الاثنين، ٥ نوفمبر ٢٠٠٧

مصر بتتقدم بينا
هو ده شعار المؤتمر السنوى للحزب الوطنى المنعقد حاليا
بس انا نفسى حد يطلع من البهوات المتلمعين ويقول لنا فين النقدم ده
يمكن احنا ما بنشوفش وما بنحسش
وطبعا الوزره الحريفه بتوعنا ها يطلعوا ويفضلوا يعدوا فى الانجازات الى حصلت ويقولا حاجات وارقام تحس بيها انهم بيكلموا عن بلد تانيه ياما احنا ظلم وبنفترى عليهم بس الحكايه لا كده ولا كده
الحكايه ان الوزره دول تمت اختيارهم بعنايه فائقه بحيث يعرفوا يسكتوا الناس
امال ايه اصل المصرين معروفين بطيبتهم
انا مش بقول الكلام ده من باب رغى الحريم بس اصل المؤتمر هدفه مناقشه ماتم انجازه خلال عام مضى ومناقشه ماتم انجازه من برنامج الريس الانتخابى اطال لنا الله فى عمره
انا عصرت على نفسى كيلو ليمون وسمعت
اهم واول حاجه اتكلموا عن انجازها هى المواطنه
وكان الانجاز انهم عينوا العديد من الاقباط فى مراكز قياديه فى الحزب وخارجه كذلك وصلت نسبه التمسيل النسائى فى الحزب 15 فى الميه
هو ده يا اناس الى حصل بالنسبه للمواطنه
تعالوا كده بقى نعرف المواطنه
هو ان يتساوى جميع المواطنين من حيت الحقوق والواجبات بغض النظر عن دجين او جنس
جميل طب ليه ما تعينش واحد مسيحى وزير داخليه او خارجيه او دفاع وكذلك الستات
ليه مازادش عدد الطلاب المسيحين فى الكليات العسكريه
وفين بقيه تعريف المواطنه؟
هو ان يشعر الفرد فى جميع نواحى الوطن بان جميل الموظفين فى الدوله فى خدمته
يعنى من اول الريس ابو طلعه جويه لغايه المخبر الى فى قسم الشرطه
يعنى الواحد يروح قسم شرطه يتعامل كويس من اول العسكرى لغايه مامور القسم
سوافق التاكسى لو ماشى بالتاكسى بتاعه وخبططته عربيه تاينه بتاعه ابن مستشار
سواق التاكس ياخد حقه من ابن المستشار بالقانون بعيد عن الكوسه والقرع
ولما يكون لسواق الميكروباص نفس الحقوق الى بياخدها الحج ابو جمال
هى دى بقى بقيه تعريف المواطنه
فين ؟
لا يوجد
ده على المستوى الحقوقى نيجى بقى للمستوى السياسى
يقولوا ايه التعديلات الدستوريه
وهى اصلا اسمها الاجهاضات الدستوريسه
خلت البلد بقت عامله زى العزبه تبع الحج وابنه
خد عندك تسهيل اعتقالات وحبسش وتعذيب وكله
لاى حد يقول لا
والى مش مصدق يسال ابراهيم عيسى او ياخد الفتوى من شيخ الازهر
ونيجى بقى لانجازات حكومه الريس
افشل وزراء فى العالم
نبدا با ايه؟
بوزاره الثقافه وزاره الفنان الوزير فاروق باشا حسنى
مصر خرجت السنه دى من استفتاء عجائب الدنيا السبع
اثار مصر مترميه فى متاحف العالم ومش عارفين حتى نجبها ولو على سبيل الاعاره
القوى العامله
برئاسه عائشه عبد الهادى
الحمد لله مصر الدوله الوحيده الى سواقين التاكسى بمؤهلات عليا
خد عندك بكالريوسات وليسانسات
من كل نوع
هندسه وتجاره وزراعه
واداب وحقوق ما سبوش
طبعا من البطاله
صفقات الخادمات المصريات فى السعوديه كانت لسه قريب
مالهمش حتى حقوق الفلبنيات دا غير كمان ان هناك الخدامه المصريه هناك عامله زى سينما مترو الى يدفع يخش
وكل يوم اخبار عن غرق مهاجرين مصرين غير شرعين على سواحل ايطاليا واليونانهربانين من نار الفقر والجوع لجحيم الموت
لسه النهارده الصوره نازله فى جريده الاخبار لشاب مصرى مرمى ميت على سواحل ايطاليا والجندى الايطالى بيبص له با احتقار
منظر والله يقيل وزاره
بس احنا عندنا مافيش الكلام الفارغ ده
ايه يعنى لسه من يومين 33 واحد غارقنين وهما مهاجرين غير شرعى لايطاليا مش مهم خالى الزحمه تخف
الداخليه
برئاسه العادلى جيت
حدث ولا حرج
ادخل ياريس اى قسم واتفرج على شباب ورجاله المخروسه
وهما متعلقين ومضروبين ومجلودين ومغتصابين بواسطه رجاله العادلى
روح المعتقالات واتفرج على الناس الى بقالها عشرين سنه
وكانهم اصحاب الكهف
كل ذنبهم انهم بيقولوا رايهم وبيقولوا لا
وزاره النقل
محمد لطفى منصور
نبدا بايه العباره ولا القطر ولا الاتوبيسات
مش عارفه بس ممكن استعين بممدوح اسماعيل هو ادرى
وبالمره نقى نساله هايقف فى اللكونه امتى اصله فى لندن
اصل عاوزه ابعت السلام لاشرف مروان
الاعلام
انس الفقى
بعد ماكنا رواد الاعلام بقينا اقل العرب فى كل حاجه
البرامج
والنشرات الاخباريه
حتى المسلسلات
شوفواالفرق بين مسلسل الظاهر بيبرس المصرى ونظيره السورى وانتم تعرفوا الفرق
وكمان البيه الوزير بيمنع المحجبات من الظهور على شاشات التلفزيون المصرى ولو واحده اتحجبت وهى مقدمه بتتنقل عمل ايدارى اصله تلفزيون الفاتيكان
تلفزيون lbcبيجيب مذيعات محجبات
انما بلد الازهر لا
السياحه
محمد جرانه
مصر فيها اكتر من تلت اثار العالم ومع ذلك دخل اسبا نيا الى ما فيهاش نص اثارنا
دخلها من السياحه يفوق دخلنا بملاين
مع اننا ماشاء الله كل اعلانتنا عن السياحه مابنجبش غير راقصات المجتمع
هاله سرحان ودينا وغيرهم
وكان بنقولهم مصر فاتحه لكم رجليها
قصد ايديها
ومع ذلك مافيش فايده
وزاره التربيه والتعليم
مصر وبعون الله فى ديل قائمه الدول من حيث جوده التعليم
ودروس خصوصيه
وعندنا اوائل الثاويه العامه المفروض يكونوا عشره عندنا بيكونوا خمسين
وده مش عبقريه
دى قدره حفظ خارقه
العيال بيوصلوا للاعدادى وما بيعرفوش يقرؤ
التعليم العالى
هانى هلال
الى جاب السنه دى 83 فى الميه فى الثانويه العامه ادبى يادوب دخل حقوق انتظام
والى جاب 95 علمى ماجابش غير علوم
ليه ؟
علشان الجامعات الخاصه تتملى منين طلبه
مش مهم الى معندهمش فلوس ما يتعلموش
الموت للى زيهم احسن
المصاريف الجامعيه بتزيد سنه عن سنه
الكتب كمان بتزيد
وطبعا مافيش تعليم
الاتصالات
طارق بدوى بتاع نبض الشارع
حجم الانتر نت
اه هما شعب جهله يعملوا ايه بالنت
اخرهم يلعبوا جيمز
التليفونات حيرانين يسرقوا من الفاتوره ازاى
شويه الفاتوره كل ست شهور وشويه كل تلاته
عادى يعنى
فلوس المصرين للمصرين
واخيرا الصحه
حاتم الجبلى
خد عندك
اكياس دم ملوثه
فلاتر غسيل كلها غير صالحه للاستخدام الادمى
اول دوله على مستوى العالم اصابه بسرطان الاطفال
تامين صحى حدث ولا حرج كله دواء بديل حتى الطبيب بيكون طبيب بديل
وماليش نفس اتكلم عن وزاره البيئه علشان السحابه السوده خانقانى وعماله اكح نسيب البيئه والرياضه بعد ماتش الاهلى
ونورت مصر
ومصر بتتاخر بيهم

هناك ٤ تعليقات:

القلم السكندري يقول...

ازيك يا ايتها الهاربة

ولا سؤال ولا أثر كدة خالص؟

وايه النشاط ده كله ما شاء الله

يارب بس الرد يتكتب المرة دي عشان كل مرة بيحصل فيا مقلب ومش بيتعرض


دمت بكل خير

تحياتير

nody يقول...

الحمد لله وصل

وانا الحمد لله كويسه

وشكرا على زوقك

بنت المنصوره

غير معرف يقول...

بسم الله
والله انا مش هقول غير انك خلصتى كل الكلام وعلى رأى الكابتن اللى اكيد بتحبيه
الله عليكى يا حبيبة والديكى

خلصتى انتى كل الكلام مش لاقى اى تعبير اقول غير انى هستعمل الشعار اياه بس بصوره توجيهيه اخرى وهى ((((مصر بتتقدم بإللى زيك )))) ربنا يحميكى انتى وكل اللى زيك مع تحفظى على اخر جمله بالنسبه للرياضه ومنه لله العرجون
وشكرا

غير معرف يقول...

ميرسيه يا تريكه يا ابو يا ابو تريكه مش كده؟
ومنه لله الخواجه المغرور ومنه لله خط الهجوم الى خط موبنيل السحرى احسن منه