الأحد، 12 يوليو، 2009

حاكموا حواء

حواء المذنبه

يوم من الايام كنت يادوب لسه انا وجدتى وعمى وصالين البلد
عمى راح مشوار وفضلت انا وجدتى
شويه وجت واحده قريبه جدتى تشوفنا
وقعدوا يتكلموا مع بعض وانا كنت قاعهد بعيد عنهم بشويه والنوم عمال يغازل عيونى الى مش متعوده تفتح بدرى كده
بدأوا كلامهم وانا مش مديه لهم ودنى كنت مركزه اوى فى النوم وعماله الوم نفسى انى جيت معاهموصحيت بادرى كده
وسخن الحديث بينهم وكانت جدتى بتتطمن على احوال البلد وناسها وايه الى حصل فى اليومين الى هى غابت فيهم
وكله تمام
لحد ما سألت جدتى عن ناس قرايبها
وكان الحديث كالتالى
جدتى وايه اخبار عمك(اخو جوزها يعنى سلو بلدنا كده)

هى كويسين بس الواد ابنه غضب مراته عند اهلها
جدتى ليه؟
هى ضربها وبهدلها قامت البت خدت بعضها هى وبنتها وراحت بيت ابوها
جدتى ولم يهتز منها شعره ليه تانى؟
ه ى نفس المره الأولانيه علشان مهله مش نضيفه فى شقتها
انا بقى فى الوثت ده صحصحت ونفضت النوم من عنيه
واقتحمت الحديث وعنيه بتطق شرار
انا يعنى ايه ضربها يعنى ؟
هى ضربها هى دى عاوزه يعنى ايه
انا ا اه يعنى ازاى ضربها
هى بالحزام باين ولا بعصايه
انا لا والله اللهى تتقطع ايده وتنكسر رقبته البعبد
هى ليه كده يابنتى؟
انا ( والغيظ خلاص ها يقتلنى )هو ايه الى ليه؟ هى عرسه؟ ولا فار؟
هى ماهى مش نضيفه ومهمله
انا ا ولو ليها اهل ما نفعش معاها الكلام والهجر والضرب الشرعى مش تمويت العرس ده يوديها لاهلها هما يتصرفوا معاها مش يضربها بالحزام
هى وفيها ايه مش جوزها
انا جاز عليه الهم هو واخدها من الشارع دى بنت ناس وبعدين تعالى هنا اهلها عملوا ايه (مع العلم ان البنت دىعيلتها من اكبرعائلات البلد)
هى ولا حاجه ها يعملوا ايه
ان ا ولا حاجه طب ماهو ليه حق
وبعد كده اتدخلت جدتى وانا فضلت الانسحاب بدل ما نبتديها بخناقه مع بعض والناس فى البلد ودانها دايما مرميه على باب الجيران
لكن الموضوع فضل فى دماغى ودبابير عماله تدور فى الجمجمه
ازاى يعنى واحده ست تقبل بموضوع الضرب من واحد علشان هو جوزها؟
يعنى هو علشان اتجوزها بقى خلاص اصبحت هى عبده ليه
ومن حقه انه يضربها ويلعن لها ابوها كل الى جابوها
الست الى بتدافع عن الحلوف الى ضرب مراته ده ست ومتجوزه ومخلفه بنات
يعنى لو بنتهاجوزها ضربها هاتقول لبنتها معلش استحملى
ومش كده وبس اكيد هى ربت ولادها انه بدام هو راجل يبقى من حقه يضرب ويهين الست
وأهل البنت الى انضربت دى ازاى بنتهم نتروح لهم مضروبه ومتبهدله كده ويسكتوا
اه هى غلطانه
بس مش لدرجه الضرب والاهانه
دا هما اكيد بيخافوا على البهايم بتاعتهم اكتر من كده
فضلت افكر وافكر
لحد ما بقيت مؤمنه اكتر من الاول
ان سبب ظلم حوا
هى حوا
هى الام الى فضلت ابنها عن بنتها لما قومتها من على الاكل تجيب لاخوها يشرب
هى الى سمحت لابنها يخرج ويتفسح ويتصرمح واخته تتحبس والنفس يتعد عليها
هى الى ربت بنتها على انها مخلوق درجه تانيه والراجل هو محور الكون
سلبتها حقوقها
قالت لها لما جوزها شتمها وضربها معلش استحملى ده جوزك
عيشى علشان عيالك وبيتك
محدش ظلم حوا غير حوا

هناك 35 تعليقًا:

مدحت محمد يقول...

وماظلمناهم ولكن كانو انفسهم يظلمون



عشان تعرفى بس

كاتب مصري يقول...

كم آلمتني هذه الكلمات
هي عشان مراته يضربها ويبهدلها قطع ايد أي راجل يمد ايده على ست مراته ولا أخته بدون وجه حق ده ربنا لما قال ضرب قال ضربا غير مبرح يعني مش موجع جسديا حاجة كده بس تححسها بغلطها
مش عارف الست دي بتفكر ازاي وازاي تربي بناتها على انهم يضربوا من اجوازهم ويسكتوا ازاي ترضى على بناتها هي باعتاهم لأجوازهم ولا لمعتقلات التعذيب
مش فاهم ازاي كده أنا مش متخيل اني ممكن أمد ايدي على مراتي يعني ولا مؤاخذة في الكلمة الراجل ميلينش وتحلى مراته في عينه الا في نقاط معينه وغير كده يضربها ولا ايه زي ما هي راضياك ومخليا حياتك نعيم تغاضى عن أغلاطها وعلمها لو غلطت مش تشدها من شعرها وبالحزام ..
تعبت قوي من الحكاوي دي ال بنسمعها كل يوم .. لطفك بينا يارب
رسالة هبعتها لكل راجل ولكل ست بتفكر بطريقة مرات الراجل لو ضربها مفيش مشكلة " اتقوا الله في النساء فإن المرأة خلقت من ضلع أعوج " ده حديث الرسول مش معقول الرسول يقول كده ويقول"رفقا بالقوارير" واحنا نضرب ونعمل الي ميتعملش وبعدين نخرج على المنابر في المؤتمرات نقول حرية المرأة طيب ادي لمراتك حريتها وبعدين قول حرية المرأة
أكرمك الله على اثارة مثل هذه المشكلة
دياريتك تكتبي عنها موضوع جامد وتبعتيه للمجلة وتشاركي معانا علطول وتكبي فيها مجلة رؤية مصرية يعني
لو عاوزة تفاصيل قوليلي وهأوضحلك كل حاجة
في حفظ الله
سلام

thunder يقول...

عاااااااااااااااااااا
عاااااااااااااااااااا
عاااااااااااااااااااا



نو كومنت
نو كومنتتتتتتتتتتتتتتتتتتتتتتتتتتتتتتتتتتتتتتتتتتتتتتتتت

thunder يقول...

مش هعلق يا نووووودى على البوست لانه بجد زعلت ما علينااااااا

Somaya Kamal El Din يقول...

عندك حق

تخيلى انا عرفت ان واحد لما اتضايق مع مراته عشان مسمعتش كلامه فى حاجة خلاها تنزل من البيت بعد ما ضربها ولولا جارتها اخدتها عندخا الله اعلم كانت راحت فين
لا واللى منرفزنى بجد انها وافقت ترجع له تانى والله كان نفسى لو اروح واطلقها منه يعنى دلوقتى انا مش فاهمة ازاى هتثق فيه بعد كل اللى حصل وانه خلاها تنزل من البيت والله رجالة فعلا ما شاء الله عليهم

انا حرة يقول...

تصدقى نفس الفكرة كانت فى دماغى انهاردة
حوا اللى ما تخطبش لابنها غير المزة المسبسبة الرفيعة اللى مفيهاش غلطة

حوا اللى بتربى ابنها على انه سيد و بنتها على انها جارية

حوا اللى بتخضع و تسيب دراستها عشان واحد دماغه فاضية عايز واحدة ما تعرفش من الكلام غير ايوة و نعم و حاضر

حوا اللى بتقوى ابنها على مراته و تغضب على بنتها ليوم الدين لو سابت بيت جوزها حتى لو ضربها ولا اهانها ولا بهدلها

فعلا ماحدش بيظلم حوا غير حوا

nody يقول...

محمد مدحت

لا دى مش حجه

الاخلاق ليها دور مهم
ماتقنعنيش ان واحد محترم يمد ايده على ست
ويقول اصلهم قالوا لى


شرفتنى

nody يقول...

كاتب مصرى

والمشكله انك نلاقى ان النوعيه دى من الذكور شايفين ان ده حق مكتسب ليهم
ده الى بيسموه عذر اقبح من ذنب

مجله ايه ياريت توضح

اسعدنى مرورك

nody يقول...

thunder


زعلان منى
ليه بس
انا كتبت البوست بعد ما انت روحت تصلى لانى كنت متضايقه
كده ماتمتش فينا الاعادى

MaNoO يقول...

نرجع بقى شوية قبل الجوزا نفسه والعريس جاى يتقدم والبنت متعرفوش وبرده امها تقولها دا كويس دا حلو دا عنده شقة قال ايه الرجالة بالشقة وتوافق البنت عشان الام خايفة عليها تبور وبتجوزها وخلاص تدخل بقى تضرب البنت ههههههه ليه متجوز حمارة ولا جايبها من السوق والله لو متجوز واحدة ملهاش اهل حرام عليه يمد ايده عليها دى انسانة زيها زيه ولكن نرجع الغلط كمان للاهل اللى بنتهن تضرب ولا والأب الشهم يروح يرجعها بيت جوزها بنفسه هانت عليك كرامتها اوى كدا والام اللى تفضل تقولها اصبر اصبر لا متصبرش ولا تتحمل حتى لو معاها عيال الواحدةمخلوقة حرة يبقى تعيش حرة لو عيشتها مقروفة فيها يبقى تطلق احسن مفيش حاجة فىا لدنيا تجبر اى حد انه يعيش طهقان من حياته وكفايانا خوف من كلمة طلاق لانها لو مكانتش حاجة طبيعية مكنش ربنا سبحانه وتعالى حللها

nody يقول...

somaya kamal El DIN


اولا ده مش راجل لا هو ولا امثاله دول مجرد ذكور

ثانيا سورى بجد الى ترجع لواحد كده معدومه الكرامه
واحده كرامتها هانت عليها
مش هاتهون على جوزها؟


شرفتينى ياقمر

ديالا يقول...

ضرب؟

هو اصلا لما يجيب بنات وبنته تتجوز ويجي جوزها يضربها هيقوم الدنيا وهيقول هيا مش عارف هيا بنت مين

بيحكموا الامور بمكيالين

وحوا فعلا هيا السبب في كده
تقبلي مروري

كاتب مصري يقول...

مجلة رؤية مصرية يا ستي
دي مجلة أنشئتها الحمد لله من أربع شهور ووقف معايا فيها مدونين كتير ربنا يكرمهم في منهم مشي وفي منهم لسة معيا وفي ناس كتير انضمت لها والحمد لله عملنا اسم كويس كنا الاول على مدونات بلوجر بعد كده فتحنا الموثع الرسمي بتاعنا http://roaua.com/
وبدأنا نكبر حبة حبة .. الفكرة اننا نوصل رسالة صحيحة وكلمة حق من منبر واعي ومدرك اعلام حر مسؤول يعني الحمد لله جذبنا كتاب كبار وأسماء كبيرة أبدت اعجابها بالمجلة والجهد الي فيها الخطوة الجديدة في التطور اننا بنغير استايل وبرمجة المجلة عشان تتناسب مع المرحلة الجديدة والي هي نقله مختلفة بعد الفترة التجريبية الي وقفنا فيها على رجلنا بمعونة ربنا سبحانه وتعالى ..
عجبني قوي نقاشك للمشكلات وطرحك ليها وعجبتني شخصيتك وروحك الكتابية قوي لذلك قلتلك ع المجلة انت بجد هتكوني قلم كويس جدا وروح ثثري المجلة
تقدري تتواصلي معايا على حاجة من الإتنين أو الإتنين سوا براحتك
بريد المجلة roaua.com@gmail.com
أو مسنجر الياهو بتاع فريق العمل ialadawy1988@yahoo.com
منتظر ردك
وهتشرفي المجلة قوي والله
تحياتي

nody يقول...

انا حره

والله ياحبيبتى انا شوفت بعنيه واحده سابت كليتها مع انها كانت متفوقه
علشان خاطر العريس قال ده شرط الجوازه
وبعد الجواز بقت هى الى بتساعده فى دراسته
شفت خضوع اكتر من كده


وتحياتى

nody يقول...

MANOo


والله اكتر حاجه بتغطنى انه الواحد من دول يبقى فيه كل العبر وممكن يبقوا اهل البنت قرايبه وعارفين كل عيوبه
واول ما يتقدم لبنتهم ينسوا كل حاجه ويبقى حلو ومافيش احلى من كده

وعلى رايك هما الى فرطوا فى حق بنتهم من البدايه

نورتنى يابام بلدى

nody يقول...

ديالا


ماهى المشكله ياحبيبتى ان الى بيضرب مراته ده
ويوم ما تيجى له بنته مضروبه من جوزها
بياخدها من ايدها يرجعها تانى ليه

يعنى مافيش فايده بارضه


اسعدنى مرورك

احلام جوليا يقول...

اكبر ظالم لحواء هي حواء هي امها الي بتظلمها علشان تاخد على الظلم ولما تقابل المجتمع الظالم لا تتمرد ولا تبقى مميزة فيه فالناس تبص عليها وتجيب سيرتها وسيرة اهلها لان التمرد والثورة في ثقافة النساء عار كبير وتحمل الاهانة والظلم بيدخل في ثقافتنا على انه صبر واجر من عند الله ياريتنا نغير ثقافتنا الاول هو ده الحل

كاتب مصري يقول...

معلش الكهربا قطعت والله ولسة جاية
آسف جدا

قلم رصاص يقول...

السلام عليكم ورحمة الله وبركاته

بكل أسف ده احدى مظاهر التخلف اللي مازالت تعربد في مجتمعنا الغلبان من اللي اللي بيعملوه فيها الناس

أنا أؤيد ماقلتيه في هذا البوست ، ولااتفق البته مع مثل هذه النوعية من الرجال ، فهؤلاء يشوهون صورة الرجولة الحقيقية التي يجب ان تنبع من باب تحمل المسئولية والاحتواء وليس القهر واتخاذ موقف طبقي اخر داخل الاسرة الصغيرة


--------
ملحوظة هام جدا

ياريت حضرتك تتابعي ردي على هجومك على الأستاذ هيكل ، وان تطلبي من الله الصبر على قرائتك للرد لأنه بصراحة طووووووووووووويل جدا واستهواني الموضوع لدرجة انه شغل بالي جدا ماجعلني اظل اكتب فيه بعد صلاة الفجر يوميها والنوم كان مبهدلني زي ماكهو مبهدل حضرتك في البوست ده كده ههههههههه

فأرجو التواصل وان لاتتعجلي في القراءة وابداء الاحكام ، واللي اتمناه اكتر ان نخرج من هذا الموضوع انطلاقا من مبدأ:
الخلاف في الرأي لايفسد للود قضية

ودمتي في تميز وابداع

في حفظ الله

حاسوباتيه يقول...

بصي الامثال دي موجوده كتير خصوصا في القرى اكتر منها في المدن لانهم بيعتبروا فعلا البنت درجه تانيه بس افتكر المدينه مش كده او نسبه اقل اكيد لانها بتكون معلمه وعارفه كويس حقوقها بس طبعا عندك حق ان حواء هي الي ظلمت نفسها

nody يقول...

احلام جوليا

قعلا هى ثقافه

بس تغير الثقافه ده محتاج ثوره


نورتينى

nody يقول...

قلم رصاص

قريت الى انت كتيته
ولقيته كله تقريبا نابع من المناهج الى حشول بيها دنغنا
والافلام الى سمموا بيها افكارنا بالثوره المجيده

انا واثقه جدا من راى
داغير انى ما بغيرش راى بسهوله
لان الى يكدب مرتين
يبقى كداب
وهيكل كدب كتير اوى

nody يقول...

حاسوباتيه


مش شرط المكان صدقينى

فى المدن ستات بيحصل لهم اكتر من كده
وبيرضوا بارضه

هى ثقافه وفكر


شرفتينى

م/أحمد ربيع يقول...

السلام عليكم
ياجماعه انا نفسى اعرف مين قال البنت درجه تانيه بالعكس والله دلوقتى البنات واخدين حقهم اوى اوى اوى ,, بس لكل قاعده شواذ والامثال اللى بتتكلموا عليها دى موجوده فعلا بس برضه انا بشوف امثال تانيه الرجاله هى اللى مظلومه طبعا مش بتوصل لدرجه الضرب بس واقع عليهم ظلم .
وبجد يانودى تسلمى على طريقه سردك للحوار وطبعا كلنا عارفين ان الفضل يرجع لجدتك ربنا يخليهالك ...

زمش يقول...

بتهيالي الموضوع ده مبقاش كتير اوى
هوا بقايا لجهل وتخلف استبد بينا سنين طويلة اوى ومش هايزول بسرعة وما اظنش اننا هانلحقه لما يزول تماما ربنا يدينا طولة العمر يعنى
بس موضوع الظلم مش قاصر فقط على ان الرجالة بتظلم الستات كمان بيحصل العكس اقصد الظلم مش الضرب
المشكلة مشكلة الظلم اللى فى الانسان عموما ايا كان جنسه

عمادخلاف يقول...

طبعا كل ماقيل عن عبارات تؤكد حقيقة واحدة المرأة هي التى فعلت كل ذلك فى نفسها وعليها ان تظل هكذا
ارجو التواصل
لدى مدونتين واحدة للقصة القصيرة والتاينة للمقالات بحلم ببكرة
http://emadkhalaf.blogspot.com/

nody يقول...

م/ احمد ربيع


اهو انت قلت الراجل او اتظلم ما بتوصلش لحد الضرب
اشمعنى احنا بقى الست لما تتظلم توصل للضرب؟


شرفتنى ياهندسه

nody يقول...

زمش

بص انا معاك ان فى رجاله بتظلم بس ده قليل جدا

الاكتر ظلم الستات



تحياتى

nody يقول...

عماد خلاف


يعنى ايه عليها ان تظل هكذا؟؟؟


تحياتى

قلم رصاص يقول...

طبعا من حقك تتمسكي برأيك زيك زي أي حد في الدنيا

واحب اعرفك حاجة مهمة جدا ، انا مش المحامي بتاع الأستاذ هيكل مبدأيا عشان متتفهمش وجهة نظري غلط

لكن اسمحيلي حضرتك بقى انتي بتتكلمي بتعالي لايمكن قبوله .. التعالي ده ملهوش علاقة بثقتك بنفسك .. الثقة بالنفس دي مسألة تانية خالص

تمسكك بكدب هيكل يعطي انطباع انك ند لواحد بحجم هيكل .. واظن ميزعلكيش اني اقول لك : انك لاعندك عمر هيكل ، ولاعندك تجارب هيكل ، عشان تقدري تتمسكي برأيك بأنه كداااااااب الى هذا الحد

فحضرتك من جيل والرجل من جيل تاني خالص

اعطي كل ذي حق حقه ، وده مش معناه اني بقولك غيري رأيك .. اطلاقا.. فهذا ليس من حقي ولا من حق غيري ، انما ده شيئ يخصك انتي وحدك

فأنتي تمسكتي بالتركيز على جانب واحد في التجربة وهو الجانب السلبي دون حتى ذكر ان اي تجربة في الدنيا لها جانب ايجابي
.. واظن ان ده مش العدل !

واعلمي حضرتك ان الموضوع ليس جدلي بيني وبين حضرتك ، فما هو الا اختلاف في وجهات النظر !

كنت انتظر ردك في الموضوع لإثراء الموضوع
نظرا لأن ردي اخذ مني وقتا ، وقد تلاحظين ذلك من خلال حجم الرد

دمتم في حفظ الله

وطاب سعيكم وممشاكم

nody يقول...

قلم رصاص

انا مش من عادتى انى ادخل مدونه حد ةانقده
لو الكلام ماعجبنيش باخد بعضى وامشى من سكات
انما انا لقيتك بتعظم شخصيه حوليها شبهات كتير اوى
شخصيه اسأت للبلد الى انا انتمى ليها
وده كلام انا واثقه منه
ومش معقول تكون متابع حلقاته وماتخدش بالك من الموضوع ده

ياريت نبطل نعمل الى بنحبهم انبيا
انت لو تلاحظ فى بوستك انك ماذكرتش اى سلبيه من سلبيات هيكل
يعنى بتقول للى بيقرا ومع العلم انا شفت الكومنتات فى ما بيسمعهوش ولا عندهم فكره عن كتتبه
بوستك هو مصدرهم عن تكوين فكره عنه
انت بتقلهم بقى ده واحد ملاااااااك
وده انا مارضتش عنه

قلم رصاص يقول...

انا مش عاملته على انه ملاك ولا حاجة

.. فلو انا ذكرت له ايجابياته
.. وحضرتك ذكرتي له سلبياته

فلا انا ولا حضرتك تكلمنا على التجربة بشكل جامع ومانع

اذن يبقى ان الفصل في هذا الخلاف مرهون بأراء ناس اخرى اكبر مننا عمرا وتجربة

فأنا الحمدلله رغم اقتناعي برأيي
ورغم احترامي جدااااا لتمسكك برأيك

عاوز اقول رغم ذلك كله ، في مواقف كثيرة جدا في حياتي ان اكتشفت خطأي او جد جديد في الامر ، أغيره الى طريق الصواب بما لايخل بالمنطق وجوهر ما اتصوره صحيحا

ولايبقى سوى اني مقتنع بأن :

رأيي صواب يحتمل الخطأ ، ورأي غيري خطأ يحتمل الصواب

واشكر لكم هذا التواصل البناء

دمتم في حفظ الله

م/أحمد ربيع يقول...

حاسوباتيه

بعد التحيه .....
انا ريفى واعيش بالقريه التى انتمى اليها واعرف جيدا أخلاق اولاد القرى او على الاصح الارياف عموما ولم أجد ماتقولينه فيهم , صحيح لكل قاعده شواذ ولكن وجدتك عممتى الموضوع على القرى وهذا غير صحيح .
انا أسف ف اللى هقوله بس والله دى حقيقه (اكتر انسانه مصانه فى بيتها هى زوجه القروى ) وانا متأكد ان معظمكم له اصول قرويه ويعرف ماأقوله جيدا مع احترامى للجميع .

blue-wave يقول...

وشهد شاهد من اهلها:))
وحشتنى المدونه وصاحبتها:)

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
شات انحراف
انحراف
منتديات منتديات عرب كول
غلا الروح
شات غلا الروح
شات صوتي
شات مغربي
قوانين الشات الصوتي
برامج كام وصوت