الأربعاء، ٨ يوليو ٢٠٠٩

مجرد سؤال

مش هانخلص بقى ؟1



سمعتوا اخر الأخبار

خير اللهم اجعله اكمالا لدور المغص والاسهال الى عملوه لينا من كام سنه بمسلسل العندليب

وبعديه ناصر رضى الله عنه

ها يكملوها السنه دى بالمشير عبد الحكيم عامر

يعنى الواحد يلطم ولا يصوت ولا ينكش شعره ويجرى ورا عربيه الرش ؟؟؟


مع كامل احترامى لكل من ساهم ولو بشكل غير مباشر فى وكسه يونيو

بس ليه يقرفونا ويزهقونا بمسلسلات عن حياتهم يعنى؟

قدوه؟

هانتعلم منهم ايه يعنى؟


كلنا طبعابنشوف المسلسلات الى من النوع ده
لما بتتعمل
بيطلع الشخصيه ملاك نبى من الأنبياء وكل الناس التانيه هما الى شياطين
مافيش ولا غلطه ولا حتى سؤ تصرف ولاحتى ذنب واحد الشخصيه بتعمله
وطبعا ده منطقيا اسمه فشر
ومن النوع التقيل كمان
يعنى الواحد يجهز نفسه مسبقا انه ها يشوف قصيده مدح مطوله لمده 30 يوم ن غير اى فايده
لان من الناحيه التاريخيه ها يكون فيه كالعاده مجامله واستعباط على اساس اننا اغبيه وما بنفهمش
وزى ماطلعوا ناصر نبى على حساب الى حوليه
ها يطلعوا حكيم هو كمان نبى
ومش هانبقى عارفين فين الحقيقه

هناك ٢٤ تعليقًا:

MaNoO يقول...

بس عارفة المرة دى هيتفضحوا اوى اصل عبد الحكيم بلاويه كتير اكتر من اى حاجة حلوة ممكن يقولوها يبقى نتوقع اننا هنتفرج على مسلسل كوميدى خايف يقول الحقيقة وبيدعى حقائق خيالية واحنا ملعينا الا الضحك انا مش عارف مايوفروا كل دا ويعملوا مسلسل لقصة حياتى حتى الجيل الجديد يستفيد من خبراتنا فى الحياة هيلاقوا الاعلانات بتجرى عليم

Unknown يقول...

والله عندك حق الواحد بيتخنق بطريقة فظيعة
مش عارف يعني أومال باه لو كانوا عملوا حاجة بجد ولهم أمجاد فعلية كانوا عملوا فينا ايه مش بعيد كانوا حنطوهم وخلونا نزورهم بالعافية
القضية انه على قولتك بيطلع ملاك ومفيش منه اتنين طيب ان كان ملاك الدنيا اتهببت على ايده ليه
حسبنا الله ونعم الوكيل
ربنا يبارك فيكي يا بنت عشق قلبي المنصورة
تحياتي

simply me يقول...

احسن حاجه انى مش بتفرج على التلفزيون فى رمضان
ارحم من الزهق ده

thunder يقول...

مممممممممممممممممممممممممم
يعنى مختفيه وكل دا الاقى بوست ندااااااااااااااااله عااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا
لما اشفوك وبطلى لعب فى عداد عمرك انتى لسه خارجة من سجن القناطر مبقالكيش ويمين يابنتى ناوى ترجعى تانى ولا اية
ههههههههههههههههه
نعاكى حق اولا معظم العروض المسرحية التاريخية دى وانا قاصد اسميها عرض مسرحى لانه فيها استخفاف وفعلا هيطلعوهم ملائكة تمشى على الارض واللى يغيظك بقى بجد لما كل دول ملايكة امال كان من الشيطين ومين السبب اصلا فى الهزيمة
او فى اى حدث تاريخى
يعنى عندك قصة الملاك فاروق مثالا وغيره وغيرة محدش عارف مين اللى مظلوم ومين الظالم ماعلينا
ليكى حساب معايا لما اشوفك وبوست زى كل مرة يع يع حلووووو كدا
اختى العزيزة دمتِ يارب بكل حب و ود وفى رعاية الله وحفظه دائما ياااااااااااااااااااااااااااااارب

Ahmed يقول...

وهتطلعي انتي في الآخر سبب نكسة 67 والعدوان الثلاثي والتغره في 73 وفشل ثورة 1919

الكل انبياء وانتي المذنبه ويمكن يكون ليكي ايد في خروج السعوديه من كأس العالم

انا من مكاني هنا بطالب بالمحاكمه العادله وطبعا انتي عارفه "عادله" مبترحمش

Unknown يقول...

ههههههههههههههههه
و انتي بتتفرجي ليه !
انا عن نفسي مبتفرجش علي اي حاجة الا لو صدفة ! و بكره المسلسلات !!

قضيها سيت كوم و كفاية !

حاسوباتيه يقول...

عندك حق والله انا ماشفتش اي حاجه منهم صح غير بس الملك فاروق ده المسلسل الوحيد الي فعلا كان صح

م/أحمد ربيع يقول...

انا هرد على الموضوع ده بس وكان نفسى ارد على كل موضوعاتك بس حقيقى انا عاوز انام راجع من الشغل الساعه 9 صباحا بس حقيقى البلوج بتاعك كله ملهوش حل ومقدرتش اقوم انام الا اما قريت معظمه تقريبا مع العلم انى مش محب اوى للقراءه ومستنى منك الجديد عشان اقراه وخدى بالك من اخوكى الصغير السنه الجايه انشالله وعرفيه ان اللى ف الكتب مش موجود بره الكتب مجرد وسيله للوصول لهدف . معلش انا عارف انى طولت بس كان لازم تاخدى حقك مقابل تعبك ده ولوانى دا اقل حاجه ممكن تتقال لموضوعاتك الاكثر من رائعه ولطريقه سردك لها يلا تصبحوا على خيييييييييييير

اه على فكره انا سجلت مخصوص عشان اعرف ارد على موضوعك

eng_rabi3

nody يقول...

MANoO

تصدق هما فعلا لو عملوا مسلسل لقصه حياتك يبقى احسن
على الاقل الاجيال ها تتعلم يعنى ايه كلمه صبر وهما شايفينك واقف تستنى تاكسى من قدام بوابه البارون وانت مروح بعد المحاضرات

دا غير ان كفاحك واستحمالك لرزاله الدكاتره علشان توصل تالته
افيد كتير من كفاح عامر واتباعه

نورتنى

nody يقول...

كاتب مصرى

هما لو كان ليهم امجاد حقيقيه
كانوا بنوا لهم ضريح فى الحسين
وخلوا الحج هناك اجبارى

شرفتنى يا ابن بلدى

nody يقول...

بندقه


ولا انا والله بتفرج
بس بعد رمضان بيقرفونا بالقرف ده
لما الواحد بيخاف يفتح الحنفيه لا يلاقيهم نازلين منها


تحياتى ياقمر

nody يقول...

thunder

لا يابن بلدى اختلف معاك
مسلسل الملك فاروق كان عادل جدا
على الاقل جاب الشخصيه بعيوبها ومميزتها

مش العك الى عملوه فى ناصر
كانوا ناقص يركبوا له جناحين

وبعدين مسلسل فاروق كان انصاف لراجل الكل اتجنى على سمعته وشرفه


تحياتى وحسابنا على التصيح ده بعدين

nody يقول...

أحمد ابو العلا

ههههههههههههه
دا حتى انا سبب زلزال 1992


بس ابقى افتكرنى بعيش وحلاوه
بس تكون بالفستق والنبى


نورتنى

nody يقول...

المعلم محمد صاحب المطعم-طعميه سخنه


والله انا ما بتفرج فى رمضان على حاجه

وبعد رمضان بيبدا الملل من العك بتاعهم
علشان كده قلبت على الكورى وحاليا التركى
على الاقل ارحم منهم


تحياتى

nody يقول...

حاسوبتيه


فعلا المسلسل ده يعتبر اكثرهم واقعيه
لانه جاب عيوب ومميزات
مش بيعرض صوره نبى معصوم من الخطأ
والناس تصدق


محبتى

nody يقول...

م /احمد ربيع


ربنا يخليك بجد
اشكرك على كلامك الرقيق ده
وانا شرفنى انك زرتنى وعبقت عندى
ويارب الزياره تتكرر


نورتنى

ابو على يقول...

وقريب ان شاء الله هايعرضو فيلم لحياه رئيسنا المفدى حسنى مبارك انتظريه على قناه الحقيقه

nody يقول...

ابو على

انت بتقول فيها
مش احمد زكى كان ناوى يعمله بس الموت سبقه

ربنا يرحمنا بقى

*البت المشمشية *حلوة بس شقية * يقول...

انتى سبب كوارث مصر كلها
بس على فكرة الاستايل الجديد بتاع المدونة جميل مبرروك

nody يقول...

البت المشمشيه حلوه بس شقيه


يعنى تغيبى تغيبى وترجعى تقولى انى سبب الكوارث
ههههههههه
ماشى ياستى الله يبارك فيكى

Unknown يقول...

لأ الحاجت التركي دي مبتفرجش علي اي حاجة مدبلجة

حلم بيعافر يقول...

اريتها تيجى على المسلسلات وقصايد المدح وبس
احنا عندنا عيب مش عند حد غيرنا
فيه شخصيات المصريين جعلوا منها الهة وقديسين لمجرد انهم حبوهم ودخلوا قلوبهم
طبعا انا مصرى وعديت بفترة اقدر اقول انى كنت مغفل فيها ومارست نفس التصرف الغلط وكانت فيه عندى شخصيات لا اقبل ان حد يمسها ولو بكلمة وكنت بشوف فيهم الحلو بس وافضل امدح واكبر طول مانا ماشى
شوفتى بقى؟
اهو طلعت امر من المسلسلات اللى بتضايقك وبتخليكى تجرى ورا عربية الرش
هههههههههههههههه
بس الحمدلله انا دللوقتى عقلت وكبرت شوية
تقبلى مرورى

nody يقول...

المعلم محمد صاحب المطعم-طعميه سخنه

ماهو الواحد بيزهق من الترجمه
هايقرا ولا يتفرج؟

nody يقول...

حلم بيعافر

كلنا بنمر بالمرحله دى
وخصوصا فى مرحله المراهقه لما بتكون العاطفه مسيطره علينا اكتر
بس شويه شويه الموضوع بياخد شكل عقلانى اكتر

الدور والباقى على الناس الى كبروا وشعرهم ابيض ولسه كده وكمان بيكدبوا علشان يثبتوا وجههه نظرهم

اسعدنى مرورك