولع


أسسسسسسسسسف جدا على التعليق الطويل ده واستحملونى بقى

وإللى لقاء يا بنت المنصوره(محمود عبد الرحمن)

حياة بلا روح يقول...

نودي

اولا حمد لله على السلامة وحشتينا جدا
يارب تكوني دايما بخير

هو ده حال التعليم في مصر

بصي
اشرحي له المنهج المقرر عليه علشان ممكن يناقش المدرس من خارج المنهج او حد من زمايله وتبقى فيه مشكله ..

ولما يمتحن اقعدي معاه واشرحي له الأحداث الصحيحة علشان دايما يبحث عن الحقيقة و يعمل مقارنة للمعلومات الي بيتلاقاها من اي مصدر في مراحل تعليمةوفي حياته وتوضحي له انه مش مع اي شخص يتناقش من خارج البيت ..
الله يكون في عونك ويوفقك

أطيب تحية

MaNoO يقول...

أولا حمد الله بالسلامة ونورتى المدونة وبالشفا للجهاز يارب
وفاتك حاجات كتير جدا من التغيرات خاصة فى المنصورة وانا عارف انك بتحبى الشغل على ارض الواقع المهم تتعوض ان شاء الله
أنا أقولك على رأيى بلاش تذكرى لاخوكى التاريخ زى ماهو مكتوب فى الكتب حفظ واحنا بنشرحه وخلاص انتى ممكن تسردى الموضوع بطريقة تشويقية بحيث هوا يفكر هوا يعرف مين الصح ومين الغلط يعنى بمعنى أصح الحدق يفهم اظن بالطريقة دى الفكرة هتثبت فى دماغه لانه هيقتنع بيها بعد تفكير وتدقيق لانه عايز مين الصح ومين الغلط
بلاش انتى تقوليله مباشرة مين الصح ومين الغلط

مسدس صغير يقول...

كلامك صح ميه المية
فعلا الثورة دى مش زى مالناس فاكرة .
هيه سبب انتكاسة مصر
مالها الملكية يعنى؟؟
نص دول العالم ممالك وعايشين ميت فل و اربعتاشر.
حتى النكسة وقيمة الجنية المصرى اللى بقت فى الارض بعد عبد الناصر مباع رصيد مصر من الدهب.
وده خلا الجنيه غلب الكارنيه.
احييكى على البوست

قلب ارهقته الاحلام يقول...

حمد الله ع السلامه ياقمر مع اني جديدة :)

بس بما إننا من نفس البلد لازم ارحب

بيكي يعني هعد ساكته ^^ متجيش

الموهيم ياستي ان انا مع رأي ال قال

بعد الامتحان تبقي فهميه كل حاجه

لان ممكن مخه مش يستوعب الكلام أو

المعلومات عنده تختلط ببعضها ففي

الامتحان ميفرقش بين ال مفروض يكتب

وال مش مفروض يكتب ,,, وتعالي علي

نفسك شوية لحد لما يمتحن ياستي :)

أنا ضفتك عندي بعد إذنك يعني

تحياتي ليكي

nody يقول...

thunder

اهلا بيك اول وتانى وتالت ورابع تعليق

والله ان كان على القعاد فاهو كده كده
ها يقعد زى ما انا قعدت

وان كنت عاوز تجيب ليه حلاوه
عاوزاها بالفستق
ياكده يا بلاش
نورتنى

nody يقول...

A.SAMIR

ماههو انا لو اعتزلت المهنه ها حس بالملل اكتر
انا بسلى وقتى معاه

كلها والله خساره

تحياتى

nody يقول...

احمد ابو العلا

الله يسلمك يابش مهندس
انا نفسى الجهاز يتصلح بدل ما اناعماله اتطفل على اعمامى وعمتى
بس مش لاقيه حد معبرنى

اما بخصوص مامتك فابجد اشترت دماغها
ربنا يخليها لك
بس المشكله انى ماعنديش بديل للمل
غير الموضوع ده
ربنا معايه بس

شرفتنى

nody يقول...

صبرنى يارب

والله انا قلت له كده قلت له دى الحقيقه انما تكتب الى الوزاره كتباه
فى الامتحان
احنا مش قد الحكومه
هههههههههههههههه

نورتينى

nody يقول...

طعميه سخنه

اهلا باولاد بلدى اولا
ثانيا
والله ما موضوع شهره الموضوع موضوع ضمير


نورتنى

nody يقول...

dodo

اولا اهلا بيك ومش لازم نبقى صاححب مدونه علشان تعلق عاندى
وومرسيه على اختيارك لمدونتى وتعليقك عليها دى شىء يشرفنى
وسلم لنا كتير على الدكنور اخوك الى مختفى من زمان ده

اما بخصوص اخويا انا فا انا بدات افهمه ان الموجود فى الكتاب حاجه
والحقيقه حاجه تانيه بس الحقيقه دى نحتفظ بيها لنفسنا

مرسيه على النصيحه وهاحاول اعمل بيها
وياريت تشرفنى تانى

Unknown يقول...

انتي مش بتشرحي عربي
خليه ضمير مستتر تقديره هم !

blue-wave يقول...

قوليله الحقيقه طبعا
هوا يسقط
وانتى تروحى السجن

thunder يقول...

مممممممممم والله لاعرفك تالت مرات يا نودى استنى ومحدش يعبرنى حتى البت اكلتى وشى لما اشوفك طب ردى على الاوف طيب اللى بسبة مش معقولة كل دا نت فاصل يابنتى ابقى طمنينى ان شاء الله عليكى
سلام يابنت بلدى

ابو المفاصل الواصل يقول...

سمموا حياتنا وقالوا الجرعة غير كافية

ولم يكفيهم ما فعلوه بالكرة الارضــــية

خراب ودمار وقتل وجهنم ارضيـــــــة

ويريدون المزيد يتامى العقل والمفهومية

ولا يرون ما فعلته اياديهم الداميـــــــــة

هؤلاء المجرمين اولاد الحراميـــــــــة

مذكرات مشاغب يقول...

بجد مدونه جميله جداااااااااااااااااااااااااااا
كنت بتمشى فيها شويتين
فلقيتك مش عاجبك الاخوان ولا الليبراليين
فحبيت اعرف ايه الصح من وجهة نظرك

اما عن المقارنه بين الثوره وقبلها
فبجد قارنتي مقارنه جميله جدا
وعلى فكره حتى لو الحكم الثوري ده اتغير سواء بثوره تانيه او لا
برده مفيش حاجه هتتغير
ماهو الريس بتاعنا ده كان في يوم من الايام واحد من الشعب عادي

انا شايف ان المشكله مش مشكلة حاكم خالص
وان المشكله فينا احنا الشعب
احنا اللي لو اتغيرنا الكم لازم يتغير

تحياتي

دودو يقول...

شوفى يابلدياتى ياغالية نفس الموضوع دة بيحصلى لما باشرح لولادى حاجة فى المنهج
بس باضطر اشرح لهم اللى فى الكتب رغم حرقة دمى وبعدين اوضح لهم وجهة النظر السليمة ***وعلى فكرة انا مرة فى مقابلة تلفزيونية مع ابن اخت الملك فاروق سمعتة بيحكى نفس الموضوع ان فى الكتب اللى كان بيدرسها مليانة شتيمة فى خالة وفى عائلتةونصحتة والدتة الاميرة فوزية ان هو يكتب فى الامتحان زى الكتاب قايل

على فكرة مدونتك جميلة ربنا يوفقك

قلم رصاص يقول...

السلام عليكم

اولا احيي حضرتك على البوست الرائع جدا

بس عاوز اقول انه يجب علينا لمما ننقد أي مرحلة أن ننقدها بشكل إيجابي ، بمعنى ان نذكر مالها وما عليها..حتى لايتحول النقد الى انتقاد .. وشتان شتان بين هذا وذاك

فاحنا ليه ننسى لفترة الثورة بعض الايجابيات اللي تمت في عهدها

يكفينا مثلا تحرير مصر ، فمصر كانت ماتزال بالفعل تحت الاستعمار الغربي البريطاني والفرنسي

يكفينا تأميم قناة السويس في أحلك الظروف واعتى الأزمات وكنا في أمس الحاجة للجنيه عشان بنبني السد العالي

يكفينا بناء السد العالي أعظم مشروع معماري في القرن العشرين وماجلبه من آثار اقتصادية هاة جدا على البلد

يكفيان بناء ألاف المصانع في فترة الستينات بالتعاون مع الاتحاد السوفيتي

وغيرها وغيرها

انا بس ذكرت بعض الايجابيات التي تحققت في فترة الثورة او بسببها

وده مش معنا انه مكانش فيه سلبيات ، بالعكس .. دا كان فيه سلبيات واخفاقات يمكن تفوق ما نحن فيه الان فيما يعلق مثلا بحقوق الانسان وغيرها

أشكرك جدا على البوست وارجو تقبل رأيي المتواضع

في حفظ الله

thunder يقول...

فين يابنت بلدى ااتمنى تكونى بخير ان شاء الله دمتِ سعيدة وفى رعاية وحفظ الله


ملاحظه اظاهرى يتنزلى بوست جديد

يوميات شاب منوفى يقول...

يابنتى انتى كدة هتخلى الواد يصيف اشرحيلة المنهج وبعدين فهمية الحقيقة بعدين متوديش الةاد فى داهية هى يعنى جت على الثورة مكل حاجة فى المناهج
غلط وتزوير فين فترة حكم محمد نجيب