السبت، ٦ سبتمبر ٢٠٠٨

احترم نفس

طبعاكلنا سمعنا عن الحمله دى على الفيس بوك وعلى مواقع الانترنت
الحمله دى فى واقعها ان عكست حاجه ها تعكس مدى التدنى الى وصلنا ليه فى مصر
لما الاحصائيات تقول ان اكتر من 70فى الميه من السيدات بيتحرش بيهم
دى مهزله بكافه المقايس دا غير طبعا الاجانب الى بيجوا ونتفضح قدامهم
ده شىء عادى نظرا لتدنى المستوىالاخلاقى والتعليمى
وردائه الخطاب الدينى
ومع ذلك كل الى احنا فالحين فيه نجيب اللوم على اى حاجه بس المهم مانجبوش على الحيوان الى استباح حرمات الله
الفريق المتخلف اياه والى اكتريته ستات اغبيه
يقولوا ماهو من لبس البنات
لبس بنات ايه يا عنوان التخلف منك ليها له؟
لبس البنات ده كان موجودقبل كده واكتر تحرر من دلوقت ومع ذلك كانت البنت او الست تلبس مينى جيب وكات وتركب الاتوبيس
مافيش واحد يقدر يبص لها ولا يقولها بم حتى
دلوقت المحجبه بتمشى فى الشارع ما بتسلمش من السفاله
وطبعا كلنا عارفين ان 70 فى الميه من السيدات والبنات فى الشارع المصرى محجبات
داغير ان الاحصائيات الى اتعملت اكدت ان المحجبات والمنتقبات بيتعرضوا بنسبه اكتر للتحرش
عارفين ليه ؟
لانهم لما سئلوا البهوات قالوا ان البنت المحجبه من السهوله التحرش بيها بينما الغير محجبه مش هاتسكت لى لو عملت فيها حاجه ممكن تزعق وتفضحنى فى الشارع انما المحجبه لا
يبقى اللبس هو السبب بذمه النبى؟
ولا السبب غباوه الى بيربوا وبيعلموا
ماهى لما واحده تعلق ارتكاب جريمه بشعه زى دى على الانثى والمفروش دى هاتبقى ام او هى فعلا ام يبقى عليه العوض ومنه العوض
ماهو لما ابنها يعمل كده ويقولها ماهى البت لابسه مش عارف ايه
هاتسكت
انما هى لو واحده عندها دماغ وبتفكر بيه وقامت رزعاه على وشه بالقلم لو عمل حاجه زى كده
وقالت له وانت مالك بالى هى لبساه هى حره تلبس الى هى عوزاه
انت المفروض تغض بصرك وتخاف من ربنا لايحصل ده معايا او مع اختك او مع بنتكفيما بعد
كانوا العيال اتربوا
انما لا نفضل نجلد فى البنات والستات لحد ما نجيب عليهم كل الغلط
الفريق التانى
الى اقرب حاجه على بؤه رمى اللوم على الحكومه
ماهو ارتفاع تكاليف الجواز
والبطاله
والواسطه
هما السبب
يسلام يا اخويا منك له
بقى هو ارتفاع تكالبف الجواز والبطاله والوساطه
هما السبب؟
طب ايه راى جنابك انت وهو ان الاحصائيات اثبتت
ان ان ظاهره التحرش بتكون بنسبه كبيره لدى الاطفال من سن الاعدادى للثانوى
والرجاله من سن 35 فما فوق
ايه راى سعادتكم
العيل الصغير الى فى اعدادى عنده مشكله ارتفاع تكاليف الجواز ولا بيعانى من بطاله
ولا الشحط الى عنده 35 فما فوق ده
ماتجوزش لسه؟
دا بيكونوا متجوزين وبيتحرشوا بارضه
ايه مشكلتهم دول
بيتحرشوا ليه؟
ولا السبب هو انعدام الاخلاق والخوف من ربنا
والتناحه وقله الادب
وبعدين الى عاوز يتجوز مش ها يقف على النواصى يستنى بنت تعدى علشان يتسافل عليها
ولا ها يقسم يومه على حسب مواعيد خروج مدارس البنات
الى عاوز يتجوز ده ها يشغل ليل نهار علشان يقدر يتجوز
مش ها يبقى عنده وقت بيتسافل على مخاليق الله فى الراحه والجايه
الصيع الى واقفين على النواصى دول مش عاوزين يتجوزوا دول عاوزين واحده ينهشوا فيها علشان يشبعوا السعار الجنسى الى عندهم
لا اكتر ولا اقل
اما بقى الفريق التالت فهما الاخوه المتنورين المتعلمين
الى يقولوا اصل الحجاب الغريب على مجتعنا اصل حجاب عمرو خالد ده هو السبب
ونظريه المزه المحجبه الى بقت منتشره فى كل الدنيا
يعنى حضرتكم الى مش محجبه بيتحرش بيها ليه؟
ماعلينا من المحجبه الوحشه الكخه الى اهلها مش عارفين يربوها دى
(مع ان دى حريه شخصيه يا دعاه الحريه
ماعلينا طبعا)
ماتجوبونى الغير محجبه بيتحرش بيها ليه هى كمان؟
طبعا مافيش اجابه
بس انا عاندى الاجابه على كل الفرق دى
طول ما احنا عمالين نجيب الغلط على كل الناس الا الجانى ها نفضل ورا
طول ما احنا عمالين نعامل الانثى على انها رجس من عمل الشيطان هانفضل كده
طول ما بنتعدى على حريه الاخرين فى لبسهم وحياتهم
هانفضل كده
يبقى من الاخر الكل فى البلد دى لازم يحترم نفسه

هناك ٣٥ تعليقًا:

Desert cat يقول...

حبيبتى والله عندك حق فى كل كلمة قولتيها
بالنسبة للستات المتخلفات فدول موجودين بكثرة فاكرة قضية نهى اللى اتنشرت فى البديل البنت اللى اتحرش بيها سواق تاكسى وهى مش سابته غير لما خدته على القسم .. دخل ستات المفروض انهم مربيات اجيال فاضلات يقولوا لك هى كدا قليلة الادب ليه تروح قسم شوفتى التخلف والجهل وصل بالناس لحد فين ؟؟؟ يعنى مش مهم السواق يمد ايده عليها ويمسك حاجه حساسه فى جسمها لكن الاهم انها مش تروح قسم وانها تعلى صوتها فى الشارع اصل كدا بقت بلطجية .. الهى يارب اللى بتقول كدا حد يتحرش بيها ويغتصبها كمان علشان تجرب المرار اللى البنت بتكون فيه ونشوف هى هتعمل ايه ...
بالنسبة للوح اللى بيقف يعاكس فى الشوارع فده بيئته سمحت له بكدا تربيته كدا تلاقى الاب والام قاعدين فى وسط قرايبهم بيفتخروا بابنهم اللى بقى شحط طول بعرض وبيعاكس البنات ... يعنى مش بفتخروا انه مهندس او دكتور او غيره لاء بيفتخروا بيه انه فاشل وانه بينزل يعرف الناس مدى سفالته وقلة ادبه وان اهله مش ربوه .. من الاخر المجتمع محتاج تربيه علشان يعرف يربى .. تفتكرى هنقدر نغير المجتمع والافكار السوداوية دى ؟؟؟؟

عايش... ولكن !!!! يقول...

مهو للأسف التهاون من البنات بردو بيخليهم يزودوا من اللى بيعملوه
وكمان سوء التربيه بقا منتشر جدا
وغير كده وكده المناظر اللى بقت موجوده على التلفزيون والنت بتخلى كل واحد يخرج عن شعوره
للاسف احنا مبقيناش قادرن لا نتقدم خطوه ولا نرجع لورا حتى
اتزنقنااااااااااااااا

blue-wave يقول...

انتى بتتكلمى على حاجه ماتت واندفنت من زمان يا هناء
حاجه كان اسمها الأخلاق

nody يقول...

desert cat

الناس المتخلفه دى بيبصوا للمراءه على انها اصلا من الاساس عار حتى لوالى بتبص دى انثى فهى شايفه نفسها عار
وده طبعا راجع للتربيه الزباله الى هى متربياها
يعنى فى نظرهم الوحده مهما يتعمل فيها لازم تسكت
لانها هى فى حد ذاتها شىء نجس


فى راى المتواضع اننا مش ها نتغير غير لما نكون كلنا عاوزين نتغير

وبالتالى مافيش فايده
تحياتى

nody يقول...

عايش ولكن
يعنى ايه التهاون مع البنات
ماالبنت حره
احنا هانمشى فى الشارع نقولها تلبس ايه وماتلبسش ايه
ما الرجاله بقوا هما كمان يبلبسوا ضيق
وبناطيل بوسط نازل وجسمهم بيبان
البنات بقى ها يتحرشوا بيهم؟

تحياتى

nody يقول...

blue_wave

انا بحاول اعلى صوتى يمكن تصحى

نورتنى

في حب مصر يقول...

السلام عليكم
كل سنة وانتي طيبية يا نودي ورمضان كريم
انا متفق تماما معاكي في كل اللي قولتيه
المشكلة دلوقت بقت انعدام اخلاق وسوء تربية وانحطاط.. وعلى فكرة المجتمع كله منظومة واحدة لما تلاقي الفساد والفوضى والانحلال موجودين يبقى صعب تصلحي حاجة من غير ما تسيبي حاجة.. المجتمع كله دلوقت بينهار للاسف وبيتراجع
مفيش غير اننا ندعي ربنا في رمضان عله يصلح الاحوال جميعها
تحياتي

the beauty candy يقول...

كلامك مظبوط يا نودى
بس هو سؤال ولو ليه اجابه ياريت تتجاوب
يعنى لو احنا احترمنا انفسنا ولبسنا محترم وحشم مش هنتعاكس ولا حد هينظر لينا
ياريت الاول هم يحترموا نفسيهم ويبداوا التصحيح من ناحيتهم
هى التربيه يا نودى غلط من الاول
كل واحد انا عاوز الواد ولو ماجاش يبقى حصله مصيبه
ليه يعنى هو احنا عار ولا ايه انا مش فاهمه

Empress appy يقول...

كله منظومه واحده مش هتقدرى ترمى حد معين بالخطأ يا نودى

nody يقول...

فى حب مصر

للاسف المجتع داينا للاسواء
ومافيش حد عنده رغبه حتى انه يقتنع انه غلط
بالعكس بيدافع عن الغلط بكل شراسه

ربنا يهدينا اجمعين
كل سنه وانت طيب يا---------؟
ورمضان كريم

nody يقول...

دودا

دا احنا لو لبسنا خيمه

تقولى ايه
ديل الكلب عمره ما يتعدل
احنا مش عار
عقولهم هى الى عار

نورتينى

nody يقول...

appy

اكيد كلها منظومه
لكن انا ما بحملش حد معين الخطأ
بس على الاقل ننادى ان مايكونش اللوم على الضحيه

نورتينى يا امبراطوره المجرات

mregypt7 يقول...

السلام عليكم
انتى كده دلوقتى بتقولى ان لبس البنات مش هو السبب فى هذا التحرش !!!!!
هنعمل نفسنا مصدقين وخلينا معاكى للاخر
طيب واحده ماشيه محترمه وفى حالها ولابسه واسع ومحجبه ولا بتتاخر فى الشوارع ولا اى حاجه ازاى هييجى شاب ويتجرا ان هويتحرش بيها او حتى يقولها كلمه وحشه
لان استحاله موضوع زى ده يحصل فى النهار او فى الساعات الاولى من الليل
ده اولا بالنسبه للبنات المحترمين اللى بيبقوا فى حالهم ولا بيتمايصوا ولا غيره
اما فى الحاله التانيه
البنت من دول تبقى ماشيه وبسم الله ماشاء الله فى ساعات متاخره من الليل او فى وضوح النهار وشعرها بيهفهف ولبس ضيق ومش عارف بنطلون ايه او جيبه فوق الرجبه وبدى استومك وغيره
وبتبقى برضه لابسه الحجاب موضه ولكن الباقى ما تتوصاش عليه
بالله عليكى اللى هييجى ييتحرش ده هيتحرش بمين بالمحترمه اللى اصلا مش بتنزل غير بالنهار ده لو كانت لوحدها ولبسها محترم وبنت فى غايه الادب ولا هيتحرش باللى ماشيه بالملابس الفاضحه واللى ماشيه لوحدها فى الساعات الاولى من الصباح يعنى انتى تجاوبى نفسك
وده برضه ما يمنعش ان الادب انعدم عند الرجاله وعلى فكره يعنى ما تلاقيش واحد معاه شهاده عاليه ويعمل حاجه زى ديه معظمهم بيكونوا صنيعيه وغيره من اللى الحياه ضاربه معاه خالص بس صدقينى اللى بيعملوه البنات هو السبب وبرضه ممكن يكون عيب كبير فى التربيه
وانتى كنتى بتتكلمى عن زمان كانوا بيلبسوا اكتر من كده
ماقلناش لا ولكن زمان كان كل الناس بتخاف على بعض كان فيه تربيه للرجال
واكيد برضه كان فى البعض اللى بيعمل اشياء تشبه اللى بيحدث الان
فياريت ما ترميش كل حاجه على الشباب وان برضه البنت هى السبب فى جزء كبير جدا من القضيه الى جانب طبعا التربيه السيئه للشاب الذى يفعل ذلك
طولت عليكى شويه
تحياتى
هندسه

nody يقول...

احمد الشيخ
بص يا بيبو

انا عارفه ومتاكده انك راجل محترم
بس انا بتكلم من واقع احصائيات
تصدق باالله ان الاحصائيات ان اكتر من 70 فى الميه من الستات فى مصر تم او بيتم التحرش بيهم
انت بتقول ان المحترمه الى ماشيه فى حالها ما حدش بيتحرش بيها
لا يا احمد اسمح لى
بيتحرش بيها
الستات الى عندهم 40 سنه بيتحرش بيهم
وده مش كلام جيباه فى بيتنا
المحجبه المحترمه والغير محجبه بيتحرش بيهم فى الشارع
بالعكس يا هندسه دول بيخافوا من الى مش محجبه لاتصوت ولا تفضحهم فى الشارع
لانهم بيقولوا عليها وشها مكشوف
وبعدين ما كل واحد حر يلبس الى هو عاوزه
هى لابسه بدى استومك
مبينه جسمها
يروح البيه يحسس بقى؟
وهو ماله بيها
هى حره ماانتم بتلبسوا بديهات ضيقه
والموضه الزفت بتاعه البناطيل وجسم الواحد فيكم بقى بيبان
هانيجى نتحرش بيكم
البنات اكيد عليهم لوم
لكن اسمح لى دول فى الاول وفى الاخر ضحايا

نورتنى يااحمد

رئيس جمهوريه نفسى يقول...

اولا كل سنة وانتى طيبه واسف على التاخير فيها رمضان كريم عليك ان شاء اللة وعلى كل الاهل
موضوع التحرش الغلط طايل المنظومة كلها البيت المدرسة دور العبادة الشارع والنفوس المريضة مش حنحمل حد ذنب التحرش لوحدة
وعلشان محدش يعلق التحرش على لبس البنت كسبب وحيد فى التحرش الجماعى ليلة العيد فى القاهرة تم التحرش بمحجبات وبنات لابسة عبايات ضعيف النفس اللى بيتحرش بيتحرش بكل ما يمت لتاء التانيث قدامة حتى لو كانت مانيكان من البلاستك

Ahmed Mohamed يقول...

هوه كله سبعين في الميه
مفيش تلاتين ووو نص في الميه
المهم
لو كل بنت فكرت بدماغك حضرتك
التحرش هيوصل لاغتصاب وفي الشارع
اصل كله ماشي علي حريته بقي
ولا عادات هيتجيب ولا تقاليد هتودي
ولا قانون نافع ولا غيرو شافع

**(من كلامك)
وبعدين ما كل واحد حر يلبس الى هو عاوزه
هى لابسه بدى استومك
مبينه جسمها
يروح البيه يحسس بقى؟
وهو ماله بيها
هى حره ماانتم بتلبسوا بديهات ضيقه**


والنبي دا اسمه كلام ...
حرية ايه بقي صلي ع النبي في قلبك

nody يقول...

رئيس جمهوريه نفسى

كل سنه وانت طيب وبالخير والسعاده

اما بخصوص المرضى النفسين
فا انا مقدرش اقول كلمه زياده على كلامك
ياريت الناس كلها تفكر زيك

nody يقول...

كلا م على بلاطه

كل سنه وحضرتك طيب
ومرسيه على الزياره

nody يقول...

ahmed.3lam

والله النسب دى انا مش جيباها من بيتنا حضرتك

ولو كان كلامى وافكارى ها يحولوا الاتحرش الى اغتصاب
فا يبقى الى بيقرا غبى ومتخلف
علشان الى لابسين عبايات واسدال ونقاب بيتحرش بيهم بارضه
مش الى لابسه بادى استومك بس
وبارضه الكلام ده واقع مش جيباه من بتنا

Ahmed Mohamed يقول...

ماهوه الي لابسين بادي وغيرو ولابسين مش لابسين هما الي جابولنا الوكسه ووجودهم هما الي بوظو اخلاق الشعب مبقناش عارفين مين الحلو ومين الزفت والمنيل
احنا هنخرف ولا ايه
هوه الطبيعي يكون في بنت اساسا لابسه بادي سواء دلوقتي ولا من قرن فات
ومن التخلف الكبير والغباء المتواصل اننا نعمل نفسنا منابر لما يرديه الغرب قوله همت عايزن بناتنا زي بناتهم


هيه جميعه من بنات عايزه تلبس علي كيفها وتعمل الي نفسها فيه ولو حد اعترض نبقي همج ومتخلفين واغبياء

الاصل في موضوع احترم نفسك
اننا نحترم نفسنا في كل حاجه ولد وبنت وتعامل مع الغير

انتي بقي وغيرك عايزين تخصصو الجمعيه دي في الدفاع عن البنت الي عايزه تعمل الي في نفسها
اقولك
سموها
ارجوك اوعي تغير انا حواليا كتير

Amgad يقول...

مممممممممممم ونقول باك
طيب اكيد سمعتي عن حملة احترمي نفسك
وحملة انتي بتتلككي ههههههههههههههههههه
علي فكرة انا متضامن مع الحملة دي
ومع الف تديونة غيرها وجروب غيروا علي الفيس بوك فروم ايه تو زد
تحياتي
امجد

Mona Shereif يقول...

بصى والله انتى بنت جدعه
حسبى الله ونعم الوكيل
ربنا يهدى النفوس الضعيفة

nody يقول...

ahmed.3lam

يعنى الواحد علشان يعرف الحلو من
الوحش يروح يحسس
حسبى الله ونعم الوكيل بجد

لبسنا ضيق تتحرشوا
لبسنا واسع تتحرشوا
نقعد فى بيوتنا احسن مش كده
ده بعينكم ان شاء الله
احنا ننزل ونروح ونيدى ونلبس الى على مزاجنا
والى مش قادر ينسى السعارالجنسى
يقعد فى بيتهم
مش ناقصين بلاوى
كفيانا تخلف بقى
بصوا على تركيا الى لابسه لابسه والى مش لابسه مش لابسه
ومحدش بيروح يقل تربيته عليها
علشان هما محترمين

فهمت؟

nody يقول...

amgad

والله كويس انك متضامن مع الحمله

نورت

nody يقول...

sometimes

حبيبتى احنا سكتنا كتير على حقنا وحريتنا
لما افتكرونا ضعاف
لكن لا
لازم يعرفوا ان فينا الى هايقدورا ياخدوا حقوقهم من غير ما يخافوا
نورتينى ياقمر

ياسر يقول...

بجد تسلم ايدك
بوست فعلاا معاكي حق يا نودي
بس المشكلة الاساسية في التدني
التربوي في البيت ونشاءت الطفل
من الصغر بين ابوة وامة والعالم المحيط
بة حتي قبل دخول المدرسة او ابتدائي
النهاردة بسم الله ماشاء الله معظم الامهات
والاباء بيشجعوا ولاادهم وبيفرحوا بيهم لما يكون
عندة موزة او صحبة ونعمة التربية
وكمان بعدنا عن دينا عامل اساسي في
التحرش لو كل شاب او راجل
بيعاكس ست او بنت تخيل لو ثانية
ممكن تكون اختة او بنتة او زوجتة او حتي امة
مكان الست دي مكنش حصل كل دة ولاا وصلنا
للمستوي دة
وكمان حاجة كل سلف ودين هتتردلة هتتردلة
سلف هيرجعلة في بيتة وفي عرضة
كمان مفيش قوانين صارمة في حالاات التحرش
في مصر
عارفة هنا في فرنسا ممكن تحرش او اغتصاب
توصل لسجن مدي الحياة
وعلشان كدة قليل جدا حاجة زي دي
اما بالنسبة لمشياخنا ربنا يسامحهم
ويتوالنا برحمتة يارب
تحياتي واسف علي الاطالة
بس القي كل المسؤلية ان مفيش قوانين
صارمة لشباب بالاخلاق دي

مصطفى حسان يقول...

لمحت مدونتك بالصدفة ولقيت فيها مواضيع كويسه كتير ومنطقية في المناقشة وعرض الأفكار.
أما بالنسبة للموضوع ده فانتي عندك حق في حاجات وحاجات تانيه انا مختلف معاكي فيها
الموضوع بمنتهي البساطه يتلخص في شوية نقط
أولا ليس من العدل أن نلقي باللوم على المجني عليه ونترك الجاني فمن المنطقي جدا ان الشخص اللي بيقوم بالتحرش هو الجاني فطبيعي جدا انه يكون هو اساس الغلط مش حد تاني
ثانيا مش من العدل ان احنا نسيب العوامل المساعده للموضوع ده ويبقي كل تفكيرنا في الجاني .. هو صحيح جاني لكن لما نيجي نناقش المشكله اجتماعيا يبقي المفرض بعد ما عرفنا انه جاني خلاص نشوف بقي ايه اللي خلاه يعمل كده
والطبيعي انها تطلع عوامل كتيره جدا
ممكن تبقي العوامل الاجتماعية أو البيئة المحيطة
ممكن تبقي قلة الوعي
ممكن تبقي المغريات الكتير اللي موجوده في الحياه
ممكن تبقي حاجات تانيه كتير قوي
ممكن تبقي البنت نفسها وممكن ما تبقاش هي
المهم كل اللي عاوز اقوله ان الاهم من ان احنا ندور على مين اللي غلطان اننا نحل المشكله
لان الاساس هي الحرية لكن المقولة المشهورة جدا بتقول :
أنت حر ما لم تضر
فمش من المنطقي مثلا ان واحد يمشي في الشارع وماسك في ايده ازازة خمره وماشي بيتطوح وبيرخم على الناس ويقول دي حرية ... لان انت كده بتأزي الناس
ومش من المنطقي ان ولد يبقي ماشي في ميدان التحرير وهو لابس شورت مثلا ويقول دي حرية ... اكيد في حرية لكن هو كده بيأزي الناس بمنظره ده
وبرضه مش من الحرية ان البنت تمشي لابسه ميكرو أو ميني وتقول دي حرية لان برضه هي كده بتتعدى على حرية الناس التانية
انا عاوز اقول لك على حاجه تانيه
زمان لما كنا في اولى حقوق كانوا بيدرسوا لنا ماده عبيطه كده اسمها الاجرام والعقاب . او يعني كنا بنقول عليها عبيطه ... لانها ما كانتش بتتكلم في القانون خالص هي كانت بتناقش حاجات تانيه زي مثلا اسباب انتشار الجريمة وازاي نقللها .. هل بالعقاب ؟؟ أكيد لكن مش العقاب لوحده .. في حاجات تانيه كمان
يعني اي جاني في الدنيا ما بيرتكبش الجريمه كده وخلاص ...
عارفه وقت خلافة عمر بن الخطاب .. كانت الأمة الاسلامية مرت بأزمة من الأزمان وكان الناس كلها تقريبا مش لاقيين ياكلوا وكان لما ييجي حد لعمر بن الخطاب رضي الله عنه وهو سارق ماكانش بيطبق عليه الحد لانه كان شايف انه مش لاقي ياكل عشان كده سرق ومش ممكن اقطع ايده عشان سرق كوز درة ياكله .. لان قبل ما يكون هو غلطان أكيد في مشكلة أو أزمة ما حاصلة

انا مش عاوز اطول اكتر من كده

لكن في جمله مشهورة جدا انا بحبها قوي والجمله دي بتقول ..
أنا مع الجاني .. لان المجتمع بأكمله يكون ضده

متهيألي وجهة نظري كده وصلت

لازم نبص للقضية كلها مش لطرف واحد في القضية ..
اسف على الإطالة

Unknown يقول...

عندك حق
بس تقولوا ايه بقى
!!!!!!!!!!!!

nody يقول...

ياسر

فعلا احنا محتاجين قوانين صارمه
توقف كل مجرم عند حده
وتعرفه ان بنات الناس الى ماشين فى الشارع دول ليهم حقوق
مش مباحين لكل واحد سعران
نورتنى
وكل سنه وانت طيب

nody يقول...

darsh
اولا كل سنه وانت طيب
ثانين الماده العبيطه بتاعه الاجرام والعقاب لسه بيدرسوها لاولى حقوق
الى يومنا هذا
اما بالنسبه للجانى فاصدقنى يامتر
الكل بيقف معاه وبيشجعه على افعالاه
المظلوم بحق فى القضيه دى هى المجنى عليها

نورتنى

nody يقول...

انا انسان
بقول كل سنه وانت طيب

نورتنى

mregypt7 يقول...

كل سنه وانتى طيبه
وعيد سعيد
اعاده الله علينا وعليكم بكل خير يارب
تحياتى
بيبــــو

nody يقول...

وانت بالصحه والسلامه يا بيبو
سمعت انك ها تقضى الليله على مركب؟
ايه النظام؟

رئيس جمهوريه نفسى يقول...

كل سنة وانتى طيبة وعسى اللة ان يتقبل صيامكم وقيامكم وصالح اعمالك

صبرني يارب يقول...

متفقه معاكي فى كل كلمه قولتيها على فكره وصوتي راح من الكلام فى الموضوع ده
وغلبت اتناقش مع كل فريق شويه انهم يفهموا ا لبعده

انما لا الشباب غلبان وصعبان وتعبان وباقي الفئات تتحرق عادي

ما يعرفوش انها منظومه لازم كل واحد يعمل الى عليه قبل ما يطالب غيره بالى عليه

يعنى قبل ما تقول للبنت البسي كويس قول نفسك غض البصر

قوانين التعامل مع بعضنا كده نلبس شرعي ونغض البصر
على فكره احنا الاثنين

يعنى الرجاله والستات يلبسوا شرعي

اه ماهو المصيبه السوده ان الرجاله عفوا قصدي الى شبه الرجاله دلوقتي بقوا يلبسوا لبس مش شرعي
البنطلون ساقط والبوكسر زيه ساقط اللهي تسقط قلوبهم .

وبعدين على كده بقى ايه رايك لما تكوني على الشط وتشوفي حيطه كده خارج من البحر ولابس مايو مش شرعي تبقى تتحرشي به وتغتصبيه ويبقى ساعتها العيب عليه بقىىىىىىى

ماهو الاستهبال شغال فى المجتمع

يا بنتى وصل بنا حلقات النقاش مره انهم توصلوا بان الست هى سبب كل المصايب الى فى الدنيا وانهم لو اترزعوا فى بيوتهم هايبقوا هما ملايكه .
اسكتييييييييي ما تفكرنيش
اخر ما زهقت قلتلهم انا عندي حل احسن من كده بكتير
احنا نوأد البنات من تاني وتنتهي الخطيئه من الكون بقى
حاجه تقرف وعقول مريضه
ايه ده بس بقى احنا فى العيد طلعتيلى الشعره بتاعتي يا شيخه

اول مره اجي عندك لكن ان شاء الله مش اخر مره