الخميس، ٢١ مايو ٢٠٠٩

تركيا ومسلسلتها

الدراما التركيه
هوس كبير أصاب المجتمعات العربيه للمسلسل التركى الشهير نور ومهند
وتوالت بعد كده المسلسلات التركيه على الشاشات العربيه عامه والمصريه خاصه
مظاهر الشغف بمهند ونور جعلت من المسلسل التركى وسيله لجذب المشاهدين لاىقناه
الكل قال ان السبب وسامه مهند وان دى فتره وهاتعدى
بس محصلش كده وزاد الاقبال
وانا شايفه ان فيه اسباب كتير لجعل المسلسل التركى رقم واحد عند المشاهد العربى عموما والمصرى خصوصا

السبب الاول
عدم وجود بديل للمسلسل التركى
وده ما أقصدش بيه ان مافيش مسلسلات مصريه بتتعرض
ولكن اقصد ان كلها قديمه ومكرره لاننا طبعا عارفين ان بقى شهر رمضان هو المحتكر الأوحد للمسلسلات
وبعد الشهر ما يخلص يفضلوا يعيدوا ويزيدوا فى المسلسلات القديمه لرمضان الى بعده
ونتيجه لكثره قنوات المسلسلات المتخصصه فا اصبح المسلسل الواحد بيتعرض بدل المره اتنين وتلاته
واربعه لغايه مايجى للناس ملل من كل المعروض
فى حين ان المسلسلات التركى الناس بتشوفها وتابعها لاول مره فابيكون ده أحد عوامل الجذب


السبب التانى

ضيق المشاهدين من المواضيع المطروحه
كلنا لو بصينا للمسلسلات الى بقت بتتعرض علينا هانلاقيها يا اما عن أطفال الشوارع يا عن الادمان يا عن
الاتجار بالاعضاء اوبيع الاطفالا ا والاغتصاب ا والتحرش ا والسرقه
الخ الخ الخ
كلها مواضيع قاتمه ما قلناش ان دى مش مشاكلنا بس مش معقول عرض مستمر
ومش معقول انهم يكونوا عايزين يفهمونا ان مصر كلها عايشه فى العشوائيات
وكل كلامنا خارج ومبتذل


ماينفعش المفروض يكون فيه تنويع
نعرض مشاكلنا اه بس من غير مبالغات واسفاف وزى مايكون فيه عرض للوحش يكون فيه عرض للحلو
وفى نفس الوقت لو بصينا على المسلسلات التركيه نلاقيها فى صراعات كتير
لكن فى نفس الوقت فى ايظار متوازن
مش كله ضرب وقتل وشتيمه
داغير ان عندهم جانب كبير من الرومانسيه
وده الى بيخلى الناس تستحمل طول المسلسل

السبب التالت


الستات وجدت فى المسلسل التركى ضالتهم المنشوده

دلوقت الست واخيرا بعد سنوات كتير من الضياع والقهر وحرقه الدم
من جوزها وهو عمال يتفرج على الحريم فى التلفزيون
ويقول جاتنا نيله فى حظنا الهباب
ويوقلها شايفه دى حلوه ازاى ولا دى معرفش ايه
بقوا هما كمان على نفس قدم المساواه مع الرجل
نتيجه لان الرجاله فى المسلسلات التركيه
رومانسين جدا مع الستات وبيقدروهم جد وبيعاملوهم معامله مهذبه
والواحد بيبقى قمر وبيحب واحده والستات بتترمى تحت رجله وما يرضاش يخونها
مش زى عندنا لو جاب بدله جديده يفتكر نفسه جورج كلونى
دا غير انهم هناك بيجيبوا للستات ورد
مش زى عندنا الواحد يهون عليه يجيب للبواب هديه وما يجبش لمراته

وفى الاخر يقول جتنا نيله فى حظنا الهباب
وان كان حد حظه هباب فا هى الست المجنى عليها





هناك ١٧ تعليقًا:

thunder يقول...

اول تعليق نيااااااااااااااااااااااااااااااااااااااااااااااااااااهاااااا




اول تعليق
اول تعليق اية دااااااااا

thunder يقول...

التانى كمااااااااان احجز احجز طالما تركى ومهند وقمر قمر قمر يبقة احجزززز

thunder يقول...

واحجز التالت كمااااااااااااااااااااااااااااااااااان



















وبعدها اروح اقراء واجى




اعلق براحتى




احتلالالالالالالالالالالالالالالالالالالالالالالالالالالالالال





نياهاااااااااا

thunder يقول...

ههههههههههههههههه
يخرب عقلك يا نودى والله طرح للموضوع جميل جدااااااااا
جدااااااااااااا
وخصوصا للاسباب واللى عاجبنى انا السبب التالت
اللى الرجل عامل يقول جاتنا نيلة فى حظنا الهباب ال ولما اتحطا فى نفس الموقف وشاف الرجالة اللى قمر قمر قمر قال على ........تيت الرقابة مانتى متفرجه على التليفزيون تانى دا منظر رجالة دول خنافس ههههههههههههه
لا والله يانودى فعلا اسلوبك التحليلى جميل جدا وفعلا معاكى انه ممكن السببن الاول والتانى هما الاسباب الرئيسية ونضيف معه الدبلجة او التعريب العربى على المسلسل
وطبعا مش هعرف اضيف بعد الاسباب دى جملة لانه فعلا لخصت الموضوع جدا

MaNoO يقول...

هههههههههههههه ورد اه لا بجد
دى مسلسلات بايخة وباردة كدا مش عارف بجد الناس بتشوفها ازاى بس عارفة أقولك على حاجة المسلسل اتعمله ضجة اعلامية فى الأول ودا سبب مساعد ومنقدرش نتجاهله انتى بتقولى مواضيعهم كتيرة بس تنكرى ان فى مواويل كتير بتبقى متفبكرة ولا يصدقها طفل حتى
انا معاكى انا لدراما عندنا فى اوقت الحالى من أسوأ حالتها طبعا وحتىا للى بيتعرض فى رمضان نادرا لما نلاقى جديد وعادة بتبقىا لصة مكررة
انا شايف ان سبب الكلام على المسلسل ومن بعد كدا المسلسلات التركية اللى على كل القنوات
اننا بنحب اى جديد بصرف النظر هوا ايه
الثقافة بتاعتهم غريبة علينا
بس معتقدش ان الستات تافهة كدا هتنتظر الرومانسية من مسلسل خاصة الست العربية طول عمرهم عاقلين
واى خدعة وابقى تعالى كل يوم
وبلاش تندبوا حظكم انتو طالبتوا بحقوق المراة لغاية اما ضيعتوا حقوق الراجل
بس برده الست ليها حق علينا يلا بقى انا طولت اوى اروح اكمل مذاكرة
سلاموز ههههههههه بس عجبتنى بيجيبوا ورد دى

مسدس صغير يقول...

ههههههههههه
زمان كان الرجالة يقولو جتنا نيلة فى حظنا الهباب
دالوقتى الستات تقول جتنا نيله فى حظنا الهباب .
ههههههههه
المسلسلات التركية برغم ان حلقات المسلسل بتبقى كتير الا ان الناس بتتفرج بردة. الرومانسية اللى فيها هيه اللى شدت الناس
لان المسلسلات العربى على رأيك يا بتتكلم عن اطفال الشوارع يا التار فى الصعيد يا التحرش
يا الاغتصاب وهكذا الناس زهقت..
حلو اوى البوست

nody يقول...

thunder


اهلا بيك اول وتانى وتالت ورابع تعليق

دايما انت اول من بيفتح نفسى والله

الرجاله بيقولوا عليهم خنافس من الحقد وحياتك
على الاقل دول على طبعتهم لا فاردين شعرهم ولا سابغينه ولا حاطين مكياج
زى الستات الى هما بيتهبلوا عليهم فى التلفزيون ولول شافوا الوحده فيهم على طبيعتها هايقرفوا يبصوا له
انما بقى الرجاله الاتراك هما شويه باودر علشان الكاميرا ودمتم
والطبيعى يكسب
هههههههههههههه
نورتنى

nody يقول...

manoo

لولا اختلاف الاذواق لبارت السلع
مش بيقولوا كده بارضه

وعاوزينك بقى تشد حيلك فى المزاكره كده
مستقبل الهندسه فى مصر بين ايديك
علشان انا بقى الى اجيب لك الورد
هههههههههه

تحياتى

nody يقول...

مسدس صغير


الرومانسيه دى بقت عمله نادره

والراجل الى يبقى رومانسى يتقال عليه خيخه وخايب
لحد ما بقينا بندور على الرومانسيه عند الاتراك

حاجه تزهق

شرفتنى

MaNoO يقول...

هيا مش هندسة أوى هيا حاسبات بس لو خايفين على مستقبلها فعلا يشيلوها من ايدى احسن ليهم وليا وللبشر كلهم
ومستنى الورد برده عادى مفيش مشاكل
هههههههههه

nody يقول...

manoo

يشيلوها من ايديك ليه؟؟
انت بتنتقم منها هى
طب هى ذنبها ايه؟؟
هههههههههههههه

خلاص اعفوا عنهم دلوقت واتجدعن
والورد محفوظ

MaNoO يقول...

انا هتجدعن فعلا ان شاء الله
بس مش عشانهم عشان عايز انجح بقى واوصل ل3 بعد صراع مع مرير مع التعليم اعتبرينى عفوت عنهم وخليها وردوواحد كانز بقى

MaNoOoSh يقول...

بجد تحليلك بيوصل لنقط كتيرة مهمة فى شهرة المسلسلات دى مع انى لما حاولت اتفرج على اى حلقة منهم اصبت بالملل الشدييييييييييد جدا.

مش عارفة ليه العرب بالذات هم اللى بسمع فى كلامهم ان مطربة شكلها حلو خربت بيوت ناس كتييير أو ان ممثل وسيم عقد الرجالة فى نفسهم.
ليه مش قادرين ندرك ان الممثل أو المطربة دول فى الحقيقة مش بالحلاوة دى ولا بالمكياج طول الوقت.. مهم بنى ادمين وبيصجوا وشعرهم منكوش واحتمال كبير كمان يكونوا بيشخروا وهم نايمين.. وممكن جدا الست منهم متكونش رقيقة زي ما بتبين والراجل منهم يكون بيعامل مراته زي الزفت.


انا بجد مبسوطة اني عرفت مدونتك من لقاء المدونين امبارح.
سلام يا قمر يا منصورية زيي.

الشعب لابد له من حكومه تشكمه يقول...

المسلسلات التركى ى بصى فاكره مسلسل الجرئ والجميلات اللى لسه شغال لحد دلوقتى هههههههههوبتلاقى برضه لسه الاحداث هى هى..اهو المسلسلات التركى موضه زيه كده.بس اللى خلاها مستمره انها رومانسيه جداااااااااااااااااااااا انا باه بعمل ايه اصلى بزهق مش معوقله اتابع مسلسل 150 حلقه يعنى..اتفرج على حلقات متفرقه واجى فى الاواخر واركز:)
اليويمن دول باه انا مع وتمضى الايام اسمر وزيزو كصه حب من وهى عندها يوم ههههههههههه..حاجه تجيبلك شوجر ياشيخه...

nody يقول...

manoo

هو ده عين العقل
هههههههه

وان شاء الله توصل للبكالريوس

ونجيب لك ورد

nody يقول...

manooosh

الرجاله العرب الوحدين فى الكون الى بيعملوا مده
لان نسبه الهطل عندهم عاليه يا اختى
مايعرفوش ان الممثله دى بتصحى من النوم شعرها منكوش والكحل ملخبط تحت عنيها
وحالتها تقرف
وانها جوا البيت زيها زى مراته


تقولى ايه عبط

انا سعدت اكتر بتشريفك ليه ياريت تكرريها تانى

nody يقول...

الشعب لابد له من حكومه تشكمه


والله انا بعمل زيك المسلسل الى بلاقيه بيطول بسبنى منه واركز فى الاخر
انا الايام دى متابعه ميرنا وخليل
حلو ورومانسى اوى

نورتينى