الأحد، ١٣ أبريل ٢٠٠٨



لو سألتك انت مصرى


تقولى ايه




بالرغم من انى معروف للمقربين ليه ان دمى تقيل مع الناس فى الشارع والموصلات والاماكن العامه


الا انى حصل معيا موقفين غصب عنى اتكلمت فيهم مع الناس


الاول مع احدى صديقاتى وصديقتها فى الكليه والثانى مع احد سائقى التاكسى


واليكم الحوار الاول بين صديقتى الاولى وصديقتها الثانيه وهى متجوزه جديد




الاولى -ازيك عامله ايه؟


الثانيه-الحمد لله


الاولى -وايه اخبار الجواز معاكى؟


الثانيه-(وقد بان عليها علامات الاسى) كويس


الاولى-ايه يا بنتى مالك ؟


الثانيه - مافيش حاجه يالا الحمد لله


انا وقد احسست بشىء غريب فسألت صحبتى


هى مالها؟


كان ردها صادم لى


اصلها متجوزه نجار وبيعملها وحش


نجاااااااااااااااااار


ليه تتجوز نجار


ردت وقالت لى اصلها متجوزاه عند


انا -طب تشرب بقى




الثانى


انا وسواق التاكسىوكنت مروحه من الكليه




هو- هو حضرتك فى كليه اداب


انا- ايوه بس ليه؟


هو- اصلك موقفانى من ادامها فا بسأل يعنى


انا-اه


هو- حضرتك سنه كام؟


انا- الليسانس


هو - قسم ايه ؟


انا - لغه عربيه


هو- بس شكل حضرتك شكلك غير بنات اداب خالص


انا-ازاى يعنى؟


هو-اصل بنات اداب معروفين انهم مدلعين ويعنى روشين


انا- وبدأت اتنرفز


وانت تعرف منين ؟


هو- انا لما كنت فى الجامعه


انا - انت خريج جامعه؟


هو- طبعا كليه زراعه تقدير عام جيد جدا والاول على دفعتى كمان


انا-ازاى؟


هو- اصل كان معايا فى الدفعه ابن دكتور فى الكليه


انا - اه


هو-ودونى اشتغلت فى مصنع الزيوت والصابون وجالى اكتئاب وماكملتش الماجيستير


وسبت الوظيفه وزى ما انتى شايفه اهوه


انا-ااااااااااااااااااه


هو ايه ده؟


واحده طالبه والسنه دى ها تحصل على ليسانس تتجوز نجار حاصل على دبلوم صنايع؟


وواحد خريجكليه زراعه بتقدير عام جيد جدا يشتغل سواق تاكس؟


طول عمرى بسمع ان انقلاب الموازين فى المجتمع


لكن عمرى ما تخيلت انها توصل للدرجه دى


ان خريجه الادداب تتجوز نجار وخريجه الهندسه تتجوز سباك


وخريجه الصيدله تتجوز مبلط


؟ازاااااااااااى


وفين التوافق والتكافؤ


مره سمعتها من استاذ مساعد فى طب المنصوره


قالى يا نودى الحاجه والدتى كانت دايما تقولى يا ابنى لازم الست تبقى بايسه ايدها وش وضهر مع جوزاها فى كل حاجه


فين بقى ده مع النجار الى بيطلع عقد نقصه على مراته؟


وفين مع طالبه الماجيستير مع واحد مؤهل متوسط بس راح ايطاليا ولا فرنسا ولا حتى انجلترا


ممكن حد يقول مش شرط الشهاده المهم الاخلاق


بس مهم الراجل يكون زى الست ان ما كانش اعلى


ولما هى ثقافه المجتمع ان الراجل ما يعيبوش الا جيبه


بتعلموا بناتكم تعليم عالى ليه؟


ولا هو شرط العريس صاحب المؤهل المتوسط


ان العروسه تكون مؤهل عالى؟


ولما ابن الدكتور بس هو الى يبقى معيد ودكتور بعد كده


بتعلموا ولا العمال والفلاحين ليه ؟


ليه ما بتخلوش دخول الجامعه قاصر فقط على ولاد الدكاتره؟


هناك ١٦ تعليقًا:

Desert cat يقول...

احجز اول رد
اقرا وارجع لك

Desert cat يقول...

طبعا بعد التدهور الاقتصادى واندثار الطبقة الارستقراطية .. وبعد ما اصبحت الواسطة والمحسوبية وبعد ما الجنية غلب الكارنية اصبح الطريق مفتوح اللى معاه واللى معهوش ميلزموش
يبقى ايه المانع ان طالبة الاداب تتجوز نجار هو النجار مش معاه وكان مش معاه
يعنى عايزاه تقعد تستنى واحد دكتور مش لاقى ياكل
بطلوا عقد بقى لغة المال دلوقتى هو كل حاجه
وبنقول مصر بتتقدم بينا
سمعنى سلام حلوة يا بلدى
تحياتى ليكى يا جميل

mregypt7 يقول...

انا عايز اقولك كلمه احنا فى مصر بلد المتناقضات معلش يعنى مادام اللى متجوزه نجار ديه مش عاجبها العريس كانت بتتجوزه ليه ولا بابا غصب عليها ولازم تتجوزيه اصل هو اللى هايعيشك ويجيبلك اللى انتى عايزاه يا اخوانا حرام عليكم لازم تشوفوا مستقبل ولادكم هايكون افضل مع مين وديه حاصله على شهاده عاليه يبقى الرد انها تتجوز واحد ما بيعرفش يفك الخط مش هاقول غير حسبى الله ونعم الوكيل
وبالنسبه لسواق التاكسى
مش عاوزه يزعل ده حال بلدنا امال المحسوبيه هاتروح فين مادام لقيت معاك ابن دكتور فى نفس السنه ما تروحش الامتحان او بص انقل من الكليه خالص وعلى فكره كلمه ليك مش تقديرك اللى هايشغلك شوف نفسك انت تفرق ايه عن الاخرين امكانياتك الشخصيه ايه لان صاحب الشركه اللى انت بتشتغل فيها بيتعامل بالملايين فمش هايخسر فلوسه عشان واحد صاحبه ولا عشان اخوه وفى الكليه اه هاتتظلم بس فى الحياه العمليه كل واحد وحسب امكانياته
وعلى رايك لو سالتك انت مصرى تقوللى ايه !!!!!!!!!!!!!!!!!!!
مع خالص تحياتى
الباش مهندس احمد

Mafrousa يقول...

اصلا المتجوزه ديه ... صحبتك بتقول اتجوزت عند...عند فى مين فى نفسها .. و لا فى مين .. و اللى عندت معاه دلوقتى حينفعها... بصى ما حدش اجبرها .. فا ماتغلطش و تعلق غلطها على شماعة غيرها ...و بعدين مش شرط انه علشان جايب جيدجدا يكون يصلح ان يكون معيد.. او استاذ.. مش كل من جاب تقدير كبير.. يكون يصلح ان يكون فى منصب.. الشخصيه مهمه... ماتزعليش من كلامى .. بس انا كنت فى موقف كده و كان على ان اختار بين اتنين لتولى منصب.. و مش حقولك قد ايه الموضوع ده كان صعب...ومش حقولك نفسيتى تعبت قد ايه بعد ان الغالبيه معارضه اختيارى... و لكن الحمد لله الايام اثبتت انى انا كنت على صواب ..عمر ما كان المجموع الكبير .. مقياس .. انا و احده صحبتى قعدت تعيد ثناويه عامه مرتين علشان تجيب مجموع كلية الطب .. و بعد ما جبته .. و هيه فى اعدادى .. ماقدرتشى تكمل و حولت على كليه تانيه
انا اسفه طولت عليكى ..

nody يقول...

قطه الصحراء
فعلا الجنيه غلب الكارنيه
والكارنيه جاب جاز على الاخر
واديها ما سنتنش الدكتور الكحيان
وخدت الكسيب
نورت يا جميل

nody يقول...

mregypt
اولا هى واهلها واى حد يعمل كده يستاهل الى يجرى له
والبيه التانى اكيد هو الى غلطان
انا بارضه كان من راى بدام عرف الى فيها كان يسيب الكليه
وبلاها تعليم
نورت يا هندسه

nody يقول...

واحده مفروسه
هى اكيد عاندت فى نفسها
وطلع على جتتها بلى ازرق

اما بالنسبه للتانى انا متفقه معاكى انه الشخصيه ليها دور
فا انتى قولتيها بنفسك انك انتى الى اختارتى
مش لقيتى نفسك مجبره على كده
تفرق كتير
نورتينى

بنت مصريه يقول...

على فكره مش شرط الصنايعى ولا النجار ولا السواق يبقوا وحشين بالعكس
انا امى كانت بتقوللى قبل ما اتجوز انا عمرى ما هجوزك لا لمحامى ولا لضابط شرطه
ليه يا ماما تقوللى المحامى لولو كان بيخاف ربنا هيبقى شحات ولو كان غنى هيبقى نصاب ومرتشى
طيب وضابط الشرطه يا ماما هيبقى صايع وقليل الادب ولسانه مش نضيف

nody يقول...

بنت مصريه
موضوع الاخلاق ده موضوع مش شرط بقترن بمستوى التعليم
انا اقص التكافؤ
نورتينى

سفينة يقول...

بجد مش ممكن اسلوب عرضك للموضوع ده
اسلوب رائع...تحفه بجد
وعلي فكره انا مش هقول لك رايي الشخصي في الموضوع ده عشان انا موافقك علي كل كلمه كتبتيها
يعني كلامك صح الصح
دا زمن انقلبت فيه كل الموازين
بس السبب في ايه هو دا السؤال؟
بجد اختيارك للمواضيع رائع جدا جدا
ربنا يوفقك في دراستك وكل حياتك
سلااااااااااااام

nody يقول...

سفينه
ده زمن معاك كام ؟
للاسف
مرسيه على مرورك

ياسر يقول...

المشكلة الكبيرة
ان مثلاا واحدة تعليم عالي
تتجوز واحد حرفي او مش متعلم
هو لاا عيب ولاا حرام المشكلة في
الحوار بينهم والتفكير والمنطق هيكون
مختلف بينهم تماما حتي لو كان الراجل
دة ملياردير والست دي فقيرة وهيوفرلها
كل ماتتمني بس الفكر مش واحد
وشوفت فعلاا امثلةحية امامي في
المنصورة نفسها والغربية

nody يقول...

ياسر
والمشكله انه فى قراره نفسه بيكون مقتنع انه اشتراها
وبينتهز اى فرصه علشان يعرفها كده
طبعا لمدواه عقده النقص
دمت بخير

غير معرف يقول...

بسم الله
معلش يانودى انا اسف للتأخير عليكى فى التعليقاتوذلك لظروف شغلى
بالنسبه للموضوع ده انا ملاحظ انه انتشر اوى ومش كده وبس انما بقا ده طبيعى واهو من ضمن التدهور اللى موجود فى الشارع المصرى بس كان لى تعقيب على كلمة(( عند )) هى دلوقتى بقا كسبت ايه صحبتك لما عندت وعاندت مين وليه وكسبت ايه عموما انتى قلتيها تشرب بقا بس نصيحه لكل بنت لو فكرت انه عريس والسلام هى الخسرانه وبلاش تفكر مع اهلها ان الجنيه هو السابق للكارنيه
وربنا يسهل للسواق يقدر يشوف ((""واسطه"")) توظفه فى الجامعه مع ابن الدكتور
وعجبى

إبن مصر يقول...

بسم الله
معلش يانودى انا اسف للتأخير عليكى فى التعليقاتوده لظروف شغلى انما حان وقت ارد
بالنسبه للموضوع ده انا ملاحظ انه انتشر اوى ومش كده وبس انما بقا ده طبيعى واهو من ضمن التدهور اللى موجود فى الشارع المصرى بس كان لى تعقيب على كلمة(( عند )) هى دلوقتى بقا كسبت ايه صحبتك لما عندت وعاندت مين وليه وكسبت ايه عموما انتى قلتيها تشرب بقا
وربنا يسهل للسواق يقدر يشوف ((""واسطه"")) توظفه فى الجامعه مع ابن الدكتور
وعجبى

غير معرف يقول...

تبقى اكيد فى مصر
لما تسمعى بس بالموازين اللى اتقلبت مش لازم تشوفي بعينك تعرفى انك اكيد فى مصر .. لما خريجه طب تتجوز سباك ولما عسكرى ما اخدشى اعداديه يتجوز خريجه تربيه او اداب ولما واحد منجد وساقط ثانويه ازهريه يتجوز مدرسه ولما ولما مش هعدد المواهب ولما يبقى العيش بالبطاقه واحنا بلد النيل والزراعه ولما يبقى وزير العيش على ابو مصيلحى الناجح سلفا بالتزوير تبقى اكيد فى مصر ولما ياخدو الميه من فلاحين الدلتا يودوها الصحرا قال ايه عاوزينها تبقى خضرة او ام الخير تقووم تطلع بطيخ وكنتالوووب وطبعا القمح والارز يموتو مش مهم تبقى اكيد فى مصر تآمنى بالله قولى لا اله الا الله ماهو دى اللى باقيه على ماهى انا لو الاقى فرصه للغرق فى البحر زى اللى غرقه اروووح
وملعون ابوها بلد بيقولك كان حلوانى
مصر التى فى خاطرى دا كان كلالالالالالالالالام