هى دى ليلى 
صاحبه الصوره ما اسمهاش ليلى
دى ست البنات نهى رشدى
انا قلت ان هى دى ليلى الى احنا عاوزنها مش ليلى الى تتكسف وتخاف من الفضيحه
والى ما يعرفش حكايه نهى رشدى
دى اول بنت ترفع قضيه ضد خنزير
اتحرش بيها
والمحكمه نصفتها وحكمت عليه 3 سنين سجن
علشان يكون عبره لكل خنزير ماشى فى الشارع بنصه التحتانى وبس
بجد البنت دى ارجل من الف راجل
يسلم الى ربوها
ويسلموا المدرسين الى درسوا لها
ويسلم اى حد وقف جمبها وشجعها انها تاخد حقها من الخنزير ده
يارب تكون كل البنات بشجاعه نهى
وما نخافش وما نتكسفش ونوقف كل كلب عند حده
دى ان شاء الله البدايه
وان شاء الله يشرعوا قانون ينص على لفظ التحرش صريحا
وتكون عقوبته مشدده
علشان كل واحد يحط لسانه جوه بقه وما يقوليش اصلها مش محجبه يعنى
اقوله البنات الى اتقطعت الهدوم من عليهم فى جامعه الدول يوم العيد
كانوا بحجاب وخمار كمان
يعنى غباوه مش عاوزه
فاهمين
احنا بقى نمشى بمزاجنا
بحجاب عادى
بخمار عادى
من غير حجاب بارضه عادى
اى واحد بقى تفكيره ما بيخرجش غير من تحت الحزام
يقعد فى بيتهم
او يروح يعمل عمليه ويريح الناس من شره
اصله اكيد يعنى تلاقيه فى الغالب بيروح يقف قدام الصيدلى مدلدل ودانه ويوشوشه ويقوله مافيش مقويات
ههههههههههههه
فا بيطلع عقده على بنات الناس
هناك ١٣ تعليقًا:
سبحان الله فى نفس اليوم اللى كتبته فيه اخر بوست عندي عن انا مش ليلى يا عبدوو
لقيت الحكم ده وكان دليل قوي على وجهه نظري بجد سبحان الله
المشكلة ان العقوبة بالحبس لوحهدها مش حتحل المشكلة
لازم يبقى فى علاج نفسى واجتماعى فى الحبس
او اعادة تأهيل
بميت راجل والله
ربنا يعزها .. وتكون نموذج يحتذى به
وانا مع رأي mido
فعلا العقوبة مش حل نهائي .. لازم يكون فيه حل نفسي جذري للمشكلة دي
لأنه اما طلعت احكام مشددة في هذه النوعيات من القضايا وبتوصل لحد الاعدام ومفيش فايدة
ربنا يهدي النفوس
appy
ياابى انتى مبروكه
بعد كده تعملى مدونه مقام سيدى بلوج
ههههههههههههههههه
نورتينى
mido
اكيد لازم يكون فيه اعاده تاهيل نفسى واجتماعى فى السجن
لكن المشكله اننا فى مصر وده طبعا مستحيل
يمكن فى البلاد الى بيحترموا فيها ادميه الناس حتى فى السجون
بيعملوا لهم اعاده تاهيل
انما هنا ما اظنش
نورتنى
قلم رصاص
المشكله اننا ماعندناش فى القانون نص صريح لواقعه التحرش الجنسى
ياريت يعملوا قانون بصيغه التحرش
علشان ضعاف النفوس يخافوا ويخترموا نفسهم
تحياتى
السلام عليكم و رحمة الله و بركاته
ههههههههههههههههههههههههههه
و ربنا انتي عثل ومبسوطة ان منصراوية كاتبه كده وبأسلوبك ده رائع بجد وفخورة جدا بالبنت دي انها عملت كده بتثبت شجاعتها وجرأتها وموش خايفة غير من المولى عز وجل ماهو موش بياخد الروخ غير خالقها و المجتمع موش هينفعني لما اسكت واقول بلاش هتفضح لاء الساكت عن الحق شيطان اخرس وده موش اي حق ده حق المراه في الدنيا و المراة دي كيان ربنا كرمه وميزه عن الرجل في حاجات كتير وبقول للحيوانات اللي بيعملوا كده اتقوا الله عندكم ولايا وان شاء الله هتترد رغم اني موش اتمناها لكن كما تدين تدان موش هيتحبسوا و بس لكن هيتقضى عليهم في اقرب الناس ليهم
مبسوطة بجد بيكي ا قمر على طرقة تناولك الموضوع وجراتك في كلامك ربنا يبارك فيكي يا كميلة
في رعاية الله
mero_moory
وعليكم السلام ورحمه الله وبركاته
تصدقى بالله احنا مش بس ندعى على الى بيعمل كده فى بنات الناس
لا على الى كمان كل حاجه يلبسها للبن
اصلها لابسه اصلها عامله
والكلام الفارغ ده
لما تبقى بنته المحجبه ولا اخته ترجع له متقطع هدومها ومتحرش بيها ساعتها ها يعرف ان الله حق
اجلتم تواضعنا ونورتينا يا قمرايه
بصرف النظر عن عنوان البوست المستفز جدا
طبعا انا عايز اقول اني ضد موضوع التحرش دة
لكن كمان بقول ان البنات المفروض تخرج وهي لابسة هدوم محترمة وخصوصا المحجبات اللي بيسيئو للحجاب لما تلاقي واحدة لابسة جينز ضيق جدا وبدي ستومك فوقيه
- كمان بخصوص اخر سطر مش عيب ابدا ان الراجل ياخد مقويات جنسية ولاعيب كمان انه يتعالج من ضعف جنسي عنده لأن العلاج دة شيئ الدين حث عليه في الحديث ( ماخلق الله داء إلا خلق له دواء فتداوا يا عباد الله )
وبعدين هو بياخد منشطات او بيعالج روحه لوكان ضعيف ليه ؟ طبعا علشان استمتاعه هو ولكن كمان علشان يمتع اللي معاه ومتكشرش في وش اهله تكشيرة تجيب الفقر وترفع الضغط وتجيب كل امراض الدنيا
على فكرة انا مش متجوز ولسة عندي 27 سنة الحمد لله صحتي كويسة ومش محتاج لا اروح لصيدلية ولا دكتور لكن بقولك على شعور راجل ممكن يقرأ البوست دة ويحس بأهانة لرجولته خصوصا في اخر سطر
عيب قوي لما تقولي مدلدل ودانه وبيوشوش لأن لا المقويات عيب ولا العلاج عيب ولا حتى لو كانت اللي واقفة دكتورة وهوطلب منها عيب خصوصا ان الحاجات دي بيتعمل عنها اعلانات في التلفزيون والصحافة وملصقات في الصيدليات وبعض الستات كمان بتستخدمها
وممكن كمان لا مؤاخذة تكون الست عندها برود ومحتاجة تمهيد طويل جدا
وصدقيني لما النور بيطفي كل بنات حوا بتتساوي
ارجو تقبل رأيي
وسلام
mostafa rayan
ولما بيبقى الواحد منكم شغال فى قريه سياحيه
والستات الاجانب بيبقوا ساعات من غير هدوم
ما بيتحرشوش بيهم ليه؟
انت ولا غيرك ربنا علشان تحساب الى لابسه ضيق
وياريت بيكون حساب محترم
الا نهش فى عرضها
انا زهقت من انى اقول ان فيه بنات بيكونوا لابسين خمار او حتى اسدال وبيتحرش بيهم
بجد زهقت
اما بقى بخصوص المقويات فا انا اقصد بكلامى الاخوه المتحرشين
لان مخ حضراتهم متركب على ان الراجدل كده وبس
فا لما يبقى الموضوع ده فى ضعف
لازم يكون مدلدل ودانه لانه من غير كده ما يسواش
نورت
انا مستغرب من البنات ليه ما بستعملو رشاش الفلفل الحار؟
انا مستغرب من البنات ليه ما بستعملو رشاش الفلفل الحار؟ ولما بيبقى الواحد منكم شغال فى قريه سياحيه
والستات الاجانب بيبقوا ساعات من غير هدوم
ما بيتحرشوش بيهم ليه؟
عقده الدونيه
مش عارف ايه اللى بيحصل فى بلدنا
إرسال تعليق